Lífið instagrammað...

Tólf myndir af instagram... 

 1. Morgunhuggulegheit. Matarblöð og góður kaffibolli. 2. Systur fyrir utan Alþingi, prúðbúnar

 3. Matur hjá ömmu, best í heimi 4. Ljúffengur capp!

 5. Orðin stutthærð!

 6. Vanilluskyrkaka með ferskum berjum og kókos

  7. Kaffihúsadeit með manni mínum 8. Hádegisdeit með fögrum vinum

  9. Æfing dagsins í dag 10. Knúsaði litla vin minn hann Ólaf Dór í dag, yndislegur

11. Grænt boozt 12. Föstudags huggulegheit, kjúklinganúðluréttur og rauðvín

xxx

Eva Laufey Kjaran

Góð byrjun á deginum

Það er ansi ljúft að byrja daginn á því að fá sér góðan boozt. Ég reyni að vera dugleg að búa til b

oozt áður en ég fer í skólann en vissulega er ekki alltaf tími til þess. Þá daga sem ég næ að gera mér boozt þá líður mér ótrúlega vel. Það er nauðsynlegt fyrir líkamann að fá góða næringu áður en lagt er af stað út í daginn... 

Berja boozt 

1 bolli frosin blönduð ber

1 bolli frosin jarðaber

1 banani

1 msk hörfræ

1 lítil dós vanilluskyr

ca. 150 ml superberries safi

Allt saman sett í blandarann í nokkrar mínútur. 

Ég átti nokkur fersk jarðaber og lét nokkur ber ofan á booztið. 

Virkilega ferskt og gott boozt. Blandan dugir vel í tvö stór glös svo ég fékk mér eitt í morgunsárið, lét restina inn í ísskáp og fæ mér svo aftur í dag sem millimál.

Það er föstudagur í dag, uppáhalds dagurinn minn. Plan dagsins er lærdómur, hlaup og svo langar mig mikið í eitthvað gott í kvöldmatinn. Það er nú algjör skylda að fá sér eitthvað gott á föstudögum. 

Ég vona að þið eigið ljómandi fína helgi 

xxx

Eva Laufey Kjaran

Mexíkósk kjúklingasúpa með philadelphia sweetchili rjómaosti

Ég gæti borðað súpur í öll mál, mér finnst fátt betra en góð og matarmikil súpa á köldu haustkvöldi.
Súpur sem eru með allskyns góðgæti í  eru í sérlegu uppáhaldi.

Mexíkósk kjúklingasúpa er í sérflokki, hún er svo góð að mínu mati. Ég hef nú bloggað um hana áður en það eru sem betur fer ekki takmörk fyrir því að tala um sömu súpuna. Að þessu sinni þá prufaði ég rjómaost sem kemur fljótt í matvöruverslanir, dásamlegur philadelphia rjómaostur með sweetchili. (Það er auðvitað hægt að nota hreinan rjómaost líka og bæta þá t.d. chili tómatsósunni frá Heinz með í súpuna) Osturinn gefur súpunni auka kraft og súpan verður mun betri fyrir vikið. 

Það er mín skoðun að súpan er alltaf betri ef hún fær að malla í rólegheitum. Því lengur því betri að mínu mati. Súpur eru  ótrúlega góðar daginn eftir og ég passa mig alltaf á því að gera nóg af súpu svo ég eigi örugglega súpu daginn eftir. 

Mexíkósk kjúklingasúpa

Uppskrift er fyrir u.þ.b 5 - 6 manns.

4 kjúklingabringur, smátt skornar (eða heill kjúklingur, skorinn í litla bita)

1 rauð paprika, smátt skorin

1 græn paprika, smátt skorin

1 gul paprika, smátt skorin

2 gulrætur, smátt skornar

1/2 blaðlaukur , smátt skorinn

2  hvítlauksgeirar

1 laukur , smátt skorinn

1/2 rautt chili, fræhreinsað og smátt skorið

2 msk olía 

2 dós saxaðir tómatar

2 teningar af kjúklingakrafti

2 - 3 msk karrý 

smá kjúklingakrydd

3 lítrar vatn

1 peli rjómi

1 dós tómatpúrra

200 g philadelphia rjómaostur með sweet chili 

salt og nýmalaður pipar

Aðferð: 

Hitið olíu á pönnu við vægan hita, saxið grænmetið smátt og steikið í smá stund á pönnunni, bara rétt til að fá smá gljáa. Setjið grænmetið í stóran pott, bætið vatninu , tómatpúrrunni, karrýinu, kjúklingateningum og   söxuðum tómötum saman við, leyfið þessu að malla á meðan þið steikið kjúklinginn. 

