Bananapönnukökur með Chia fræjum

Ég er sífellt að prófa mig áfram með hollari uppskriftir handa Ingibjörgu Rósu og að sjálfsögðu fyrir sjálfa mig líka. Það er svo auðvelt að grípa í hvítt brauð og eitthvað sem er kannski ekkert svo hollt og gott fyrir okkur. Hér er hollari útgáfa að pönnukökum sem ég baka oft handa okkur og eru mjög góðar. Gott er að setja t.d. ost og gúrku sem álegg ofan á þessar pönnsur. Prófið ykkur endilega áfram.

Bananapönnukökur með Chia fræjum 

ca. 8 litlar pönnukökur

•  2 egg
• 1 1/2 banani 
• 1 - 1,5 dl Kornax heilhveiti 
• 1 msk Chia fræ 
• Smá kanill

Aðferð: 

1. Létt þeytið eggin, stappið banana og blandið saman. 

2. Bætið hveitinu smám saman við, byrjið á því að setja minna en meira ef ykkur finnst deigið of blautt þá bætið þið einfaldlega meiri hveiti saman við. 

3. Í lokin bætið þið Chia fræjum og kanil út í og hrærið vel. 

4. Hitið smjör á pönnukökupönnu og steikið í ca. 2 - 3 mínútur á hvorri hlið.

5. Berið fram með smjöri og osti. Svakalega gott og og hollt!

Njótið vel.

xxx

Eva Laufey Kjaran Hermannsdóttir

Allt hráefni sem notað er í þessa uppskrift fæst í verslunum Hagkaups.

Belgískar vöfflur með súkkulaði og jarðarberjum

Sunnudagar eiga að vera til sælu, svo mikið er víst. Að byrja daginn á bakstri er einfaldlega vísir að góðum degi og í morgun ákvað ég að skella í þessar einföldu og gómsætu vöfflur með súkkulaði og jarðarberjum. Ég eignaðist svo fínt belgískt vöfflujárn um daginn og mér þykir svo gaman að baka þessar þykku og góðu vöfflur, það tekur enga stund að skella í vöfflurnar og ilmurinn um heimilið er himneskur. Uppskriftin er ekki stór en það er lítið mál að tvöfalda eða þrefalda hana, upplagt að skella í þessar fínu vöfflur í kaffitímanum í dag. 

Annars vona ég að þið eigið ljúfan sunnudag framundan með fólkinu ykkar, á morgun hefst prófavika hjá mér í háskólanum og eyði ég þess vegna deginum inni að læra. Ég strax orðin spennt fyrir næstu helgi en þá ætla ég að njóta þess að vera með Ingibjörgu Rósu. 

Belgískar vöfflur með súkkulaði og jarðarberjum

ca. 10 vöfflur (lítil uppskrift - auðvelt að tvöfalda eða þrefalda)

• 2 bollar Kornax hveiti (ca. 5 dl ) 
• 1 tsk lyftiduft 
• 2 egg 
• 1 tsk vanilla (extract eða sykur)
• 3 msk sykur 
• 1 bolli mjólk (2,5 dl)
• 1 bolli AB mjólk (2,5 dl)
• 3 msk ljós olía
• Smjör

Aðferð:

1. Blandið þurrefnum saman í skál. 
2. Pískið tvö egg, hellið mjólkinni, olíunni og ab mjólkinni saman við og blandið við þurrefnin. 
3. Blandið öllu vel saman og hitið vöfflujárnið, smyrjið járnið með smjöri og bakið vöfflurnar þar til þær eru gullinbrúnar. 
4. Berið vöfflurnar strax fram og þær eru gómsætar með súkkulaði og jarðarberjum. Það er líka ótrúlega gott að rista nokkrar pekanhnetur og útbúa einfalda karamellusósu... þið getið sumsé borið vöfflurnar fram með öllu því góðgæti sem ykkur lystir. 

Ég vona að þið njótið vel. 

xxx

Eva Laufey Kjaran Hermannsdóttir

Hráefnin í þessa uppskrift fást í verslunum Hagkaups. 

Bananapönnukökur með sírópi

Æ það er í alvöru talað eitt það besta að byrja daginn á pönnukökubakstri, það gerist eingöngu á frídögum og ég nýt þess í botn. Uppskriftin hér fyrir neðan er ótrúlega einföld og þægileg, sem er plús. Við viljum ekkert flækja hlutina snemma á morgnana. Ég bæti stundum bönunum út í deigið og mér þykir það æðislega gott, en auðvitað má sleppa því eða bæta einhverju öðru góðu út í deigið. 

