Smurstöðin

Ég fór ásamt mömmu og ömmu á Smurstöðina í hádeginu. Smurstöðin er nýr veitingastaður á neðstu hæð í Hörpunni sem leggur áherslu á hágæðasmurbrauð þar sem íslenskt hráefni er í hávegum haft. Það er langt síðan ég tók myndavélina með í hádegismat en mér finnst mjög gaman að mynda góðan mat og vil gjarnan deila þeim með ykkur. Við erum allar þrjár mikið fyrir smurbrauð og vorum allar mjög ánægðar með matinn. Smurbrauðin voru eins góð og þau eru falleg, algjör veisla fyrir bragðlaukana. Smurstöðin er frábær veitingastaður sem ég mæli með að þið prófið.

Laxa smurbrauðið er ómótstæðilega gott. 

Fallega og góða amma mín, hún verður 75 ára í næstu viku og við erum byrjaðar að fagna.

Hér skálar móðir mín við mömmu sína. 

Roastbeef smurbrauðið, ég get ekki hætt að hugsa um þessa brauðsneið. 

Ég vona að þið eigið góðan dag framundan. 

xxx

Eva Laufey Kjaran Hermannsdóttir

Fjögurra mánaða

Ingibjörg Rósa er oðin fjögurra mánaða. Hún stækkar svo hratt og er orðin svo dugleg og flott stelpa. Þvílík forréttindi að fá að vera mamma hennar og njóta þess að vera með henni alla daga. 

Þegar hún er sofandi þá er ég í tölvunni að skoða myndir af henni, þessi mynd er til dæmis í miklu uppáhaldi. Lífið hefur vissulega breyst á þessum fjórum mánuðum, til hins betra. 

xxx

Eva Laufey K. Hermannsdóttir

Instagram @evalaufeykjaran

 1. Jólabaksturinn er hafin hér í Vesturbænum. 

2. Fallega stúlkan mín, hún er orðin fjögurra mánaða. Tíminn flýgur áfram.

 3. Smákökukeppni Kornax og Gestgjafans. Brot af kökunum sem við smökkuðum. 

4. Við mæðgur ætlum alltaf að vera í stíl, það held ég nú.

 5. Uppáhöldin mín tvö, Ingibjörg Rósa alltaf í stuði.

6. Vinkonufögnuður. 

7. Það eru fleiri en ég sem vilja kaffi og muffins. 

8. Áfram með smjörið... smákökufjörið er rétt að byrja. 

xxx

Eva Laufey K. Hermannsdóttir

Sunnudagsbaksturinn

Á sunnudögum er tilvalið að baka eitthvað gott og bjóða fjölskyldu og vinum í kaffi. Ég tók saman nokkrar uppskriftir sem eiga það sameiginlegt að vera ljúffengar. Sjálf ætla ég að baka og fá mitt fólk í kaffi. Það er fátt notalegra. Ég vona að þið eigið góðan sunnudag framundan.  

Amerískar súkkulaðibitakökur. Þessar þurfa allir að prófa. Uppskrift hér. 

Oreo bollakökurnar dásamlegu. Uppskrift hér. 

Kanilsnúðar eru alltaf klassískir og alltaf jafn góðir. Uppskriftin er hér.

Ef ykkur langar í gómsæta hnallþóru þá er þessi án efa málið, súkkulaðibomban góða. Uppskrift hér.

Bananakaka með rjómaostakremi og ristuðum pekanhnetum. Uppskrift hér.

 Þessi vanilluskyrkaka með hvítu súkkulaði er alltaf í miklu eftirlæti hjá mér. Uppskrift hér.

xxx

Eva Laufey K. Hermannsdóttir

Kjúklingur Saltimbocca

Kjúklingur Saltimbocca er Ítalskur réttur og nafnið þýðir eiginlega „Stekkur upp í munninn“ og vísar til þess hve ljúffengur rétturinn þykir. Í upprunalegu uppskriftinni er kálfakjöt notað en oft er kálfakjötinu skipt út fyrir kjúkling. Þessi réttur samanstendur af þunnum kjúklingabringum, hráskinku og salvíublöðum. Þetta er réttur sem á eftir að koma ykkur á óvart. Hann er mjög einfaldur en mamma mía hvað hann er góður. Sannkallaður sælkeraréttur sem þið ættuð að prófa.

Rétturinn er borinn fram með kartöflumús og ljúffengri hvítvínssósu. Njótið vel!

Kjúklingur Saltimbocca.

•     Fjórar kjúklingabringur
•     8 hráskinkusneiðar
•     10 – 12 fersk salvíublöð
•     Salt og nýmalaður pipar
•     1 – 2 msk. Ólífuolía

 Aðferð: Skerið kjúklingabringur í tvennt og kryddið með salti og pipar. Leggið eitt salvíublað ofan á kjúklingabringuna og vefjið hráskinkunni utan um hvern bita. Hitið ólífuolíu á pönnu og steikið bringurnar í smá stund á hvorri hlið eða þar til þær eru brúnaðar á öllum hliðum. Leggið bringurnar því næst í eldfast mót og inn í ofn við 180°C i 20 mínútur. Á meðan kjúklingurinn er í ofninum útbúið þið sósuna og kartöflumús.

