Rosaleg súkkulaðibomba.

Á þjóðhátíðardaginn er svo sannarlega tilvalið að bjóða fjölskyldu og vinum heim í kaffiboð áður en haldið er í skrúðgöngu. Íslensk Hnallþóra gegnir lykilhlutverki að mínu mati í kaffiboðum á þessum fallega degi.  Súkkulaði, Rice Krispies, rjómi, fersk ber og enn meira súkkulaði. Það er blanda sem getur ekki klikkað. 

Hér kemur uppskriftin að þjóðhátíðarkökunni dásamlegu.

Þjóðgerður

Súkkulaðibotnar:

Ég notaði þessa uppskrift en þið getið auðvitað notað hvaða súkkulaðibotna uppskrift sem þið viljið. Ég mæli þó með þessum botnum en þeir eru einstaklega mjúkir og góðir. 

•       3 bollar hveiti
•          2 bollar sykur
•          3 egg
•          2 bollar venjuleg ab-mjólk
•          1 bolli olía
•          5-6 msk kakó
•          2 tsk lyftiduft
•          1 tsk natron
•          nóg af vanilludropum, magn eftir smekk

Aðferð: 

Blandið öllum hráefnum saman og hrærið í nokkrar mínútur eða þar til deigið verður slétt og fínt. Hellið deiginu í tvö smurð bökunarform. Bakið við 175°C í 25 – 30 mínútur. Mikilvægt að fylgjast með og stinga gafli í kökuna til þess að athuga hvort hún sé tilbúin, passið ykkur á því að baka ekki of lengi. Kælið kökuna smávegis áður en þið setjið á hana kremið. 

Rice Krispies botn:

·         50 g smjör

·         50 g suðusúkkulaði

·         50 g Pipp karamellusúkkulaði

·         2 msk síróp

·         2,5 bolli Rice Krispies

Aðferð:

Bræðið smjör við vægan hita, setjið súkkulaðið saman við og leyfið því að bráðna. Bætið sírópinu því næst saman við og hrærið vel í. Passið að hafa vægan hita svo blandan brenni ekki. Þegar allt er orðið silkimjúkt þá er gott að blanda Rice Krispies út í. Hellið blöndunni í form og leyfið botninum að kólna í kæli í lágmark 15 mínútur. 

Rjómakrem

•         ½ l Rjómi
•        1 msk. Flórsykur

Aðferð:

Þeytið rjóma og bætið flórsykrinum saman við í lokin.

Súkkulaðisíróp – kremið.

•          70 g smjör
•       150 g suðusúkkulaði
•       2 msk síróp

Aðferð: 

Brjótið súkkulaðið og bræðið saman við smjörið við vægan hita, ekki fara frá pottinum. Það er mjög auðvelt að brenna þessa góðu sósu. Hrærið vel í sósunni og bætið sírópinu saman við í lokin. Það er mjög mikilvægt að kæla sósuna vel áður en þið dreifið henni yfir kökuna. 

Hér eru myndir sem sýna bakstursferlið og hvernig við setjum saman kökuna. 

Ég byrja á að baka súkkulaðibotnana, ég elska þessa uppskrift sem ég nota vegna þess að hún er svo einföld.

Næsta skref er að útbúa Rice Krispies botninn, það tekur enga stund að búa hann til og það er ferlega freistandi að smakka súkkulaðidásemdina í pottinum en passið ykkur, blandan er mjög heit. 

Þá er komið að því að setja kökuna saman. Fyrst fer súkkulaðibotn, svo Rice krispies botninn og smávegis af súkkulaðisósunni. 

Ég skar niður fersk jarðarber og bláber, sáldraði smá sykri yfir og geymdi í kæli í 15 mínútur. Þess þarf ekki en mér finnst það betra. Dreifið rjómanum yfir botnana og setjið svo berin yfir rjómann. Í rauninni er kakan klár á þessu stigi. Ég ákvað þó að fara alla leið og hafa hana tvöfalda. 

