Brauðbakstur í Salt eldhúsi.

 Í bakhúsi á Laugaveginum leynist gullmoli sem engin áhugamannekja um matargerð ætti að láta fram hjá sér fara. Þar hefur Auður Ögn Árnadóttir innréttað kennslueldhúsið Salt eldhús. Kennslueldhús sem bíður upp á ótrúlega fjölbreytt úrval matreiðslunámskeiða, þar sem þátttakendur elda sjálfir allan mat frá grunni án þess að stuðst sé við fyrirlestrarformið. 

Á þriðjudaginn þá fór á ég námskeið hjá Salt eldhúsi. Þar lærði ég að baka dásamleg brauð frá grunni. Ég hef oft bakað brauð með ágætum árangri en mig hefur lengi langað að læra það almennilega.  Brauðbaksturinn hjá mér hefur verið svona happa og glappa, stundum eru brauðin voða fín en aðra daga ekki svo fín.  

Á námskeiðinu  lærðum við að baka frönsk og ítölsk brauð úr þremur tegundum af deigi og fengum við þátttakendurnir að prófa okkur áfram á öllum stigum brauðgerðar. Auður, eigandi Salt eldhús kennir námskeiðið og gerir það ótrúlega vel. Ég get ekki beðið eftir því að baka brauð fyrir fjölskylduna mína og vini. Það er algjör nauðsyn að kunna að baka gott brauð, það er líka eitthvað svo dásamlegt við það að baka sín eigin brauð. Þá veit maður nákvæmlega hvað fer í deigið. 

Þetta er í annað sinn sem ég fer á námskeið hjá Salt eldhúsi og ég skora á ykkur að skella ykkur á námskeið hjá Auði. Þetta er algjörlega frábært. Ég tók auðvitað nokkrar myndir af námskeiðinu sem ég ætla að deila með ykkur. 

 Skemmtilegu borðfélagarnir mínir.

 Við fengum ljómandi góða súpu og ljúffengt brauð í kvöldmatinn. 

 Hér sýnir Auður okkur hvernig við búum til einfalt og gott pestó.

 Fallegu og góðu brauðin sem við bökuðum.

 Brauðstangir fylltar með parmesan, kóríander, basilíku og ólífum. 

Það var ekki amalegt að fara af námskeiðinu með fullan poka af nýbökuðu og ljúffengu brauði. 

Ég mæli með að þið skoðið úrvalið af námskeiðum hjá Salt eldhúsi. 

xxx

Eva Laufey Kjaran

Mánudagur.

Svona leit morgunverðurinn minn út, mjög góð byrjun á vikunni sem verður heldur annasöm.  Ég er spennt fyrir verkefnum vikunnar og hlakka til að deila þeim með ykkur. Nú ætla ég hins vegar að fá mér kaffibolla númer þrjú, já það sagði enginn að það væri auðvelt að vakna snemma á mánudögum.

Vonandi eigið þið góðan dag. 

xxx

Eva Laufey Kjaran.

Súkkulaðisæla á sunnudegi.

Mig dreymdi súkkulaðiköku í nótt svo þegar ég vaknaði þá fór ég beinustu leið inn í eldhús og bakaði ljúffengan mömmudraum. Kakan stendur alltaf fyrir sínu og er stórgóð. Nýbökuð súkkulaðikaka og ískalt mjólkurglas á sunnudagsmorgni er draumabyrjun á deginum. 

Ég sit hér við stofuborðið, drekk kaffi og er að skipuleggja næstu daga. Lærdómur, skrif, vinna, námskeið og meira til er á dagskránni en mér líður alltaf mun betur þegar ég skrifa og skipulegg hvern einasta dag þegar mikið er að gera. Skemmtileg vika með spennandi verkefnum framundan. En nú ætla ég að fá mér aðra sneið af kökunni og byrja á einhverju af þessum lista sem ég er búin að punkta niður. Ég vona að þið eigið góðan dag framundan kæru vinir. 

xxx

Eva Laufey Kjaran.

Lífið Instagrammað.

 1. Kristían Mar Kjaran og Eva Laufey Kjaran. 

2. Ég og Maren systir mín að njóta þess að drekka rósavín í blíðunni í Noregi. 

