Súkkulaðikaka með Frosting kremi

 Súkkulaðibotnar

3 bollar hveiti (Amerísk mæling, 1 bolli = 2,4 dl)
2 bollar sykur
3 egg
2 bollar AB mjólk
1 bolli bragðdauf olía
5 msk kakó
2 tsk lyftiduft
1 tsk matarsódi
2 tsk vanilludropar eða sykur

Aðferð:

Blandið öllum hráefnum saman í skál, hrærið í nokkrar mínútur eða þar til deigið verður slétt og fínt. Hellið deiginu í smurð bökunarform og bakið við 180°C í 25 - 30 mínútur. Það er gott ráð að stinga hníf í kökuna eftir 25 mínútur og ef hnífurinn kemur hreinn upp úr er kakan klár en annars þarf hún lengri tíma. Ofnar eru auðvitað eins misjafnir eins og þeir eru margir.

Það er mikilvægt að leyfa kökunni að kólna alveg áður en hún er skreytt með kreminu.

Vanillu Frosting

4 eggjahvítur

2 1/2 dl sykur

1 tsk vanillusykur

Aðferð: Þeytið eggjahvítur og sykur saman þar til froða fer að myndast. Færið skálina, setjið yfir sjóðandi vatn og hrærið þar til blandan byrjar að þykkna og hitna. Takið þá skálina frá vatninu og hrærið áfram í hrærivélinni, bætið vanillu saman við á því stigi. Hrærið áfram þar til kremið kólnar og verður orðið stíft. (Alveg eins og með marengs, þið eigið að geta hvolft skálinni án þess að kremið hreyfist) Ég setti nokkra dropa af gulum matarlit út í kremið í lokin, mér finnst gel matarlitirnir frá Wilton lang bestir. Mæli með þeim. 

 Ég vona að þið eigið frábæra páska með fjölskyldu og vinum. 

xxx

Eva Laufey Kjaran Hermannsdóttir

Öll hráefni sem notuð eru í þessa uppskrift fást í verslunum Hagkaups. 

Eggja- og beikonskálar sem allir elska

Um helgar er tilvalið að nostra svolítið við morgunmatinn og í morgun útbjó ég þessar einföldu og gómsætu eggja- og beikonskálar. Ég mun pottþétt bera þessi egg fram í næsta brönsboði en þau er ótrúlega góð, maður fær allt í einum bita. Stökkt beikon, stökkt brauð og silkimjúkt egg. Ef þið eigið ferskar kryddjurtir er tilvalið að nota þær með og ég átti ferskt timían sem ég sett ofan á eggja- og beikonskálarnar mínar. Það mætti segja að þetta væri lúxus byrjun á deginum og ég mæli svo sannarlega með að þið prófið. 

Himneskar eggja- og beikonskálar.

Uppskriftin miðast á við fjóra manns en það er ekki óvitlaust að tvöfalda skammtinn enda er þessi uppskrift mjög góð og ekki ólíklegt að fólk vilji tvær múffur. 

• 4 beikonsneiðar
• 4 brauðsneiðar
• 4 Brúnegg
• Salt og nýmalaður pipar 
• Ferskar kryddjurtir eftir smekk t.d. timían eða steinselja

Aðferð: 

1. Hitið ofninn í 180°C (blástur) 
2. Skerið skorpuna af brauðinu og mótið litlar skálar með brauðinu með því að þrýsta brauðinu á botninn á eldfasta múffu forminu. 
3. Vefjið eina beikonsneið utan um hverja brauðsneið og setjið í eldfasta múffu formið. *Það er mjög mikilvægt að smyrja formið vel áður vegna þess að annars festist beikonið og eggið við formið.
4. Brjótið eitt egg í hverja skál. 
5. Kryddið til með salti, pipar og ferskum kryddjurtum.
6. Bakið við 180°C í ca. 10 mínútur. Fylgist með eggjunum en þau eru tilbúin þegar eggin eru stíf. 

Berið fram og njótið með morgunkaffibollanum. 

Njótið vel. 

xxx

Eva Laufey Kjaran Hermannsdóttir

Allt hráefni sem notað er í þessa uppskrift fæst í verslunum Hagkaups. 

Sörur

Gleðilega fyrstu aðventu kæru lesendur. Hér var kveikt á fyrsta kertinu snemma í morgunsárið og smá jólaskraut er komið upp, ég er byrjuð í lokaprófum og klára prófin um næstu helgi. Ég er búin að lofa mér því að skreyta almennilega þegar prófin eru búin, mig klæjar í puttana að byrja að skreyta, útbúa jólakort og baka smákökur. Það er auðvitað aldrei eins freistandi að byrja jólastússið en þegar maður er í prófatörn. Fyrstu kökurnar á dagskrá eftir próf eru sörur en mér þykja þær ómissandi í desember og þær eru í sérstaklega miklu uppáhaldi. Það er einnig svo gott að eiga þær í frystinum og geymast þær mjög vel. Ég ætla að deila með ykkur uppkskriftinni sem ég geri alltaf fyrir jólin en uppskriftin er frá mömmu minni, þær eru aðeins grófari vegna þess að við notum heslihnetur í botninn en auðvitað má skipta þeim út fyrir möndlur. Ég vona að þið njótið vel og eigið dásamlegan sunnudag framundan með fólkinu ykkar. 

