Ársuppgjör. Kveð árið 2013 með þakklæti efst í huga.

"Áramótaheitið mitt í ár er að einblína á litlu hlutina sem skipta máli og gera lífið skemmtilegra. Mér finnst alltaf í byrjun janúar að ég þurfi að vera með ákveðið plan og háleit markmið sem nauðsyn ber að fylgja, það veldur mér stundum smá áhyggjum því mér líður oft eins og allt þurfi að gerast strax og ég gleymi að einblína á litlu hlutina sem skipta oft öllu máli. Hér eru nokkur lítil atriði sem að mínu mati gera lífið skemmtilegra.. 

Ég ætla að fara oftar í bústað, eiga fleiri notalegar stundir með fjölskyldunni minni, elda oftar með vinkonum mínum, fara vikulega út að borða í hádeginu með vinum mínum, taka enn fleiri myndir af mat og deila uppskriftum, fara á matreiðslunámskeið, prufa að elda indverskan mat, fara oftar út að hlaupa, hrósa oftar, njóta meira, sofa út án þess að fá samviskubit, fara oftar í bíó helst á Akranesi,  fleiri datenight með manni mínum, ferðast meira innanlands, halda áfram að safna matreiðslubókum og tímaritum, hætta að hlusta á neikvæðni, fara oftar upp á Akrafjall, læra meira, lesa meira, vera óhrædd við að prufa nýja hluti og taka fagnandi á móti nýjum áskorunum. 

Aðal markmiðið er þó bara að njóta þess að vera til.

Þann fjórða janúar bloggaði ég um áramótaheit fyrir árið 2013 eins og þið sjáið hér fyrir ofan, textinn er tekinn úr þeirri bloggfærslu.

Ég hef undanfarin tvö ár tekið saman vinsælustu uppskriftir ársins og þannig gert upp við árið, en uppskriftirnr segja þó ekki alveg frá árinu og því ætla ég að breyta aðeins til og fjalla um hvern mánuð í staðinn. 

Janúar 

Janúar var fremur rólegur. Það sem stóð upp úr var málþing sem nefndin mín, Menntmálanefnd SHÍ hélt þann 19.janúar. Þar áttu nemendur og kennarar Háskóla Íslands góðan dag saman og við náðum að ræða mikilvæg málefni sem snéru að bættum menntamálum við HÍ. 

Það voru óvenju margar bakstursfærslur í janúar, það er nú líklega vegna þess að mér finnst janúar oft á tíðum svo grár og leiðinlegur, þá er alltaf dásamlegt að fá sér góða köku.


Febrúar

Ég hélt mitt fyrsta bollakökunámskeið í febrúar. Það var á Akranesi og tókst mjög vel, ég var auðvitað svolítið stressuð eins og eðlilegt er. Þetta var mjög skemmtilegt og ég endurtók leikinn nokkrum sinnum á þessu ári. Ótrúlega gaman að eyða kvöldstund með bakstursglöðu fólki. 

Mars

Hápunktur mars mánaðar var dásamlegt frí til Noregs til fjölskyldunnar minnar. Það er alltaf best að vera í faðmi fjölskyldunnar. Virkilega huggulegt páskafrí. Mig langar helst aftur í þetta fína veður og þennan góða páskamat þegar ég skoða þessar myndir. Ó jæja, það styttist nú í páska;)

Apríl 

Ég skrifaði undir útgáfusamning að matreiðslubók minni, Matargleði Evu í apríl. Mikil ósköp sem ég var ánægð þann dag og er auðvitað enn, ótrúlega gaman að fá tækifæri til þess að skrifa sína eigin bók.

Ég fór á mjög skemmtilegt bakstursnámskeið hjá Salt eldhúsi sem mér finnst standa upp úr í aprílmánuði. Þar lærði ég að baka almennilegt brauð.

Maí

Maí var líklega besti mánuður ársins. Ég held alltaf upp á maí vegna þess að ég á afmæli þann 16.maí og ég er ansi mikið afmælisbarn. Ég fór með vinum mínum út að borða á afmælisdaginn og bauð þeim síðan upp á köku. Við sátum á grasinu fyrir utan Alþingishúsið og gæddum okkur á súkkulaðiköku á sólríkum degi. Það var dásemd. 

Bókaskrifin voru í fullum gangi í maí því það styttist jú í bókaskil. 