Skerið kjúklinginn í litla bita og steikið á pönnu upp úr olíu í smá stund, kryddið til með kjúklingakryddi, salti og pipar. Bætið kjúklingnum við súpuna. Látið hana sjóða við vægan hita í 10 - 15 mín.

Að lokum fer rjóminn og rjómaosturinn saman við súpuna.Takið ykkur góðan tíma til að laga súpuna, ég leyfði henni að malla við vægan hita í um það bil klukkustund en þess þarf auðvitað ekki. Látið hana þó malla í lágmark 30 mín. Bragðbætið súpuna að vild, gæti verið að þið viljið meiri karrý eða meiri pipar. 
Mikilvægt að smakka sig til! 

 Berið súpuna fram með sýrðum rjóma, rifnum osti og nachos flögum, sem hver og einn bætir á sinn disk eftir smekk.

 Þessi súpa gleður mig mjög mikið og mér finnst ótrúlega huggulegt að standa við eldavélina og dúlla mér við súpugerð. Ilmurinn um heimilið er líka dásamlegur á meðan. Hún er svolítið sterk svo ég mæli með að þið smakkið ykkur til. En ég er þó  frekar mikil hæna þegar kemur að sterkum mat, kannski er hún ekkert svakalega sterk.  Hún er allavega ansi góð og ég mæli innilega með að þið prufið. 

Annars vona ég að þið eigið gott kvöld framundan. Þetta er alveg veður til þess að skríða upp í sófa eftir matinn, kveikja á nokkrum kertum og njóta þess að hafa það huggulegt á meðan vindurinn blæs. 

xxx

Eva Laufey Kjaran

Sænskir kanilsnúðar með glassúr

Sænskir kanilsnúðar eru sérlega góðir snúðar sem fanga augað. Í Svíþjóð er árlega haldin "kanelbullans dag" þann 4 október. Október nálgast og því er tilvalið að setja á sig svuntuna og baka nokkra ljúffenga sænska kanilsnúða. 

Uppskriftirnar af sænskum kanilsnúðum eru ótal margar, ég var lengi vel að dúlla mér á internetinu að skoða uppskriftir. Ég fann eina sem mér leist mjög vel á,  ég átti til flest hér heima fyrir sem þurfti til þannig ég þurfti ekki að byrja á því að fara út í búð. Mér finnst alltaf svo ánægjulegt að sleppa við það. Að geta bara dúllað mér áfram í náttfötunum, bara svona týpískir huggulegir sunnudagar. 

Snúðarnir heppnuðust mjög vel að mínu mati og ég mæli með að þið prufið. 

Sænskir kanilsnúðar 

Deig :

           

15 dl hveiti      

1 bréf þurrger

135 g smjör

2 dl sykur

1 egg
4 dl mjólk

1 tsk vanilla extract 

smá salt 

Fylling : 

50 g sykur

100 g smjör

2 - 3 msk kanill (fer eftir því hvað þið viljið mikið kanilbragð)

Ofan á : 

1 egg

perlusykur 

Það tekur svolítinn tíma að útbúa þessa dásamlegu snúða svo það er nauðsyn að gefa sér góðan tíma. 

Aðferð:

Hitið mjólkina upp að 37°C (líkamshiti) og bætið þurrgerinu saman við, blandið þessu vel saman. 

Leggið til hliðar og náið ykkur í aðra skál. 

Setjið hveiti, sykur, salt, egg, vanillu extract og smjör sem á að vera við stofuhita saman í skálina.

 Best er að nota hendurnar til þess að blanda þessu vel saman. 

