Kjúklingur í mangóchutney með ristuðum möndluflögum.

 Veðrið er frekar ljúft í dag og þá er nú ekki annað hægt en að vera glaður. Á svona dögum er líka tilvalið að gera vel við sig í mat, þess vegna ætla ég að deila með ykkur uppskrift sem er í ótrúlega miklu uppáhaldi hjá mér. Kjúklingur í mangóchutney með ristuðum möndluflögum, það er eitthvað við mangóchutney sem fær mig til að brosa og gleðjast. Ég nota það mikið við matargerð, að vísu hef ég aldrei verið það dugleg að búa það til sjálf frá grunni en einn daginn þá ætla ég að prufa það en þangað til þá held ég áfram að kaupa tilbúið mangóchutney sem er líka mjög gott. Þegar ég elda þennan rétt þá miða ég við að það séu tveir til þrír bitar á mann, ég vil helst ekki nota kjúklingabringur vegna þess að þær eru ekki jafn bragðmiklar en þið getið auðvitað notað bringur ef þið viljið. Þessi uppskrift miðast á við tvo til þrjá manns. Njótið vel. 

Mangóchutney kjúklingaréttur.

1 – 2 msk olía

6 – 8 Kjúklingabitar

½ krukka mango chutney

1 peli rjómi  (venjulegur eða matreiðslurjómi)

Karrí (ég nota ca. 2 msk)

½ kjúklingateningur

Salt og pipar eftir smekk

Möndlur 

Aðferð:

 1. Skolið kjúklingabitana mjög vel. 

2. Hitið olíu við vægan hita og brúnið kjúklingabitana á öllum hliðum í smá stund, kryddið til með salti, pipar og karrí.

 3. Setjið kjúklingabitana í eldfast mót.

 4. Blandið rjóma og mangó chutney vel saman í potti við vægan hita

 5. Hrærið vel saman og bætið karrí, kjúklingatening, salti og pipar saman við. Það er auðvitað mjög mikilvægt á þessum tímapunkti að þið smakkið ykkur til.  Leyfið sósunni að malla við vægan hita í fimm til sjö mínútur. 

 6. Hellið sósunni yfir kjúklingabitana og setjið inn í ofn við 180°C 35 - 40 mínútur. 

Ég get lofað ykkur því að þið eigið eftir að sveima í kringum ofninn því lyktin af réttinum er  dásamlega góð. 

 Ristið möndluflögur á  pönnu. 

 Berið réttinn fram með fersku salati, hrísgrjónum og sáldrið ristuðum möndluflögum yfir... og njótið.

 Mangóchutneysósa, kjúklingabitar og möndluflögur. Þessi samsetning er algjörlega frábær og ég vildi að þið gætuð fundið lyktina af réttinum í gegnum myndir því hún er ótrúlega góð og lokkandi!

Ég mæli svo sannarlega með þessum kjúklingarétt kæru vinir. Skjótist út í búð eftir vinnu/skóla, farið heim og setjið góða tónlist á fóninn, setjið upp betri svuntuna og njótið þess að dúlla ykkur í eldhúsinu. Svo það allra mikilvægasta, bjóðið fólkinu ykkar í mat og njótið þess að borða góðan mat í góðum félagsskap.

xxx

Eva Laufey Kjaran

Besta skúffukakan.

Í dag á hann Haddi minn afmæli, tuttuguogfjögurra ára í dag. Það er samt svo svo lygilega stutt síðan að við vorum átján ára.  Ég fór snemma á fætur og bakaði þessa skúffuköku sem er í miklu uppáhaldi hjá honum. Við erum sammála um að þessi kaka sé með þeim betri, hún er svo mjúk og dásamleg. Það var virkilega huggulegt að fá sér kökusneið með morgunkaffinu, það má nú aldeilis á tyllidögum. 

 Næst þegar súkkulaðilöngunin kemur yfir ykkur þá mæli ég svo sannarlega með að þið prufið þessa köku, þið verðið ekki svikin. Hún er einföld, fljótleg og virkilega ljúffeng. 

Besta skúffukakan.