 3. Fatafjör í Kolaportinu. Söludömur og uppboðsstjóri.. djók. 

4. Menntamálanefndin mín að funda á mánudegi, líf og fjör. 

5. Stórgott hádegisdeit með yndislegu Ebbu Guðný. 

6. Sumarið er næstum því komið, því er nauðsyn að setja upp gleraugun. 

7. Föstudagsblómin fínu. 

8. Hamborgari og með því á Hamborgarabúllu Tómasar. Skál í bernaise!

Þið getið auðvitað fylgst með mér á Instagram, finnið mig undir evalaufeykjaran.

xxx

Eva Laufey Kjaran.

Ítalskar kjötbollur frá grunni og ljúffeng súkkulaðimús.

 Þessi vika hefur gjörsamlega flogið áfram og verið mjög viðburðarík. Ég hlakka til að deila með ykkur þeim verkefnum sem eru framundan hjá mér. Það er svo ótrúlega gaman að stíga út fyrir þægindaramman og  grípa tækifærin þegar þau gefast. 

Það er kærkomið að komast í smá helgarfrí, fríið fer þó meira og minna í lærdóm en það er helgarfrí fyrir því. Ég ætla að elda eitthvað gott og njóta þess að vera með fólkinu mínu. Helgarmaturinn er alltaf eilítið betri. Ég ætla að deila með ykkur tveimur uppskriftum sem eiga það sameiginlegt að vera einfaldar, fljótlegar og sérlega gómsætar. Tilvalið að bjóða fjölskyldu og vinum upp á þessa rétti. 

Ítalskar kjötbollur með pastasósu. 

Þessi uppskrift er í miklu eftirlæti hjá mér. Ég sé Ítalska matarmenningu í hyllingum og get ekki beðið eftir því að heimsækja Ítalíu einn daginn. Þessi réttur færir okkur örlítið nær Ítalíu í huganum... Við byrjum á sósunni. 

Pastasósa. 

2 -3 hvítlauksrif, marin

1/2 laukur, smátt skorinn

2 dósir hakkaðir tómatar

4 dl vatn

1/2 kjúklingateningur

1 msk.fersk steinselja, smátt söxuð

1 msk. fersk basilíka, smátt söxuð

1 tsk. agave síróp

salt og pipar, magn eftir smekk

Aðferð:

Hitið olíu við vægan hita í potti, steikið lauk og hvítlauk í olíunni í 1 - 2 mínútur. Bætið öllu hinu í pottinn og leyfið sósunni að malla á meðan þið búið til kjötbollurnar. 

Kjötbollur.

500 g. nautahakk

1 dl. brauðrasp

1 laukur, smátt skorinn

3 hvítlauksrif, marin

3 msk. fersk steinselja, smátt söxuð

1 msk. fersk basílika, smátt söxuð

2 msk rifinn Parmesan ostur

1 egg, létt pískað

salt og pipar, magn eftir smekk

Aðferð:

Blandið öllum hráefnum saman með höndunum. Mótið í litlar kúlur, passið að hafa þær ekki of stórar vegna þess að þá er hætta á að þær klofni þegar þær fara ofan í sósuna. Hitið olíu á pönnu og steikið bollurnar í smá stund. Látið síðan bollurnar ofan í sósuna, leyfið því að malla við vægan hita í 15 - 20 mínútur. Mér finnst best að bera bollurnar fram með spagettí en þið getið auðvitað notað hvaða pasta sem þið viljið. Sjóðið spagettíið samkvæmt leiðbeiningum á pakkanum. Setjið spagettíið í fat og raðið síðan bollunum ofan á og hellið sósunni yfir. Rífið duglega af ferskum Parmesan osti yfir, alls ekki spara þennan dásamlega ost. Þið getið auðvitað borið réttinn fram með salati en mér finnst hann í raun bestur einn og sér með góðu brauði, helst hvítlauksbrauði. 

Svo er auðvitað nauðsynlegt að gera vel við sig um helgar og bjóða upp á ljúffengan eftirrétt. Þessi súkkulaðimús er án efa uppáhalds eftirrétturinn minn, ég geri þessa mús mjög oft en ég fæ bara ekki nóg af henni. Fljótleg, einföld og ótrúlega ljúffeng! Hægt er að nota bæði ljóst sem og dökkt súkkulaði, fer bara eftir smekk hvers og eins. 

