Fallegir og ljúffengir bitar í veisluna

Í sumar útskrifaðist Haddi frá Háskólanum í Reykjavík og héldum við smá boð hér heima. Ég ákvað að vera með smárétti, ég bauð meðal annars upp á snittur og litlar kökur. Marengskökur og súkkulaðikökur eru yfirleitt vinsælastar á veisluborðinu og þess vegna ákvað ég að bjóða upp á litlar Pavlovur og franska súkkulaðiköku með ljúffengu kremi. Ég var mjög ánægð með útkomuna og skreytti kökurnar með ferskum berjum og blómum, það kom ákaflega vel út og var mikið fyrir augað. Þegar ég held boð eða á von á mörgum í mat þá finnst mér best að velja rétti sem ég get undirbúið með smá fyrirvara, ég gat bakað frönsku súkkulaðikökuna fyrr í vikunni og setti hana inn í frysti. Bakaði marengsinn kvöldinu áður og það eina sem ég átti eftir að gera var að skreyta kökurnar og það tekur ekki langa stund. Ég vona að þetta veiti ykkur innblástur fyrir næsta boð eða næstu veislu... já eða bara næst þegar ykkur langar í góðan bita. 

Litlar Pavlovur með sítrónubúðing og rjóma 

• 6 Brúnegg (aðskilinn) 
• 300 g sykur
• 1 ½ tsk mataredik
• 1 tsk vanilla extract eða dropar
• Salt á hnífsoddi

1. Þeytið eggjahvítur með salti, bætið sykri saman við í þremur skömmtum

og þeytið vel á milli. 

2. Bætið ediki og vanilludropum saman við þegar

marensinn er orðinn stífur. 

3. Skiptið deiginu niður í litlar kökur á pappírsklædda ofnplötu. 

4. Bakið marensinn við 100°C í 90 mín. Slökkvið á ofninum, opnið hurðina og látið marensinn kólna. Ef þið hafið tíma þá er gott að gera þetta kvöldinu áður en þið ætlið að nota kökurnar og leyfa þeim að kólna í ofninum yfir nóttina. 

• 200 ml rjómi 
• Vanillusykur 
• Sítrónubúðingur (Lemon curd)  

*Geymið gjarnan eggjarauðurnar og notið þær í bakstur eða þá til að búa til sítrónubúðing (Lemon curd). Ég keypti að vísu tilbúinn sítrónubúðing í Hagkaup frá merkinu Stonewall Kitchen.

Setjið eina matskeið eða fleiri, fer eftir smekk ofan á marengskökurnar. Þeytið rjóma og setjið væna skeið af rjóma yfir sítrónubúðinginn. Skreytið kökurnar gjarnan með ferskum berjum, blómum og sigtið í lokin flórsykri yfir. 

Frönsk súkkulaðikaka

Botn:

• 200 g sykur
• 4 Brúnegg
• 200 g suðusúkkulaði
• 200 g smjör
• 1 dl Kornax hveiti

Aðferð:

1. Hitið ofninn í 180°C (blástur). 

2. Þeytið sykur og egg saman þar til blandan verður létt og ljós. 

3. Bræðið saman smjör og súkkulaði við vægan hita. Blandið hveitinu saman við eggjablönduna, sumir vilja sleppa hveitinu en þá verður kakan sérstaklega blaut. 

4. Bætið súkkulaðiblöndunni varlega saman við í lokin. 

5. Smyrjið bökunarform, ég notaði að þessu sinni ferkantað form vegna þess að ég ætlaði að skera kökuna niður í litla bita. Þið getið auðvitað notað hringlaga en það fer bara eftir því hvernig þið ætlið að bera kökuna fram. 

6. Bakið kökuna við 180°C í 30 mínútur. Kælið hana mjög vel áður en þið setjið kremið á hana. 

Súkkulaðikrem 

• 150 g suðusúkkulaði eða annað gott súkkulaði
• 70 g smjör 
• 2 msk síróp 

Aðferð: 

1. Brjótið súkkulaðið og bræðið í smjörinu við vægan hita, ekki fara frá pottinum. Það er mjög auðvelt að brenna þessa góðu sósu. 

2. Hrærið vel í sósunni og bætið sírópinu saman við í lokin. 

3. Hellið sósunni yfir kökuna. Þessi sósa er ómótstæðilega góð og það er tilvalið að bera hana fram með fleiri kökum eða ísréttum. Skreytið kökuna gjarnan með ferskum berjum, það gerir kökuna enn betri. 

Þetta var stórgóður dagur með fjölskyldu og vinum. 

