Vikuseðill

Mánudagsfiskurinn: Æðisleg bleikja í teriyaki sósu með fetaosti. Þessi réttur er afskaplega einfaldur og fljótlegur sem er alltaf mikill plús á þreyttum mánudegi. 

Þriðjudagur: Æðisleg rif með asískum blæ. Þetta er rétturinn sem setningin "eitt sinni smakkað, þú getur ekki hætt" á vel við. 

Miðvikudagur: Mexíkóskt kjúklingasalat með mexíkó-ostasósu og Doritos.

Fimmtudagur: Á uppstigningardaginn ætla ég að elda fyllt cannelloni með spínati og nóg af osti... algjört sælgæti. 

Föstudagur: Á mínu heimili er hefð fyrir pizzaáti á föstudögum og ætla ég að gera þessa ómótstæðilegu bbq pönnupizzu sem er borin fram með klettasalati, tómötum og nýrifnum parmsesan. 

Helgarmaturinn: Um helgina ætla ég að elda uppáhalds súpuna mína en það er humarsúpan hennar mömmu sem ég elska og elda við sérstök tilefni. 

Helgarbaksturinn

Hér koma tvær hugmyndir að helgarbakstrinum annars vegar ljúffeng marensterta með karamellukremi og hins vegar dúnmjúkar morgunverðarbollur sem allir ættu að prófa.

Marensterta með kókosbollurjóma og karamellukremi.

Kotasælubollur og bráðhollt túnfiskssalat.

Ég vona að þið eigið góða viku framundan.

xxx

Eva Laufey Kjaran Hermannsdóttir

Öll hráefnin í þessar uppskriftir fást í verslunum Hagkaupsþ

Kjúklingasalat

Sumir dagar eru ansi þéttir og mikið sem þarf að gera, en það þýðir þó ekki að sleppa við að hafa eitthvað gott í kvöldmatinn. Það er alltaf hægt að finna smá tíma fyrir matargerð. Að búa til einfalt og matarmikið salat tekur ekki lengri tíma en  20 mínútur.  Þetta salat geri ansi oft, geri það nú sjaldan eins en mér finnst þessi útgáfa eiginlega sú besta. 

 Kjúklingasalat

Fyrir u.þ.b. 3 - 4 manns

2  kjúklingabringur

1 poki af blönduðu salati, pokinn var 200 g 

100 g Tagliatelle

1/2 agúrka 

1 græn paprika

1 rauð paprika

1/2 rauðlaukur 

10 kirsuberjatómatar

1/2 krukka fetaostur, gott að setja smá af olíuna líka

rifinn parmesan ostur, magn eftir smekk

1 askja jarðaber

mulið nachos með saltbragði, magn eftir smekk

1 1/2 msk balsamikedik

2 msk sweet chili sósa

sesam fræ, magn eftir smekk 

salt og pipar

1. Sjóðið pasta samkvæmt leiðbeiningum á pakkanum. (Ég læt alltaf salt og smá ólífuolíu í pottinn) Þegar að það er tilbúið, losið þá allt vatn frá og setjið pastað inn í ísskáp í örfáar mínútur. 

2. Skerið kjúklingabringuna í litla bita, hitið olíu á pönnu og steikið hana við vægan hita. Kryddið til með smá salt og pipar. Þegar að bringan er að verða tilbúin bætið þá sweet chili sósunni og sesamfræjum saman við, hrærið vel í. Ég bætti 1 msk af vatni saman við líka og leyfði þessu að malla við mjög lágan hita í 1 - 2 mínútur. 

3. Skerið grænmetið smátt niður, ég reif gúrkuna niður með rifjárni. Skolið allt saman vel og blandið þessu saman í skál. 

4. Bætið kjúklingabringunni, balsamik edikinu, fetaostinum og jarðaberjum saman við. Blandið vel saman og kryddið með smá salti og pipar.

 5. Stráið salatinu á fat, myljið nachos yfir og rífið duglega af ferskum parmesan ost og stráið yfir.

 Litríkt og fallegt salat. 

  Berið salatið gjarnan með fram með brauði, pestó og ef til vill salat dressingu. Að vísu reyni ég að sleppa því að nota dressingu því þær eiga það til að vera svo sterkar og stela því bragðinu af yndislega grænmetinu. Kjúklingurinn á líka að vera ansi vel kryddaður, sweet chili sósan er ansi sterk og fín. 

 Fljótlegt og ljúffengt salat á þessu heimili í kvöld, ég get varla beðið eftir því að gæða mér á salatinu. Plan kvöldsins er að læra og fara svo í göngutúr, haustið er svo kósí og veðrið dásamlegt. Gott ef það er ekki bara tilefni til þess að fá sér heitt súkkulaði eftir göngutúrinn, ég er nú hrædd um það. Ég á allavega súkkulaði, kanilstangir og negulnagla upp í skáp svo mér finnst það mjög líklegt að ég gæði mér á ljúffengu jóla-súkkulaði í kvöld. Sagði ég jóla? Já hvort ég gerði. Ég er farin að hlakka til. 

