Belgískar vöfflur með súkkulaði og jarðarberjum

Sunnudagar eiga að vera til sælu, svo mikið er víst. Að byrja daginn á bakstri er einfaldlega vísir að góðum degi og í morgun ákvað ég að skella í þessar einföldu og gómsætu vöfflur með súkkulaði og jarðarberjum. Ég eignaðist svo fínt belgískt vöfflujárn um daginn og mér þykir svo gaman að baka þessar þykku og góðu vöfflur, það tekur enga stund að skella í vöfflurnar og ilmurinn um heimilið er himneskur. Uppskriftin er ekki stór en það er lítið mál að tvöfalda eða þrefalda hana, upplagt að skella í þessar fínu vöfflur í kaffitímanum í dag. 

Annars vona ég að þið eigið ljúfan sunnudag framundan með fólkinu ykkar, á morgun hefst prófavika hjá mér í háskólanum og eyði ég þess vegna deginum inni að læra. Ég strax orðin spennt fyrir næstu helgi en þá ætla ég að njóta þess að vera með Ingibjörgu Rósu. 

Belgískar vöfflur með súkkulaði og jarðarberjum

ca. 10 vöfflur (lítil uppskrift - auðvelt að tvöfalda eða þrefalda)

• 2 bollar Kornax hveiti (ca. 5 dl ) 
• 1 tsk lyftiduft 
• 2 egg 
• 1 tsk vanilla (extract eða sykur)
• 3 msk sykur 
• 1 bolli mjólk (2,5 dl)
• 1 bolli AB mjólk (2,5 dl)
• 3 msk ljós olía
• Smjör

Aðferð:

1. Blandið þurrefnum saman í skál. 
2. Pískið tvö egg, hellið mjólkinni, olíunni og ab mjólkinni saman við og blandið við þurrefnin. 
3. Blandið öllu vel saman og hitið vöfflujárnið, smyrjið járnið með smjöri og bakið vöfflurnar þar til þær eru gullinbrúnar. 
4. Berið vöfflurnar strax fram og þær eru gómsætar með súkkulaði og jarðarberjum. Það er líka ótrúlega gott að rista nokkrar pekanhnetur og útbúa einfalda karamellusósu... þið getið sumsé borið vöfflurnar fram með öllu því góðgæti sem ykkur lystir. 

Ég vona að þið njótið vel. 

xxx

Eva Laufey Kjaran Hermannsdóttir

Hráefnin í þessa uppskrift fást í verslunum Hagkaups. 

Guðdómlegt epla- og bláberjacrumble

Í gærkvöldi ákvað ég að baka þessa einföldu epla- og bláberjaböku eftir kvöldmatinn. Það var svolítið haustlegt úti, pínu kalt og rigning.. fullkomið veður fyrir kertaljós, köku sem yljar að innan og sjónvarpsgláp. Ég var stjörf yfir þáttum sem sýndir eru á Stöð 2 sem heita Killer Women með Piers Morgan, þættirnir eru bara tveir og ég mæli með að þið leigið þá á vodinu ef þið eruð ekki búin að sjá þá. Þeir eru mjög góðir og ég mæli alveg með því að maula á einhverju góðu eins og þessari böku yfir þáttunum. 

Ég notaði heilhveiti að þessu sinni og mér finnst það betra en hvítt hveiti í þessa köku, hef núna prófað hvoru tveggja og verð að segja að heilhveitið hefur vinninginn. Mylsnan verður grófari og einhvern hátt bragðmeiri. Ég mæli með að þið skellið í þessa einföldu böku, þið getið bæði bakað hana í ofni eða grillað á grillinu. Algjör snilld!

Guðdómlegt epla- og bláberjacrumble

• 5 græn epli
• 1 bolli bláber, fersk eða frosin
• 1 – 1½ tsk kanill
• 2 tsk sykur
• 1 tsk vanillusykur
• 70 g súkkulaði
• Mylsna:
• 80 g Kornax heilhveiti
• 80 g sykur
• 100 g smjör
• 50 g kókosmjöl

Aðferð:

1. Hitið ofninn í 180°C.
2. Flysjið eplin, fjarlægið kjarna og stilka.
3. Skerið eplin í litla bita og dreifið eplabitunum í eldfast mót. 
4. Blandið sykri, vanillusykri og kanil saman við eplin.
5. Saxið súkkulaði og dreifið yfir eplin. 
6. Næsta skref er að útbúa deigið sem fer ofan á eplin. Blandið heilhveiti, sykri, smjöri og kókosmjöli saman í skál og blandið saman með höndunum. 
7. Dreifið deiginu yfir eplin og bakið í ofni við 180°C í 35-40 mínútur.