Þá er kakan nánast klár. Nú þarf bara að hella sósunni yfir og skreyta með ferskum berjum. Gott er að sáldra smávegis af flórsykri yfir kökuna - bara rétt áður en þið berið hana fram. 

Þessi kaka er rosalega góð og ætti að koma öllum í hátíðarskapið. 

Ég mæli svo sannarlega með að þið prófið þessa köku kæru vinir og njótið með fólkinu ykkar. Ég vona að þið eigið góðan þjóðhátíðardag framundan. Hæhójíbbíjej! 

xxx

Eva Laufey K. Hermannsdóttir

Beikonvafinn kjúklingur og guðdómleg piparostasósa. Stórgóð grillmáltíð!

 Kjúklingaspjót eru mjög vinsæl á sumrin, þau eru ekki bara gómsæt heldur eru þau ansi einföld og fljótleg. Ég grillaði beikonvafinn kjúkling sem var mjög ljúffengur og því tilvalið að deila uppskriftinni með ykkur.

Beikonvafinn kjúklingur 

•          600 g kjúklingakjöt (best er að nota bringur eða lundir)
•          2 – 3 msk. Ólífuolía
•          1 tsk. Paprikukrydd
•          1 tsk. Kjúklingakrydd
•          1 tsk. Kummin
•          Salt og nýmalaður pipar
•          1 pakki beikon
•          1 rauð paprika, skorin í litla bita
•          Tréspjót, sem legið hafa í bleyti í 20 mínútur.

Aðferð: Best er að nota bringur sem sneiddar eru í hæfilega bita eða lundir.  Kjúklingakjötið er síðan látið liggja í nokkra stund í kryddleginum (olía og kryddin blönduð saman) t.d. um 30 mínútur. Vefjið beikoni utan um kjúklingabitana og þræðið upp á trépinna. Það er bæði fallegt og rosalega gott að þræða allskyns grænmeti á trépinnana, að þessu sinni var ég bara með rauða papriku en endilega bætið við t.d. sveppum og rauðlauk.  Gott er að pensla afganginum af kryddleginum á kjötið meðan á eldun stendur. Grillið í nokkrar mínútur, snúið spjótunum tvisvar til þrisvar sinnum.

Gott er að bera spjótin fram með grilluðum kartöflum og fersku salati. Mér finnst sérlega gott að búa til hvítlaukssmjör og setja smávegis ofan á bökunarkartöfluna mína. (Smjör við stofuhita, smátt söxuð steinselja og nokkur pressuð hvítlauksrif blöndum vel saman)

Piparostasósa

Þessi sósa er að mínu mati ein sú allra besta og hún hentar með öllum grillmat. 

•         1 msk. Smjör
•          Sveppir, magn eftir smekk. (það má sleppa þeim)
•          1 piparostur
•          ½ l matreiðslurjómi
•          1 kjúklingateningur

Aðferð: Hitið smjör í potti, skerið sveppina smátt og steikið upp úr smjörinu í smá stund. Skerið piparostinn í litla bita og bætið honum út í pottinum ásamt rjómanum. Bætið kjúklingateningnum saman við. Leyfið ostinum að bráðna við vægan hita, hrærið vel í sósunni af og til.

Það er fátt betra en góð grillmáltíð á sumarkvöldi og það er sérstaklega ánægjulegt að fá góða gesti og njóta í góðra vina hópi. 

 Góða helgi kæru vinir. 

xxx

Eva Laufey K. Hermannsdóttir

Ljúffengar kjötbollur með mexíkósku ívafi

Ég elska góðar kjötbollur og gott meðlæti. Ég fékk mikla löngun í kjötbollur eitt kvöldið í vikunni og þá eldaði ég þessar góðu kjötbollur með mexíkósku ívafi. Ótrúlega fljótlegur og bragðgóður kvöldverður sem ég mæli með að þið prófið. 