Hápunktur ársins verð ég eiginlega að segja að hafi verið Kaupmannarhafnarferð okkar vina. Ég hef sjaldan ef bara aldrei skemmt mér eins vel. Ég prísa mig sæla að eiga svo skemmtilega, frábæra og góða vini. Já maður segir það aldrei of oft. Mikið er maður ríkur!

Júní

Júní kom og þá átti sumarið að byrja. Júní var erfiður mánuður og lífið breyttist.

Júlí

Í júlí ferðaðist ég svolítið innanlands, var að vinna sem flugfreyja hjá Icelandair og naut þess að vera með fjölskyldunni minni. Ég og Haddi fórum í bíltúr einn sunnudaginn og fórum að Paradísarlaut, þar eru myndirnar teknar hér fyrir ofan. Gullfallegur staður. 

Ágúst 

Í ágúst naut ég þess að vera með vinum mínum, tók margar myndir fyrir bókina mína og átti dásamlegan morgun í Central Park. Það er fátt betra en að hlaupa þar og njóta. 

Í ágúst byrjaði ég á því að deila uppskriftum með hlustendum Síðdegisútvarpsins, ég var með eina uppskrift á viku. Það var ofboðslega skemmtilegt og ég lærði mikið. Þau eru líka svo dásamleg í Síðdegisútvarpinu að það var alltaf gaman að koma til þeirra. 

September

September var ansi skemmtilegur. Ég átti frábærar stundir með vinum mínum. Ég og Agla hittum Stefán í New York og það voru aldeilis góðir fagnaðarfundir. Stefán Jóhann flutti til Ameríku á þessu ári og það reynist okkur vinahópnum þungbært. En sem betur fer náðum við að knúsa hann heil ósköp í september, það var dásemd. 

Október

Í október fórum við amma í ferlega ljúfa helgarferð til Noregs, það var án efa hápunktur októbermánaðar. Í lok október fóru matreiðsluþættirnir mínir, Í eldhúsinu hennar Evu í loftið á Stöð 3. 

Nóvember 

Þann 8. nóvember kom matreiðslubókin mín Matargleði Evu út. Það var mjög skrítið en á sama tíma afskaplega gaman að fá bókina í hendurnar í fyrsta sinn. Ég hélt útgáfuboð sama daga og þar átti ég stórgott kvöld með fjölskyldu, vinum og lesendum. Ég var mjög sátt og sæl með daginn. Það má segja að það hafi verið bókajól í fjölskyldunni þetta árið, það var ótrúlega gaman að sjá bækurnar okkar saman á lista yfir mest seldu handbækur eina vikuna. Við vorum mikið búin að grínast með það að fara í almennilegt bókastríð. Það hefði verið mun skemmtilegra ef hann hefði verið hér með okkur í bókafjörinu. 

 Ég bakaði ótrúlega margar bollakökur fyrir bókakynningar í nóvember og desember, spurning hvenær ég baka þær aftur ;) Það var sérlega gaman að hitta lesendur á bókakynningum. 

Ég og Haddi fluttum í nóvember til Reykjavíkur, okkur líður mjög vel hér og heimilið verður heimilislegra með hverjum deginum. 

Desember 

Desember flaug áfram. Það var mikið að gera í þessum mánuði en það var líka skemmtilegt. Ég átti skemmtilegar stundir með vinum mínum, kynnti bókina mína og var nú ekki í leiðinlegum félagsskap. Fór á jólatónleika, fór oft út að borða, hlustaði mikið á jólalög, skreytti heimilið, bakaði og eyddi jólunum með fjölskyldunni minni á Akranesi. 

Árið

Ég verð alltaf svolítið meyr á áramótunum, hef verið það frá því að ég var lítil. Að fara yfir árið sem er að líða og ganga inn í nýtt ár. Árið 2013 var mér mjög erfitt en á sama tíma mjög gott. Þetta er búið að vera mjög sérstakt ár. Í janúar 2013 stefndi ég á að einblína á litlu hlutina sem ég gerði, ég naut þess að vera til og greip þau tækifæri sem mér voru boðin. Ég lærði mjög mikið á þessu ári, stærsta lexían er líklega sú að lífið er ekki sjálfsagt og við erum ekki eilífð. Ég hef ákveðið að lifa lífinu lifandi, gera það sem mig langar til og það sem gerir mig hamingjusama. Ég vil ekki líta til baka eftir nokkur ár og hugsa "afhverju gerði ég þetta ekki". Við eigum ekki að bíða með að stökkva á tækifærin og gera það sem okkur langar til, til hvers að bíða? Við höfum ekki tíma til þess að eyða honum í bið. Að bíða eftir því að lifa og njóta. 