Amerískar pönnukökur með bönunum

Hráefni 

• 1 egg
• 5 dl KORNAX hveiti 
• 3 tsk lyftiduft 
• 1/2 tsk. Salt
• 3 msk. Smjör ( brætt)
• 4 dl. Mjólk (Ef ykkur finnst deigið of þykkt þá bætið þið meiri mjólk út í)
• 1 tsk vanillusykur
• 1 banani 

Aðferð:

1. Sigtið saman hveiti, lyftidufti og salt í skál.
2. Bræðið smjör, leggið til hliðar og kælið.
3. Hrærið mjólk og eggjum saman í annarri skál.
4. Setjið mjólkurblönduna út í hveitiblönduna og hrærið vel saman. 
5. Bætið smjörinu saman við í nokkrum pörtum og hrærið vel á milli.
6. Bætið vanillusykrinum saman við í lokin. 
7. Skerið banana í bita og bætið bitunum út í deigið.
8. Hitið smjör á pönnu og steikið pönnukökurnar á báðum hliðum þar til þær verða gullinbrúnar. 

 Ég skar niður meiri banana og fersk jarðaber og lét ofan á, hellti smávegis af sírópi yfir og sáldraði að lokum flórsykri yfir. 

 Ég mæli með Maine Maple Syrup frá Stonewall Kitchen, ótrúlega bragðgott siróp.

xxx

Eva Laufey Kjaran Hermannsdóttir

Öll hráefnin í þessa uppskrift fást í verslunum Hagkaups.

Kotasælubollur og bráðhollt túnfiskssalat

Á morgnana og þá sérstaklega um helgar elska ég að baka morgunverðarbollur í ró og næði. Það gefst ekki mikill tími til baksturs á morgnana á virkum dögum en ég nýt þess í botn á laugardögum, að hella upp á gott kaffi og baka brauð í rólegheitum. En takið eftir að hér er ég að lýsa fullkomnum laugardegi, þeir byrja nú ekki allir svona. Ég fékk svo góðar bollur hjá vini okkar í morgunkaffi um daginn en þær bollur innhéldu kotasælu. Ég hef ekki hætt að hugsa um bollurnar sem ég fékk í morgunkaffinu og ákvað þess vegna að prófa mig áfram í morgunbollubakstri með kotasælu. 

Kotasælan gerir það að verkum að bollurnar verða dunmjúkar og góðar, ég elska kotasælu og nota hana mjög mikið en hafði aldrei prófað hana í brauðbakstur. Hún kom skemmtilega á óvart og þessar bollur eru æðislegar, ég gaf meðal annars foreldrum mínum og tengdaforeldrum bollur og voru þau ansi hrifin.  Ekki færu þau að plata :) 

Hér kemur uppskriftin að kotasælubollum og bráðhollu túnfiskssalati sem ég geri oft og þykir alltaf svakalega gott. 

Morgunverðarbollur með kotasælu

Brauðbakstur 

Einfalt 

Tími frá byrjun til enda:  90 mínútur 

Uppskriftin gefur ca. 22 bollur (fer eftir stærðinni sem þið kjósið) 

Hráefni 

• 100 g brætt smjör
• 4 dl nýmjólk
• 1 bréf þurrger (12 g bréfið)
• 1 msk hunang
• 1 tsk salt
• 400 g kotasæla
• ca. 900 g + aðeins meira KORNAX hveiti

Aðferð:

1. Bræðið smjör í potti, bætið mjólkinni, þurrgerinu og hunanginu saman við og hrærið vel saman.
2. Hellið blöndunni í hrærivélaskál ásamt saltinu, kotasælunni og hveitinu.
3. Hnoðið deigið í hrærivélinni í um það bil 8 mínútur. (Það tekur aðeins lengri tíma að gera það í höndunum)
4. Stráið hveiti á borðflöt og hnoðið deigið í smá stund með höndunum og mótið eina stóra kúlu.
5. Færið kúluna yfir í hreina skál og leggið viskastykki yfir skálina. Leyfið deiginu að hefast í rúmlega klukkustund eða þar deigið hefur tvöfaldast að stærð.
6. Hitið ofninn í 200°C (blástur)
7. Skiptið deiginu niður í jafn stóra bita og mótið bollurnar.
8. Leggið bollurnar á pappírsklædda ofnplötu.
9. Penslið bollurnar með eggi og sáldrið birkifræjum yfir.
10. Bakið við 200°C í 15 mínútur.

Gott túnfiskssalat er algjört sælgæti, ég elska þessa uppskrift þar sem hún er afar einföld og alls ekki óholl. Mér finnst stundum þegar ég kaupi tilbúið túnfiskssalat út í búð að það sé alltof mikið af majónesi í salatinu, ekki það að ég borði ekki majónes en það má ekki yfirgnæfa salatið. Þessi útgáfa er ekki bara góð heldur er hún líka bráðholl- ég segi ykkur það satt. 