5 egg 

3 dl sykur

5 dl hveiti

1 1/2 dl vatn
3 msk kakó

2 msk sterkt kaffi, uppáhellt

300 g smjör

1 tsk vanillusykur

3 tsk lyftiduft

100 g dökkt súkkulaði

Aðferð: 

Hitið ofninn í 200 °C 

1. Þeytið saman egg og sykur í nokkrar mínútur, þar til blandan verður létt og ljós

2. Sigtið þurrefnin saman og bætið saman við

3. Bræðið smjörið og bætið því saman við deigið. 

4. Bætið vatninu og kaffinu saman við að lokum. 

5. Smyrjið stórt eldfast mót eða ofnskúffu, mér finnst langbest að setja bökunarpappír líka. Þá verður mjög auðvelt að ná kökunni upp úr forminu eða skúffunni. 

6. Hellið deiginu í formið.

7. Grófsaxið dökka súkkulaðið og dreifið yfir. 

8. Bakist við 200 ° C í 17 - 20 mínútur. 

Kælið kökuna áður en þið setjið á hana krem. 

Einfalt súkkulaðikrem

100 g smjör, brætt
100 g flórsykur
3 msk sterkt kaffi, uppáhellt
3 - 4 msk kakó

Öllu blandað saman í hrærivél í nokkrar mínútur. 

Sáldrið yfir skrauti eða kókosmjöli. 

Fáið ykkur svo ískalda mjólk og njótið þess að borða kökuna. 

 Nú kallar skólinn svo ég ætla að drífa mig suður. Ég vona að þið eigið ljúfan dag kæru vinir. 

xxx

Eva Laufey Kjaran

Árshátíð

Aldrei, í sögu minni þá hef ég verið tilbúin svona snemma fyrir árshátíð. Vanalega þá er ég með varalit út á kinn og alltof sein... það var auðvitað lítið annað í stöðunni að skella hönd á mjöðm og smæla. Greyið heimilisfólkið sem þarf að standa í því að taka myndir. 

Ég er ferlega spennt að hitta sumarvinnufélagana, það er alltaf svo gaman að hitta þau. 

Ég vona að þið eigið gott kvöld framundan. 

xxx

Eva Laufey Kjaran

Útihlaup, grænn boozt og hlauparáð fyrir byrjendur.

Mér finnst ferlega gaman að hlaupa, að vísu finnst mér ekkert sérlega gaman að koma mér í form. Þá er allt svo erfitt og ótrúlega erfitt að koma sér af stað, en um leið og maður hefur komist yfir ákveðið þrep, þegar maður finnur að maður hefur betra úthald og líkaminn styrkist þá líður manni vel. Það er svo ótrúlegt hvað hreyfing hefur áhrif á andlegu hliðina. Ég tók þá ákvörðun skömmu eftir áramót að koma mér í ágætt hlaupaform. Mig langar mjög mikið að hlaupa hálft maraþon í sumar, nú hef ég verið að hlaupa að einhverju viti í rúman mánuð og finn strax mun á mér.  Þetta kemur allt smám saman, góðir hlutir gerast hægt.

Ég er ekki að hlaupa til þess að grennast. Það er ekki mitt plan, ég vil heldur einbeita mér að því að styrkja líkamann minn og auka úthald. Í morgun þá fór ég rúma 7 km í blíðunni hér á Skaganum, það var mjög gott en það var fremur kalt. Í næstu viku stefni ég á 10 km útihlaup. 

Eftir hlaupin þá reyni ég að koma mér vel fyrir á dýnunni sem ég keypti á mjög góðu verði í N1 um daginn og geri nokkrar æfingar, það er ansi þægilegt að horfa á myndskeið á netinu af einföldum æfingum sem hægt er að gera heima við. Ég nota þessa dýnu eða bara handklæði til þess að liggja á. Geri nokkrar æfingar og teygi síðan vel á. 

 Ekkert betra en grænn og góður boozt eftir gott hlaup. Í þessum boozt er eftirfarandi: kíví, spínat, frosið mangó, banani, chia fræ, 1/4 tsk agave síróp og appelsínu trópí með aldinkjöti.