Kjötbollur með mexíkósku ívafi 

• 500 g nautahakk
• 1 egg, pískað
• 3 - 4 hvítlauksrif, pressuð
• 1/4 chili aldin, fræhreinsað og smátt saxað
• 1 meðalstór rauðlaukur, smátt saxaður
• handfylli ferskur kóríander, smátt saxaður
• handfylli mulið nachos, með saltbragði (líka hægt að nota brauðrasp)
• handfylli rifinn ostur 
• salt og pipar, magn eftir smekk

• olía eða smjör til steikingar
• 1/2 l rjómi 
• 1/4 - 1/2 kjúklingateningur 
• salt og pipar, magn eftir smekk

Meðlæti: 

• Ferskt salat (blandað salat, agúrka, lárpera og fetaostur ) og hrísgrjón

Aðferð: Blandið öllum hráefnum saman, best er að gera það með höndunum. Mótið litlar kúlur, mér finnst gott að miða við eina matskeið af deigi svo bollurnar séu hér um bil jafn stórar. Hitið olíu eða smjör á pönnu og brúnið bollurnar á öllum hliðum. Bætið rjómanum og kjúklingakrafti saman við. Kryddið til með salti og pipar. Leyfið bollunum að malla í sósunni í ca. 10 mínútur - 15 mínútur. Mér finnst sérlega gott að saxa niður kóríander og dreifa  yfir pönnuna í lokin.

Berið bollurnar fram með hrísgrjónum og fersku salati, já eða öðru góðu meðlæti. 

Einfalt, fljótlegt og gómsætt. 

xxx

Eva Laufey K. Hermannsdóttir

Frönsk súkkulaðikaka með gómsætu Pipp karamellukremi

 Þessi súkkulaðikaka verður mjög oft fyrir valinu þegar ég vil baka eitthvað sérstaklega gott. Það kannast líklega flestir við þessa ómótstæðilegu köku og þessi uppskrift er ótrúlega vinsæl. Hvaðan uppskriftin kemur veit ég ekki en mikil ósköp þakka ég þeim einstakling sem fann upp á henni. Sá á mikið lof skilið. Frönsk súkkulaðikaka á að vera dökk og þétt, svolítið eins og konfektmoli. Sumir setja hnetur í deigið og er það líka mjög gott. Persónulega finnst mér þessi kaka best með gómsætu karamellukremi og helst vil ég hafa hana svolítið kalda á meðan að öðrum þykir hún betri volg. 

 Frönsk súkkulaðikaka með gómsætu Pipp karamellukremi

Botn:

• 200 g sykur
• 4 egg
• 200 g suðusúkkulaði
• 200 g smjör
• 1 dl hveiti

Aðferð:

Hitið ofninn í 180°C (blástur). Þeytið sykur og egg saman þar til blandan verður létt og ljós. Bræðið saman smjör og súkkulaði við vægan hita. Blandið hveitinu saman við eggjablönduna, sumir vilja sleppa hveitinu en þá verður kakan sérstaklega blaut. Bætið súkkulaðiblöndunni varlega saman við í lokin. Smyrjið bökunarfom eða setjið (eins og mér þykir best) bökunarpappír í botninn á forminu og hellið deiginu í formið. Bakið kökuna í 30 mínútur. 

Pipp karamellukrem

• 150 g Pipp karamellusúkkulaði
• 70 g smjör 
• 2 msk síróp

Aðferð: 

Brjótið súkkulaðið og bræðið saman við smjörið við vægan hita, ekki fara frá pottinum. Það er mjög auðvelt að brenna þessa góðu sósu. Hrærið vel í sósunni og bætið sírópinu saman við í lokin. Hellið sósunni yfir kökuna. Þessi sósa er ómótstæðilega góð og það er tilvalið að bera hana fram með fleiri kökum eða ísréttum. Skreytið kökuna gjarnan með ferskum berjum, það gerir kökuna enn betri. 

 Ég hef alltaf verið mjög hrifin af Pipp súkkulaðinu og nú er hægt að velja um fleiri bragðtegundir t.d. karamellu og banana sem að mínu mati eru mjög góð. 

