Já nú sigrum við janúar og febrúar!

 Það eru tveir mánuðir á árinu sem að mínu mati líða svolítið hægt, þá er ég að tala um janúar og febrúar. Þeir geta verið gráir og pínu fúlir. En við getum auðvitað alltaf tekið málin í okkar hendur og verið dugleg við að hitta fólkið okkar, hreyfa okkur og borða góðan mat auðvitað. Að plana og hafa eitthvað til þess að hlakka til er svo skemmtilegt (finnst mér, ég er pínu plan-óð). Hér eru nokkur dæmi sem hægt er að gera til þess að hressa upp á þessa ágætu en gráu mánuði. 

Að sáldra smá súkkulaði út í morgunkaffið eða fá sér einn bita af dökkum súkkulaðibita með, það er eitthvað við elsku súkkulaðið sem hressir og kætir. 

 Veðrið er búið að vera ágætt hjá okkur í janúar og vonandi helst það svona fínt (þ.e.a.s ekki snjór og leiðindi, já ég kalla það leiðindi). Reimið á ykkur íþróttaskóna og farið út að labba eða hlaupa. Það er ótrúlegt hvað hreyfingin hefur góð áhrif á okkur. Allt verður mikið betra eftir góða útiveru. 

 Hér fyrir ofan eru nokkur ágæt hlaupalög. 

 Planið matarboð með vinum og fjölskyldu, mér finnst fátt skemmtilegra en að hitta fólkið mitt og borða með þeim góðan mat. Það er sérstaklega skemmtilegt að velja þema og fá alla til þess að taka þátt í matargerðinni, í bókinni minni Matargleði Evu er ég með tvö þemu af matarboðum. Sushi veisla og mexíkóskt matarboð. Farið saman í búðina, veljið hráefnin og farið heim að elda. Það er uppskrift að stórgóðu kvöldi.

 Skelltu þér á matreiðslunámskeið eða á bakstursnámskeið hjá Salt eldhúsi. Ef þig langar að læra að búa til makkarónur, ferskt pasta eða baka þitt eigið brauð þá er þetta eitthvað fyrir þig. 

Hádegis-og kvöldverðardeit með fólkinu ykkar. Það brýtur svo sannarlega upp daginn og er að mínu mati nauðsynlegt að gera allavega einu sinni í viku. Í hádeginu finnst mér dásamlegt að fara á Jómfrúnna eða á Snaps. Mjög skemmtilegir staðir og maturinn sérlega góður. 

• Bíóferðir eru alltaf skemmtilegar, ég held að ég sé búin að fara oftar núna í bíó í janúar en ég gerði yfir allt árið í fyrra. Það eru svo góðar myndir í bíó þessa stundina. 
•  Að baka köku á kvöldin og njóta með glasi af mjólk. Það er hversdagslúxus. 
• Taka almennilega til, henda gömlu dóti eða gefa. Við getum verið svo dugleg að safna allskyns hlutum og fötum sem við notum ekki lengur. Það er ágætt að nota janúar og febrúar í tiltekt, gera heimilið ferskt og fínt fyrir vorið. 

Það er svo margt skemmtilegt sem við getum gert daglega með fólkinu okkar, við ráðum því alveg sjálf. Ég vona að þið eigið góða viku framundan kæru lesendur. 

xxx

Eva Laufey K. Hermannsdóttir

Ofnbakaður Camenbert

Ég ætla að deila með ykkur uppkrift að dásamlegum ofnbökuðum camenbert, þessi uppskrift er í bókinni minni Matargleði Evu. Ég er sérstaklega hrifin af ostum og gæti borðað þá í öll mál, ofnbakaðir ostar eru i´sérstöku uppáhaldi. Ég mæli með að þið prófið þessa uppskrift um helgina. Fullkomið sem forréttur eða eftirréttur... svo gott að narta í góða osta á kvöldin. Sérstaklega í góðum félagsskap. Hér kemur uppskriftin, ég vona auðvitað að þið njótið vel. 

Bakaður camenbert er auðvitað algjört lostæti,

 hann einn og sér bræðir öll hjörtu.