 Mig langar svo að benda ykkur á glæsilega vefsíðu sem Elísabet Margeirsdóttir sér um. Þar eru að finna upplýsingar um hlaup, mataræði og mjög góð hlauparáð fyrir byrjendur. Markmið  Elísabetu er að fræða og ráðleggja einstaklingum og hópum um heilsusamlegt matarræði og lífstíl. 

Elísabet bjó til fyrir mig hlaupaprógram sem ég hef fylgt og það er svo ótrúlega gaman að finna fyrir árangrinum. Það er stórkostleg tilfinning að geta hlaupið aðeins meira og meira í hvert skipti.  Vefslóðin er ; www.betanaering.is .

Nú ætla ég hins vegar að njóta þess að það er laugardagur í dag og fá mér eitthvað gott, var hugsa um pönnukökur með bláberjum. Er það ekki eitthvað? Ég vona að þið eigið ljúfan dag kæru vinir. 

xxx

Eva Laufey Kjaran

Pítsakvöld

 Við höfum reynt að hafa alltaf pítsu á föstudögum (ég er að reyna að skrifa pítsu frekar en pizzu, mér finnst það fallegra). Það er svo fljótlegt og skemmtilegt að baka pítsur. Í kvöld vorum við með grænmetis- og hráskinkupítsu. Við vorum þrjú með tvær  pítsur og borðuðum nánast allt upp til agna, ég tek það fúslega á mig að hafa borðað mest enda ligg ég núna eins og skata upp í sófa. Ég er að bíða eftir því að smá rúm gefist fyrir súkkulaðið mitt sem ég keypti mér fyrir helgina, nóa kropp er auðvitað það besta sem ég veit um og ég ætla að læðast í það og fá mér einn kaffibolla seinna í kvöld.

 Rólegt og huggulegt föstudagskvöld í vændum hjá mér, svona kvöld eru dásamleg.

Uppskrift finnið þið hér og hér. Mér finnst best að nota ferskan mozzarella, ég á erfitt með að standast þá freistingu að fá mér bita af og til. Það er svei mér þá fátt betra en ferskur mozzarella, namminamm.

Hafið það gott í kvöld elsku vinir.

xxx

Eva Laufey Kjaran

Halló helgi!

Föstudagur genginn í garð, það er alltaf föstudagur! Sama klisjan, vá hvað tíminn líður hratt. Föstudagar eru alltaf svolítið skemmtilegir, allir virðast vera í betra skapi og hlakka til að hafa það gott um helgina. Það skemmdi ekki fyrir að vakna á undan vekjaraklukkunni í morgun vegna þess að það var svo bjart úti. Þá rauk ég fram og bjó mér til boozt, skálaði auðvitað við þá sem vildu skála á heimilinu. (það vildi samt enginn skála, skil ekkert í þessu). 

Ég vildi bara kasta á ykkur kveðju og vona að þið séuð að eiga ljúfan föstudag. Seinna í dag ætla ég að setja inn uppskrift að ljúffengu fajitas. Svo fylgist þið endilega með ef þið hafið áhuga. 

xxx

Eva Laufey Kjaran

Japanskt kjúklingasalat

Æ það er svo gott þegar veðrið er svona fínt, ég er komin í vorfíling og ég vona svo sannarlega að þetta veður haldist. Maður veit nú aldrei, fyrir viku síðan var veðrið upp á sitt versta en í dag skín sólin og það er frekar ljúft veður. Ég fylgi veðrinu svolítið, það skiptir máli hvernig veður er úti þegar ég er að ákveða hvað ég eigi að elda. Þegar gott er veður þá kýs ég eitthvað einfalt, fljótlegt og fremur létt. Í gær eldaði ég japanskt kjúklingasalat og mikið sem það er nú gott. 

Hér kemur uppskriftin, njótið vel. 

Japanskt kjúklingasalat fyrir þrjá til fjóra. 