Hendurnar verða verulega klístraðar og fínar en það gerir nú ekkert til. Hellið mjólkurblöndunni í pörtum saman við hveitiblönduna og blandið þessu vel saman með höndunum. 

Því næst setjið þið deigið á borðið og hnoðið almennilega saman. Mér finnst gott að strá örlitlu hveiti á borðið áður en ég læt deigið á borðið. 

Setjið deigið aftur í skálina, breiðið röku viskustykki yfir og látið hefast í 30 - 40 mínútur. 

Þegar að deigið er búið að hefast þá skerið þið deigið í tvo bita. 

Fletjið deigið út og smyrjið fyllinguna á deigið. 

Ég hitaði smjörið í smá stund í potti, bræddi það ekki alveg en það var silkimjúkt. Bætti sykrinum og kanil saman við. Blandan á að vera svolítið þykk. 

Rúllið deiginu upp eða brjótið það saman og skiptið því upp í lengjur, það er ansi gaman að föndra svolítið með deigið. Sænsku kanilsnúðarnir eru svo fallegir og það eru mörg vidjó á netinu sem sýna ýmsar aðferðir til þess að gera fallega snúða. Hvað sem þið gerið, þá verða þeir nú alltaf jafn góðir. 

Setjið bökunarpappír í ofnskúffu, raðið snúðunum á pappírinn og leggið viskustykki yfir þá, rakt viskustykki. Leyfið þeim að standa í ca. 30 mínútur. 

Að lokum pískið þið egg og penslið snúðana. Ég stráði smá perlusykri yfir snúðana. 

Bakið þá við 200°C í 8 - 10 mínútur. 

Það er fátt sem jafnast á við kanilsnúðalyktina sem ilmar um heimilið... 

Ég get eiginlega aldrei beðið eftir að þeir kólni og stelst alltaf í smá bita, vel mér þá auðvitað girnilegasta snúðinn. :-) 

Persónulega þá finnst mér snúðarnir bestir bara nýkomnir út úr ofninum með ískaldri mjólk en þeir eru líka ferlega góðir með glassúr. 

Ég nota enga sérstaka uppskrift þegar ég geri glassúr, dassa mig bara áfram. 

En það sem ég nota alltaf er flórsykur, mjólk og vanillu extract. Dass af flórsykri, dass af mjólk og dass af vanillu extract eða vanilludropum ef þið eigið ekki vanillu extract. Blandið þessu öllu vel saman og úr þessu verður til dásamlegur glassúr. 

Ég spara alls ekki glassúrinn á mína snúða... 

                    Það er hægt að bæta við hverju sem er í þessa snúða t.d. berjum og súkkulaði. 

Sunnudagskaffið verður ekki betra að ég held. Ég bakaði svolítið mikið svo ég frysti nokkra snúða, það er ansi ánægjulegt að eitthvað bakkelsi í frysti. Gaman að gefa gestum góða snúða svo er nú líka bara ansi huggulegt að fá sér einn og einn snúð af og til... 

Ég vona að þið eigið ljómandi fínan sunnudag 

xxx

Eva Laufey Kjaran

Lasagne

Lasagne er einn af mínum uppáhalds réttum. Þetta er réttur sem klikkar sjaldan og hann er í raun aldrei eins. Það eiga flestir sínar eigin útgáfur af lasagne. Ég hef verið að prufa mig áfram með mína útgáfu af lasagne og ég er orðin býsna ánægð með réttinn. Að þessu sinni þá gerði ég ekki Bechamel sósuna vegna þess að ég var með svo mikið af ostum. Bechamel sósan er þó ansi ljúffeng í lasagne. 

Lasagne er alltaf gott og sannkallaður fjölskylduréttur. Ég veit ekki um marga sem myndu slá hendinni á móti góðu lasagne. Er nokkuð til betri leið en að hefja góða helgi en að hóa til sín fjölskyldunni og bjóða þeim upp á ljúffengt lasagne? Þannig eiga föstdagskvöld að vera að mínu mati, að byrja kvöldið á góðum mat og borða á sig gat, ég geri það nú einum of oft þegar lasagne á við sögu. Færa sig því næst upp í sófa, horfa á góða mynd og spjalla við fólkið sitt. Svo um leið og súkkulaðiþörfin kemur þá er fyllt á nammiskálina, það má allt á föstudögum. Ég er nú hrædd um það. 