• 1 camembert
• 1 msk smjör
• 2 tsk góð fíkjusulta
• handfylli heslihnetur
• fersk hindber og bláber

Aðferð:

1. Bræðið smjör, penslið ostinn með smjöri og leggið ostinn í eldfast mót.
2. Snöggsteikið heslihneturnar í smjörinu sem er eftir. Það er algjört smekksatriði hvað maður notar mikið af hnetum og þið getið notað hvaða hnetur sem er. 
3. Setjið væna skeið af fíkjusultunni yfir og í lokin hneturnar.
4. Bakið ostinn við 180°C í 8 - 10 mínútur. 
5. Dreifið ferskum berjum yfir ostinn þegar hann er kominn út úr ofninum, berið fram með ristuðu brauði eða kexi. 

Njótið vel.

Eva Laufey K. Hermannsdóttir

Ljúffeng vetrarsúpa með kóríander, avókadó og steiktum tortillakökum.

Ég elska góðar og matarmiklar súpur sem ylja á köldum kvöldum. Fríða vinkona mín bauð okkur í vinahópnum upp á gómsæta súpu um daginn. Ég kolféll fyrir súpunni og prófaði að gera hana strax daginn eftir handa fjölskyldunni minni. Svo góð er hún að ég fæ ekki nóg.

Myndavélin var batteríslaus svo síminn bjargaði mér að þessu sinni, símamynd. 

Ljúffeng vetrarsúpa með kóríander, avókadó og steiktum tortillakökum.

Uppskrift fyrir 3 - 4 

• 1 msk. olía
• 1 rauðlaukur, smátt skorinn
• 2 hvítlaukrif, pressuð
• 1 1/2 rauð paprika
• 5 - 6 gulrætur
• 1 1/2 krukka hakkaðir tómatar, ég notaði tómata í krukku frá Sollu
• 1 - 2 msk. tómatpúrra 
• 1,2 - 1,5 l vatn + 2 grænmetis eða kjúklingateningar
• 1 tsk. paprikukrydd
• 1/2 tsk. þurrkuð basilíka
• 1/2 tsk. þurrkað koríander (eða ferskt, það er betra)
• smá chilikrydd, smekksatriði hvað þið notið mikið. Prófið ykkur áfram, kryddið er frekar sterkt.

!Fríða var með kjúkling í súpunni en ég sleppti honum. Súpan er mjög góð með kjúkling. Notið þá ca. 500 - 600 g af kjúklingakjöti. Skerið kjúklingakjötið í litla bita og steikið á pönnu í smá stund og bætið kjúklingnum síðan saman við súpuna. 

Aðferð:

Hitið olíu í potti við vægan hita, steikið laukinn og hvítlaukinn í smá stund. Hreinsið grænmetið og skerið í litla bita, bætið grænmetinu saman við og steikið í smá stund (1 - 2 mín). Bætið vatninu, hökkuðum tómötum og tómatpúrru saman við. Kryddið til með grænmetis-eða kjúklingakrafti. Því næst fara þau krydd sem ég tel upp hér að ofan, endilega prófið ykkur áfram með kryddin. Leyfið súpunni að malla í lágmark 30 mínútur. Mér finnst súpan alltaf betri ef hún fær að malla svolítið lengi. 

Meðlæti, það sem vð látum ofan á súpuna. 

• 1 msk. olía
• tortillakökur, skornar í litla bita 
• sýrður rjómi 
• avókadó, smátt skorið 
• ferskur kóríander, smátt saxaður 
• fetaostur

Hitið olíu við vægan hita á pönnu og steikið tortillakökurnar, skerið þær fyrst í litla bita. Það er dásamlegt að setja sýrðan rjóma, steiktar tortillakökur, avókadó, mulinn fetaost og ferskan kóríander yfir súpuna. Hver og einn getur sett saman sína súpu. Ég elska að hafa mikið í minni súpu. Það kom mér sérstaklega á óvart hvað það er gott að setja ferskt avókadó í súpur.

Einfalt, fljótlegt og dásamlega gott. Ég mæli með að þið prófið þessa uppskrift kæru vinir. 

xxx

Eva Laufey K. Hermannsdóttir

Byrjun á nýju ári

Loksins fann ég myndavélasnúruna mína svo nú get ég deilt með ykkur myndum kæru vinir. Byrjum bara árið á myndum sem ég tók í morgun, dagurinn í dag hefur farið í að plana næstu vikur og mánuði. Já, ég er ein af þeim sem verð að skrifa allt niður og skipuleggja mig vel og vandlega, annars fer allt í kaós. Verkefni morgundagsins er meðal annars að kaupa dagbók, já það er ekki nóg að skrifa plönin niður í tölvuna mér finnst eiginlega betra að nota gömlu góðu dagbókina. 