3 kjúklingabringur

sweet chili sósa

2 msk. sesamfræ

salatpoki (blandað salat, ég notaði spínat og klettasalat að þessu sinni)

1 mangó 

1/2 agúrka

kirsuberjatómatar, magn eftir smekk

1 rauðlaukur

balsamikedik

fetaostur (hálf krukka)

1 poki núðlur (instant súpunúðlur án krydds) 

salt og pipar 

1. Hitið 1  - 2 msk af olíu við vægan hita hita, skerið kjúklingabringurnar í ræmur og snöggsteikið í olíunni. Kryddið til með salti og pipar. Hellið sweet chili sósunni yfir (ca. 5 msk) og þetta látið malla í smástund.  

2. Skolið allt grænmetið mjög vel. Skerið grænmetið í litla bita og blandið því saman við salatið. Skvettið smávegis af balsamikediki yfir og setjið fetaostinn saman við, blandið þessu vel saman. 

3. Ég rista núðlurnar og sesamfræin á þurri pönnu. Brýt núðlurnar í smáa bita og rista þær fyrst því þær taka lengstan tíma og síðan fræin. (núðlurnar eiga að vera stökkar)

4. Raðið öllu saman í fallegt mót. Fyrst fer salatið, svo fer kjúklingurinn og núðlurnar ofan á kjúklinginn. Sáldrið fræum og ef til vil smá auka fetaosti yfir. Það er algjört smekksatriði en á þessum tímapunkti myndi ég smakka salatið og athuga hvort þið viljið setja meiri sweet chili sósu, þá er gott að dreifa svolítið af sósunni á salatið. Sósan er góð og er afskaplega góð með þessu salati. 

Berið þetta salat gjarnan fram með hvítlauksbrauði og sýrðum rjóma. 

Ótrúlega einfalt, fljótlegt og bragðmikið salat. 

Ég mæli með að þið prufið þessa uppskrift í kvöld kæru vinir. 

xxx

Eva Laufey Kjaran

11.03.13

Þá er mánudagurinn genginn í garð og mánudags boostið á sínum stað. Helgin var ferlega hugguleg og það væri alveg ágætt ef helgin myndi ekki líða svona skelfilega hratt. En þessi vika lítur vel út og margt spennandi að gerast. 

Ég vona að þið eigið góða viku kæru vinir. 

xxx

Eva Laufey Kjaran

Halló helgi!

Gleðilega helgi kæru vinir. Helgin mín byrjaði fyrir klukkustund síðan, byrjaði á því að fá mér ljúffengan safa. Er hálf orkulaus eftir frekar kalda og gráa viku en þessi  safi ætlar að kýla orkuna í gang.

Ég ætla að læra, borða góðan mat, hitta góða vini, fara að hlaupa, baka köku og almennt hafa það svolítið huggulegt um helgina. Ég vona að þið gerið eitthvað skemmtilegt, annað væri auðvitað algjör vitleysa. 

xxx

Eva Laufey Kjaran

Lífið Instagrammað.

1. Þegar mamma var á landinu þá fórum við nokkrar í ljúfan lunch á Jómfrúnni og fengum okkur smurbrauð og hvítvín. 

2.Ég og amma mín nutum þess í botn.

3.  Ég og vinkona mín hún Guðrún Selma fórum í smakk á Lemon og vorum mjög ánægðar með staðinn sem opnar einmitt á morgun. 

4. Haddi var svo elskulegur að gefa mér falleg blóm og köku ársins á konudaginn. 

 5. Ég var mjög sátt með makkarónu námskeiðið hjá Salt eldhúsi. 

6. Makkarónur eru algjört augnayndi. 

7. Fajitas. Uppskriftin kemur inn á bloggið á morgun. 

8. Systur á vorfagnaði Nýs Lífs. Edda systir prýðir forsíðu blaðsins og er sérstaklega glæsileg! 

 9. Vinkonufjör á laugardaginn. Blönduðum nokkra ljúfa kokteila. 

10. Ljúffengt sushi frá Tokyo sushi. 

Ég læt nánast daglega inn myndir á Instagram og ykkur er velkomið að fylgjast með mér þar, þið finnið mig undir evalaufeykjaran.

xxx

Eva Laufey Kjaran

Fjórar súpur sem bæta og kæta á köldum vetrardegi.