Mig langar að benda ykkur á Snapchattið mitt ef þið viljið fylgjast með mér þar - en ég hendi inn misgáfulegum innslögum og þið getið fylgst með þáttargerðinni og fl. Ég heiti einfaldlega evalaufeykjaran á Snapchat.

xxx

Eva Laufey Kjaran Hermannsdóttir 

Allt hráefnið sem notað er í þessa uppskrift fæst í verslunum Hagkaups. 

Pizzasnúðar með skinku og pepperoni

Í morgun bakaði ég í fyrsta skipti pizzasnúða, ég skil ekkert í mér afhverju ég hef ekki bakað þá fyrr. Pizzasnúðar minna mig á grunn-og framhaldsskólaárin mín, en þá fór ég ósjaldan út í bakarí og keypti mér pizzasnúð og kókómjólk. Það er auðvitað tilvalið að baka þessa snúða yfir sumartímann og nýta þá sem nesti í ferðalagið eða einfaldlega bara til að eiga heima fyrir. Ég setti helminginn af mínum snúðum í frysti, en þá get ég alltaf stolist í einn og einn og hitað, það er alls ekki síðra. Ég er í sumarfríi þessa dagana með henni Ingibjörgu Rósu minni og það var afar notalegt að byrja daginn á bakstri. Við mæðgurnar njótum þess svo í hádeginu að eiga nýbakaða snúða. 

Pizzasnúðar með skinku og pepperoni 

Þessi uppskrift er stór, ég skipti henni í tvennt bjó til snúða og skinkuhorn. Helmingur af þessari uppskrift gaf mér semsagt 20 meðalstóra pizzasnúða. 

• 900 g Kornax hveiti (í rauðu pökkunum)
• 40 g sykur
• ½ tsk salt
• 100 g smjör, brætt
• 500 ml mjólk
• 1 pakki þurrger (12 g)

Fylling :

• 1 bréf skinka
• 1 bréf pepperoni
• pizzasósa, magn eftir smekk
• rifinn mozzarella ostur, magn eftir smekk
• oreganó krydd

Til að pensla yfir:

• 1 egg
• 2 msk mjólk
• rifinn ostur
• oreganó krydd

Aðferð:

1. Hitið mjólk í potti, mjólkin á að vera volg.
2. Vekjið gerið í mjólkinni, en það tekur um það bil fimm mínútur. Um leið og það byrjar að freyða í skálinni er gerblandan tilbúin.
3. Bræðið smjör.
4. Blandið öllu saman í skál og hnoðið deigið mjög vel, ég leyfi hnoðaranum á hrærivélinni minni að sjá um verkið en þá tekur það um bil bil fimm til sex mínútur.
5. Setjið viskastykki yfir skálina og leyfið deiginu að lyfta sér í rúmlega klukkustund eða þar til það hefur tvöfaldast og jafnvel þrefaldað stærð sína.
6. Hitið ofninn í 180°C.
7. Skiptið deiginu í tvennt, stráið hveiti á borðflöt og hnoðið létt.
8. Fletjið deigið út með kökukefli.
9. Smyrjið deigið með pizzasósu, skerið niður skinku og pepperoni og leggið yfir. Sáldrið rifnum mozzarella osti yfir og kryddið til með oreganó.
10. Rúllið deiginu saman og skerið hverja rúllu í 18 – 20 bita.
11. Leggið bitana beint á pappírsklædda ofnplötu eða í bollakökuform eins og ég gerði.
12. Penslið snúðana með eggjablöndunni og sáldri rifnum mozzarella osti yfir og kryddið gjarnan með oreganó.
13. Bakið snúðana við 180°C í 10 – 12 mínútur eða þar til snúðarnir eru gullinbrúnir.

Ég fæ oft fyrirspurnir hvaðan þessar skálar eru en þær eru frá cupcompany. 

Mjög góðir snúðar, mæli með að þið prófið.

xxx

Eva Laufey Kjaran Hermannsdóttir 

Allt hráefni sem notað er í þessa uppskrift fæst í verslunum Hagkaups. 

Snittubrauð og útskriftin hans Hadda

Á laugardaginn útskrifaðist Haddi minn sem viðskiptafræðingur frá HR. Að sjálfsögðu vorum við með boð fyrir fjölskyldu og vini hér heima fyrir og fögnuðum þessum áfanga. Ég ákvað að bjóða upp á smárétti en það er einstaklega þægilegt og það er hægt að vinna sér inn tíma og undirbúa réttina svolítið áður. Ég var búin að baka allar kökur fyrr í vikunni og setti í frysti, tók þær svo út með smá fyrirvara og þá átti ég bara efir að skreyta þær. Snitturnar tóku sennilega lengsta tímann en það er ákaflega gaman að skreyta snittur og það er endalaust hægt að leika sér með hráefni.