 Ég fékk tækifæri til þess að stíga vel út fyrir þægindarammann á árinu, ég gaf út bók og steig mín fyrstu skref í sjónvarpi. Ég er lánsöm að hafa fengið tækifæri til þess að gera það sem ég hef gaman af og hef ástríðu fyrir. Í fyrsta á ævinni er ég virkilega ánægð og sátt við þann stað sem ég er á í lífinu, oft hef ég verið að efast um hvort ég sé að gera rétt og hvort ég sé að njóta mín sem ég hef ekki eins og nú. Ég leyfi mér því að njóta stundarinnar, gera það sem mér þykir skemmtilegt og gríp tækifærin. Ég hef engu að tapa. 

Ég kveð 2013 með þakklæti efst í huga. Ég er 24 ára gömul, ég hélt að lífð myndi ekki breytast og að allir yrðu alltaf hjá okkur. En það breyttist,  lífið breyttist. Ég er svo þakklát fólkinu mínu fyrir að hjálpa mér í gegnum erfiða tíma. Fjölskyldan mín og vinir mínir, orð fá því ekki lýst hversu mikið mér þykir vænt um þau. 

Njótið þess að vera til, knúsið fólkið ykkar og eigið gott kvöld. 

 Gleðilegt nýtt ár kæru vinir, takk fyrir árið sem er að líða.

Ég tek vel á móti 2014. Ég er handviss um að það verði besta árið. ;)

xxx

Eva Laufey Kjaran Hermannsdóttir 

Gómsætar kræsingar frá Iceland.

Um jólin elska ég að fá mér eitthvað sætt með kaffinu á kvöldin eftir ljúffengan jólamat. Stundum gefst þó ekki mikill tími til þess að huga að eftirréttum. Þá er nú gott að eiga gómsætar kræsingar í frystinum þegar súkkulaðilöngunin kemur upp eða góðir gestir koma óvænt í heimsókn. Það er ansi þægilegt að eiga tilbúnar kræsingar. Ég bauð fjölskyldu minni upp á þessar kræsingar eitt kvöldið eftir jólamatinn, súkkulaðiostakaka og súkkulaðihjúpuð kirsuber. Einfalt, þægilegt og gómsætt. 

 Súkkulaðihjúpuð kirsuber eru ferlega góð, sérstaklega með kaffinu. 

Súkkulaði- og karamelluostakaka sem sló í gegn. 

 Ég mæli með að þið prófið þessar einföldu kræsingar frá Iceland. Það má nú stundum hafa þetta svolítið þægilegt og kaupa tilbúið.

xxx

Eva Laufey Kjaran

Lokaþáttur af matreiðsluþáttunum mínum, Í eldhúsinu hennar Evu. Hátíðarmatur. Kalkúnabringa með dásamlegu meðlæti.

Ofnbakaðar kalkúnabringur
Uppskriftir miðast við fjóra

• 1 kg kalkúnabringa
• smjör
• kalkúnakrydd
• salt og pipar
• 3 dl vatn
• 1 kjúklingateningur

Aðferð:
Hitið smjör á pönnu, kryddið bringuna með kalkúnakryddi, salti og pipar. Brúnið bringuna á öllum hliðum á pönnunni í örfáar mínútur. Setjið bringuna í eldfast mót. Sjóðið vatn og leysið kjúklingatening upp í vatninu, hellið vökvanum í eldfasta mótið. Gott er að setja smá smjörklípu ofan á bringuna áður en hún fer inn í ofn. Bringan er sett inn í ofn við 90°C í 1,5 klst. Gott er að stinga kjötmæli í bringuna eftir 1,5 klst. Mælirinn ætti að sýna 73–74°C. Þá er bringan tilbúin, ef ekki þá þarf hún að vera svolítið lengur í ofninum. Bringan þarf að hvíla þegar hún er komin út úr ofninum í 15–20 mínútur.