Ég ætla þó ekki að tala meira um jólin í þetta sinn.

Ég mæli með þessu salati kæru vinir og ég vona að þið eigið eftir að eiga notalegt kvöld 

xxx

Eva Laufey Kjaran

Mexíkósk kjúklingasúpa með philadelphia sweetchili rjómaosti

Ég gæti borðað súpur í öll mál, mér finnst fátt betra en góð og matarmikil súpa á köldu haustkvöldi.
Súpur sem eru með allskyns góðgæti í  eru í sérlegu uppáhaldi.

Mexíkósk kjúklingasúpa er í sérflokki, hún er svo góð að mínu mati. Ég hef nú bloggað um hana áður en það eru sem betur fer ekki takmörk fyrir því að tala um sömu súpuna. Að þessu sinni þá prufaði ég rjómaost sem kemur fljótt í matvöruverslanir, dásamlegur philadelphia rjómaostur með sweetchili. (Það er auðvitað hægt að nota hreinan rjómaost líka og bæta þá t.d. chili tómatsósunni frá Heinz með í súpuna) Osturinn gefur súpunni auka kraft og súpan verður mun betri fyrir vikið. 

Það er mín skoðun að súpan er alltaf betri ef hún fær að malla í rólegheitum. Því lengur því betri að mínu mati. Súpur eru  ótrúlega góðar daginn eftir og ég passa mig alltaf á því að gera nóg af súpu svo ég eigi örugglega súpu daginn eftir. 

Mexíkósk kjúklingasúpa

Uppskrift er fyrir u.þ.b 5 - 6 manns.

4 kjúklingabringur, smátt skornar (eða heill kjúklingur, skorinn í litla bita)

1 rauð paprika, smátt skorin

1 græn paprika, smátt skorin

1 gul paprika, smátt skorin

2 gulrætur, smátt skornar

1/2 blaðlaukur , smátt skorinn

2  hvítlauksgeirar

1 laukur , smátt skorinn

1/2 rautt chili, fræhreinsað og smátt skorið

2 msk olía 

2 dós saxaðir tómatar

2 teningar af kjúklingakrafti

2 - 3 msk karrý 

smá kjúklingakrydd

3 lítrar vatn

1 peli rjómi

1 dós tómatpúrra

200 g philadelphia rjómaostur með sweet chili 

salt og nýmalaður pipar

Aðferð: 

Hitið olíu á pönnu við vægan hita, saxið grænmetið smátt og steikið í smá stund á pönnunni, bara rétt til að fá smá gljáa. Setjið grænmetið í stóran pott, bætið vatninu , tómatpúrrunni, karrýinu, kjúklingateningum og   söxuðum tómötum saman við, leyfið þessu að malla á meðan þið steikið kjúklinginn. 

Skerið kjúklinginn í litla bita og steikið á pönnu upp úr olíu í smá stund, kryddið til með kjúklingakryddi, salti og pipar. Bætið kjúklingnum við súpuna. Látið hana sjóða við vægan hita í 10 - 15 mín.

Að lokum fer rjóminn og rjómaosturinn saman við súpuna.Takið ykkur góðan tíma til að laga súpuna, ég leyfði henni að malla við vægan hita í um það bil klukkustund en þess þarf auðvitað ekki. Látið hana þó malla í lágmark 30 mín. Bragðbætið súpuna að vild, gæti verið að þið viljið meiri karrý eða meiri pipar. 
Mikilvægt að smakka sig til! 

 Berið súpuna fram með sýrðum rjóma, rifnum osti og nachos flögum, sem hver og einn bætir á sinn disk eftir smekk.

 Þessi súpa gleður mig mjög mikið og mér finnst ótrúlega huggulegt að standa við eldavélina og dúlla mér við súpugerð. Ilmurinn um heimilið er líka dásamlegur á meðan. Hún er svolítið sterk svo ég mæli með að þið smakkið ykkur til. En ég er þó  frekar mikil hæna þegar kemur að sterkum mat, kannski er hún ekkert svakalega sterk.  Hún er allavega ansi góð og ég mæli innilega með að þið prufið. 

Annars vona ég að þið eigið gott kvöld framundan. Þetta er alveg veður til þess að skríða upp í sófa eftir matinn, kveikja á nokkrum kertum og njóta þess að hafa það huggulegt á meðan vindurinn blæs. 

xxx

Eva Laufey Kjaran

Brokkolísúpa

Það jafnast fátt á við góða og matarmikla súpu á köldum dögum. Þessi súpa er bæði svakalega einföld og góð. Ég mæli hiklaust með að þið prófið. 