Dagurinn var alveg frábær, veðrið var gott og fólkið okkar svo skemmtilegt. Þetta gat ekki klikkað. Ég tók að sjálfsögðu myndir og hér koma nokkrar sem og uppskriftir að góðu og einföldu snittubrauði og tillögur að áleggi. 

Vanillu- og súkkulaðibollakökur slá alltaf í gegn. 

Fjórar tegundir af snittum sem gleðja bæði auga og bragðlauka. 

Ég keypti bæði tilbúin snittubrauð og bakaði nokkur, ég hefði átt að byrja fyrr að baka brauðin og eiga í frysti en stundum er tíminn ekki að vinna með manni og þá er gott að geta skotist út í bakarí! 

Snittubrauð 

• 500 g brauðhveiti frá Kornax (gæti þurft meira en minna) 
• 320 ml volgt vatn
• 1 msk hunang
• 15 g ger
• 1 tsk salt
• 2  msk ólífuolía

1.    Blandið þurrgeri, volgu vatni og hunangi saman. Setjið viskastykki yfir skálina og leyfið gerinu að vakna í rólegheitum, það tekur 6 - 8 mínútur. Þegar byrjar að freyða í blöndunni er hún tilbúin. 

2.    Blandið gerblöndunni, hveiti, salti og olíu saman og hnoðið í nokkrar mínútur eða þar til deigið verður mjúkt. Setjið viskastykki yfir skálina og leyfið deiginu að hefast í klukkustund. 

3.    Búið til tvær lengjur úr deiginu og  skerið létt í brauðin eftir endilöngu. Látið hefast á ný í 20 – 30 mínútur.

4.    Hitið ofninn í 220 – 230°C. Það er afar mikilvægt að ofninn sé mjög heitur þegar brauðið fer inn í hann.

5.    Bakið í um það bil 10 mínútur eða þar til brauðið er orðið stökkt og gullinbrúnt.

Frönsk súkkulaðikaka og litlar pavlovur. 

Caprese snittur 

snittubrauð 

grænt pestó 

kirsuberjatómatar 

mozzarella ostur 

basilíka 

salt og nýmalaður pipar 

Aðferð: 

1. Skerið snittubrauð í sneiðar. 

2. Smyrjið brauðsneiðarnar með grænu pestó. 

3. Skerið kirsuberjatómata og litlar mozzarellakúlur í sneiðar. 

4. Raðið tómötum og ostinum ofan á hverja sneið, kryddið til með salti og pipar. Leggið eitt basilíkulauf yfir hverja sneið. 

Ítölsk dásemd 

snittubrauð 

hvítlauks alioli 

Ítölsk krydduð pylsa eða hráskinka

klettasalat 

hægeldaðir kirsuberjatómatar 

salt og nýmalaður pipar

parmesan ostur 

Aðferð: 

1. Skerið snittubrauð í sneiðar. 

2. Smyrjið brauðsneiðarnar með hvítlauks alioli. 

4. Raðið kryddpylsu eða hráskinku ofan á hverja sneið.

5. Skerið klettasalatið niður og setjið yfir pylsuna. 

6. Skerið kirsuberjatómata í tvennt, leggið í eldfast mót og dreifið olíu yfir. Kryddið til með salti og pipar og bakið í ofni við 150°C í 2 - 3 klst. Setjið tómat ofan á hverja sneið. 

7. Kryddið til með salti og pipar. Rífið niður parmesan ost og sáldrið yfir í lokin. 

Herra Salómon

snittubrauð 

majónes 

dill 

dijon sinnep 

sítróna 

salt og nýmalaður pipar 

reyktur lax 

grænt epli 

graslaukur 

Aðferð: 

1. Skerið snittubrauð í sneiðar. 

2. Setjið 5 msk af majónesi, handfylli af fersku dilli, 1 msk af dijon sinnepi, safann úr hálfri sítrónu, salt og pipar í matvinnsluvél og maukið þar til sósan verður silkimjúk. Smakkið ykkur að sjálfsögðu til! 