Létt og gott túnfiskssalat 

• 1 dós túnfiskur í olíu (olían sigtuð frá)
• 3 msk sýrður rjómi (ég nota frá MS í bláu dósinni)
• 1/2 rauð paprika 
• 1/2 rauðlaukur 
• 2 harðsoðin egg 
• Salt og nýmalaður pipar 

Aðferð: 

1. Byrjið á því að sjóða eggin í 5 - 6 mínútur, kælið eggin svo í köldu vatni áður en þið skerið þau afar smátt. 
2. Skerið papriku og rauðlauk afar smátt niður. 
3. Blandið öllum hráefnum saman og kryddið til með salti og pipar. 
4. Best er að geyma salatið í kæli í lágmark hálftíma áður en þið ætlið að bera það fram. 

Salatið er himneskt með þessum morgunverðarbollum!

Njótið vel og ég vona að þið eigið góða helgi framundan. 

xxx

Eva Laufey Kjaran Hermannsdóttir 

 Öll hráefnin í þessa uppskrift fást í verslunum Hagkaups

Egg Benedict - vinsælasti brönsréttur í heimi

Þáttur kvöldsins var tileinkaður djúsí brönsréttur og ég varð auðvitað að gera einn af vinsælustu brönsréttum í heimi, egg Benedict. Fyrir mér er hann algjörlega fullkominn, sameinar allt sem mér þykir gott. Brauð, góð skinka, egg og ljúffeng sósa. Ég mæli svo sannarlega með að þið prófið þennan rétt um helgina og ég þori að lofa að þið eigið eftir að njóta vel. 

Egg Benedict 

• 4 egg
• 2 L vatn
• 1 tsk. edik (má sleppa) 
• Salt
• 6 sneiðar af góðri hráskinku 
• Tvær þykkar sneiðar af grófu brauði (ég notaði gróft súrdeigsbrauð)
• Spínat steikt upp úr smjöri, magn eftir smekk
• 3 - 4 msk. Hollandaise sósa (sjá uppskrift fyrir neðan)
• Salt og nýmalaður pipar
• Smátt söxuð steinselja 
• Basilíka, eftir smekk

Aðferð: Það er best að byrja á sósunni og þið finnið uppskriftina hér fyrir neðan. Næsta skref er að skera súrdeigsbrauðið í þykkar sneiðar, setjið brauðsneiðarnar á pappírsklædda ofnskúffu og sáldrið smávegis af olíu yfir og hitið í ofni í 5 - 7 mínútur við 180°C.

Hleypt egg eru linsoðin án skurnar. Það er mikilvægt að eggin séu fersk. Setjið vatn í pott, bætið edikinu út í vatnið og látið suðuna koma upp, lækkið þá undir pottinum en látið hann samt halda vægri suðu. 

Brjótið egg í bolla og hellið egginu mjög varlega út í vatnið. Sjóðið eggin í þrjár mínútur, þá ætti eggjahvítan að vera umvafin eggjarauðunni og þegar skorið er í eggið ætti rauðan að leka fallega út.  Takið eggið varlega upp úr pottinum, mér finnst best að nota fiskispaða og setjið á eldhúspappír og þerrið.

Snöggsteikið spínat upp úr smjöri og steikið hráskinkuna í smá stund á pönnu eða þar til hún er orðin stökk og fín. 

Setjið brauðsneiðarnar á diska á raðið í eftirfarandi röð, brauð, hráskinka, spínat, egg, tvær matskeiðar af sósu, salt, pipar og smátt söxuð steinselja. 

Þetta er vægast sagt ljúfengur réttur sem allir ættu að prófa. 

Hollandaise sósa 

• 2 eggjarauður 
• 1 tsk kalt vatn
• 1 tsk sítrónusafi 
• 200 g brætt smjör
• salt og nýmalaður pipar

Aðferð: 

Setjið eggjarauður, vatn og sítrónusafa í ílat sem töfrasprotinn kemst ofan í. Það verður að vera svipað og sést á þessu myndbandi sem ég fylgdi. Bræðið smjörið og passið að það sé enn heitt þegar þið hellið því saman við eggjarauðurnar. Þeytið eggjarauður, vatn og sítrónusafa með töfrasprotanum í eina til tvær mínútur eða þar til það er komin ljós og létt froða sem hefur margfaldast, hellið smjörinu í mjórri bunu saman við sósuna þar til hún er tilbúin. Ef sósan verður of þykk þá má þeyta svolitlu volgu vatni saman við. Að lokum er sósan smökkuð til með salti, pipar og svolitlum sítrónusafa. 