Berið kökuna fram með þeyttum rjóma eða ís, það er algjört lostæti. 

xxx

Eva Laufey K. Hermannsdóttir

Instagram @evalaufeykjaran

1. Ég heimsótti Kolbrúnu Pálínu í Höfðingjum heim að sækja. Sumarlegar uppskriftir í hollari kantinum.

2. Ég eldaði með Degi B. Eggertssyni í Höfðingjum heim að sækja. Hann eldaði stórgóða smárétti. Ég mæli með að þið prófið þessar uppskriftir en þið finnið uppskriftinar hér. 

3. Nú erum við búin að taka upp alla þættina og við Andri pródúsent fengum okkur ljúffengan ís í tilefni þess. Þetta hefur verið alveg einstaklega ánægjulegur tími og gaman að elda með skemmtilegu fólki 

4. Ég á svo yndislega vini sem héldu óvænt babyshower fyrir mig. Veitingarnar voru afskaplega fallegar og gómsætar. 

5. Hópmynd í fína veðrinu. Mikið er ég lánsöm að eiga góða og skemmtilega vini. 

6. Krúttlegur þvottur á snúrunni á þessu heimili. Styttist í litlu dömuna okkar. 

7. Þann fjórða júní var ár síðan að við kvöddum þennan góða mann, mikil ósköp sem ég sakna hans. Þessi mynd er dýrmæt. Síðasta myndin sem var tekin af okkur saman, þarna vorum við Edda systir að selja föt í Kolaportinu og hann kom og kíkti á okkur. 

8. Alltaf best að komast í sjæningu hjá Svavari mínum. Nú fer ég sátt og sæl með nýja hárið inn í sumarið. 

Ég vona að dagurinn ykkar fari vel af stað. Njótið ykkar í veðurblíðunni. 

xxx

Eva Laufey K. Hermannsdóttir

Ómótstæðilegar súkkulaðibitakökur sem bráðna í munni.

Þegar að kökulöngunin bankar á dyrnar, þá er gott að skella í einfalda uppskrift af súkkulaðibitakökum. Það er eitthvað svo sérstaklega gómsætt við þær. Best er að borða þær nýbakaðar með ískaldri mjólk. Tvenna sem klikkar aldrei. Uppskriftin er frekar stór og gerir rúmlega 30 kökur. Í þetta skiptið frysti ég helmingin af deiginu til þess að geta gripið í og skellt í ofn þegar að góða gesti ber að garði, eða einfaldlega þegar kökulöngunin kallar

Ég mæli með að þið prófið þessa uppskrift kæru vinir. Ég þori að veðja á að þið eigið eftir að verða stórhrifin af þessum kökum!

 Amerískar súkkulaðibitakökur með litríkum súkkulaðiperlum

• 2 egg 
• 230 g smjör
• 400 g sykur 
• 3 tsk vanillusykur
• 320 g Kornax hveiti
• 1 tsk lyftiduft
• salt á hnífsoddi
• 1 tsk matarsódi
• 1 poki litríkar súkkulaðiperlur frá Nóa Síríus
• 1 poki súkkulaðihnappar frá Nóa Síríus

Aðferð: 

1.  Hitið ofninn í 180°C (blástur) 
2. Þeytið saman smjör, sykur og egg þar til blandan verður létt og ljós. 
3. Blandið þurrefnum saman við og þeytið. Gott er að stoppa einu sinni til tvisvar og skafa meðfram hliðum svo allt blandist vel saman. 
4. Blandið súkkulaðiperlum og súkkulaðihnöppum saman við og blandið saman með sleif. 
5. Ég notaði tvær matskeiðar til þess að móta kökurnar. Setjið kökurnar á pappírsklædda ofnskúffu og bakið við 180°C í 10 - 12 mínútur. 
6. Kælið kökurnar svolítið áður en þið berið þær fram, mér finnst sérlega gott að bræða svolítið súkkulaði og dreifa yfir kökurnar í lokin. Það gefur kökunum þetta extra! 