Árið byrjar vel, janúar er alltaf að mínu mati svolítið grár mánuður en hann hefur verið ansi ljúfur hingað til. Veðrið er líka búið að vera svo fínt og ég hef byrjað daginn á því að fara í sund og það er svo hressandi. Mikið er líka gott þegar sólin skín, ég hlakka til vorsins. 

Það eru nóg af verkefnum framundan og ég hlakka til að deila þeim með ykkur. Fyrsta verkefnið mitt hér á blogginu er að deila með ykkur uppskrift að dásamlegri súpu. Ég smakkaði súpuna hjá vinkonu minni í vikunni og uppskriftin verður komin hingað inn á bloggið í kvöld. Dásamleg kjúklingasúpa með kóríander, ferskum avókadó og stökkum tortilla vefjum. 

Ég vona að árið fari vel af stað hjá ykkur.

xxx

Eva Laufey K. Hermannsdóttir 

Ársuppgjör. Kveð árið 2013 með þakklæti efst í huga.

"Áramótaheitið mitt í ár er að einblína á litlu hlutina sem skipta máli og gera lífið skemmtilegra. Mér finnst alltaf í byrjun janúar að ég þurfi að vera með ákveðið plan og háleit markmið sem nauðsyn ber að fylgja, það veldur mér stundum smá áhyggjum því mér líður oft eins og allt þurfi að gerast strax og ég gleymi að einblína á litlu hlutina sem skipta oft öllu máli. Hér eru nokkur lítil atriði sem að mínu mati gera lífið skemmtilegra.. 

Ég ætla að fara oftar í bústað, eiga fleiri notalegar stundir með fjölskyldunni minni, elda oftar með vinkonum mínum, fara vikulega út að borða í hádeginu með vinum mínum, taka enn fleiri myndir af mat og deila uppskriftum, fara á matreiðslunámskeið, prufa að elda indverskan mat, fara oftar út að hlaupa, hrósa oftar, njóta meira, sofa út án þess að fá samviskubit, fara oftar í bíó helst á Akranesi,  fleiri datenight með manni mínum, ferðast meira innanlands, halda áfram að safna matreiðslubókum og tímaritum, hætta að hlusta á neikvæðni, fara oftar upp á Akrafjall, læra meira, lesa meira, vera óhrædd við að prufa nýja hluti og taka fagnandi á móti nýjum áskorunum. 

Aðal markmiðið er þó bara að njóta þess að vera til.

Þann fjórða janúar bloggaði ég um áramótaheit fyrir árið 2013 eins og þið sjáið hér fyrir ofan, textinn er tekinn úr þeirri bloggfærslu.

Ég hef undanfarin tvö ár tekið saman vinsælustu uppskriftir ársins og þannig gert upp við árið, en uppskriftirnr segja þó ekki alveg frá árinu og því ætla ég að breyta aðeins til og fjalla um hvern mánuð í staðinn. 

Janúar 

Janúar var fremur rólegur. Það sem stóð upp úr var málþing sem nefndin mín, Menntmálanefnd SHÍ hélt þann 19.janúar. Þar áttu nemendur og kennarar Háskóla Íslands góðan dag saman og við náðum að ræða mikilvæg málefni sem snéru að bættum menntamálum við HÍ. 

Það voru óvenju margar bakstursfærslur í janúar, það er nú líklega vegna þess að mér finnst janúar oft á tíðum svo grár og leiðinlegur, þá er alltaf dásamlegt að fá sér góða köku.


Febrúar

Ég hélt mitt fyrsta bollakökunámskeið í febrúar. Það var á Akranesi og tókst mjög vel, ég var auðvitað svolítið stressuð eins og eðlilegt er. Þetta var mjög skemmtilegt og ég endurtók leikinn nokkrum sinnum á þessu ári. Ótrúlega gaman að eyða kvöldstund með bakstursglöðu fólki. 

Mars

Hápunktur mars mánaðar var dásamlegt frí til Noregs til fjölskyldunnar minnar. Það er alltaf best að vera í faðmi fjölskyldunnar. Virkilega huggulegt páskafrí. Mig langar helst aftur í þetta fína veður og þennan góða páskamat þegar ég skoða þessar myndir. Ó jæja, það styttist nú í páska;)

Apríl 

Ég skrifaði undir útgáfusamning að matreiðslubók minni, Matargleði Evu í apríl. Mikil ósköp sem ég var ánægð þann dag og er auðvitað enn, ótrúlega gaman að fá tækifæri til þess að skrifa sína eigin bók.