Súkkulaðimús.

25 g smjör

200 g 70% súkkulaði

250 ml rjómi

3 stk. egg

2 msk. sykur

Bræðið smjör og súkkulaði saman við vægan hita í potti. Hellið súkkulaðinu síðan í skál og blandið þremur eggjarauðum saman við, blandað eggjarauðunum vel saman við súkkulaðið. Leggið súkkulaðiblönduna til hliðar. Þeytið rjóma og að því loknu bætið súkkulaðiblöndunni saman við, í þremur pörtum. Leggið blönduna til hliðar. Stífþeytið eggjahvíturnar og bætið sykrinum smátt og smátt saman við. Hrærið eggjahvítublöndunni mjög varlega saman við súkkulaðiblönduna með sleikju, setjið í glös eða skál. Kælið í lágmark 3 klst.

Skreytið súkkulaðimúsina með ferskum berjum og stráið smá flórsykri yfir.

Ég mæli eindregið með að þið prófið þessar uppskriftir og njótið vel, það er auðvitað aðal málið. Góða helgi kæru vinir.

xxx

Eva Laufey Kjaran.

Ó, borg mín borg.

Ég hef sagt ykkur það áður hvað ég elska að eiga gæðastundir í hádeginu með fjölskyldunni minni og vinum. Hádegisverður og góður félagsskapur, dagurinn verður bara svo miiiklu betri. Í dag fór ég ásamt vinkonu minni henni Guðrúnu Sóley á Borg Restaurant. 

Borg Restaurant er staðsettur í hjarta borgarinnar. Ég heillaðist upp úr skónum um leið og ég kom þangað inn, innréttingin á staðnum er algjört augnayndi og þjónustan ótrúlega góð. Hlýlegur og elegant veitingastaður. 

 Matseðillinn er mjög spennandi og mig langaði einna helst að prufa allt saman á einu bretti. Ég og Guðrún ákváðum að fá okkur fjarka dagsins, það er ótrúlega sniðugt ef maður vill smakka nokkra rétti. Framsetningin á réttunum er líka mjög skemmtileg og það kunnum við Guðrún svo sannarlega að meta. Réttirnir voru ótrúlega góðir, hver öðrum betri og mæli ég svo sannarlega með að þið smakkið fjarka dagsins. 

 Guðrún Sóley var ánægð með matinn og kaffið, og já auðvitað var súkkulaðibitinn gómsætur líka. 

 Ég hlakka til að fara aftur á Borg Restaurant. Ég er nú þegar farin að skipuleggja stefnumót  með manninum mínum og vinakvöld. Kokteilarnir eru svakalega girnilegir og ég sé fyrir mér ljúf sumarkvöld með vinum mínum á Borginni. 

xxx

Eva Laufey Kjaran

Kaupmannahöfn.

Í maí þá ætla ég að fara með fjórum af mínum bestu vinum til Kaupmannahafnar. Tilhlökkunin er vægast sagt mikil og ég get ekki beðið eftir því að eyða með þeim nokkrum dögum í danaveldi. Við höfðum talað svo lengi um að fara til útlanda saman en höfðum aldrei gert  neitt meira í því en að tala um það, en þegar við sáum að vinkona okkar hún Beyonce væri með tónleika í Kaupmannahöfn í maí þá vorum við ekki lengi að panta miða út. Þetta verður stórkostlegt, ég finn það á mér. 

Ég er búin að vera að skoða veitingahús á netinu og skoða hvað við getum gert í Kaupmannahöfn, ég hef ekki farið þangað síðan í útskriftarferð í 10.bekk. Mig langaði svo að athuga hvort elskulegu lesendur mínir geta ekki bent okkur á eitthvað sniðugt í Köben í sambandi við mat og afþreyingu. Mér þætti nú mikið vænt um það :) 

Ég vona að þið eigið góðan dag. 

xxx

Eva Laufey Kjaran

Appelsínu-og gulrótarsafi.

Í morgun bjó ég til appelsínu- og gulrótarsafa. Þessi safi er yfirfullur af hollustu og vítamínum, hentar því afskaplega vel að byrja daginn á einu glasi af góðum og hollum safa.  Það tekur enga stund að búa til safa, minnsta málið í eldhúsinu. Mér finnst voða gott að hefja daginn og þá sérstaklega mánudaga eftir smá helgarsukk á hollum og góðum morgunmat, þá gegnir safinn lykilhlutverki. 