Sörur

Botn:

• 4 Brúnegg (eggjahvítur)
• 230 g heslihnetur (eða möndlur)
• 230 g flórsykur 

Aðferð:

1.  Hitið ofninn í 180°C. Hakkið heslihneturnar eða möndlurnar í matvinnsluvél.
2. Stífþeytið eggjahvíturnar þar til hægt er að hvolfa skálinni án þess að hvíturnar renni úr.
3. Blandið hnetunum og flórsykrinum varlega saman við eggjahvíturnar með sleikju. Mótið kökurnar með teskeið og setjið á pappírklædda ofnplötu. Bakið í 10 – 12 mínútur.

 Krem:

• 4  Brúnegg (eggjarauður)
• 1 dl vatn
• 130 g sykur
• 250 g smjör, við stofuhita
• 2 – 3 msk kakó
• ½ tsk vanillusykur eða vanillu extract
• 1 msk sterkt uppáhellt kaffi

Aðferð: 

1. Þeytið eggjarauðurnar. 
2. Hitið vatn og sykur þar til það hitnar og verður að sírópi. 
3. Hellið sírópinu saman við eggjarauðurnar i mjórri bunu og haldið áfram að þeyta. 
4. Skerið smjörið í teninga og bætið út í. 
5. Næsta skref er að bæta kakó, vanillu og kaffi út í kremið. 
6. Þeytið í svolitla stund eða þar til kremið verður silkimjúkt. Það er ágætt að smakka sig til á þessu stigi.
7.  Kælið kremið áður en þið setjið það á kökurnar. Gott er að sprauta kreminu á kökurnar með sprautupoka eða nota teskeiðar til þess að smyrja kreminu á þær. Það er algjört smekksatriði hversu mikið af kremi fer á kökurnar. 
8. Kælið kökurnar mjög vel, helst í frysti áður en kökurnar eru hjúpaðar.

Hjúpur

• 300 g súkkulaði t.d. suðusúkkulaði 

Aðferð:  Bræðið súkkulaðið yfir vatnsbaði. Dýfið kremhlutanum á sörunum ofan í súkkulaðið.

Gott er að geyma kökurnar í frysti, takið þær út með smá fyrirvara áður en þið berið þær fram. 

xxx

Eva Laufey Kjaran Hermannsdóttir

Allt hráefni sem notað er í þessa uppskrift fæst í verslunum Hagkaups.

Mjúk súkkulaðikaka með fljótandi karamellusósu

Í gærkvöldi fór fram landssöfnun Samhjálpar til uppbyggingar á meðferðarheimilis í Hlaðgerðarkoti. Söfnunin gekk frábærlega og við söfnuðum rúmlega 80 milljónum sem er algjörlega frábært, það var svo gaman að fá að taka þátt í söfnuninni en við Ásgeir Erlendsson vorum í símaverinu með fullt af skemmtilegu fólki. Ég var svo sátt og sæl þegar ég vaknaði í morgun að ég varð að baka eina gómsæta köku. Mig langaði auðvitað í súkkulaðiköku og ég átti til ljúffenga karamellusósu sem passaði fullkomnlega með súkkulaðinu. Úr varð sænsk kladdkaka með þykkri karamellusósu. Þið ættuð að skella í þessa köku sem allra fyrst, lofa að þið eigið eftir að elska þessa. 

Mjúk súkkulaðikaka með fljótandi karamellusósu

• 150 g smjör 
• 2 Brúnegg 
• 2 dl sykur 
• 3 dl Kornax hveiti 
• 1 tsk lyftiduft 
• 2 tsk vanilla extract (eða dropar/sykur)
• 4 msk kakó 
• Ögn af salti 
• 3 - 4 msk Dulce de leche karamellusósa 

Aðferð:

1. Hitið ofninn í 180°C. 
2. Bræðið smjör við vægan hita. 
3. Þeytið saman egg og sykur þar til blandan verður létt og ljós. 
4. Blandið þurrefnum saman og blandið varlega saman við eggjablönduna með sleif. 
5. Hellið smjörinu og vanillu saman við og hrærið með sleif, saltið smávegis. 
6. Smyrjið form og hellið deiginu í formið. 
7. Setjið karamellusósuna yfir deigið.
8. Bakið við 180°C í 18 - 20 mínútur, kakan á að vera svolítið blaut. 
9. Kælið á meðan þið útbúið kremið. 