3. Smyrjið hverja sneið með dillsósunni og leggið laxinn yfir. 

4. Skerið niður grænt epli í þunnar sneiðar og setjið yfir laxinn. 

5. Skerið niður graslauk og dreifið yfir snitturnar í lokin. 

Sælkerasnitta 

snittubrauð 

hvítlauks alioli 

camenbert ostur 

beikon 

rauð paprika 

tyttuberjasulta 

radísuspírur 

Aðferð: 

1. Skerið snittubrauð í sneiðar. 

2. Smyrjið hverja sneið með hvítlauks ailoli. 

3. Skerið niður Camenbert og leggið yfir hverja sneið. 

4. Steikið beikon þar til það verður mjög stökkt og skerið það í litla bita. Setjið beikonbita yfir ostinn. 

5. Setjið eina tsk af tyttuberjasultu yfir.

6. Skerið rauða papriku mjög þunnt og leggið yfir. 

7. Í lokin setjið þið smá radísuspírur yfir, þær eru ofsalega bragðgóðar. 

Loksins er hægt að fá fallegar bóndarósir út í blómabúð, þessar eru einstaklega fallegar. 

Ein fjölskyldumynd, Ingibjörg Rósa er ekkert ofsalega hrifin af þessu myndastússi og grettir sig bara ;-) 

xxx

Eva Laufey Kjaran Hermannsdóttir 

Allt hráefni sem notað er í þessa uppskrift fæst í verslunum Hagkaups.

Hollt túnfisksalat

 Hollt og gott túnfisksalat

Þetta salat er verulega einfalt að búa til, ég er ótrúlega mikið fyrir salöt ofan á hrökkbrauð eða brauð. En það gerir víst lítið fyrir línurnar að borða eintóm mæjónes salöt svo það er gott að breyta til frá hinu týpíska túnfisksalati í hollari salat. Að mínu mati er hollari kosturinn betri og bragðmeiri. 

Hér kemur einföld uppskrift, ef uppskrift má kalla, ég dassaði mig til og notaði það sem ég átti inn í ísskáp. Þannig aðal galdurinn er að smakka sig áfram. En í þetta salat hjá mér fór eftirfarandi;

Avókadó

Íslenskt salat

Túnfiskur í vatni

Paprika

Chilli 

Rauðlaukur

Agúrka

Salt og hvítlaukssalt
Nokkrir dropar af sítrónusafa

Ég skar grænmetið mjög smátt, blandaði túnfisknum saman við, kreisti smá sítrónusafa yfir og kryddaði til. Var svo heppin að eiga silkimjúkt avókadó og blandaði því saman við salatið, notaði hendurnar til þess að blanda þessu vel saman, avókadóið gerði þetta ansi djúsí og gott

Gott er að setja smá kotasælu með. 

Verulega gott.

Mæli með að þið prufið

xxx

Eva Laufey Kjaran

Bakaðar paprikur fylltar með grænmeti og kúskús

Bakaðar paprikur fylltar með grænmeti og kúskús

2 rauðar paprikur. Ýmist skornar í tvennt og stilkurinn látinn halda sér eða bara lokið skorið af. Mikilvægt að fræin séu fjarlægð. 

1/2 kúrbítur, skorinn litla bita

6 - 8 kirsuberjatómatar, skornir í litla bita

1/2 græn paprika, fræhreinsuð og skorinn í litla bita

4 - 5 sveppir, skornir í litla bita

1 tsk karrý

1 - 2 msk ólífuolía

80 - 100 g fetaostur

100 g kúskús

Rifinn ostur, hér um bil 1 msk yfir hverja papriku

Salt og nýmalaður pipar

1 - 2 msk fersk krydd t.d. graslaukur, basilika eða rósmarín.

Það er um að gera að nota það grænmeti sem þið eigið inn í ísskáp, það er hægt að nota hvaða grænmeti sem er. Um að gera að prufa sig áfram. 

 Aðferð

Hitið ofninn í 200°C. Skolið allt grænmeti vel og fræhreinsið. Sjóðið kúskús samkvæmt leiðbeiningum á pakkanum. 

Blandið  grænmetinu, fetaostinum og kúskúsinu saman í skál, kryddið vel með karrý, salti og pipar. Deilið grænmetisblöndunni jafnt niður á paprikurnar. Stráið rifnum osti yfir og dreypið olíunni líka yfir þær. Inn í ofn í 25 - 30 mín við 200°C. 

Þegar paprikurnar eru komnar út úr ofninum er gott að saxa ferskar kryddjurtir og strá yfir. 

Það er hægt að bera paprikurnar fram sem forrétt, aðalrétt eða bara sem meðlæti. 

Mjög sniðugt að bæta t.d. kjúkling eða hakki við, tilvalið að nota afganga í þennan rétt.

Dásamlega safaríkar og góðar. Mjög góð máltíð, létt og fín. 

Ég vona að þið eigið gott kvöld framundan. 

xxx

Eva Laufey Kjaran