Eggja- og beikonskálar sem allir elska

Um helgar er tilvalið að nostra svolítið við morgunmatinn og í morgun útbjó ég þessar einföldu og gómsætu eggja- og beikonskálar. Ég mun pottþétt bera þessi egg fram í næsta brönsboði en þau er ótrúlega góð, maður fær allt í einum bita. Stökkt beikon, stökkt brauð og silkimjúkt egg. Ef þið eigið ferskar kryddjurtir er tilvalið að nota þær með og ég átti ferskt timían sem ég sett ofan á eggja- og beikonskálarnar mínar. Það mætti segja að þetta væri lúxus byrjun á deginum og ég mæli svo sannarlega með að þið prófið. 

Himneskar eggja- og beikonskálar.

Uppskriftin miðast á við fjóra manns en það er ekki óvitlaust að tvöfalda skammtinn enda er þessi uppskrift mjög góð og ekki ólíklegt að fólk vilji tvær múffur. 

• 4 beikonsneiðar
• 4 brauðsneiðar
• 4 Brúnegg
• Salt og nýmalaður pipar 
• Ferskar kryddjurtir eftir smekk t.d. timían eða steinselja

Aðferð: 

1. Hitið ofninn í 180°C (blástur) 
2. Skerið skorpuna af brauðinu og mótið litlar skálar með brauðinu með því að þrýsta brauðinu á botninn á eldfasta múffu forminu. 
3. Vefjið eina beikonsneið utan um hverja brauðsneið og setjið í eldfasta múffu formið. *Það er mjög mikilvægt að smyrja formið vel áður vegna þess að annars festist beikonið og eggið við formið.
4. Brjótið eitt egg í hverja skál. 
5. Kryddið til með salti, pipar og ferskum kryddjurtum.
6. Bakið við 180°C í ca. 10 mínútur. Fylgist með eggjunum en þau eru tilbúin þegar eggin eru stíf. 

Berið fram og njótið með morgunkaffibollanum. 

Njótið vel. 

xxx

Eva Laufey Kjaran Hermannsdóttir

Allt hráefni sem notað er í þessa uppskrift fæst í verslunum Hagkaups. 

Ítölsk eggjakaka með klettasalati og nýrfinum Parmesan

Ítölsk eggjakaka með klettasalati og nýrifnum Parmesan 

Bökuð á pönnu sem má fara inn í ofn, stærðin á pönnunni er 26cm

• Olía + smá smör 
• 1/2 blaðlaukur smátt skorinn
• 2 meðalstórar bökunarkartöflur, smátt skornar 
• 1 krukka grilluð paprika (smá af olíunni líka eins og 2 msk)
• 9 Brúnegg , léttþeytt
• 1 dós sýrður rjómi 
• 100 g rifinn ostur
• Handfylli rifinn Parmesan ostur
• Salt og pipar

Aðferð: 

1. Hitið olíu og smjör á pönnu. (Athugið að það þarf að nota pönnu sem má fara inn í ofn)
2. Látið laukinn malla í olíunni/smjörinu í smá stund eða þar til hann verður mjúkur í gegn. Bætið þá kartöflum og steikið í 1 - 2 mínútur, því næst bætið þið grilluðu paprikunum út á pönnuna. Blandið öllu vel saman og kryddið til með salti og pipar, steikið á pönnunni í 3 - 4 mínútur. 
3. Á meðan létt pískið þið 0 egg og kryddið til með salti og pipar.
4. Bætið rifnum osti saman við eggin og hellið eggjablöndunni út á pönnuna. 
5. Steikið á lágum hita í 6 - 8  mínútur. 
6. Setjið eggjakökuna inn í ofn við 180°C í 15 - 20 mínútur eða þar til eggjakakan er stíf í gegn og gullinbrún. 
7. Berið eggjakökuna fram með klettasalati og stráið gjarnan rifnum Parmesan osti yfir. 

Ekki missa af Matargleði Evu öll fimmtudagskvöld klukkan 19:50 á Stöð 2. 

Njótið vel. 

xxx

Eva Laufey Kjaran Hermannsdóttir 

Allt hráefni sem notað er í þessa uppskrift fæst í verslunum Hagkaups. 

Eggjamúffur með beikoni og papriku.

Eins og Instagram fylgjendur mínir hafa tekið eftir þá vorum við fjölskyldan í vikufríi á Spáni. Við komum heim í nótt en dóttir mín svaf allt flugið og var ekkert að stressa sig á því að sofa út þó við hefðum komið heim um fimmleytið. en það er nú ekkert sem góður kaffibolli getur ekki bjargað. Allavega, ég átti eftir að deila uppskrift að eggjamúffum sem ég gerði um daginn og það freistaði mun meira að setja uppskriftina strax inn en að byrja að ganga frá tveimur risa ferðatöskum sem bíða mín. Það er aldrei skemmtilegt að ganga frá fríinu en mikil ósköp var dásamlegt að taka stutt og gott frí, ég mun áreiðanlega deila myndum með ykkur á næstu dögum. 

