Lífið Instagrammað

                              1. Dásamlegt sushi á Galító          2. Hugguleg stund á flugvellinum í Osló

                   3. Sameinuð. Ég og prinsarnir mínir þrír.   4. Naut mín í botn með strákunum mínum

                        5. Ég og Aldís á góðu spilakvöldi          6. Lunch á kuldalegum vetrardegi

7. Ég er aðeins búin að komast í jólaskrautið, það er bara svo kósí.     8 JólaPavloan mín 

xxx

Eva Laufey Kjaran

Skúffukaka

Þegar að ég var yngri og mamma var að baka þá stóð ég yfir henni og reyndi að hjálpa til, ég var þó einungis bara að létta henni verkin svo ég myndi nú örugglega fá sleifina sem allra fyrst til þess að sleikja deigið af henni. Mér fannst svo gaman að fylgjast með mömmu minni baka og elda, ég dáðist af henni hvað hún væri nú flínk. Einn daginn skyldi ég sko baka á hverjum degi.
 Þá gæti ég líka borðað eins mikið deig og ég vildi!

Á meðan að kakan var í ofninum þá danglaði ég mér í eldhúsinu, fylgdist með kökunni lyftast. Það var frekar erfitt að bíða á meðan að kakan kólnaði og kremið gat farið á. En þegar að kakan var komin á borðið og mamma leyfði okkur að dreifa kókosmjöli yfir þá var hamingjan í hámarki.
Nú þegar að ég skrifa þetta niður þá líður mér eins og ég sitji við eldhúsborðið á Suðurgötunni og njóti mín til hins ítrasta.

Skúffukaka 

Ég var að fletta í gegnum norsk matarblöð og rakst á ansi ljúffenga uppskrift að súkkulaðiköku sem ég varð að prufa. Ég sameinaði þá uppskrift við gamla uppskrift sem er frá henni ömmu minni. Útkoman var að mínu mati ansi dásamleg. 

5 egg 

3 dl sykur

5 dl hveiti

1 1/2 dl vatn
3 msk kakó

2 msk sterkt kaffi, uppáhellt

300 g smjör

1 tsk vanillusykur

3 tsk lyftiduft

100 g dökkt súkkulaði

Aðferð: 

Hitið ofninn í 200 °C 

1. Þeytið saman egg og sykur í nokkrar mínútur, þar til blandan verður létt og ljós

2. Sigtið þurrefnin saman og bætið saman við

3. Bræðið smjörið og bætið því saman við deigið. 

4. Bætið vatninu og kaffinu saman við að lokum. 

5. Smyrjið stórt eldfast mót eða ofnskúffu, mér finnst langbest að setja bökunarpappír líka. Þá verður mjög auðvelt að ná kökunni upp úr forminu eða skúffunni. 

6. Hellið deiginu í formið

7. Grófsaxið dökka súkkulaðið og dreifið yfir. 

8. Bakist við 200 ° C í 17 - 20 mínútur. 

 Súkkulaði á súkkulaði, held að það verði ekki betra. 

 Hér er kakan klár til þess að fara inn í ofninn. 

Kælið kökuna mjög vel áður en þið setjið á hana kremið. 

  

Einfalt súkkulaðikrem

100 g smjör, brætt
100 g flórsykur
3 msk sterkt kaffi, uppáhellt
3 - 4 msk kakó

Öllu blandað saman í hrærivél í nokkrar mínútur. 

Mér finnst gott að dreifa kókosmjöli yfir kökuna

Berið kökuna gjarnan fram með ískaldri mjólk. 

Hver biti er algjör sæla

Kaffitíminn var sumsé virkilega notalegur. 

Ég vona að þið hafið átt góða helgi kæru vinir

xxx

Eva Laufey Kjaran

Kökur er manns gaman.

 Fyrir ári síðan þá var ég beðin um að baka uppáhalds kökuna mína fyrir kökublað Gestgjafans. 

Ég bakaði skyrköku sem er í miklu uppáhaldi hjá mér og ég hef birt uppskriftina af henni á blogginu. Það var sannkallaður draumur í dós fyrir kökukerlinguna að fá að vera með í kökublaðinu. 

Á þessu ári hef ég verið svo ótrúlega heppin að fá að skrifa fyrir Gestgjafann og í þessu kökublaði þá gerði ég kökuþátt í anda Magnolía. Kökur eru í miklu uppáhaldi hjá mér og ég viðurkenni fúslega að mér líður hvergi betur en þegar ég fæ að dúllast í kökum. Ég er því óendanlega þakklát fyrir að hafa fengið það tækifæri að skrifa fyrir Gestgjafann. 

Ég elska að fá tækifæri til þess að gera eitthvað sem ég virkilega gaman af, að fá fiðring í magann og fá að vinna með svo flottu fólki og læra af þeim. Eins og ég nefndi hér fyrir ofan, þá er það draumur í dós fyrir kökukerlingu eins og mig. 