Á svona vetrardögum er ekkert betra en að ylja sér að innan með góðri og kraftmikilli súpu. Hér eru fjórar uppskriftir að súpum sem eru einstaklega bragðmiklar og góðar að mínu mati.

 Ég mæli með góðri súpu og nýbökuðu brauði í kvöld kæru vinir. 

 Mexíkósk kjúklingasúpa. Þessi súpa er án efa í eftirlæti hjá mér, ég gæti borðað þessa súpu á  hverjum degi án þess að fá nóg. Þessi súpa verður í kvöldmatinn hjá mér í kvöld. 

Brokkolísúpa með osti. Bragðmikil og ljúffeng súpa. Osturinn setur punktinn yfir i-ið.

 Bragðmikil kjúklingasúpa með eplum og karrí. Bragðlaukarnir fá svo sannarlega að njóta sín þegar þessi súpa á í hlut, ótrúlega góð súpa sem rífur svolítið í. 

 Tómatsúpa með basilíku. Einföld, bragðmikil og ljúffeng súpa. 

Kveikið á nokkrum kertum, leyfið súpunni að malla í rólegheitum og njótið þess að vera inni á meðan veðrið lætur svona leiðinlega.... og farið varlega ef þið þurfið að fara út kæru vinir.

xxx

Eva Laufey Kjaran

Franskar makkarónur.

 Í bakhúsi á Laugaveginum leynist gullmoli sem engin áhugamannekja um matargerð ætti að láta fram hjá sér fara. Þar hefur Auður Ögn Árnadóttir innréttað kennslueldhúsið Salt eldhús. Kennslueldhús sem bíður upp á ótrúlega fjölbreytt úrval matreiðslunámskeiða , þar sem þátttakendur elda sjálfir allan mat frá grunni án þess að stuðst sé við fyrirlestrarformið. 

Fyrir viku síðan fór ég ásamt vinkonu minni á námskeið hjá Salt eldhús. Þar lærðum við að baka dásamlegar Franskar makkarónur frá grunni. Húsnæðið hjá Salt eldhús er gullfallegt og umhverfið mjög notalegt. Um leið og ég kom inn í þetta fallega eldhús þá vissi ég að kvöldið yrði gott, stemnningin í eldhúsinu er ferlega góð og hugguleg. 

Við bökuðum nokkrar tegundir af frönskum makkarónum og lærðum ýmis góð ráð. Ég smakkaði fyrst makkarónur í París fyrir tveimur árum síðan og kolféll fyrir þeim. Kökurnar eru algjört augnayndi og bragðast mjög vel. Ég mæli svo sannarlega með þessu námskeiði hjá Salt eldhús fyrir þá sem hafa áhuga á því að læra að baka franskar makkarónur. 

Ég ætla að deila með ykkur nokkrum myndum sem ég tók af þessu ansi huggulega kvöldi. 

Í byrjun námskeiðins fá allir þátttakendur veglega möppu með uppskriftum og ýmsum góðum ráðum. 

 Byrjað á því að stífþeyta eggjahvítur. 

  Þessar sniðugu sílikonmottur getur þú keypt hér.

 Súkkulaðimakkarónur bíða eftir því að komast inn í ofn.

 Auður bauð okkur upp á dásamlega súpu og nýbakað brauð. Við sátum í góða stund við fallegt langborð og nutum þess að borða góðan mat í góðum félagsskap á meðan kökurnar voru í ofninum. Virkilega notaleg og afslöppuð stemmning.

 Þessi er nú svolítið mikið falleg. 

 Eldhúsið er stílhreint og afar fallegt.

 Súkkulaði á súkkulaði, gerist nú varla betra. 

 Makkarónur með kaffikremi, þær voru sérlega góðar. 

 Augnayndi.

 Kökunum raðað í falleg box og afraksturinn tekinn með heim.

 Ég var virkilega ánægð með kvöldið og er staðráðin í þvi að fara á fleiri námskeið hjá þessu fallega eldhúsi. Ég mæli svo sannarlega með að skellið ykkur á námskeið hjá Salt eldhúsi.

xxx

Eva Laufey Kjaran