Fagurbleikur og bragðgóður

Fagurbleikur og bragðgóður boozt er fullkomin byrjun í góðu brönsboði. Á tyllidögum má svo fara alla leið og fylla drykkinn upp með kampavíni. Virkilega frískandi og góður drykkur sem tekur enga stund að búa til og allir elska. 

Bleika dásemdin

• 1 bolli frosin jarðarber 
• 1 bolli frosin hindber 
• 1 bolli klakar 
• 4-5 góðar matskeiðar af grísku jógúrti 
• 1 banani 
• Appelsínusafi, magn eftir smekk
• Smá skvetta af hunangi 

Aðferð: Setjið allt í blandarann í 2-3 mínútur eða þar til drykkurinn er silkimjúkur. Berið strax fram og njótið vel. 

xxx

Eva Laufey Kjaran Hermannsdóttir

Öll hráefnin sem voru notuð í þessa uppskrift fást í verslunum Hagkaups.

Frískandi berjaboozt

Frískandi berjaboozt  kemur manni í stuð, ég er að segja ykkur þetta satt. Þessa dagana er ég að vinna í nýjum þáttum og að klára lokaritgerð í viðskiptafræðinni. Ég þarf þess vegna góða orku til að koma mér í gegnum annasama daga. Boozt eru frábær að því leytinu að hægt er að skella allskonar góðum hráefnum saman og yfirleitt er útkoman ljúffeng, svo lengi sem það er ískalt og fallegt á litinn þá er ég glöð. 

Shake it out - Hlustið á þetta lag og shake-ið ykkur í gang á þessum fína fimmtudegi

xxx

Eva Laufey Kjaran Hermannsdóttir

Öll hráefnin í þessa uppskrift fást í verslunum Hagkaups.

Smoothie skál sem er stútfull af hollustu

Í fyrsta þætti af Matargleði voru fljótlegar og hollar uppskriftir í aðalhlutverki, fyrsti rétturinn sem ég gerði í þættinum var einföld smoothie skál sem fangar auga og er algjört sælgæti. Vissulega er ekki alltaf tími á morgnana til þess að nostra við morgunmatinn og auðvitað er hægt að skella drykknum í drykkjarílat og bruna út. En, þegar tími gefst þá mæli ég með að þið gerið svona skál og njótið í botn. 

Smoothie skál með allskonar berjum 

• Handfylli spínat 
• 1/2 lárpera 
• 1 bolli frosið mangó 
• 1 bolli frosin jarðarber 
• 1 msk hnetusmjör 
• 1 banani 
• 1 tsk chia fræ 
• Möndlumjólk eða appelsínusafi, magn eftir smekk 
• Klakar 
• 2 - 3 msk grískt jógúrt

Aðferð: Setjið öll hráefnin í blandarann og blandið þar til drykkurinn verður silkimjúkur, hellið í skál og skreytið að vild með allskyns góðum berjum og ávöxtum. 

Missið ekki af Matargleði Evu öll fimmtudagskvöld á Stöð 2 klukkan 19:25. 

Njótið vel. 

xxx

Eva Laufey Kjaran Hermannsdóttir 

Öll hráefni sem voru notuð í þessa uppskrift fást í verslunum Hagkaups

Frískandi bláberjaboozt með hörfræjum

Bláber eru bæði ótrúlega holl og góð, þau eru stútfull af andoxunarefnum og bæta meltinguna. Ég elska bláber og nota þau mikið í bæði matargerð og bakstur, svo er auðvitað frábært að fá sér bláber sem nasl milli mála. Eitt af því besta sem ég fæ mér er bláberja boozt, ískalt og svakalega frískandi. Dóttir mín sem er 14 mánaða að verða 15 mánaða á næstu dögum (hjálpi mér hvað tíminn er fljótur að líða) fær boozt með mér og finnst þessi einstaklega góður. Við fáum okkur oft svona drykk í kaffitímanum eftir vinnu. Mæli svo sannarlega með að þið prófið þennan drykk og þori ég að veðja að þið eigið eftir að búa hann til aftur og aftur. 

Bláberja boozt 

• 200 g Bláberjaskyr 
• Handfylli af bláberjum
• Einn banani 
• Ein msk af hörfræjum 
• Klakar 
• Möndlumjólk, magnið fer eftir smekk (fer eftir því hvað þið viljið hafa drykkinn þykkan)

Aðferð: 

1. Setjið öll hráefnin í blandarann í smá stund eða þar til drykkurinn er silkimjúkur. Mér finnst best að setja nokkra klaka út í drykkinn. 

2. Hellið drykknum í glas og njótið. 

Njótið vel. 

xxx

Eva Laufey Kjaran Hermannsdóttir 

Allt hráefni sem notað er í þessa uppskrift fæst í verslunum Hagkaups.