En nóg um nammi og sófakúr, ég ætla að deila með ykkur uppskrift af mínu lasagne. 

Ég vona að þið eigið eftir að njóta vel. 

Lasagne

Fyrir um það bil 6 - 8 manns

2 msk ólífuolía 

1 kg nautahakk

1 stór stilkur sellerí, smátt skorinn

1 rauðlaukur, smátt skorinn

2 hvítlauksgeirar, pressaðir

nokkrir sveppir ca. 8 - 9 , smátt skornir

1 tsk. steinselja, þurrkuð

spínat, magn eftir smekk

kotasæla, lítill dós

rifinn mozzarella ostur, magn eftir smekk

parmesan ostur, magn eftir smekk

1 pakki lasagne pasta

salt og nýmalaður pipar

Sósan

1 dós hakkaðir tómatar

1 dós Ítalía tómata passata

1/2 handfylli af ferskum basillaufum

2 - 3 msk tómatpúrra

3 dl vatn

1 kjúklingateningur

salt og nýmalaður pipar

                                   

Hitið olíuna í potti og steikið hvítlaukinn, því næst bætið þið rauðlauknum, selleríinu og sveppum saman við. Steikið við vægan hita í 1 - 2 mínútur. 

Færið grænmetið í skál og setjið nautahakkið á pönnuna og steikið vel. Kryddið nautahakkið ansi vel með salti, pipar og steinselju. 

Því næst náið þið ykkur í pott, setjið hakkið og grænmetið út í og byrjið á sósunni. Setjið allt út í sem ég nefndi hér að ofan, hrærið vel í þessu og leyfið þessu að malla við vægan hita í 15 - 20 mín. Ég læt stundum nokkur lárviðarlauf saman við blönduna og leyfið laufunum að malla með. Mér finnst þó fátt huggulegra en að dúllast í þessu, taka mér góðan tíma og leyfa sósunni að malla lengi. Kryddið kjötblönduna vel með salti og pipar, það er nauðsynlegt að smakka sig til því mér finnst alltaf eitthvað vanta. Meiri salt, meiri pipar, meiri basilika... það veit nú enginn nema við sjálf og þess vegna er algjör nauðsyn að smakka sig til. 

Hitið ofninn í 180°C. Setjið 1/3 af kjötblöndunni á botninn í eldföstu móti og setjið mozzarellaost, parmesan og spínat yfir. Raðið lasagne blöðum yfir og endurtakið leikinn, þetta lasagne var í þremur lögum. Ég lét kotasæluna aðeins yfir eitt lag. 

Mér finnst best að nota þessar lasagne plötur. 

Að mínu mati er virkilega gott að hafa kotasælu i lasagne. Rétturinn verður svolítið djúsí fyrir vikið og það líkar mér. Það er fátt betra en að fá sér bita af ljúffengu lasagne þar sem osturinn ræður ríkjum. 

Að lokum þá stráið þið mozzarella osti og parmesan osti yfir, mér finnst líka gott að setja smá salt og pipar efst. Bakið í ofninum í 35 - 40 mínútur. 

Það er virkilega gott að leyfa réttinum að kæla sig í allavega  10 mínútur áður en þið berið hann fram, hann er svakalega heitur og það er ekkert gott að borða of  heitan mat, þá borðar maður gjarnan matinn alltof hratt eða skolar honum niður með of miklu vatni því hann er sjóðandi heitur. Takið ykkur góðan tíma þegar rétturinn er tilbúin, leggið á borð, skálið í rauðvín eða í pepsí. Skiptir ekki máli hvað er í glasinu, allavega skálið. Það er að koma helgi.

Ég veit ekki með ykkur en svona og nákvæmlega svona vil ég hafa mitt lasagne, það nánast kemur á móti mér. Safaríkt og ljúffengt. Fangar augað mitt og þá er ekki aftur snúið. Það skemmtilega við réttinn er að hver og einn getur gert hann að sínum, ég nota oftast bara það sem ég á til inn í ísskáp hverju sinni. 