 Hamingjusöm kökukerling

Ég mæli með að þið nælið ykkur í eintak af glæsilegu kökublaði Gestgjafans. Það eru svo margar girnilegar uppskriftir sem ég hlakka til að prufa. Ég var svo heppin að fá að smakka nokkrar af kökunum sem eru í blaðinu og þær voru hverri annarri betri. Sannköllu kökusæla! 

Annars er ég mjög ánægð með að það sé að komin helgi. Mamma mín er komin til landsins og ætla ég að eyða helginni í rólegheitum heima við. Lærdómur og huggulegheit með fjölskyldunni. 

Ég vona að þið eigið góða helgi kæru vinir. 

xxx

Eva Laufey Kjaran

Snyrtivörur

Ég nota snyrtivörur daglega eins og flestir. Það eru nokkrar snyrti-og hárvörur í snyrtitöskunni minni sem eru að mínu mati mjög góðar. Hér fyrir neðan þá sjáið þið myndir af vörum sem eru í uppáhaldi hjá mér. 

 1. Foxy Curls frá Bed Head. Ég er með frekar liðað hár og þessi hárfroða hentar því afar vel fyrir mitt hár. 2. Hársprey frá Bed Head 3. Sjampó frá Redken, virkilega gott að mínu mati. Ég er með viðkvæman hársvörð og get alls ekki notað hvaða sjampó sem er. 5. Moroccanoil. Ég var búin að heyra mikið um hana og ákvað að prufa, ég mæli með að þið gerið slíkt hið sama ef þið eruð t.d. með þurrt hár. Hárið á mér er allt annað eftir að ég byrjaði að nota olíuna. 

 1. Kanebo, fljótandi farði 2. Helena Rubinstein concealer, sá besti sem ég hef prufað 3. Púður frá MAC 4. Dagkrem frá Sóley. Húðin á mér er ansi þurr og sérstaklega yfir vetrartímann, þetta dagkrem hentar minni húð afskaplega vel og kremið er lífrænt í þokkabót. 5. Andlitsmaski frá académié. 

 Kinnalitir, varalitir og augnskuggar frá MAC eru í miklu uppáhaldi. Bobbi Brown augnskuggarnir eru líka ótrúlega góðir. Ég kaupi mér yfirleitt blautan eyeliner frá GOSH, mér finnst hann reglulega góður og svo er hann frekar ódýr. Ég kaupi eiginlega aldrei sama maskarann, hef ekki enn fundið þann eina rétta. Sá sem ég nota núna er frá Maybelline. 

Ég er búin að nota þetta ilmvatn í nokkur ár. Lacoste - Touch of pink.
Frískandi og létt lykt sem ég fæ ekki nóg af.

xxx

Eva Laufey Kjaran

Ofnbakaður lax með pestó

 Ég er mjög mikið fyrir fisk og borða hann að minnsta kosti tvisvar sinnum í viku. 

Fiskur er ótrúlega hollur og svakalega góður. Mér finnst sérlega skemmtilegt að elda fisk, það er hægt að elda hann á svo marga vegu og búa til svo marga góða rétti. En það einfalda er líka ofsalega gott, ég sýð mér stundum ýsu og stappa hana saman við kartöflur og smjör. Það finnst mér afskaplega gott! 

Lax er í sérstöku uppáhaldi hjá mér. Soðinn, ofnbakaður, grillaður, grafinn, reyktur eða bara hrár á sushi. En nú er ég farin að tala eins og Stella í Orlofi, næsta færsla verður sumsé um lax í hlaupi og lax í mæjónesu. Já, nú er ég farin að tala um eitthvað allt annað en það sem ég ætlaði að tala um, ójæja víst ég er nú byrjuð. Stella í Orlofi er ein sú allra besta kvikmynd sem ég hef séð.  Ég get horft á hana aftur og aftur, atriðið þar sem hún matreiðir lax á marga vegu er ansi frábært.  Þegar að ég var yngri þá heillaðist ég af þessu atriði, réttirnir voru svo flottir hjá frú Stellu og þá sérstaklega lax í hlaupi. Mér finnst þó ansi ólíklegt að ég eigi eftir að prufa að útbúa lax í hlaupi, rétturinn heillar mig ekki jafn mikið í dag og hann gerði hér áður fyrr. 

En nóg um Stellu í bili, nú ætla ég að deila með ykkur uppskrift af virkilega einföldum rétt sem mér þykir afskaplega góður. Ég vona að þið njótið vel kæru vinir. 

 Ofnbakaður lax með pestó 

Uppskrift er fyrir fjóra manns

4 bitar lax, u.þ.b 170 g hver, roð-og beinhreinsaður

salt og nýmalaður pipar

grænt pestó, uppskrift finnið þið HÉR

8 arkir smjörpappír, 30 x 30 cm 

Hitið ofninn í 200°C. Skolið bitana og kryddið þá til  með salti og pipar. 

  Ég bjó til mitt pestó, uppskrift  finnið þið HÉR það er ansi auðvelt að búa til sitt eigið pestó og mæli ég með því, ég grófhakkaði pestóið að þessu sinni og mér fannst reglulega gott. 

  Brjótið upp á smjörpappírinn, leggið laxabitann eða bitana á pappírinn og smyrjið ca. 1 - 2 msk af pestó yfir hvern bita, en auðvitað ráðið þið magninu sjálf. 

