Smákökur með súkkulaði- og pekanhnetum

Gleðilega aðra aðventu kæru lesendur. Mikið vona ég að helgin ykkar hafi verið uppfull af notalegheitum með fjölskyldu og vinum. Ég hef lítið sinnt blogginu að undanförnu en ég er búin að vera í prófum og lítill tími gefist fyrir bakstur og eldamennsku. En nú verð ég dugleg að setja inn jólalegar uppskriftir fyrir ykkur. 

Í gær bakaði ég til dæmis þessar ofur góðu smákökur með súkkulaði- og pekanhnetum, ég er svakalega mikið fyrir hnetur en þið getið auðvitað skipt þeim út fyrir meira súkkulaði ef þið eruð ekki jafn hrifin af hnetum og ég.  Uppskriftin er frekar stór og notaði ég einungis 1/4 af deiginu, ég frysti rest og get þá alltaf skorið það deig í bita og skellt inn í ofn þegar kökulöngunin kemur upp. Kökurnar hjá mér eru frekar stórar en það er bara smekksatriði. Ég mæli með að þið prófið þessar og vonandi smakkast þær vel. 

Smákökur með súkkulaði- og pekanhnetum

•  230 g smjör 
• 180 g púðursykur frá 
• 180 g ljós púðursykur 
• 2 egg
• 320 g hveiti
• 1 tsk lyftiduft 
• 1 tsk matarsódi
• 100 g pekanhnetur
• 300 g súkkulaði, ég notaði bæði suðusúkkulaði og dökka súkkulaðihnappa
• 1 tsk vanilludropar 

Aðferð: 

1. Hitið ofninn í 180°C. 
2. Þeytið sykur og smjör þar til blandan verður létt í sér, bætið eggjum saman við. Einu í einu. 
3. Bætið þurrefnum saman við eggjablönduna og hrærið, skafið einu sinni til tvisvar sinnum meðfram hliðum á skálinni og haldið áfram að hræra. 
4. Saxið niður pekanhnetur og súkkulaði, setjið saman við ásamt vanillu og blandið vel saman með sleikju. 
5. Mótið kúlur með teskeiðum eða matskeiðum, setjið kökurnar á pappírsklædda ofnplötu og bakið við 180°C í 10 - 12 mínútur 
6. Bræðið gjarnan súkkulaði og sáldrið yfir kökurnar í lokin. 

Njótið strax og þá helst með ísköldu mjólkurglasi. 

Upplagt að pakka deiginu inn í plastfilmu og geyma í frysti ef þið viljið ekki baka allt í einu. 

Aðventuknús frá mér til ykkar.

xxx

Eva Laufey Kjaran Hermannsdóttir

Öll hráefni í þessa uppskrift fást í verslunum Hagkaups.

Sörur

Gleðilega fyrstu aðventu kæru lesendur. Hér var kveikt á fyrsta kertinu snemma í morgunsárið og smá jólaskraut er komið upp, ég er byrjuð í lokaprófum og klára prófin um næstu helgi. Ég er búin að lofa mér því að skreyta almennilega þegar prófin eru búin, mig klæjar í puttana að byrja að skreyta, útbúa jólakort og baka smákökur. Það er auðvitað aldrei eins freistandi að byrja jólastússið en þegar maður er í prófatörn. Fyrstu kökurnar á dagskrá eftir próf eru sörur en mér þykja þær ómissandi í desember og þær eru í sérstaklega miklu uppáhaldi. Það er einnig svo gott að eiga þær í frystinum og geymast þær mjög vel. Ég ætla að deila með ykkur uppkskriftinni sem ég geri alltaf fyrir jólin en uppskriftin er frá mömmu minni, þær eru aðeins grófari vegna þess að við notum heslihnetur í botninn en auðvitað má skipta þeim út fyrir möndlur. Ég vona að þið njótið vel og eigið dásamlegan sunnudag framundan með fólkinu ykkar. 

Sörur

Botn:

• 4 Brúnegg (eggjahvítur)
• 230 g heslihnetur (eða möndlur)
• 230 g flórsykur 

Aðferð:

1.  Hitið ofninn í 180°C. Hakkið heslihneturnar eða möndlurnar í matvinnsluvél.
2. Stífþeytið eggjahvíturnar þar til hægt er að hvolfa skálinni án þess að hvíturnar renni úr.
3. Blandið hnetunum og flórsykrinum varlega saman við eggjahvíturnar með sleikju. Mótið kökurnar með teskeið og setjið á pappírklædda ofnplötu. Bakið í 10 – 12 mínútur.

 Krem:

• 4  Brúnegg (eggjarauður)
• 1 dl vatn
• 130 g sykur
• 250 g smjör, við stofuhita
• 2 – 3 msk kakó
• ½ tsk vanillusykur eða vanillu extract
• 1 msk sterkt uppáhellt kaffi

Aðferð: 

1. Þeytið eggjarauðurnar. 
2. Hitið vatn og sykur þar til það hitnar og verður að sírópi. 
3. Hellið sírópinu saman við eggjarauðurnar i mjórri bunu og haldið áfram að þeyta. 
4. Skerið smjörið í teninga og bætið út í. 
5. Næsta skref er að bæta kakó, vanillu og kaffi út í kremið. 
6. Þeytið í svolitla stund eða þar til kremið verður silkimjúkt. Það er ágætt að smakka sig til á þessu stigi.
7.  Kælið kremið áður en þið setjið það á kökurnar. Gott er að sprauta kreminu á kökurnar með sprautupoka eða nota teskeiðar til þess að smyrja kreminu á þær. Það er algjört smekksatriði hversu mikið af kremi fer á kökurnar. 
8. Kælið kökurnar mjög vel, helst í frysti áður en kökurnar eru hjúpaðar.