Ég fór á mjög skemmtilegt bakstursnámskeið hjá Salt eldhúsi sem mér finnst standa upp úr í aprílmánuði. Þar lærði ég að baka almennilegt brauð.

Maí

Maí var líklega besti mánuður ársins. Ég held alltaf upp á maí vegna þess að ég á afmæli þann 16.maí og ég er ansi mikið afmælisbarn. Ég fór með vinum mínum út að borða á afmælisdaginn og bauð þeim síðan upp á köku. Við sátum á grasinu fyrir utan Alþingishúsið og gæddum okkur á súkkulaðiköku á sólríkum degi. Það var dásemd. 

Bókaskrifin voru í fullum gangi í maí því það styttist jú í bókaskil. 

Hápunktur ársins verð ég eiginlega að segja að hafi verið Kaupmannarhafnarferð okkar vina. Ég hef sjaldan ef bara aldrei skemmt mér eins vel. Ég prísa mig sæla að eiga svo skemmtilega, frábæra og góða vini. Já maður segir það aldrei of oft. Mikið er maður ríkur!

Júní

Júní kom og þá átti sumarið að byrja. Júní var erfiður mánuður og lífið breyttist.

Júlí

Í júlí ferðaðist ég svolítið innanlands, var að vinna sem flugfreyja hjá Icelandair og naut þess að vera með fjölskyldunni minni. Ég og Haddi fórum í bíltúr einn sunnudaginn og fórum að Paradísarlaut, þar eru myndirnar teknar hér fyrir ofan. Gullfallegur staður. 

Ágúst 

Í ágúst naut ég þess að vera með vinum mínum, tók margar myndir fyrir bókina mína og átti dásamlegan morgun í Central Park. Það er fátt betra en að hlaupa þar og njóta. 

Í ágúst byrjaði ég á því að deila uppskriftum með hlustendum Síðdegisútvarpsins, ég var með eina uppskrift á viku. Það var ofboðslega skemmtilegt og ég lærði mikið. Þau eru líka svo dásamleg í Síðdegisútvarpinu að það var alltaf gaman að koma til þeirra. 

September

September var ansi skemmtilegur. Ég átti frábærar stundir með vinum mínum. Ég og Agla hittum Stefán í New York og það voru aldeilis góðir fagnaðarfundir. Stefán Jóhann flutti til Ameríku á þessu ári og það reynist okkur vinahópnum þungbært. En sem betur fer náðum við að knúsa hann heil ósköp í september, það var dásemd. 

Október

Í október fórum við amma í ferlega ljúfa helgarferð til Noregs, það var án efa hápunktur októbermánaðar. Í lok október fóru matreiðsluþættirnir mínir, Í eldhúsinu hennar Evu í loftið á Stöð 3. 

Nóvember 

Þann 8. nóvember kom matreiðslubókin mín Matargleði Evu út. Það var mjög skrítið en á sama tíma afskaplega gaman að fá bókina í hendurnar í fyrsta sinn. Ég hélt útgáfuboð sama daga og þar átti ég stórgott kvöld með fjölskyldu, vinum og lesendum. Ég var mjög sátt og sæl með daginn. Það má segja að það hafi verið bókajól í fjölskyldunni þetta árið, það var ótrúlega gaman að sjá bækurnar okkar saman á lista yfir mest seldu handbækur eina vikuna. Við vorum mikið búin að grínast með það að fara í almennilegt bókastríð. Það hefði verið mun skemmtilegra ef hann hefði verið hér með okkur í bókafjörinu. 

 Ég bakaði ótrúlega margar bollakökur fyrir bókakynningar í nóvember og desember, spurning hvenær ég baka þær aftur ;) Það var sérlega gaman að hitta lesendur á bókakynningum. 

Ég og Haddi fluttum í nóvember til Reykjavíkur, okkur líður mjög vel hér og heimilið verður heimilislegra með hverjum deginum. 

Desember 

Desember flaug áfram. Það var mikið að gera í þessum mánuði en það var líka skemmtilegt. Ég átti skemmtilegar stundir með vinum mínum, kynnti bókina mína og var nú ekki í leiðinlegum félagsskap. Fór á jólatónleika, fór oft út að borða, hlustaði mikið á jólalög, skreytti heimilið, bakaði og eyddi jólunum með fjölskyldunni minni á Akranesi. 