Sveppasósa

• 250 g blandaðir sveppir
• smjör
• ½ l rjómi
• 2 dl vatn + soð
• 1 tsk. góð berjasulta
• salt og pipar

Aðferð:
Skerið sveppina smátt. Steikið sveppina upp úr smjöri í potti og kryddið til með salti og pipar. Bætið síðan rjómanum saman við og leyfið sósunni að malla við vægan hita í nokkrar mínútur. Bætið út í vatni og soðinu sem kom frá kalkúnabringunni, hellið vökvanum sem er í eldfasta mótinu og bætið út í sósuna. Setjið smávegis af sultu saman við. Leyfið sósunni að malla svolítið lengur, smakkið auðvitað til og kryddið að vild.

Sætkartöflumús með piparosti

• 5–600 g sætar kartöflur
• 1–2 msk. smjör
• 90 g rifinn piparostur
• salt og pipar

Aðferð:
Sætar kartöflur eru skrældar og skornar í svipað stóra bita. Þær eru svo settar í pott og vatn rétt látið fljóta yfir. Suðan látin koma upp og soðið í 25–30 mínútur eða þar til að kartöflurnar eru orðnar mjúkar. Vatninu er síðan hellt af. Kartöflurnar stappaðar fínt með smjöri og bragðbættar með piparosti, salti og pipar.

Rósakál steikt á pönnu með beikoni og rjóma

• 500 g ferskt rósakál
• 100 g beikon
• 1½  dl rjómi
• salt og pipar

Aðferð:
Rósakálið er skolað, hreinsað og skorið í tvennt. Sjóðið rósakálið í léttsöltu vatni í 2–3 mínútur. Vatninu er síðan hellt af. Setjið smjörklípu á pönnu, skerið beikonið í litla bita og steikið á pönnunni. Bætið rósakálinu saman við beikonið og steikið í 5 mínútur við vægan hita. Rjómanum er síðan bætt út á pönnuna og kryddað til með salti og pipar. Leyfið rósakálinu og beikoninu að malla í rjómanum við vægan hita í nokkrar mínútur.

Waldorfsalat

• 2 græn epli
• 1½ sellerí
• 25 græn vínber
• 1 dós sýrður rjómi
• 2–3 msk. þeyttur rjómi
• 2 dl valhnetur, þurrristaðar á pönnu
• 1 tsk. agavesíróp
• smá súkkulaði til þess að strá yfir

Aðferð:
Kjarnhreinsið eplin, flysjið og skerið í litla bita. Skerið sellerí í litla bita. Skerið vínber í tvennt. Grófhakkið hneturnar og þurrristið á pönnu. Pískið saman sýrðan rjóma og rjóma. Blandið síðan öllu saman í skál og sáldrið smá súkkulaði yfir í lokin. Geymið í kæli þar til salatið er borið fram.

Uppskriftirnar sem ég deili með ykkur í dag voru úr lokaþættinum mínum af frumraun minni í sjónvarpi, Í eldhúsinu hennar Evu. Ég steig algjörlega út fyrir þægindarammann og er afskaplega ánægð með að hafa gripið tækifærið. Þetta var mjög skemmtilegt og lærdómsríkt ferli. Ég naut mín við gerð þáttanna og hef vonandi veitt ykkur innblástur í eldhúsinu. 

 Takk fyrir allar fallegu kveðjurnar og skilaboðin sem ég hef fengið frá ykkur í sambandi við þættina, það er ómetanlegt já, ómetanlegt að fá svo góðan stuðning frá  góðu fólki. 

Risajólaknús til ykkar allra. 

xxx

Eva Laufey Kjaran

Vinningshafinn í gjafaleiknum...

Alls tóku 411 lesendur þátt í gjafaleiknum hér á blogginu í samstarfi við Cup Company.  Það var hún Sandra Mjöll sem var númer 29 í þetta skiptið. Hún fær því þessi gullfallegu form frá Cup Company. 

Þúsund þakkir fyrir góða þáttöku í gjafaleiknum kæru vinir, það verður gjafaleikur enn á ný í vikunni. Fylgist vel með. 

Bestu kveðjur til ykkar allra 

Eva Laufey Kjaran 

Nýja heimilið

Nú erum við flutt og íbúðin okkar verður heimilislegri með hverjum deginum, það er voða gaman að koma sér fyrir. Okkur líður vel hér í borginni, ekki það að okkur hafi ekki liðið vel á Akranesi. Það er bara svo ansi gott að sleppa akstrinum, mér finnst ég eiga miklu meiri tíma. 