Súkkulaðikremi með karamellusósu 

• 70 g smjör 
• 120 g suðusúkkulaði
• 2 msk síróp
• smávegis af salti 
• 2 msk Dulce de leche

Aðferð: 

1. Brjótið súkkulaðið og bræðið saman við smjörið við vægan hita, ekki fara frá pottinum. Það er mjög auðvelt að brenna þessa góðu sósu. 
2. Bætið sírópinu og karamellusósunni við í lokin, hrærið saman og hellið yfir kökuna. 

Berið kökuna fram með flórsykri og þeyttum rjóma, ég lofa ykkur því að kakan mun slá í gegn. 

Njótið vel. 

xxx

Eva Laufey Kjaran Hermannsdóttir 

Öll hráefnin sem notuð eru í þessa uppskrift fást í verslunum Hagkaups. 

Grænmetisbaka með fetaosti.

Bökur fylltar með allskyns góðgæti, bæði sætar og ósætar eru algjört lostæti. Eins og ég sagði ykkur frá í síðustu færslu vorum við Haddi í París fyrir nokkrum vikum og auðvitað fékk ég mér Quiche Lorraine og sætar bökur með vanillubúðingi og berjum. Bökur eru franskar að uppruna og því algjör skylda að fá sér slíka ef maður er staddur í Frakklandi. Ég hef oft deilt uppskriftum að bökum hér á blogginu en það skemmtilega við bökur eru að þær eru aldrei eins og það er hægt að gera þær á svo marga vegu. Þessa grænmetisböku gerði ég fyrr í vikunni og mér fannst hún svakalega góð og verð að deila henni með ykkur, það er tilvalið að bera hana fram í brönsinum. Maður fær allt í einum bita ef svo má segja, stökkur botn fylltur með ljúffengri eggjablöndu og allskyns góðu grænmeti. Það má svo auðvitað leika sér með þessa fyllingu að vild, möguleikarnir eru endalausir. 

Grænmetisbaka með fetaosti 

Grunndeig fyrir quiche bökur

• 200 g Kornax heilhveiti 
• 100 g kalt smjör 
• smá salt 
• 1 eggjarauða 
• 3 - 4 msk ískalt vatn 

Aðferð:

1. Skerið smjörið í litla bita og hnoðið saman við heilhveitið. 
2. Saltið deigið og vinnið deigið vel saman, bætið eggjarauðu og vatni saman við og gætið þess að vinna það ekki of mikið. 
3. Pakkið deiginu inn í plastfilmu og geymið í kæli í 30 mínútur. 
4. Fletjið deigið þunnt út og setjið í form, gatið hér og þar með gaffli. Setjið bökunarpappír yfir deigið í forminu og fyllið upp með hrísgrjónum eða bökunarbaunum til að botninn formist vel. 
5. Bakið botninn við 200°C í 10 - 15 mínútur eða þar til hann hefur fengið smá lit. Á meðan botninn er í ofninum er fyllingin útbúin. 

Grænmetis- og eggjafylling 

• 1 msk ólífuolía 
• 1/2 blaðlaukur, smátt skorinn
• 1 rauð paprika, smátt skorin 
• 1 meðalstórt spergilkálshöfuð, skorið í litla bita 
• 6 Brúnegg 
• 3 msk sýrður rjómi 
• salt og nýmalaður pipar
• 1 tsk karrí 
• Fetaostur (ég notaði fetaostinn í bláu krukkunni frá MS), magnið eftir smekk 

Aðferð: 

1. Hitið olíu við vægan hita.
2. Skerið grænmetið smátt, byrjið á að steikja blaðlaukinn þar til hann fer að mýkjast. Bætið síðan öllu grænmetinu út á pönnuna og kryddið til með karrí, salti og pipar. Ég setti eins og 2 msk af vatni saman við og leyfði þessu að krauma á pönnunni í 5 mínútur. 
3. Pískið 6 egg í skál og setjið sýrða rjómann saman við og hrærið vel. Kryddið með salti og pipar. 
4. Dreifið grænmetisblöndunni yfir grunndeigið og hellið eggjablöndunni yfir. Setjið fetaostinn yfir í lokin og magnið fer eftir smekk. 
5. Bakið við 180°C í 25 - 30 mínútur eða þar til bakan er orðin stíf og gullinbrún.
6. Berið bökuna gjarnan fram með fersku salati og góðri dressingu. 

Bon appétit!

xxx 

Eva Laufey Kjaran Hermannsdóttir 

Allt hráefni sem notað er í þessa uppskrift fæst í verslunum Hagkaups. 