Árið

Ég verð alltaf svolítið meyr á áramótunum, hef verið það frá því að ég var lítil. Að fara yfir árið sem er að líða og ganga inn í nýtt ár. Árið 2013 var mér mjög erfitt en á sama tíma mjög gott. Þetta er búið að vera mjög sérstakt ár. Í janúar 2013 stefndi ég á að einblína á litlu hlutina sem ég gerði, ég naut þess að vera til og greip þau tækifæri sem mér voru boðin. Ég lærði mjög mikið á þessu ári, stærsta lexían er líklega sú að lífið er ekki sjálfsagt og við erum ekki eilífð. Ég hef ákveðið að lifa lífinu lifandi, gera það sem mig langar til og það sem gerir mig hamingjusama. Ég vil ekki líta til baka eftir nokkur ár og hugsa "afhverju gerði ég þetta ekki". Við eigum ekki að bíða með að stökkva á tækifærin og gera það sem okkur langar til, til hvers að bíða? Við höfum ekki tíma til þess að eyða honum í bið. Að bíða eftir því að lifa og njóta. 

 Ég fékk tækifæri til þess að stíga vel út fyrir þægindarammann á árinu, ég gaf út bók og steig mín fyrstu skref í sjónvarpi. Ég er lánsöm að hafa fengið tækifæri til þess að gera það sem ég hef gaman af og hef ástríðu fyrir. Í fyrsta á ævinni er ég virkilega ánægð og sátt við þann stað sem ég er á í lífinu, oft hef ég verið að efast um hvort ég sé að gera rétt og hvort ég sé að njóta mín sem ég hef ekki eins og nú. Ég leyfi mér því að njóta stundarinnar, gera það sem mér þykir skemmtilegt og gríp tækifærin. Ég hef engu að tapa. 

Ég kveð 2013 með þakklæti efst í huga. Ég er 24 ára gömul, ég hélt að lífð myndi ekki breytast og að allir yrðu alltaf hjá okkur. En það breyttist,  lífið breyttist. Ég er svo þakklát fólkinu mínu fyrir að hjálpa mér í gegnum erfiða tíma. Fjölskyldan mín og vinir mínir, orð fá því ekki lýst hversu mikið mér þykir vænt um þau. 

Njótið þess að vera til, knúsið fólkið ykkar og eigið gott kvöld. 

 Gleðilegt nýtt ár kæru vinir, takk fyrir árið sem er að líða.

Ég tek vel á móti 2014. Ég er handviss um að það verði besta árið. ;)

xxx

Eva Laufey Kjaran Hermannsdóttir 

Gómsætar kræsingar frá Iceland.

Um jólin elska ég að fá mér eitthvað sætt með kaffinu á kvöldin eftir ljúffengan jólamat. Stundum gefst þó ekki mikill tími til þess að huga að eftirréttum. Þá er nú gott að eiga gómsætar kræsingar í frystinum þegar súkkulaðilöngunin kemur upp eða góðir gestir koma óvænt í heimsókn. Það er ansi þægilegt að eiga tilbúnar kræsingar. Ég bauð fjölskyldu minni upp á þessar kræsingar eitt kvöldið eftir jólamatinn, súkkulaðiostakaka og súkkulaðihjúpuð kirsuber. Einfalt, þægilegt og gómsætt. 

 Súkkulaðihjúpuð kirsuber eru ferlega góð, sérstaklega með kaffinu. 

Súkkulaði- og karamelluostakaka sem sló í gegn. 

 Ég mæli með að þið prófið þessar einföldu kræsingar frá Iceland. Það má nú stundum hafa þetta svolítið þægilegt og kaupa tilbúið.

xxx

Eva Laufey Kjaran

Lokaþáttur af matreiðsluþáttunum mínum, Í eldhúsinu hennar Evu. Hátíðarmatur. Kalkúnabringa með dásamlegu meðlæti.

Ofnbakaðar kalkúnabringur
Uppskriftir miðast við fjóra

• 1 kg kalkúnabringa
• smjör
• kalkúnakrydd
• salt og pipar
• 3 dl vatn
• 1 kjúklingateningur

Aðferð:
Hitið smjör á pönnu, kryddið bringuna með kalkúnakryddi, salti og pipar. Brúnið bringuna á öllum hliðum á pönnunni í örfáar mínútur. Setjið bringuna í eldfast mót. Sjóðið vatn og leysið kjúklingatening upp í vatninu, hellið vökvanum í eldfasta mótið. Gott er að setja smá smjörklípu ofan á bringuna áður en hún fer inn í ofn. Bringan er sett inn í ofn við 90°C í 1,5 klst. Gott er að stinga kjötmæli í bringuna eftir 1,5 klst. Mælirinn ætti að sýna 73–74°C. Þá er bringan tilbúin, ef ekki þá þarf hún að vera svolítið lengur í ofninum. Bringan þarf að hvíla þegar hún er komin út úr ofninum í 15–20 mínútur.

