Grænt pestó

Mér finnst pestó alltaf svakalega gott. Mér finnst pestó gott með kjúkling, pasta, fisk og sérlega gott með brauði. 

Hægt að nota það með svo mörgu. Sérlega núna eftir páskana, þá þrái ég eitthvað létt og gott. Búin að borða of mikið af kjöti og þungum máltíðum. 

Hér kemur uppskrift að grænu pestó. 

85 g  Furuhnetur

1 Búnt basilíka

150 g. Parmesan ostur, rifinn

1 Hvítlauksgeirar

1 dl ólífuolía

salt og pipar ftir smekk

Setjið allt í matvinnsluvél, smakkið ykkur til og frá með salt og pipar. 

Einfaldara verður það ekki. Sérlega gott pestó sem á alltaf vel við. 

xxx

Eva Laufey Kjaran

Páskadagur

Svaf út og byrjaði daginn á súkkulaðiáti. Það má einu sinni á ári. 

Ég vona að þið eigið ljúfan dag. 

Gleðilega páska.

xxx

Eva Laufey Kjaran

Gleðilega páska

Í hélt ég smá páskakaffi og bauð meðal annars upp á þessa súkkulaðiköku með gulu kremi. 

Ég prufaði að laga vanillubúðing frá dr.Oetker og lét búðingin á milli kökubotnanna ásamt ferskum jarðaberjum og hvítu súkkulaði sem ég reif niður. 

Virkilega huggulegt og heimsins best að vera með famelíunni. 

Ég vona að þið hafið það huggulegt um páskana. 

xxx

Eva Laufey Kjaran

05.04.12

Gaman að fá að vera memm í Monitor

xxx

Eva Laufey Kjaran

Chilikjötbollur með spaghettí og sósu.

Kjötbollur með spaghettí og sósu. 

500 gr. Nautahakk

1 dl. Brauðmylsna

½ Laukur, smátt niðurskorinn

½ Rautt chili, smátt niðurskorinn

3 Hvítlauksrif, marin

3 msk. Fersk steinselja, söxuð.

1 msk. Fersk basilika, söxuð

1 msk. Rifinn parmesan ostur

1 msk. Ólífuolía

1 Egg

Salt og grófmalaður pipar

Kryddið nautahakkið með salt og pipar, bætið brauðmylsnu, basilikku, steinselja, lauk, hvítlauk, parmesan, chili olíu og eggi saman við, blandið mjög vel saman og mótið litlar bollur. Steikið í um tíu mínútur við miðlungshita upp úr olíu á stórri pönnu. Mikilvægt að snúa bollunum reglulega við svo þær steikist jafnt. Ég lét þær sömuleiðis inn í ofn við 180°C í fimm mínútur.

Berið fram með speghettíi, sósunni og rifnum parmesan. 

Ljúffeng og einföld pastasósa.

1 msk. Olífuolía

1 laukur, smátt skorinn

4 hvítlauksrif, marin

4 msk. Basilika, söxuð

2 dósir niðursoðnir tómatar

1 dl. Vatn

½ kjúklingateningur

1 msk. Rifinn parmesan ostur

Salt og pipar

Mýkið lauk og hvítlauk í olíu á pönnu við vægan hita, bætið niðursoðnum tómötum saman við og vatninu. Látið malla í nokkrar mínútur, bætið síðan kjúklingateningnum, salti og pipar saman við. Að lokum fer söxuð basilika og parmesan ostur saman við  og látið malla í smá stund í viðbót. Smakkið ykkur til, það virkar oftast best. Kannski viljið þið meiri pipar eða meiri basiliku! Þið finnið það. Ótrúlega einföld og góð sósa.

Við vorum mörg í mat hjá mömmu í gær svo ég þrefaldaði uppskriftina. 

Allir voru sáttir og sælir eftir matinn. 

Það besta er að það var afgangur svo ég get fengið mér þessar dásamlegu kjötbollur núna í hádegismat. 

Ég mæli hiklaust með því að þið prufið þessa uppskrift. 

Ég vona að þið eigið ljúfan dag. 

xxx

Eva Laufey Kjaran

Apríl!

Ég vaknaði í morgun við fuglasöng og sólargeisla. Hjartað mitt fylltist af gleði, ég stökk upp úr rúminu, kveikti á kaffikönnunni og út á pall. Vissulega var hitastigið ekkert ótrúlega hátt en ég náði mér bara í peysu. Settist út með kaffi, safa og matreiðslublöð í leit að innblástri. Það var ansi notaleg byrjun á deginun.

Í vikunni þá ætla ég að elda, baka, njóta, hlaupa, læra og hafa það huggulegt. Páskafrí að skella á og famelían heima við. 

Einnig verður gjafaleikur á blogginu svo ég hvet ykkur til að fylgjast með. 

Ég vona að þið eigið ljúfan mánudag. 

xxx

Eva Laufey Kjaran

Bruschetta með tómötum

Í dag var bröns hjá mömmu. Brauð, ostar, allskyns álegg, ávextir og svo kanillengja með kaffinu. 

Ég lagaði bruschettu með tómötum. Fersk og dásamlega góð! Mér finnst bröns með þessu ívafi heldur betri heldur en sá með ensku ívafi.

Bruschetta, hráskinka með melónu, brauð með ítölskum ostum og grænmeti. 

Ljúúúúffeng byrjun á góðum sunnudegi. 

Uppskrift dagsins er því Bruschetta með tómötum

5 stórir tómatar

3 – 4 Hvítlauksrif

2 msk. Olífu Olía

2 tsk. Balsamik Edik

8 – 10 Basilikkulauf

Salt og pipar

1 msk. Olía

Fínt snittubrauð

 1.       Hitið vatn að suðu, skerið þrjá tómata í helming. Setjið þá ofan í sjóðandi vatn í um það bil 30 sekúndur, takið þá síðan upp úr og þerrið vel. 

Saxið tómatana smátt ásamt fersku tómötunum sem fóru ekki ofan í pottinn.

2.       Saxið basillaufin smátt. Náið ykkur í stóra skál, blandið tómötum og basillaufum saman.

3.       Bætið olíunni og edikinu saman við og blandið vel.

4.       Setjið hvílauksrifin í hvítlaukspressu og látið saman við tómatblönduna.

5.       Salt og pipar að vild, svolítið duglega af salti.

6.       Inn í ísskáp á meðan að þið steikið brauðið.

7.       Skerið brauðið í u.þ.b. 1 ½ cm þykkar sneiðar

8.       Hitið olíuna á pönnu og steikið  brauðsneiðarnar í henni þar til þær eru léttbrúnaðar.

9.       Brauðið fer svo á disk og setjið um það bil eina góða matskeið af tómamauki á hverja brauðsneið, smá salt og pipar og vel af ferskum parmesan.
Osturinn setur punktinn yfir i-ið.

 Bruschetta er sérlega góð. Léttur réttur sem á alltaf vel við! 

Ég vona að þið hafið það huggulegt.

xxx

Eva Laufey Kjaran

Litli Rúrik

 Ég er svo skotin í litla vini mínum honum Rúrik. 

Hann er mánaðargamall í dag og því ber að fagna með köku. 

Mamma hans hún Agla og litli Rúrik. 

Þau eru æði. 

xxx

Eva Laufey Kjaran