Missið ekki af Matargleði Evu öll fimmtudagskvöld á Stöð 2 klukkan 19:25. 

Njótið vel. 

xxx

Eva Laufey Kjaran Hermannsdóttir 

Öll hráefni sem notuð eru í þessa uppskrift fást í verslunum Hagkaups.

Eggja- og beikonskálar sem allir elska

Um helgar er tilvalið að nostra svolítið við morgunmatinn og í morgun útbjó ég þessar einföldu og gómsætu eggja- og beikonskálar. Ég mun pottþétt bera þessi egg fram í næsta brönsboði en þau er ótrúlega góð, maður fær allt í einum bita. Stökkt beikon, stökkt brauð og silkimjúkt egg. Ef þið eigið ferskar kryddjurtir er tilvalið að nota þær með og ég átti ferskt timían sem ég sett ofan á eggja- og beikonskálarnar mínar. Það mætti segja að þetta væri lúxus byrjun á deginum og ég mæli svo sannarlega með að þið prófið. 

Himneskar eggja- og beikonskálar.

Uppskriftin miðast á við fjóra manns en það er ekki óvitlaust að tvöfalda skammtinn enda er þessi uppskrift mjög góð og ekki ólíklegt að fólk vilji tvær múffur. 

• 4 beikonsneiðar
• 4 brauðsneiðar
• 4 Brúnegg
• Salt og nýmalaður pipar 
• Ferskar kryddjurtir eftir smekk t.d. timían eða steinselja

Aðferð: 

1. Hitið ofninn í 180°C (blástur) 
2. Skerið skorpuna af brauðinu og mótið litlar skálar með brauðinu með því að þrýsta brauðinu á botninn á eldfasta múffu forminu. 
3. Vefjið eina beikonsneið utan um hverja brauðsneið og setjið í eldfasta múffu formið. *Það er mjög mikilvægt að smyrja formið vel áður vegna þess að annars festist beikonið og eggið við formið.
4. Brjótið eitt egg í hverja skál. 
5. Kryddið til með salti, pipar og ferskum kryddjurtum.
6. Bakið við 180°C í ca. 10 mínútur. Fylgist með eggjunum en þau eru tilbúin þegar eggin eru stíf. 

Berið fram og njótið með morgunkaffibollanum. 

Njótið vel. 

xxx

Eva Laufey Kjaran Hermannsdóttir

Allt hráefni sem notað er í þessa uppskrift fæst í verslunum Hagkaups. 

Jólamúslí með grísku jógúrti og hindberjum

Sæl verið þið kæru lesendur, þennan morguninn langar mig að deila með ykkur uppskrift að ómótstæðilegum morgunmat já eða millimáli... reyndar má líka bjóða upp á hann sem hollari eftirrétt. Ó jæja, semsagt möguleikarnir eru margir og þið ættuð svo sannarlega að prófa að útbúa þetta heimalagaða múslí með örlitlum jólakeim. Fyrr í vikunni bakaði ég nokkrar jólakökur og það var svo notalegt, ég er að segja ykkur það. Það má alveg byrja þennan jólabakstur og njóta hans fram í desember. 

Þið getið að minnsta kosti byrjað á þessu kanil- og engifermúslí sem er alveg frábært með grísku jógúrti og ferskum berjum t.d. hindberjum. Það er líka gott að eiga múslíið í krukku á eldhúsborðinu en þá er svo auðvelt að grípa í smá og smá sem millimál. Hér kemur uppskriftin sem er bæði sáraeinföld og fljótleg. Njótið vel. 

Kanil- og engifermúslí 

• 5 dl tröllahafrar
• 1 dl hörfræ
• 2 dl sólblómafræ
• 1 dl saxaðar kasjúhnetur
• 1 dl eplasafi
• 1 dl kókosolía
• 1 msk hlynsíróp (eða önnur sæta t.d. hunang)
• ½ tsk malað engifer
• 1 tsk kanill

Aðferð: 

1. Hitið ofninn í 180°C. 
2. Blandið öllum hráefnum saman í skál og hrærið. 
3. Klæðið bökunarplötu með bökunarpappír og dreifið múslíinu á plötuna. 
4. Bakið í ca. 30 mínútur eða lengur. Fylgist vel með og hrærið nokkrum sinnum í blöndunni á meðan bökunartíma stendur.  
5. Kælið vel áður en þið berið fram. Bætið t.d. þurrkuðum berjum eða kókosflögum við múslíið þegar það kemur út úr ofninum.

Ég vona að þið eigið góðan dag framundan. 

xxx

Eva Laufey Kjaran Hermannsdóttir

Öll hráefni sem notuð eru í þessa uppskrift fást í verslunum Hagkaups.