Egg eru í miklu uppáhaldi hjá mér og gegna þau lykilhlutverk í mörgum réttum sem mér finnst góðir, hvort sem það er matargerð eða í bakstri. Um daginn bakaði ég þessar einföldu og rosalega góðu eggjamúffur, það er tilvalið að bera þær fram í morgunmat eða á bröns hlaðborðinu. Það er heldur ekki vitlaust að taka nokkrar með í ferðalagið. Eggin gegna aðalhlutverkum í uppskriftinni en þið getið notað hvaða grænmeti og kjötmeti sem þið viljið, notið það sem þið eigið í ísskápnum. 

Eggjamúffur með beikoni og papriku. 

• Um það bil 12 múffur.

10 Brúnegg

1 dós sýrður rjómi 

1 rauð paprika 

1/4 púrrulaukur

100 g beikon

salt og nýmalaður pipar 

rifinn ostur 

Aðferð: 

1. Hitið ofninn í 180°C. 
2. Þeytið eggin saman og bætið sýrða rjómanum saman við. Kryddið til með salti og pipar. 
3. Skerið paprikuna, vorlaukinn og beikonið smátt niður og bætið út í eggjablönduna. 
4. Blandið vel saman og bætið gjarnan smá osti út í. 
5. Skiptið deiginu niður í bollakökuform, það hefur reynst mér best að smyrja bollakökuformið mitt með smá smjöri og hveiti. Annars festist eggjablandan við formið, en það tekur þá bara smá stund að ná henni úr með sápu og heitu vatni. 
6. Dreifið rifnum osti yfir og bakið við 180°C í miðjum ofni í 20 - 25 mínútur eða þegar eggjamúffurnar eru gullinbrúnar og eggjamassinn stífur. 
7. Berið strax fram, ég setti þær í bollakökuform áður en ég bar þar fram en það var bara upp á útlitið að gera hefur ekkert með bragðið að segja svo þið getið alveg sleppt því. 

Njótið vel kæru lesendur. 

xxx

Eva Laufey Kjaran Hermannsdóttir 

Allt hráefni í þessa uppskrift fæst í verslunum Hagkaups. 

Deluxe morgunverðarpanna

Um helgar nýt ég þess að dunda mér í eldhúsinu, sérstaklega á morgnana. Nú er sá tími liðinn að maður geti sofið út (Ingibjörg Rósa grípur daginn um sexleytið..geisp). En, þá hef ég góðan tíma til að elda eitthvað gott. Um daginn eldaði ég þessa ljúffengu morgunverðarpönnu, sáraeinfalt og ótrúlega gott. Egg eru mitt eftirlæti, í þessari pönnu má finna sitt lítið af hverju og það er tilvalið að nota það sem hendi er næst. Allt er leyfilegt um helgar! 

Morgunverðarpanna að hætti sælkerans 

Ólífuolía 

7 - 8 kartöflur

1 laukur

1 rauð paprika

5 - 6 sneiðar gott beikon 

3 - 4 Brúnegg

kirsuberjatómatar 

steinselja 

basilíka

salt og nýmalaður pipar 

Aðferð: 

1. Hitið olíu á pönnu. 
2. Skerið niður kartöflur, lauk, papriku og beikon. Steikið í nokkrar mínútur eða þar til karöflurnar eru gullinbrúnar og beikonið stökkt. Kryddið að sjálfsögðu til með salti og pipar. 
3. Brjótið 3 - 4 egg yfir og setjið pönnuna inn í ofn við 180°C í 6 - 8 mínútur eða þar til eggin eru fullelduð. Ef þið eigið ekki pönnu sem má fara inn í ofn þá færið þið blönduna yfir í eldfast mót. Setjið kirsuberjatómatana gjarnan með inn í ofn eða setjið þá yfir þegar eggin er klár. 
4. Saxið niður ferskar kryddjurtir t.d. steinselju og basilíku og sáldrið yfir pönnuna í lokin. 
5. Berið strax fram og njótið! 

Bon Appétit!

xxx

Eva Laufey Kjaran Hermannsdóttir

Allt hráefni sem notað er í þessa uppskrift fæst í verslunum Hagkaups.