Um helgina er fyrsta helgin í aðventu sem þýðir að það styttist í elsku jólin, tíminn flýgur áfram og það er nóg að gera fram að jólum. Ég ætla að reyna að baka eitthvað um helgina, hálf tómlegt að eiga engar smákökur á nýja heimilinu. Það gengur auðvitað ekki. 

Kökur gera heimilið enn heimilislegra og hlýlegra. 

Svona er útsýnið mitt þennan föstudagseftirmiðdag, ég sit hér drekk ljómandi gott kaffi og borða dásamlega súkkulaðibitaköku. Ég er að undirbúa ræðu sem ég ætla að flytja á morgun á Akranesi á stefnumótunarfundi í atvinnumálum.  Ég er einnig að undirbúa jólaútvarpsþátt sem ég verð með á morgun. Ég mæli þess vegna með að þið hlustið á Útvarp Akranes (95.0) klukkan 17.30 á morgun. Jólajóla. :) 

Ég vona að þið eigið góða helgi framundan kæru vinir. Ég hugsa að það sé ekkert svo galið að setja á sig svuntuna og baka nokkrar jólasmákökur. Svona til að eiga með kaffinu eða próflestrinum. 

xxx

Eva Laufey Kjaran

Lífið Instagramað @evalaufeykjaran

 1. Bókin mín Matargleði Evu kom út þann áttunda nóvember. Það var dásamleg tilfinning að fá bókina í hendurnar eftir langa bið, ég er voða ánægð með bókina og ég er algjörlega í skýjunum yfir því hvað henni hefur verið vel tekið. Ég hélt útgáfuboðið sama daga og bókin kom út. Hátt í tvö hundruð manns komu og fögnuðu þessum áfanga með mér. Mikið sem ég er heppin að eiga allt þetta góða fólk. Ómetanlegt að eiga góða fjölskyldu, góða vini og auðvitað góða lesendur. Þúsund þakkir til ykkar allra. Án ykkar hefði ég ekki tækifæri til þess að gefa út matreiðslubók. 

 2. Rice Krispíes kakan dásamlega í tökum.

3. Kynning á Stöð 3 í Kringlunni, þættirnir mínir Í eldhúsinu hennar Evu eru einmitt sýndir á mánudögum á Stöð 3.

 4. Fríðan okkar kom heim frá Ameríku, við skáluðum auðvitað í piparkökulatte í tilefni þess. Stefán Jóhann kemur líka heim frá New York fyrir jólin, mikil ósköp sem það verður gott að fá hann heim. 

5. Það verður auðvitað allt að gerast á sama tíma svo ég hafi nú örugglega nóg að gera. Við erum flutt til Reykjavíkur. Málningarvinna og flutningar hafa einkennt síðustu daga. Íbúðin okkar verður heimilislegri með hverjum deginum og get ég ekki beðið eftir því að elda í fína eldhúsinu mínu og deila uppskriftum með ykkur. 

 6. Ég hélt bókakynningu á Akranesi eina helgina í nóvember, það var afskaplega huggulegt. Elskulegu vinkonur mínar komu auðvitað. 

7. Mér fannst voða gaman að sjá bækurnar okkar saman á lista yfir mest seldu handbækurnar, nú er bókastríðið á milli okkar farið á fullt líkt og við vorum búin að tala um og hlæja mikið af. 

 8. Að byrja daginn á því að hægelda lamb er góð skemmtun, í kvöld er matreiðsluþátturinn minn Í eldhúsinu hennar Evu sýndur á Stöð 3 klukkan 20:45. Ég mæli með að þið fylgist með - hægeldað lambalæri, gott meðlæti og ljúffengur desert. 

9. Bollakökur á leið í Ráðhúsið. Ég bauð upp á bollakökur á bókamessunni í Ráðhúsinu um helgina. Það var virkilega skemmtilegt. 

10. Í dag naut ég þess að drekka jólakaffi, borða piparkökur, hlusta á jólalög og undirbúa jólaþætti sem við tökum upp á morgun. Jólajóla. Ég er orðin mjög spennt fyrir jólunum, það styttist nú heldur betur í þau. 