Hjúpur

• 300 g súkkulaði t.d. suðusúkkulaði 

Aðferð:  Bræðið súkkulaðið yfir vatnsbaði. Dýfið kremhlutanum á sörunum ofan í súkkulaðið.

Gott er að geyma kökurnar í frysti, takið þær út með smá fyrirvara áður en þið berið þær fram. 

xxx

Eva Laufey Kjaran Hermannsdóttir

Allt hráefni sem notað er í þessa uppskrift fæst í verslunum Hagkaups.

Glútenfríar piparkökur, þessar klassísku og góðu.

Piparkökur eru þær jólasmákökur sem ég tengi hvað mest við jólin. Lyktin af þeim er svo góð og jólaleg, Það er fastur liður hjá mér að baka gómsætar piparkökur fyrir jólin. Þessi uppskrift er að glútenfríum piparkökum en þið getið auðveldlega notað venjulegt hveiti ef þið viljið það frekar. Það er ágætis ráð að setja hveitið út í deigið smám saman, um leið og deigið er orðið slétt og þétt þá er það tilbúið. Það gæti verið að þið þurfið minna af venjulegu hveiti en þið prófið ykkur bara áfram. Þessar eru svakalega góðar og ég mæli með að þið prófið þessa uppskrift og fáið svo fjölskyldu og vini til þess að skreyta kökurnar með ykkur. 

Glútenfríar piparkökur

• 150 g smjör, við stofuhita
• 1 dl síróp
• 2 dl sykur
• 1 dl rjómi eða mjólk
• 2 tsk. Kanill
• 1 tsk. Negull
• ½ tsk. Engifer
• ¼ tsk. Hvítur pipar
• 1 tsk. Vínsteinslyftiduft
• 450 – 550 g fínt Fínax mjöl

Aðferð: Hitið smjör, síróp og sykur í potti við vægan hita. Þegar sykurblandan fer að þykkna takið þið pottinn af hellunni og kælið í smá stund og bætið rjómanum út í. Hellið blöndunni í stóra skál og sigtið þurrefnin út í, það er gott að geyma smá hveiti sem þið bætið við smám saman en deigið er tilbúið þegar það er orðið slétt og þétt. Því næst er plastfilma er sett yfir skálina og deigið geymt í kæli í nokkra klukkustundir helst yfir nóttu.

Hnoðið deigið smávegis og fletjið út með kökukefli. Það er alltaf gott að strá svolítið af hveiti á borðið áður en þið fletjið deigið út, það kemur í veg fyrir að deigið festist við borðið. Piparkökurnar eru mótaðar með piparkökuformum. Bakið kökurnar við 175°C í um það bil 10 mínútur.

Kælið kökurnar og skreytið gjarnan með glassúr. Ég sáldraði flórsykri yfir nokkrar kökur en ég ætla að skreyta restina af kökunum í desember með litlum frændum sem eru að koma heim frá Noregi. Það er miklu skemmtilegra að skreyta kökurnar í góðum félagsskap. 

xxx

Eva Laufey Kjaran Hermannsdóttir

Ómótstæðilegar Oreo smákökur

Þessar kökur slógu heldur betur í gegn á heimilinu mínu en þær kláruðust hratt og örugglega. Þannig á það vera, þá get ég bakað þessar kökur aftur. Ég notaði glútenfrítt hveiti en þið getið auðvitað notað venjulegt hveiti, þið þurfið aðeins minna af því svo byrjið bara að setja 200 g af hveiti og bætið svo í ef ykkur finnst deigið of blautt. Ég þori að lofa ykkur því að þið eigið eftir að baka þessar kökur aftur og aftur.. ekki bara um jólin heldur allt árið um kring. 

Njótið vel. 

Oreo smákökur 

• 110 g smjör 
• 100 g hreinn rjómaostur
• 200 g syk­ur
• 1 egg
• 250 g Finax glútenfrítt hveiti
• 1 tsk vínsteinslyftiduft
• 150 g súkkulaði
• 1 tsk vanilla extract
• 1 pakki Oreo kexkökur
• 100 g hvítt súkkulaði

Aðferð: Hitið ofninn í 180°C. Þeytið smjör og rjómaost saman þar til blandan verður létt og ljós, bætið sykrinum saman við og einu eggi. Blandið hveitinu og lyftidufti út í og hrærið í 2 – 3 mínútur. Í lokin bætið þið vanillu og smátt söxuðu súkkulaði saman við og hrærið í smá stund. Geymið deigið í ísskáp í 10 – 15 mínútur. Mótið litlar kúlur með teskeið og veltið kúlunum upp úr muldu Oreo kexi. Setjið kúlurnar á pappírsklædda ofnskúffu og inn í ofn við 10 – 12 mínútur við 180°C. Það er afar gott að bræða hvítt súkkulaði og sáldra yfir kökurnar þegar þær koma út úr ofninum.

xxx

Eva Laufey Kjaran Hermannsdóttir

Jólabaksturinn