Spergilkálssúpa

• 250 g spergilkál
• 2 stórar kartöflur, um 350 g
• 2 hvítlauksgeirar
• ½ laukur
• 1,3 l vatn
• 1 grænmetisteningur
• 1 og ½ kjúklingateningur
• 1 msk olía
• 1 msk smjör
• Salt og nýmalaður pipar

Hráefnið góða 

 Skerið laukinn og hvítlaukinn smátt, hitið olíuna í potti og mýkið laukinn.

 Bætið síðan vatninu og teningum saman við , leyfið því að malla í nokkrar mínútur.

 Skerið kartöflurnar og brokkolíið í litla bita og setjið saman við súpuna. Kryddið til með salti og nýmöluðum pipar.

 Látið suðuna koma upp og leyfið súpunni að malla í 20 – 25 mínútur. 

Ilmurinn um heimilið verður dásamlegur.

 Slökkvið síðan undir pottinum og maukið grænmetið með töfrasprauta (ef þið eigið ekki töfrasprauta þá er hægt að setja súpuna í blandara og mauka grænmetið þannig) þegar grænmetið er orðið vel maukað setjið þá pottinn aftur á helluna við vægan hita

 Ég bætti 1 msk af smjöri saman við í lokin sem að mínu mati gerir súpuna betri.

Kryddið til með salti og pipar ef þess þarf. Súpan er þá klár og ég mæli með því að strá rifnum ost yfir súpuna þegar hún er borin fram.

 Einfalt ostabrauð

Með súpunni þá var ég með bakað ostabrauð af einföldustu gerð.

Samlokubrauð

Ostur

Olía

Salt og nýmalaður pipar

 Hitið ofninn í 200°C. Skerið skorpuna af venjulegu samlokubrauði, rífið niður ost og setjið á brauðið. Stráið olíu yfir brauðsneiðarnar og kryddið með hvítlaukssalti og pipar. Inn í ofn í 2 – 3 mínútur.

Ljúffeng máltíð sem er einföld og ódýr. 

Ég vona að þið eigið góðan dag 

xxx

Eva Laufey Kjaran

Mexíkósk kjúklingasúpa

Ég er mikil súpu kona og finnst fátt betra en góð súpa. Þessi kjúklingasúpa er í miklu uppáhaldi, mér finnst hún best þegar að hún er búin að malla lengi. Það er best að taka sér góðan tíma til þess að dúlla sér við súpugerð. Það er líka svo notalegt að hafa góða súpulykt ilma um heimilið.

Mexíkósk kjúklingasúpa

Þessi uppskrift er fyrir 5 - 6 manns. 

4 - 5 kjúklingabringur

1 rauð paprika

1 græn paprika

2 gulrætur

1/2 blaðlaukur 

4 - 5 hvítlauksgeirar

1 laukur 

1 grænt eða rautt chili, ég gleymdi að kaupa chili svo ég notaði 1 tsk af þurrkuðum chili pipar

2 msk olía 

1 dós saxaðir tómatar

1 1/2 - 2 teningar af kjúklingakrafti

2 - 3 tsk karrý

2,5 lítri vatn

1 peli rjómi

1/2 - 3/4 úr krukku af Heinz chili tómatsósu

100 - 150 g rjómaostur 

Aðferð:

Hráefnin sem við þurfum í súpuna

Hitið olíu á pönnu við vægan hita, saxið grænmetið smátt og steikið í smá stund á pönnunni, bara rétt til að fá smá gljáa. 

     Setjið grænmetið í stóran pott, bætið vatninu , chili tómatsósunni, karrýinu, kjúklingateningum og    söxuðum tómötum saman við, leyfið þessu að malla á meðan þið steikið kjúklinginn. 

Skerið kjúklinginn í litla bita og steikið á pönnu upp úr olíu, kryddið með chili, salti og pipar.

 Bætið kjúklingnum við súpuna. Látið hana sjóða við vægan hita í 10 - 15 mín.

                                           Að lokum fer rjóminn og rjómaosturinn saman við.  

              Takið ykkur góðan tíma til að laga súpuna, ég leyfði henni að malla við vægan hita í nærri 2 klukkustundir en þess þarf auðvitað ekki. Látið hana þó malla í lágmark 30 mín. Bragðbætið súpuna að vild, gæti verið að þið viljið meiri karrý eða meiri pipar. Mikilvægt að smakka sig til! 

Berið súpuna fram með sýrðum rjóma, rifnum osti og nachos flögum, sem hver og einn bætir á sinn disk eftir smekk.

Matarmikil súpa sem hressir og kætir. Stundum sleppi ég því að setja rjóma og rjómaost, bæti þá við meiri grænmeti. En að mínu mati er hún betri með rjómanum, elsku rjómanum.

 Lúxus súpa sem á alltaf vel við. 

Njótið vel. 

xxx

Eva Laufey Kjaran