Ég vona að þið hafið það rosalega gott. Ég vildi stinga nefinu aðeins hingað inn, bloggið hefur verið í smá dvala undafarið en vonandi hef ég meiri tíma næstu vikurnar. Því nú byrjar jólabaksturinn og þá vil ég auðvitað deila jólauppskriftum með ykkur. 

 xxx

Eva Laufey Kjaran

Dásamlega vetrarsúpa sem yljar

Veturinn er kominn, það má með sanni segja. Það er snjór úti og svolítið kalt, þá er nú ekkert betra að mínu mati en ljúffeng súpa sem yljar. Ég er einstaklega mikil súpukona og mér finnst fátt betra en góð og matarmikil súpa. Ég bjó til afskaplega einfalda og gómsæta tómatsúpu um daginn og ég verð að deila uppskriftinni með ykkur. Ég prófaði að nota kirsuberjatómata í dós að þessu sinni og ég verð að segja að ég er yfir mig hrifin af þeim, einstaklega bragðgóðir. Ég mæli með að þið prófið þessa súpu, það er svo huggulegt þegar heimilið ilmar af matargerð og á köldum dögum gefa súpur hita í kroppinn. 

Dásamlega vetrarsúpa

uppskrift miðast við 3 - 4 

• 1 msk. ólífuolía
• 1/2 meðalstór laukur
• 2 hvítlauksrif, pressuð
• 2 dósir tómatar, kirsuberja
• 10 - 12 fersk basilíkulauf
• 1 kjúklingateningur eða grænmetisteningur
• 4 dl vatn 
• 1 dl rjómi 
• 50 g rifinn ostur 
• salt og nýmalaður pipar, magn eftir smekk

Aðferð:

• Við byrjum á því að hita olíu við vægan hita í potti, skerum laukinn smátt og setjum út á pönnuna. Bætið hvítlauknum saman við og hrærið vel í, við ætlum bara rétt að mýkja laukinn. Því næst fara tómatar og basilíkulauf saman við, bætið kjúklinga eða grænmetistening saman við. Næsta skref er að setja allt saman í blandarann í örfáar mínútur eða þar til súpan er orðin silkimjúk. Hellið henni aftur í pottinn, bætið vatninu, rjómanum og ostinum saman við. Leyfið súpunni að malla við vægan hita í fimm - sjö mínútur. Kryddið auðvitað til með salti og pipar. Það er mikilvægt að smakka sig til, sérstaklega í súpugerð að mínu mati. 

 Ég vona að þið njótið vel kæru vinir. Ég minni svo á sjónvarpsþáttinn minn í kvöld 'Í eldhúsinu  hennar Evu' klukkan 20:45 á Stöð 3. Í kvöld ætlum við að fara í pestógerð og útbúa fljótlegan og gómsætan kjúklingarétt. 

xxx

Eva Laufey Kjaran

Tiramisú og bakaðir ávextir með vanilluís.

Tiramisú

Tiramísú er guðdómlegur ítalskur eftirréttur. Nafnið þýðir í raun „taktu mig upp“ og er þá verið að

vísa í að hann fer með okkur í hæstu hæðir, svo góður er hann. Þegar ég gæði mér á tiramisú fer

hugurinn með mig á lítinn sætan veitingastað í Bretlandi þar sem ég smakkaði réttinn í fyrsta sinn.

Það eru til margar útgáfur af tiramisú, þessi útgáfa er virkilega einföld.

• 4 egg
• 100 g sykur
• 400 g mascarpone ostur
• 2 msk Amarula líkjör (má sleppa)
• 2 tsk vanillu extrakt
• 4 dl þeyttur rjómi
• 250 g kökufingur
• (Lady Fingers)
• 6-7 dl sterkt uppáhellt kaffi
• kakó eftir þörfum

Stífþeytið egg og sykur saman þar til þykk froða myndast.

Blandið mascarpone ostinum saman við eggjablönduna og hrærið

vel. Bætið líkjörnum, vanillunni og rjómanum varlega saman við

með sleif. Leggið blönduna til hliðar í stutta stund á meðan þið

hugið að kökunum. Hellið upp á sterkt kaffi og setjið kaffið í

skál.Veltið kökufingrunum upp úr kaffinu og raðið þeim með

jöfnu millibilli í fallegt form, það er líka hægt að bera réttinn

fram í nokkrum glösum en þá gerið þið bara það sama og segir

hér á undan. Setjið helminginn af ostablöndunni ofan á kökufingurna,

stráið svolitlu kakói yfir og endurtakið leikinn þar til

hráefnið er búið. Í lokin er stráð vel af kakói yfir réttinn. Það þarf

að kæla þennan rétt í lágmark 4 klukkustundir áður en þið berið

hann fram, best finnst mér að geyma hann í kæli yfir nótt.