Íslenskar pönnukökur með Nutella og bönunum

Í morgun langaði mig svo í pönnukökur og auðvitað skellti ég í þessar einföldu og bragðgóðu pönnsur sem flestir kannast við. Íslenskar pönnukökur eru virkilega góðar og hægt að bera þær fram á ýmsa vegu t.d. með morgunkaffinu, í kaffitímanum með sultu og rjóma og svo í eftirrétt með ferskum berjum, súkkulaðisósu og ís. Það tekur enga stund að búa til ljúffengar pönnukökur og ilmurinn sem fer um heimilið er dásamlegur. Svona eins og að koma heim til ömmu á sunnudegi, það er nú ekkert sem toppar það. Amma hans Hadda bakar bestu pönnukökur sem ég hef smakkað og hún hefur gefið mér góð ráð varðandi pönnukökubaksturinn og pönnukökurnar mínar eru strax betri eftir að ég fór að hennar ráðum. Ömmur eru gull. 

Íslenskar pönnukökur

ca. 18 - 20 pönnukökur

• 2 Brúnegg
• 1 dl sykur 
• 3 dl Kornax hveiti 
• 1 tsk lyftiduft 
• 1 tsk vanilludropar
• 1/2 tsk kardimommudropar 
• smá salt 
• 3 msk brætt smjör
• 4 - 5 dl mjólk, eða eftir þörfum 

Aðferð: 

1. Þeytið egg og sykur saman í hrærivél þar til eggjablandan verður létt og ljós. 

2. Bætið þurrefnum saman við og hrærið, hellið vanillu, kardimommudropum, smjöri og mjólk saman við varlega. 

3. Hrærið í deiginu með sleif á  þessu stigi, mér finnst það langbest en þá get ég betur stjórnað áferðinni á deiginu. Pönnukökudeigið á að vera þunnt og þið getið prófað að steikja eina pönnuköku, ef ykkur finnst hún of þykk þá bætið þið einfaldlega meiri mjólk saman við þar til þið eruð ánægð. 

Berið pönnukökurnar strax fram og þá gjarnan með Nutella og bönunum eins og ég fékk mér í morgun. Annars finnst mér fátt betra en pönnukökur með sultu og rjóma. Ójá, ég gæti haldið áfram að telja upp möguleikana en nú er komið að ykkur að prófa og ég vona að þið njótið vel. 

xxx

Eva Laufey Kjaran Hermannsdóttir 

Allt hráefni sem notað er í þessa uppskrift fæst í verslunum Hagkaups.

Oreo brownies sem bráðna í munni

Vinkonur mínar komu til mín í sunnudagskaffi og bauð ég þeim meðal annars upp á þessa sjúklega góðu Oreo súkkulaðiköku sem bráðnar í munni. Þegar súkkulaði og Oreo koma saman er veisla, svo mikið er víst. Mér finnst brownies eða brúnkur alltaf svo góðar, stökkar að utan og mjúkar að innan. Það má svo líka leika sér með þessa uppskrift, skipta Oreo út fyrir annað góðgæti. Allt er nú hægt! Ég þori að lofa ykkur því að þið eigið eftir að baka þessa aftur og aftur... hún er það góð. 

Oreo brownie

• 170 g smjör
• 190 g súkkulaði 
• 3 Brúnegg + 2 eggjarauður
• 160 g púðursykur
• 1 tsk lyftiduft 
• salt á hnífsoddi
• 1 msk kakó 
• 3 msk Kornax hveiti 
• 160 g Oreo kexkökur 
• súkkulaðisósa að eigin vali 

Aðferð:

1. Hitið ofninn í 180°C. (blástur)Bræðið saman smjör og súkkulaði við vægan hita í potti. 
2. Þeytið egg, eggjarauður og púðursykur saman þar til eggjablandan verður létt og ljós. 
3. Hellið súkkulaðiblöndunni í mjórri bunu við eggjablönduna og hrærið vel saman. 
4. Bætið lyftidufti, salti, kakó,hveiti og smátt söxuðu Oreo út í deigið og blandið varlega saman með sleif. 
5. Hellið deiginu í smurt form (ég notaði 20 cm ferkantað kökuform) og bakið við 180°C í 25 – 30 mínútur. Leyfið kökunni að kólna alveg áður en þið takið hana úr forminu. Berið fram með rjóma eða ís og súkkulaðisósu sem þið sáldrið yfir. 

Nú ætla ég að skottast fram í eldhús og næla mér í aðra sneið, það er heppilegt að það var svolítill afgangur í dag haha. Ég ætla síðan að koma mér vel fyrir framan sjónvarpið. 

Svona eiga sunnudagskvöld að vera.

xxx

Eva Laufey Kjaran Hermannsdóttir 

Allt hráefni sem notað er í þessa uppskrift fæst í verslunum Hagkaups.