 Uppskriftin að þessum kökum má finna í bókinni minni, Matargleði Evu. Ég notaði reyndar annað súkkulaði í þá uppskrift. Það er gaman að prófa sig áfram með allskyns gúmmilaði í þessa uppskrift.

 Litríkt og fallegt deig.

Kökurnar nýkomnar úr ofninum og búnar að fá súkkulaði sjæningu. Þá er ekkert annað í stöðunni en að fá sér nokkrar kökur, já nokkrar og njóta. 

 Mér finnst mjög gott að dýfa kökunum ofan í mjólkurglasið mitt. Fullkomin tvenna. 

Ég mæli með að þið prófið þessa uppskrift um helgina kæru vinir og munið að njóta, til þess er nú elsku baksturinn!

xxx

Eva Laufey K. Hermannsdóttir

Laugardagsmorgun

Helgarnar eru svo notalegar, ég byrjaði þennan laugardaginn á því að baka dásamlega kanilsnúða. Uppskriftin er hér. Ég er enn í náttfötunum og klukkan að ganga eitt. Svona dagar eru nauðsynlegir, ró og næði. Ætli það sé ekki best að loka tölvunni í bili, koma sér vel fyrir upp í sófa og kíkja í einhverjar bækur. Heimilið ilmar af kanilsnúðum og Elvis minn Presley sér um tónlistina. 

Ég vona að þið eigið góða helgi framundan. 

xxx

Eva Laufey K. Hermannsdóttir

Dúndurgott kvöldsnarl

Frosin vínber eru algjört lostæti. Mæli með að þið prófið!

Einfaldleikinn er oftast bestur

Ég er mjög og þá meina ég mjög hrifin af pasta. Ég fæ mér reglulega þennan einfalda og gómsæta pastarétt, að mínu mati er einfaldleikinn sá besti.

Ítölsk pastasósa

Þessi sósa er svakalega einföld og passar með flestum pastaréttum, ég mæli með að þið prófið ykkur áfram með þessa uppskrift.

Ólífuolía

• 1 meðalstór rauðlaukur
• 2 – 3 hvítlauksrif, smátt söxuð
• 1 dós niðursoðnir tómatar
• 1 msk. Basilíka, smátt söxuð
• Salt og pipar, magn eftir smekk
• Smá skvetta af agave sírópi

Aðferð: Hitið olíu í potti, steikið rauðlaukinn og hvítlaukinn í smá stund. Bætið tómötum og basilíku saman við og kryddið til með salti og pipar. Smakkið ykkur til og bætið endilega við kryddum sem ykkur þykir góð. Mér finnst gott að setja smá skvettu af agave sírópi í lokin, bara rétt aðeins. Ég læt sósuna í matvinnsluvél en það er ekki nauðsynlegt.

Sjóðið spaghettí samkvæmt leiðbeiningum á pakkanum og berið fram með sósunni, rifnum osti og stráið ferskri basilíku yfir. Ótrúlega einfalt og gómsætt. 

xxx

Eva Laufey K. Hermannsdóttir

Bleikar makrónur, kaffi og gott lesefni á sólríkum degi!

Að byrja daginn á því að fara út á svalir með kaffibolla og lesefni í góðu veðri er hrein dásemd. Svona byrjaði minn dagur í dag. Vonandi eru margir sólríkir dagar sem bíða okkar í sumar. Ég trúi nú ekki öðru. Svalirnar okkar eru loksins að taka á sig mynd og sólin skín þar allan daginn. 

Ég er búin að hafa það mjög gott yfir helgina, ég átti afmæli á föstudaginn og það hafa verið veisluhöld frá því að ég vaknaði þann daginn. Veisluhöldin halda áfram í dag en hún mamma mín fagnar sínum afmælisdegi í dag. Hún er sú allra besta og við ætlum að eiga huggulegan dag saman í blíðunni. 

Ég vona að þið eigið góðan dag kæru vinir. Við heyrumst fljótt aftur! Það eru þónokkrar uppskriftar sem bíða eftir að komast hingað inn. 

xxx

Eva Laufey K. Hermannsdóttir