Morgunboozt með hnetusmjöri og döðlum

Helgin flaug áfram hratt og örugglega, ég eyddi helginni á vinnuhelgi í skólanum mínum. Að vísu fór ég líka á haustkynningu Stöðvar 2 á föstudaginn og skemmti mér konunglega með samstarfsfólki mínu, voruð þið búin að kynna ykkur haust dagskrána okkar? Hún er stútfull af frábæru efni, hér getið þið skoðað dagskrána nánar.  Eftir svona helgi þá þarf ég nauðsynlega að byrja daginn á góðum morgunmat og mig langar að deila með ykkur uppskriftinni að morgunbooztnum mínum. Ég fæ mér alltaf 1001 nótt þegar ég fæ mér boozt á Booztbarnum og þetta er mín útgáfa að 1001 nótt. Ljúffengur morgunverður með hnetusmjöri og döðlum... nammigott!

Morgunboozt með hnetusmjöri og döðlum

• 200 g vanilluskyr frá MS
• 1 banani 
• 4 döðlur 
• 1 msk gróft hnetusmjör
• 1/2 msk chiafræ eða önnur fræ t.d. hörfræ
• appelsínusafi, magn eftir smekk
• klakar

Aðferð: Setjið allt í blandarann og blandið þar til drykkurinn verður silkimjúkur. Berið strax fram og njótið!

Ég vona að þið eigið stórgóða viku framundan.

xxx

Eva Laufey Kjaran Hermannsdóttir

Allt hráefnið sem notað er í þessa uppskrift fæst í verslunum Hagkaups. 

Green Tea ljúflingur

 Mér finnst mjög gott að fá mér orkumikið og ljúffengt boozt, sérstaklega núna þegar mikið er að gera og prófin byrjuð. 

Það tekur enga stund að búa það til og booztið er stútfullt af hollustu. 

Ég mæli svo sannarlega með að þið prufið og njótið. 

Green Tea boozt

Green Tea & Blueberry safi, magn eftir smekk

1 banani

handfylli frosið mangó, smátt skorið

1 handfylli ferskt spínat

1 msk hörfræ 

rifinn engiferrót, magn eftir smekk

1 msk lime-safi

Allt saman sett í blandarann í nokkrar mínútur, það er líka gott að setja skyr eða grískt jógúrt saman við. Setjið nokkra ísmola í drykkinn og þá er hann virkilega svalandi. 

Þessir safar eru í miklu uppáhaldi hjá mér, hollir og svakalega góðir.

 Orkumikið og svalandi boozt sem bætir og kætir. 

xxx

Eva Laufey Kjaran

Þreyttur mánudagur og bleikur boozt

 Þegar að klukkan hringdi í morgun kl.05:30 þá voru augnlokin þúsund kíló, ég sem var svo ánægð að hafa farið snemma upp í rúm í gær en þá auðvitað var ég andvaka til að verða tvö. Þannig ég gat ómögulega hugsað mér að skottast af stað í Metabolic þegar að klukkan hringdi, ég vaknaði  tveimur tímum síðar og sá mjög eftir því að hafa ekki farið. Það er ekkert betra en góður íþróttatími í morgunsárið, vissulega er erfitt að vakna en orkan verður mun meiri og betri fyrir vikið eftir tímann. Það var því leitt að missa af tímanum í dag því ég gæti vel þegið smá meiri orku í dag, sumir dagar eru sumsé þreyttari en aðrir. 

Góður og orkumikill boozt er því nauðsynlegur í morgunsárið, bætir og kætir. 

Bleikur boozt 

Frosin blönduð ber

Frosinn banani, skorinn í bita

Grískt jógúrt

Hörfræ

Rifinn engiferrót

Superberries safi
Sítrónusafi

Allt saman sett í blandarann í nokkrar mínútur!

Nú er ég komin í ullarsokka, ætla að hita mér gott kaffi og halda áfram að læra. 

Ég vona að þið eigið ljúfan mánudag.

xxx

Eva Laufey Kjaran

Bláberjaboozt

Það er ekkert sem jafnast á við ferskt og gott boozt í morgunsárið. Ég nota yfirleitt frosin ber og booztin verða betri fyrir vikið að mínu mati. Ísköld og ljúffeng, alveg eins og að borða góðan ís. 

Það tekur enga stund að gera boozt, ég nota það sem ég á í ísskápnum og frystinum hverju sinni. Í morgun þá gerði ég mér bláberja boozt og hann var sérlega góður. 