Berið lasagne fram með fersku salati og ef till vill hvítlauksbrauði. Rífið duglega af parmesan osti yfir og njótið, hver biti er dásemd. Það er skylda að setjast niður og njóta matarins, helst í góðum félagsskap. 

Ég vona að þið eigið dásamlega helgi framundan kæru lesendur

xxx

Eva Laufey Kjaran

Klúbbablaðið

Klúbbablaðið, nýjasta tölublað Gestgjafans er virkilega girnilegt. Það er fátt huggulegra en að fletta í gegnum girnileg matreiðslublöð og enn huggulegra að prufa uppskriftirnar. Allar uppskriftirnar sem eru að finna í þessu tölublaði eru að mínu mati einfaldar og þæginlegar. 

Ég og vinkonur mínar héldum Babyshower handa Evu vinkonu sem er núna orðin móðir, lítil falleg stúlka kom í heiminn fyrir nokkrum dögum. Babyshowerið tókst vel til og var ansi skemmtilegt. Mini-ostakökur, mini-samlokur, sítrónubitar, kökupinnar, límonaði og meira til. Þetta var frábær dagur með elsku vinkonum mínum.

Ég mæli eindregið með klúbbablaðinu. Bætir og kætir. 

xxx

Eva Laufey Kjaran

Smurbrauð og notalegheit

Ég hef nú margoft tekið myndir af fallega matnum á Jómfrúnni og sagt ykkur frá því að við mamma og amma förum reglulega þangað þegar mamma er á landinu. Systir mín hún Maren kemur líka með okkur þegar að hún er heima, verst að hún var ekki með okkur í þetta sinn. Það hefði verið reglulega huggulegt.

Við fáum ekki nóg af þessum ljúffenga mat á Jómfrúnni og dönsku stemmningunni sem ríkir þar. Virkilega huggulegt og mæli ég innilega með því að þið farið þangað og smakkið dásamlegu smurbrauðin.

Ég reyni að vera dugleg að hitta fjölskylduna mína og vini í hádeginu. Það brýtur svo sannarlega upp daginn. Suma daga hefur maður ekki mikinn tíma en það þarf ekki að vera mikill tími til að knúsast, blaðra og fá sér eitthvað gott!

Smá blaður, góður matur og góður félagsskapur, bætir og kætir! 

Góður kaffibolli eftir góða máltíð er nauðsyn.. og já einn súkkulaðibiti eða svo. 

xxx

Eva Laufey Kjaran

Sunnudagur til sælu

Sit hér í rólegheitum í stofunni að drekka kaffi á nákvæmlega sama stað og ég drakk morgunkaffið mitt fyrir klukkan níu í morgun, að fletta í gegnum sömu matarblöðin, fæ aldrei nóg af girnilegum matarblöðum.

 Þessi helgi er búin að vera svo fljót að líða. Það hefur verið nóg að gera þessa helgina. Á föstudaginn þá steig ég algjörlega út úr þægindarammanum, var búin að vera svolítið stressuð en fann svo að lokum hvað það er nú gott að stíga út úr þægindarammanum. Ég er staðráðin í því að við lærum mest á því. Það er líka svo gaman þegar að maður fylgir því sem manni finnst gaman að gera og allt verður miklu skemmtilegra, þó svo að því fylgi stress og annað slíkt. Þá er það bara af hinu góða. 

Helgin er líka búin að vera sérlega hugguleg þar sem mamma mín er á landinu. Það er heimsins best. Himneskt að fá mömmumat, ég sit einmitt virkilega södd og sæl eftir sunnudagslambið hjá mömmu. Það er eitthvað svo sjarmerandi að fá læri eða hrygg á sunnudögum, skemmtileg fjölskylduhefð.

Lærdómur kallar og ég verð víst að leggja frá mér tölvuna og blessuð matarblöðin.
Ný vika að hefjast á morgun og ansi margt skemmtilegt á döfinni. 

Ég vona að hafið haft það einstaklega gott um helgina og fengið ykkur eitthvað svakalega gott að borða. 

Góða nótt

xxx

Eva Laufey Kjaran