 Ég bý til safa sem dugar í nokkur glös og endist mér út daginn. 

Appelsínu- og gulrótarsafi. 

500 ml ískalt vatn 

5 meðalstórar gulrætur

2 meðalstórar appelsínur

1 sítróna

4 - 5 cm ferskt engifer. 

1. Byrjið á því að flysja og skera hráefnið. 

2. Setjið vatn í blandarann, 500 ml ískalt vatn. 

3. Bætið hráefninu saman við vatnið í pörtum, ég læt fyrst gulræturnar og leyfi þeim að hakkast algjörlega áður en ég læt hitt hráefnið saman við. 

4. Ég sía safann minn í gegnum sigti áður en ég drekk hann, þið ráðið því auðvitað hvort þið viljið sía hann eður ei. 

5. Hellið safanum í glas og njótið. 

Einfalt ekki satt?

 Jæja, nú ætla ég að koma mér af stað út í vikuna... verkefnin bíða. Ég vona að þið eigið góða viku framundan kæru vinir. Við heyrumst fljótlega. 

xxx

Eva Laufey Kjaran.

Græn orkubomba.

Ég fór beinustu leið út í búð þegar ég kom heim frá Noregi í gær og fyllti matarkörfuna af hollum mat, já grænt skal það vera í apríl. Ég er að berjast við flensu og lykillinn að því að ná sér fljótt er með engiferið að vopni. Í morgun bjó ég til græna ofurbombu sem smakkaðist mjög vel. Ég á ekki safapressu svo ég nota bara blandarann minn góða 

Ég vona að þið njótið vel. 

Græn ofurbomba. 

500 ml vatn

1 sellerí stilkur

1 handfylli spínat (væn lúka) 

1/2 sítróna

4 cm engiferrót

1/4 agúrka

Aðferð: 

Byrjið á því að setja vatn og spínat saman í blandarann, bætið síðan einu og einu hráefni saman við. Blandið öllu saman í nokkrar mínútur þar til þetta er orðið að girnilegum safa. 

Ég læt safann í gegnum sigti að lokum, þið þurfið þess náttúrlega ekki en mér finnst það betra. 

Hellið safanum í glas með nokkrum klökum og njótið vel. 

xxx

Eva Laufey Kjaran

Fimm uppskriftir í léttari kantinum.

Ég veit ekki með ykkur en ég borðaði yfir mig um páskana og gott betur en það. Veisla á hverjum degi, óhóflegt súkkulaðiát og já sífellt át. Það er vissulega huggulegt en ég finn það að líkaminn minn gargar á hollustu eftir páskalúxusinn. Ég tók til fimm uppskriftir sem eru í léttari kantinum, þær eiga það allar sameiginlegt að vera fremur einfaldar, fljótlegar og góðar auðvitað. Ég ætla að borða mikið af fisk og grænmeti í vikunni, það er allavega eitt af markmiðum vikunnar. Í kvöld verður fiskrétturinn með kókosmjólkinni á boðstólnum heima hjá mér, hann er ótrúlega góður og léttur í maga. 

 Kjúklingasalat með pasta, jarðberjum og ferskum parmesan osti. Salat sem fangar augað og kitlar bragðlaukana, ótrúlega gott. 

 Ofnbakaður lax með pestó, bökuðum sætum kartöflum og fersku salati. Lax er í sérstöku uppáhaldi hjá mér og þessi réttur er algjört æði. 

 Japanskt kjúklingasalat, ljúffengt salat með dásamlegu krönsi.

 Fiskréttur með rækjum, kókosflögum og kókosmjólk. Mér finnst best að nota ýsu en þið getið auðvitað notað hvaða fisk sem er. 

Satay kjúklingasalat, þetta salat er án efa það besta sem ég hef smakkað. Ég fékk uppskriftina hjá vinkonu minni fyrir nokkrum árum og ég hef margoft eldað þetta góða salat. Mæli sérstaklega með að þið prófið þetta salat. 

Ég vona að þið njótið vel kæru vinir. 

xxx

Eva Laufey Kjaran