Kartöflumús með parmesan osti

•      500 g soðnar kartöflur 
•      30 g smjör
•      1 dl mjólk
•      Salt og nýmalaður pipar
•      1 dl rifinn parmesan ostur

Aðferð: Afhýðið kartöflurnar og bræðið smjörið. Setjið kartöflurnar út í smjörið og takið pottinn af hitanum, stappið kartöflurnar vel saman við smjörið og hellið volgri mjólk út í smáum skömmtum. Bætið ostinum við og stappið öllu vel saman þar til réttri áferð er náð, það er smekksatriði hvað þið notið mikla mjólk en þið finnið það um leið ef þið þurfið að bæta við mjólk. Bragðbætið með salti og pipar.

Hvítvínssósa

• ·         2 msk. Smjör
• ·         6 - 7  fersk salvíublöð, smátt skorin
• ·         700 ml hvítvín
• ·         1 stk. Kjúklingakraftur
• ·         Nýmalaður pipar

Aðferð: Bræðið smjörið á pönnu og steikið salvíublöðin. Hellið hvítvíninu út á og bætið kjúklingakraftinum saman við. Kryddið til með pipar.  Leyfið sósunni að sjóða í smá stund, lækkið þá hitann og leyfið sósunni að malla í nokkrar mínútur eða þar til kjúklingurinn er tilbúinn.

Góða helgi kæru lesendur.

xxx

Eva Laufey K. Hermannsdóttir

Að velja bestu jólasmákökuna....

Ég var svo heppin að vera dómari í smákökusamkeppni Kornax og Gestgjafans sem haldin var í október síðastliðinn. Það bárust 160 uppskriftir og sýnishorn af þeim til keppninnar. Það var ekki auðvelt að velja fyrstu sætin því það voru svo margar ljúffengar kökur. Ég er mjög ánægð með kökurnar sem eru í efstu sætunum og ég mæli með að þið nælið ykkur í glæsilegt kökublað Gestgjafans og prófið þessar uppskriftir.  Nú er sko tími til að prófa nýjar sortir og byrja að baka. 

Ég er byrjuð að baka fyrir jólin, er búin að baka þrjár sortir og hlakka til að deila með ykkur uppskriftum að ljúffengum jólasmákökum á næstu dögum. Þessi rjómaostakaka sem þið sjáið á myndinni hér fyrir ofan er án efa uppáhalds kakan mín í  ár, hún er alltof góð og ég segi það vegna þess að ég get ómögulega hætt að næla mér í eina og eina.

Efstu sætin. Þessar kökur eru algjört sælgæti. 

Ég er afskaplega hrifin af bökkum og mér finnst þessi handgerði viðarbakki mjög fínn undir matreiðslublöðin mín og kertin... og blómin. Mæli með að þið skoðið úrvalið hjá Snúrunni, þar finnið þið ótrúlega fallegar vörur. 

Hér má sjá brot af kökunum, ójá þetta var sko smákökukeppni í lagi. 

Hér erum við dómararnir mjög södd og sæl eftir allt kökuátið. Með mér í dómnefnd voru Albert Eiríksson, Sigríður Bragadóttir og Auðjón Guðmundsson. Það var afskaplega gaman að taka þátt í að velja bestu jólasmákökuna. 

xxx

Eva Laufey K. Hermannsdóttir

Mikilvægi kaffibollinn

Mikilvægi mánudagskaffibollinn. Þegar Ingibjörg Rósa tekur fyrsta lúrinn sinn þá fæ ég mér einn ljúffengan bolla. Morgunkaffið er nefnilega alltaf best. Ég vona að ykkar vika fari vel af stað. 

xxx

Eva Laufey K. Hermannsdóttir

Kósí kvöld

Það er fátt sem jafnast á við kósí kvöld með fjölskyldunni. Dagskrá kvöldsins inniheldur sushi og sjónvarpsgláp. Ég hlakka alltaf til að horfa á Stelpurnar á Stöð 2 á laugardagskvöldum, mér finnst þær alveg frábærar. Svo er ég dottin inn í Homeland, ég er nýbyrjuð að horfa á þessa þætti og það er algjör snilld að geta horft á þá á frelsinu. Mæli með þeim ef ykkur vantar þætti til að horfa á. 

Ég vona að þið eigið gott kvöld kæru lesendur. 

xxx

Eva Laufey K. Hermannsdóttir

Æðislegt granóla sem allir ættu að prófa.