Berið fram með vanilluís og karamellusósu.

Njótið vel. 

xxx

Eva Laufey Kjaran Hermannsdóttir

Öll hráefnin í þessa uppskrift fást í verslunum Hagkaups

Þjóðhátíðarkökur

Á föstudaginn ættum við öll að fagna þjóðhátíðardeginum okkar með pompi og prakt, það er heldur betur tilvalið að fá fjölskyldu og vini heim í stórar hnallþórur og kampavín. Ég ætla að minnsta kosti að baka og fá til mín góða gesti, byrja daginn heima á kökum og rölta svo í bæinn. Fyrir nokkrum árum gerði ég þjóðhátíðarboð fyrir Gestgjafann og mér fannst það ótrúlega gaman, aldrei að vita nema veisluborðið verði svona á föstudaginn! 

Súkkulaðibomba með rice krispies og súkkulaðikremi. Algjört sælgæti!

Vanilludásemd með rjómaostakremi, einföld og virkilega ljúffeng.

Kókosbolludraumur með nóg af ferskum berjum. 

Sítrónukaka með léttu kremi, ferskum berjum og flórsykri. 

Njótið vel. 

xxx

Eva Laufey Kjaran Hermannsdóttir 

Öll hráefnin í þessar uppskriftir fást í verslunum Hagkaups. 

Súkkulaðikakan sem allir elska

Það kannast nú líklega flestir við þessa uppskrift en hún er gífurlega vinsæl á mínu heimili og í minni fjölskyldu. Mamma bakaði þessa köku ósjaldan fyrir okkur og ég baka hana mjög oft hér heima. Í dag var kósí dagur hjá okkur fjölskyldunni, Ingibjörg Rósa var svolítið slöpp og ákváðum við þess vegna að hafa það rólegt í dag. Þá fannst mér nú tilvalið að skella í þessa einföldu og góðu súkkulaðiköku sem við borðuðum með bestu lyst, fátt sem toppar nýbakaða súkkulaðiköku og ískalt mjólkurglas. Klassík sem enginn fær leið á.

 Þessa dagana er ég meðal annars að undirbúa tökudaga fyrir bókina mína, kökubókina sem kemur út í haust. Um 80 uppskriftir að ljúffengum kökum saman í eina bók! Ég get ekki beðið, ætla að eyða sumarfríinu mínu í bakstur og ljósmyndatökur með frábærum ljósmyndara honum Karl Petterson. Það  verður gaman, svo ætla ég einnig að gifta og flytja... þetta verður heldur betur fjörugt sumarfrí. Þetta var smá útúrdúr en ég fann fyrir fiðring í dag þegar ég bakaði þessa köku og fann fyrir mikilli tilhlökkun fyrir komandi bakstursmánuðum. 

En hér er uppskriftin.... njótið vel <3 

Mömmudraumur

• 150 g sykur
• 150 g púðursykur
• 130 g smjör
• 2 egg
• 260 g KORNAX hveiti
• 1 tsk matarsódi
• 1,5 tsk lyftiduft
• salt á hnífsoddi
• 50 g kakó
• 2 dl mjólk

Aðferð:

1. Þeytið sykur og smjör þar til blandan verður létt og ljós. 
2. Bætið eggjum  saman við, einu í einu.
3. Blandið þurrefnum út í deigið ásamt mjólkinni.
4. Skiptið deiginu niður í tvö smurð hringlaga form og bakið við 180°C í 20 – 25 mínútur.

Súkkulaðikrem 

• 500 g flórsyku
• 60 g kakó
• 1 egg
• 80 g smjör
• 1 tsk vanilla (extract eða dropar)
• 4 msk sterkt uppáhellt kaffi 

Aðferð:

1.   Bræðið smjör við vægan hita
2.   Blandið öllu saman í hrærivélaskál og þeytið þar til kremið verður silkimjúkt og fallegt. 

Það er mjög mikilvægt að kæla kökubotnanna áður en þið smyrjið kreminu á milli botnanna og yfir alla kökuna. Skreytið gjarnan með kökuskrauti eða ferskum berjum.

Ég vona að þið hafið átt góða helgi með fólkinu ykkar kæru lesendur. 

xxx

Eva Laufey Kjaran Hermannsdóttir 

Öll hráefni í þessa uppskrift fást í verslunum Hagkaups