Egg Benedict með heimagerðri Hollandaise sósu

 Dögurður eða brunch er fullkomin máltíð, morgunmatur og hádegismatur í eina sæng. Að byrja daginn á ljúfengum mat, sitja og spjalla fram eftir degi er uppskrift að góðum degi. Einn af mínum eftirlætis brunch réttum er Egg Benedict og ég ákvað að bjóða vinkonu minni upp á þennan  rétt þegar hún kom í brunch til mín í dag. Þetta var í fyrsta sinn sem ég gerði þennan rétt og í fyrsta sinn sem ég prófaði að gera Hollandaise sósu. Rétturinn heppnaðist sem betur fer mjög vel og sátum við Dísa mjög lengi við matarborðið og nutum þess að borða og spjalla í rólegheitum. Í eftirrétt voru að sjálfsögðu pönnukökur með jarðaberjum og sírópi, það er ekkert brunchboð nema pönnukökur séu í boði. 

 Egg Benedict

Egg Benedict er amerískur réttur samanstendur af enskri múffu, beikoni, hleyptu eggi og Hollandaise sósu. Það var ekki eins flókið að útbúa þennan gómsæta rétt eins og ég var búin að búa mig undir, ég var búin að horfa á mörg Youtube kennslumyndbönd áður en ég tók af skarið, aðal áhyggjuefnið hjá mér var sósan, ó dásamlega Hollandaise sósan. Ég prófaði aðferð sem er mjög einföld og fljótleg og hentaði hún mjög vel og sósan var virkilega góð og áferðin á henni eins og hún á að vera. Ég notaði töfrasprotann og það tók mig tvær til þrjár mínútur að útbúa sósuna, mjög einfalt. Þetta er mín útgáfa að þessum rétt og breytti ég upprunalegu uppskriftinni en eggin og sósan eru vitaskuld í aðalhlutverki 

• 4 brúnegg 
• 2l vatn
• 1 tsk. edik (má sleppa) 
• 6 sneiðar af góðri hráskinku 
• Tvær þykkar sneiðar af grófu brauði (ég notaði gróft súrdeigsbrauð)
• Spínat steikt upp úr smjöri, magn eftir smekk
• 3 - 4 msk. Hollandaise sósa (sjá uppskrift fyrir neðan)
• Salt og nýmalaður pipar
• Smátt söxuð steinselja 

Aðferð: 

1. Það er best að byrja á sósunni og þið finnið uppskriftina hér fyrir neðan. Næsta skref er að skera súrdeigsbrauðið í þykkar sneiðar, setjið brauðsneiðarnar á pappírsklædda ofnskúffu og sáldrið smávegis af olíu yfir og hitið í ofni í 5 - 7 mínútur við 180°C.
2. Hleypt egg eru linsoðin án skurnar. Það er mikilvægt að eggin séu fersk. Setjið vatn í pott, bætið edikinu út í vatnið og látið suðuna koma upp, lækkið þá undir pottinum en látið hann samt halda vægri suðu. 
3. Brjótið egg í bolla og hellið egginu mjög varlega út í vatnið. (ég mæli með að þið skoðið kennslumyndbönd á Youtube, þá sjáið þið aðferðina við að setja eggið út í pottinn). Sjóðið eggin í þrjár mínútur, þá ætti eggjahvítan að vera umvafin eggjarauðunni og þegar skorið er í eggið ætti rauðan að leka fallega út. 
4. Takið eggið varlega upp úr pottinum, mér finnst best að nota fiskispaða og setjið á eldhúspappír til þess að þerra. 
5. Snöggsteikið spínat upp úr smjöri og steikið hráskinkuna í smá stund á pönnu eða þar til hún er orðin stökk og fín. 
6. Setjið brauðsneiðarnar á diska á raðið í eftirfarandi röð, brauð, hráskinka, spínat, egg, tvær matskeiðar af sósu, salt, pipar og smátt söxuð steinselja. 

Þetta er vægast sagt ljúfengur réttur sem allir ættu að prófa. 

Hollandaise sósa

• 2 eggjarauður 
• 1 tsk kalt vatn
• 1 tsk sítrónusafi 
• 200 g brætt smjör
• salt og nýmalaður pipar

Aðferð: 

1. Setjið eggjarauður, vatn og sítrónusafa í ílat sem töfrasprotinn kemst ofan í. Það verður að vera svipað og sést á þessu myndbandi sem ég fylgdi. (Fool proof Hollandaise, haha).
2. Bræðið smjörið og passið að það sé enn heitt þegar þið hellið því saman við eggjarauðurnar.
3. Þeytið eggjarauður, vatn og sítrónusafa með töfrasprotanum í eina til tvær mínútur eða þar til það er komin ljós og létt froða sem hefur margfaldast, hellið smjörinu í mjórri bunu saman við sósuna þar til hún er tilbúin. 
4. Ef sósan verður of þykk þá má þeyta svolitlu volg uvatni saman við. Að lokum er sósan smökkuð til með salti, pipar og svolitlum sítrónusafa. 

Njótið vel. 

xxx

Eva Laufey Kjaran Hermannsdóttir