Ég er með æði fyrir granóla þessa dagana og mér finnst fátt betra en grísk jógúrt með því í morgunmat eða sem millimál. Það er ferlega einfalt að útbúa það og líka miklu skemmtilegra en að kaupa það tilbúið út í búð. Ég er yfirleitt aldrei með það sama í mínu granóla, ég nota bara það sem ég á til í skápunum hverju sinni. Það er ekkert heilagt við þessa uppskrift sem ég deili með ykkur í dag, hægt er að breyta og bæta hana að vild. Ég þori að lofa því að þið eigið eftir að gera ykkar eigið granóla aftur og aftur.

Ljúffengt granóla

• 8 dl hafrar
• 2 dl möndlur
• 2 dl pekanhnetur
• 2 dl sólblómafræ
• 2 dl graskersfræ
• 2 msk hörfræ
• 2 dl eplasafi
• 1 dl kókosolía
• 2 - 3 msk. gott hunang
• ½ tsk vanilluduft

Aðferð: Hitið ofninn í 170°C. Blandið öllum hráefnum saman í skál og hrærið. Klæðið bökunarplötu með bökunarpappír og dreifið múslíinu á plötuna. Bakið í ca. 30 mínútur eða lengur. Fylgist vel með og hrærið nokkrum sinnum í blöndunni á meðan bökunartíma stendur.  Kælið vel áður en þið berið fram. Bætið t.d. þurrkuðum berjum eða kókosflögum við múslíið þegar það kemur út úr ofninum.

Hér fyrir neðan eru myndir sem sýna ykkur aðferðina sem er sérstaklega einföld. 

Nú á ég ljúffengt granóla sem ég hlakka til að fá mér í fyrramálið. Ég vona að þið eigið góða helgi framundan kæru lesendur. 

xxx

Eva Laufey K. Hermannsdóttir

Pekanbaka

Fyrir rúmlega ári deildi ég þremur uppskriftum í Nýju Lífi. Ég áttaði mig á því áðan að ég er ekki búin að setja inn þessar uppskriftir á bloggið sem er algjör hneisa því þessar uppskriftir eiga það sameiginlegt að vera ljúfengar. Í dag deili ég með ykkur uppskrift að uppáhalds bökunni minni, pekanbökunni dásamlegu. Ég fæ ekki nóg af pekanhnetum og hvað þá ef þú blandar þeim saman við súkkulaði. Þessa böku ættu allir að prófa. Njótið vel!

Pekanbaka með súkkulaði

• 100 g smjör, við stofuhita
• 185 g hveiti
• 1 eggjarauða
• ¼ tsk salt
• ½ tsk vanilla extract
• 2 tsk kalt vatn.

Aðferð:

Hnoðið öllu saman með höndum, sláið deiginu upp í kúlu og geymið í kæli í 15 – 20 mínútur. Stráið smávegis af hveiti á borð og fletjið deigið út, setjið deigið í bökuform og útbúið fyllinguna.

Fylling

• 50 g smjör, við stofuhita
• 180 g sykur
• 220 g ljóst síróp
• 3 egg
• 1 tsk. Vanilla extract
• 130 g súkkulaði, helst dökkt (70%)
• 170 g pekanhnetur

Aðferð:

Hitið ofninn í 180°C. Þeytið saman smjör og sykur þar til blandan verður ljós og létt, bætið sírópinu saman við og hrærið í 1 – 2 mínútur. Bætið eggjum saman við, einu í einu og hrærið vel á milli. Saxið súkkulaði og hnetur fremur smátt og bætið saman við ásamt vanillu. Hellið fyllingunni ofan í bökunskelina og bakið við 180°C í 40 – 45 mínútur. Berið bökuna fram með þeyttum rjóma eða ís.

xxx

Eva Laufey K. Hermannsdóttir

Glútenlausar og gómsætar bláberjapönnukökur

Glútenlausar og gómsætar bláberjapönnukökur

• 5 dl Finax fínt  mjöl
• 4 msk brætt smjör
• 1 tsk. Vínsteinslyftiduft
• Salt á hnífsoddi
• 2 tsk. Góð vanilla (vanilla extract eða vanillusykur)
• 2 dl mjólk
• 1 ½ dl AB mjólk (eða önnur hrein súrmjólk)
• 1 – 2 msk sykur
• 2 – 3 dl bláber (fersk eða frosin)

 Aðferð:

1. Sigtið saman hveiti, lyftiduft og salt.
2. Bræðið smjör, leggið til hliðar og kælið.
3. Pískið eitt egg og mjólk saman. 
4. Næsta skref er að blanda öllum hráefnum vel saman í skál með sleif. Bætið bláberjum saman við deigið í lokin með sleif.
5. Leyfið deiginu að standa í 30 - 60 mínútur áður en þið steikið pönnukökurnar.
6.  Hitið smjör á pönnukökupönnu og steikið pönnukökurnar í ca. mínútu eða tvær á hvorri hlið. Þær eru tilbúnar þegar þær eru gullinbrúnar. 

Berið pönnukökurnar fram með ljúffengu sírópi og ferskum berjum. 

Njótið helgarinnar. 

xxx

Eva Laufey K. Hermannsdóttir