Sveppasósa

• 250 g blandaðir sveppir
• smjör
• ½ l rjómi
• 2 dl vatn + soð
• 1 tsk. góð berjasulta
• salt og pipar

Aðferð:
Skerið sveppina smátt. Steikið sveppina upp úr smjöri í potti og kryddið til með salti og pipar. Bætið síðan rjómanum saman við og leyfið sósunni að malla við vægan hita í nokkrar mínútur. Bætið út í vatni og soðinu sem kom frá kalkúnabringunni, hellið vökvanum sem er í eldfasta mótinu og bætið út í sósuna. Setjið smávegis af sultu saman við. Leyfið sósunni að malla svolítið lengur, smakkið auðvitað til og kryddið að vild.

Sætkartöflumús með piparosti

• 5–600 g sætar kartöflur
• 1–2 msk. smjör
• 90 g rifinn piparostur
• salt og pipar

Aðferð:
Sætar kartöflur eru skrældar og skornar í svipað stóra bita. Þær eru svo settar í pott og vatn rétt látið fljóta yfir. Suðan látin koma upp og soðið í 25–30 mínútur eða þar til að kartöflurnar eru orðnar mjúkar. Vatninu er síðan hellt af. Kartöflurnar stappaðar fínt með smjöri og bragðbættar með piparosti, salti og pipar.

Rósakál steikt á pönnu með beikoni og rjóma

• 500 g ferskt rósakál
• 100 g beikon
• 1½  dl rjómi
• salt og pipar

Aðferð:
Rósakálið er skolað, hreinsað og skorið í tvennt. Sjóðið rósakálið í léttsöltu vatni í 2–3 mínútur. Vatninu er síðan hellt af. Setjið smjörklípu á pönnu, skerið beikonið í litla bita og steikið á pönnunni. Bætið rósakálinu saman við beikonið og steikið í 5 mínútur við vægan hita. Rjómanum er síðan bætt út á pönnuna og kryddað til með salti og pipar. Leyfið rósakálinu og beikoninu að malla í rjómanum við vægan hita í nokkrar mínútur.

Waldorfsalat

• 2 græn epli
• 1½ sellerí
• 25 græn vínber
• 1 dós sýrður rjómi
• 2–3 msk. þeyttur rjómi
• 2 dl valhnetur, þurrristaðar á pönnu
• 1 tsk. agavesíróp
• smá súkkulaði til þess að strá yfir

Aðferð:
Kjarnhreinsið eplin, flysjið og skerið í litla bita. Skerið sellerí í litla bita. Skerið vínber í tvennt. Grófhakkið hneturnar og þurrristið á pönnu. Pískið saman sýrðan rjóma og rjóma. Blandið síðan öllu saman í skál og sáldrið smá súkkulaði yfir í lokin. Geymið í kæli þar til salatið er borið fram.

Uppskriftirnar sem ég deili með ykkur í dag voru úr lokaþættinum mínum af frumraun minni í sjónvarpi, Í eldhúsinu hennar Evu. Ég steig algjörlega út fyrir þægindarammann og er afskaplega ánægð með að hafa gripið tækifærið. Þetta var mjög skemmtilegt og lærdómsríkt ferli. Ég naut mín við gerð þáttanna og hef vonandi veitt ykkur innblástur í eldhúsinu. 

 Takk fyrir allar fallegu kveðjurnar og skilaboðin sem ég hef fengið frá ykkur í sambandi við þættina, það er ómetanlegt já, ómetanlegt að fá svo góðan stuðning frá  góðu fólki. 

Risajólaknús til ykkar allra. 

xxx

Eva Laufey Kjaran

Vinningshafinn í gjafaleiknum...

Alls tóku 411 lesendur þátt í gjafaleiknum hér á blogginu í samstarfi við Cup Company.  Það var hún Sandra Mjöll sem var númer 29 í þetta skiptið. Hún fær því þessi gullfallegu form frá Cup Company. 

Þúsund þakkir fyrir góða þáttöku í gjafaleiknum kæru vinir, það verður gjafaleikur enn á ný í vikunni. Fylgist vel með. 

Bestu kveðjur til ykkar allra 

Eva Laufey Kjaran