Ofnbakaðir ávextir með kókos og hvítu súkkulaði

Bakaðir ávextir með kókosog vanilluís. Þessi ofureinfaldi eftirréttur er einn sá allra besti. Hægt er að nota hvaða ávexti sem er, allt eftir smekk hvers og eins. 

Bakaðir ávextir

• 3 bananar
• 2 mangó
• ½ ananas
• 15 jarðarber
• 1 askja/200 g bláber
• 100 g vínber
• 3 kíví
• 180 g hvítt súkkulaði
• 4 msk kókosmjöl

Skerið ávexti í bita og setjið í eldfast form. Saxið hvítt súkkulaði og dreifið yfir ávextina, sáldrið kókosmjöli yfir og skellið inn í 180°C heitan ofn. Bakið þar til ávextirnir verða ljósbrúnir. Berið fram með vanilluís.

Útgáfudagur

Mikil ósköp var það góð tilfinning að fá bókina í hendurnar í gærkvöldi. Ég er mjög ánægð með bókina og hlakka svo til að sýna ykkur kæru vinir. Mér þætti virkilega vænt um að sjá ykkur í útgáfuhófinu mínu í dag. Verið hjartanlega velkomin!

Risaknús 

Eva Laufey Kjaran

Fylltar kjúklingbringur með dásamlegu pestó

Helgin er að skella á og þá er svo sannarlega tilvalið að gera vel við sig og sína. Ég hef lítið náð að blogga í vikunni því nú verr og miður en ég vona að þessi uppskrift bæti upp fyrir bloggleysið. Ég er sérlega hrifin af kjúkling og elda hann mjög oft eins og þið hafið örugglega tekið eftir. Fylltar kjúklingabringur eru í eftirlæti, þessi uppskrift sem ég deili með ykkur í dag er afar einföld og þægileg. Fullkomin föstudagsuppskrift ef svo má að orði komast. Ég smakkaði svo gott og ferskt pestó um daginn að ég ákvað að nota það í þennan rétt. Ég er mjög hrifin af pestó og þá sérstaklega ef það er mjög ferskt. 

Fylltar kjúklingabringur með dásamlegu pestó 

Uppskriftin er fyrir fjóra 

4 kjúklingabringur 

8 msk. hreinn rjómaostur

7 - 8 msk. pestó 

1 msk. fínt brauðrasp 

fersk steinselja, magn eftir smekk 

salt og nýmalaður pipar

ólífuolía 

kirsuberjatómatar 

Aðferð: 

Þerrið kjúklingabringurnar og skerið í þær vasa til að koma fyllingunni í. Blandið saman í skál rjómaostinum, pestóinu, svolítið af ferskri steinselju og kryddið til með salti og pipar. Setjið 1 - 2 msk af fyllingunni inn í hverja bringu. Til þess að fyrirbyggja að fyllingin myndi nú leka út þá lét ég nokkra tannstöngla til þess að halda fyllingunni inn í bringunni. Leggið bringurnar á eldfast mót, kryddið þær til með salti og pipar. Skerið kirsuberjatómata í tvennt og setjið þá á eldfasta mótið. Sáldrið bæði brauðraspinu og ólífuolíunni yfir að lokum. Setjið bringurnar inn í ofn við 180°C í 25 - 30 mínútur. Þegar bringurnar eru komnar út úr ofninum þá er gott að saxa niður ferska steinselju og sáldra yfir áður en þið berið þær fram. Ég var ekki með sósu því bringurnar voru mjög safaríkar en þið getið auðvitað búið til létta og góða sósu ef þið viljið. Gott er að bera þennan rétt fram með hrísgrjónum eða sætum kartöflum. Já  og auðvitað fersku salati. 

Einfaldur, fljótlegur og gómsætur réttur sem ég mæli með að þið prófið. 

 Þetta er pestóið góða sem ég notaði, algjör dásemd sem ég mæli með. Pestóið fæst m.a. í Hagkaup. 

Ég vona að þið eigið ljúfa helgi framundan kæru vinir. 

xxx

Eva Laufey Kjaran