 Pakkið laxinum vel inn og gætið þess að hvergi sé gat á pappírnum. 

Setjið inn í heitan ofn og eldið í 12 - 15 mín. 

 Meðlætið var ansi einfalt og ljúffengt. 

Sætar kartöflur og gulrætur með sesamfræjum

2 stórar sætar kartöflur 

3 - 4 gulrætur

2 msk ólífuolía

salt og pipar

Flysjið og skolið kartöflurnar og gulræturnar. Skerið bæði kartöflurnar og gulræturnar í litla bita. Hitið vatn að suðu, bætið salti saman við vatnið. Sjóðið kartöflurnar og gulræturnar í u.þ.b. 10 mín. Fjarlægið allt vatn og þerrið vel. Hitið olíu á pönnu við vægan hita, steikið í nokkrar mínútur. 

Kryddið til með salti og pipar. Að lokum bætið þið ca. 2 msk af sesamfræjum saman við og steikið í 2 - 3 mínútur til viðbótar. 

Ferskt salat

Vatnsmelóna

agúrka

spínat 

kirsuberjatómatar

fetaostur

salt og pipar

Öllu blandað saman, magn eftir smekk. Vatnsmelónan er dásamleg í þessu salati, svo fersk og góð. 

  Það tekur enga stund að útbúa þessa hollu og bragðgóðu máltíð. Mér finnst best að bera réttinn fram með einföldum kartöflum, gulrótum, fersku salati og grísku jógúrti. 

Mér finnst  mjög gaman að bera réttinn fram í bögglum, sérstaklega ef ég er með góða gesti í mat. Það er ansi skemmtilet að leyfa gestunum að opna þá sjálfir. Það er líka svolítið öðruvísi að bera fiskinn fram í bögglum og allt sem er öðruvísi í matargerð heillar mig verulega mikið.

Ég mæli hiklaust með þessum rétt, hann er virkilega ljúffengur. 

Vonandi eigið þið ljúfan miðvikudag kæru vinir. 

xxx

Eva Laufey Kjaran

GÆS

Maren systir mín er að fara að gifta sig og því var hún gæsuð um helgina. Dagurinn var ótrúlega skemmtilegur og fékk hún aðeins að finna fyrir því greyið. Að mínu mati stóð hún sig hrikalega vel og að hennar sögn var fátt betra en að fara í morgunflug daginn eftir heim til Noregs. Eitt veit ég að ég myndi ekki lifa slíka flugferð af eftir gæsun. Klapp fyrir Mareni! En ég tók margar myndir af þessum skemmtilega degi og ætla að deila nokkrum með ykkur. 

 Maren náði að safna nokkrum krónum upp í kjólinn, ýmist með söng og bananasölu.

 Smá hressing 

Vinkonur Marenar ánægðar með daginn og gæsin ansi hress. 

 Flottust í KISS búning. 

 Virkilega skemmtilegur dagur. Elsku Maren er farin aftur til Noregs sem er ansi súrt en hún kemur fljótt aftur og strákarnir með henni líka. Mikið hlakka ég til! 

Nú ætla ég að drífa mig suður, ég kveð ykkur í bili kæru vinir. Ég vona að þið eigið ljúfan dag framundan. 

xxx

Eva Laufey Kjaran

Huggulegheit í vondu veðri

Veðrið er ansi slæmt í dag eins og þið hafið nú eflaust tekið eftir. Ég fór ekki suður í morgun vegna veðurs og er því búin að vera heima við í dag. Kveikt er á mörgum kertum og nú ráða huggulegheit ríkjum. Mér dettur ekki til hug að vesenast eitthvað út úr húsi í dag. Ég fékk til mín góða gesti í smá kaffi áðan. Mikið sem það var nú huggulegt.

 Ristað brauð með allskyns áleggi.

Ferskir ávextir

 Smoothie í kampavínsglasi. 

Berjadraumur 

Frosin ber
Skyr 

Superberries safi 

Hörfræ

Magn eftir smekk. Allt sett í blandara í nokkrar mínútur. 

Sannkallaður gleðdrykkur

 Það er algjör nauðsyn að fá sér eitthvað smá sætt með kaffinu. 

Ég mæli með að þið kveikið á kertum, hitið ykkur heitt súkkulaði og komið ykkur vel fyrir upp í sófa með teppi. Þetta er algjörlega veður til þess að hafa það sérstaklega huggulegt. 

xxx

Eva Laufey Kjaran

Takk fyrir innlitið!

Bless Október og halló Nóvember! 

Þúsund þakkir fyrir heimsóknirnar í Október, mikil ósköp er ég heppin með lesendur. 

Rúmlega 87.000 heimsóknir í Október. Ég er mjööög ánægð með það og þakka ég ykkur kærlega fyrir að skoða síðuna mína. 

Nú þarf ég að koma mér af stað í skólann.

Ég vona að þið eigið góðan dag og farið varlega í umferðinni. Þessi hálka er nú sérdeilis ekki skemmtileg. 

xxx

Eva Laufey Kjaran