Bláberjaboozt

2 bollar frosin bláber 

1 banani 

1 msk hörfræ 

1 lítill dós af vanilluskyri 

150 ml superberries safi (magn er í raun eftir smekk, þið prufið ykkur til)

Rifinn engiferrót, magn eftir smekk

Allt sett í blandarann í nokkrar mínútur. 

Það er nóg fyrir stafni í dag svo það var algjör nauðsyn að byrja daginn vel með góðum boozt. 

Ég vona að þið eigið ljúfan dag kæru vinir, það er svo föstudagur á morgun sem þýðir að helgin er að koma. Það er alltaf föstudagur, tíminn flýgur áfram. 

xxx

Eva Laufey Kjaran

Mangó Boozt

 Eins og ég hef nú sagt við ykkur áður þá er ekkert betra en gott boozt í morgunsárið. Í morgun þá gerði ég mér mangó boozt sem er að mínu mati svakalega gott. 

Mangó boozt 

1 bolli frosið mangó, í litlum bitum

1 banani

1 msk haframjöl

1/2 msk hörfræ

3 msk vanilluskyr

engiferrót, rifinn

1 - 2 bolli appelsínutrópí

Allt sett í blandarann í nokkrar mínútur. Ég vil hafa mitt boozt svolítið þykkt en þið getið auðvitað bætt við meiri safa ef þið viljið hafa það heldur þynnra. 

Mæli hiklaust með að þið prufið og njótið. 

Það er föstudagur í dag! Uppáhalds dagurinn minn í vikunni. 

Ég er að fara til Akureyrar í dag og verð þar yfir helgina á ráðstefnu stúdentahreyfinganna á Íslandi. 

Ég hef ansi góða tilfinningu fyrir helginni, það er alltaf svo gaman að koma til Akureyrar. 

Góða helgi kæru vinir

xxx

Eva Laufey Kjaran

Góð byrjun á deginum

Það er ansi ljúft að byrja daginn á því að fá sér góðan boozt. Ég reyni að vera dugleg að búa til b

oozt áður en ég fer í skólann en vissulega er ekki alltaf tími til þess. Þá daga sem ég næ að gera mér boozt þá líður mér ótrúlega vel. Það er nauðsynlegt fyrir líkamann að fá góða næringu áður en lagt er af stað út í daginn... 

Berja boozt 

1 bolli frosin blönduð ber

1 bolli frosin jarðaber

1 banani

1 msk hörfræ

1 lítil dós vanilluskyr

ca. 150 ml superberries safi

Allt saman sett í blandarann í nokkrar mínútur. 

Ég átti nokkur fersk jarðaber og lét nokkur ber ofan á booztið. 

Virkilega ferskt og gott boozt. Blandan dugir vel í tvö stór glös svo ég fékk mér eitt í morgunsárið, lét restina inn í ísskáp og fæ mér svo aftur í dag sem millimál.

Það er föstudagur í dag, uppáhalds dagurinn minn. Plan dagsins er lærdómur, hlaup og svo langar mig mikið í eitthvað gott í kvöldmatinn. Það er nú algjör skylda að fá sér eitthvað gott á föstudögum. 

Ég vona að þið eigið ljómandi fína helgi 

xxx

Eva Laufey Kjaran

Orku boozt

Orkuboozt dagsins, grænn og góður. Ljúffeng byrjun á deginum

 Handfylli spínat, 1/4 mangó, 1/2 banani, 1 msk hörfræ, rifinn engiferrót og 200 ml kókosvatn. 

Mikið er veðrið gott! Ég elska það. Nú ætla ég að koma mér vel fyrir á pallinum með eina bók áður en ég fer í vinnuna, Boston í dag. 

Ég vona að þið eigið góðan dag í blíðunni

xxx

Eva Laufey Kjaran

Orkuríkt Berjaboozt

 Líkt og ég hef sagt áður þá finnst mér mjög gott að laga mér boozt eins oft og ég get.

 Þetta boozt er svakalega gott.

Berjaboozt 

2 1/2 dl. Frosin ber (Ég skolaði þau áður en ég notaði þau)

2 Lófar spínat

1 Banani

1 1/2 msk. Hörfræ

Engiferrót eftir smekk. Rótin skræld og rifinn niður með rifjárni. 

1 Stórt glas Trópí Tríó 

Allt saman í blandarann í nokkrar mínútur. 

Orkumikið og bragðgott. 

Í morgun vaknaði ég við sólargeisla, það var dásamlegt. Dreif í sund og er búin að hafa það ansi huggulegt. Næst á dagskrá er göngutúr í sveitinni.
 Þegar veðrið er gott þá langar manni  að gera allt og njóta þess að sleppa dúnúlpunni. 

Það verður allt betra með sólinni og góðum boozt auðvitað!

Ég vona að þið eigið ljúfa helgi.

xxx

Eva Laufey Kjaran