Oreo Cupcakes

12 Dásamlegar Oreo cupcakes

125 gr. Smjör

2 dl. Sykur

2 Egg

1 dl. Mjólk

3 dl. Hveiti

1,5 tsk. Lyftiduft

1 tsk. Vanillusykur (Eða vanilla extract)

50 gr. Oreo kexkökur, mulið í grófa bita. 

1. Hrærið saman í hrærivél smjöri og sykri, blandið síðan einu og einu eggi út í. 

3. Bætum einu og einu eggi saman við, gott að hræra fyrsta eggið saman við í tvær mínútur og bæta síðan hinu við. 

4. Blandið þurrefnum saman í aðra skál þ.e. hveiti, vanillusykur og lyftiduft. Sigtið þrisvar til fimm sinnum í gegnum sigti. 

5. Síðan er hveitiblöndunni og mjólkinni blandað saman við smjörblönduna, smátt og smátt. 

Eftir nokkrar mínútur verður áferðin silkimjúk og þá er tími til að blanda oreo kökunum saman við í hér um bil eina mínútu eða svo. 

Dásamlegt deig!

Þá er að setja deigið í bollakökuform og inn í ofn við 200°C í 20 mínútur. 

Tilbúnar og fallegar. Kælið kökurnar vel áður en þið setjið krem ofan á.
Þessi grænu form eru keypt í Hagkaup og eru ótrúlega góð. Stór og góð. En ég ákvað að skipta um form að loknum bakstrinum vegna þess að mér fannst hvít form koma betur út, þ.e.a.s. fallegra myndefni. En það skiptir náttúrlega engu máli hvaða form þið notið, kökurnar smakkast alltaf jafn vel. 

Ég notaði mjög einfalt krem sem kom nokkuð vel út. 

2 dl. Rjómi 

2 1/2 msk. Flórsykur

1/2 tsk. Vanilla extract

6 Oreo kexkökur

Byrjum á því að þeyta rjómann, bætum vanillu extract og flórsykrinum saman við í pörtum. 

Ég sigtaði mulið oreo út í kremið sem fór á nokkrar kökur. Þið sjáið á myndunum að þær eru dekkri. 

Ég sigtaði mulið Oreo yfir allar kökurnar og braut nokkrar kökur og notaði sem skraut. 

Reglulega góðar og einfaldar kökur. Að mínu mati getur ekkert klikkað sem inniheldur Oreo. 

Beauties

Njótið vel. 

xxx

Eva Laufey Kjaran

Taco-og fajita.

Í vikunni þá var taco-og fajita í matinn. Mikil ósköp sem mér finnst það gott. Einfalt, fljótlegt og bragðmikið. Mér finnst agalega gott að nota hakk, kjúkling eða fisk þegar að ég er með þetta í matinn. 

Upplagt  að hefja góða helgi með góðum mat.

Góða helgi og njótið ykkar um helgina. 

Ég minni svo á gjafaleikinn í færslunni fyrir neðan.  

xxx

Eva Laufey Kjaran

SushiSamba og gjafaleikur.

 SushiSamba 

Ég og Agla vinkona mín fórum út að borða á SushiSamba eitt kvöldið.

Staðurinn sérhæfir sig í matargerð frá Japan og Suður-Ameríku.

Þegar að við komum inn á staðinn þá vorum við komnar til útlanda í huganum. 
Andrúmsloftið á staðnum  er þannig og það kunnum við vel að meta.

Við byrjuðum á því að fá dásamlega drykki, chili Mojito og ástaraldins Mojito.

Við fengum óvissuferð úr Samba eldhúsi og Sushi eldhúsi.

 Gómsætir réttir byrjuðu að streyma á borðið okkar, hver öðrum betri. Mjög ólíkir réttir en allir áttu þeir það sameiginlegt að vera framandi, bragðmiklir og ferskir.

Framsetningin var mjög skemmtileg og það kunni ég vel að meta, maður gat ekki annað en hlakkað til að smakka réttina.

Ég er nokkuð viss um að ég hafi ekki smakkað betra sushi, Sake rúllan er með því betra sem ég hef smakkað. Lax, aspas, gúrka, sellerý og wasabi-jalepeno-guacamole saman í eina rúllu. Þetta hljómar vel en smakkast enn betur. Ég og Agla sammældumst um að þetta væri líklega eitt  besta sushi sem við höfum smakkað.

Eftirrétturinn setti punktinn yfir i-ið. Í þá mund sem við héldum að við gætum ómögulega borðað meira af þessum kræsingum þá kom eftirrétturinn, himneski eftirrétturinn og áður en við vissum af vorum við búnar með hann.

Algjör nauðsyn að fá sér Nutellu súkkulaðikökuna með salt-karamelluís og heslihnetupraline.

Þetta var dásamleg kvöldstund. Frábær matur, góð þjónusta og heillandi staður.

Ég er mjög ánægð að geta farið þangað með kærastanum mínum. Hann borðar t.d. ekki sushi og þá hefur mér fundist erfitt að finna staði sem bjóða upp á bæði sushi og kjöt en nú er staðurinn fundinn! Ég get fengið mér dásamlegt sushi og hann gómsætt kjöt.

Ég mæli svo sannarlega með því að þið prófið SushiSamba.

Mig langar til þess að gefa heppnum lesanda gjafabréf fyrir tvo í fimm rétta óvissuferð úr sushi-og sambaeldhúsi

Það sem þú kæri lesandi þarft að gera til þess að eiga möguleika á því að næla þér í gjafabréfið er að skrifa nafn og netfang fyrir neðan færsluna í athugasemdakerfið og gefa blogginu like á Facebook.

Ef þú hefur nú þegar gefið blogginu like á facebook þá er nóg að setja nafn og netfang í athugasemdakerfið. 
 Ég dreg út heppin vinningshafa þann 19.apríl svo þið hafið viku til þess að taka þátt.


Njótið vel. 

Fallega Aglan mín 

Himneskur eftirréttur.

xxx

Eva Laufey Kjaran