Hamborgaragleði

Það er fátt betra en matarmikill hamborgari. Hamborgarinn getur verið algjört lostæti, í mínum huga er hann ekki skyndibitafæði. Mér finnst hamborgarar geta verið holl og góð máltíð. Það er hægt að bera hamborgarann fram á marga vegu, hægt er að hafa með honum óteljandi sósur og meðlæti. 

Hamborgarar úr kjúklingakjöti eða fisk eru líka dásamlega góðir. Hægt er að bera hamborgarann fram í allskyns brauðum, ég var með að þessu sinni týpískt hamborgarabrauð sem ég keypti. En það er virkilega skemmtilegt að baka sitt eigið brauð, prufa eitthvað nýtt og spennandi. Það er náttúrlega dásemdin við matargerð, maður er alltaf að prufa og læra eitthvað nýtt. Möguleikarnir eru miklir og endalaust hægt að fikra sig áfram. 

Hamborgari - fyrir fjóra 

400 g nautahakk

1 egg 

1 msk brauðrasp

1/2 rauðlaukur, smátt saxaður

1 msk fersk steinselja (ég átti ekki ferska steinselju svo ég notaði steinseljukrydd)

1 tsk ítalskt krydd 

salt og nýmalaður pipar

Hnoðið öllu vel saman og mótið hamborgarana. Hitið olíu á pönnu og steikið hamborgarana í um 2 mínútur á hvorri hlið. (kryddið vel með salti og pipar) 

Stillið ofninn í 180°C, setjið hamborgarana á hamborgarabrauð. Skerið mozzarella ostinn í sneiðar, ég vil helst hafa þær svolítið þykkar. Setjið ostinn á hvern borgara og inn í ofn ásamt hamborgarabrauðinu í 1 - 2 mín, eða þar til osturinn er bráðnaður. 

Hægt er að bera hamborgara fram með mörgum sósum, mér finnst gamla góða hamborgarasósan alltaf góð en svo finnst mér ansi gott að breyta til. Að þessu sinni gerði ég gríska jógúrtsósu, sem mér finnst alltaf góð. Hægt er að bera þessa sósu með mörgum réttum. Ég læt ansi vel af hvítlauk í sósuna en það er náttúrlega bara smekksatriði. Ég dassa mig alltaf til þegar ég bý til þessa sósu og ég mæli með því að þið gerið slíkt hið sama. Þannig verður útkoman best og allir sælir með sósuna.

Grísk jógúrtsósa

Grískt jógúrt

Hvítlaukur

Sítrónusafi, nokkrir dropar af góðum sítrónusafa

Agúrka, afhýdd og smátt söxuð

Salt og pipar að vild

Þessu er öllu blandað saman í skál. Ljúffeng sósa sem passar svo sannarlega við hamborgarann.

Sætar kartöflur eru ansi bragðgóðar. Þær passa við hvaða máltíð sem er, þær innihalda minni sykur en venjulegar kartöflur og eru stútfullar af C vítamíni og trefjum. Mér finnst gott að sjóða þær, steikja þær, grilla þær og baka þær í ofni. Semsé, góðar kartöflur að mínu mati :) 

Ofnbakaðar sætar kartöflur 

Sætar kartöflur, tvær - þrjár stórar

Olía

Maldon salt

Afhýðið og skerið kartöflurnar í langa bita. Setjið þær í eldfast mót, dreifið olíu yfir og inn í ofn við 180°C í 30 - 35 mínútur. Sáldrið maldon salti yfir ljúffengu kartöflurnar þegar þær koma út úr ofninum. 

Ég skar niður klettasalat, tómata og agúrku. Blandaði því vel saman í skál, sáldraði pínu af salt og pipar yfir og leyfði þessu að vera inn í kæli í í 15 - 20 mín. Lét salatblönduna á hamborgarann og notaði salatið sömuleiðis sem meðlæti. 

Það er hægt að nota hvaða grænmeti sem er á hamborgara, skemmtilegt er að hafa mikið úrval svo hver og einn geti búið til sinn eigin hamborgara og borðað af bestu lyst. 

Þessi hamborgari var ansi góður og matarmikill. Alveg eins og ég vil hafa hann. 

Ég vona að þið njótið vel og jafnvel prufið þessa uppskrift. 

Góður bjór með góðum hamborgara, það er nú ansi gott combó.

Ég vona að þið eigið ansi góða helgi 

xxx

Eva Laufey Kjaran

Súkkulaði cupcakes með súkkulaðikremi

..... a piece of happiness

 Fyrir fimm árum þá fæddist dásamlegur prins hann Kristían Mar Kjaran, systursonur minn. Hann er mikið afmælisbarn og ég hefði óskað þess að eyða með honum afmælisdeginum. Það er agalega erfitt að prinsarnir mínir búi í Noregi. Þeir eru þrír prinsar í Noregi, ólíkir og skemmtilegir bræður sem gjörsamlega bræða frænku sína. Þeir eru miklir sælkerar, sérlega Kristían.
 Okkur finnst fátt skemmtilegra en að baka saman, þeir setja á sig svuntu og vilja taka þátt í bakstrinum. 

Súkkulaðikökur eiga svo sannarlega við á afmælisdögum, skreyttar súkkulaðikökur í öllum regnbogans litum. Kökurnar fanga augað og eru svo sannarlega hamingjukökur. 

Þessar kökur eru einfaldar og vissulega ljúffengar. 

Ég fékk tólf kökur úr uppskriftinni, þetta voru frekar stórar bollakökur hjá mér í þetta sinn.

 Súkkulaði cupcakes 

2 egg

115 g smjör, við stofuhita

180 g hveiti 

200 g sykur 

2 tsk lyftiduft

1/2 tsk salt

2 tsk vanilla extract

60 g kakó

240 ml uppáhellt kaffi (sterkt)

Aðferð 

Vinnið sykur og smjör vel saman þar til létt er og ljóst. Setjið eggin saman við eitt í einu og vinnið vel saman á milli. Blandið uppáhelltu kaffi og kakóinu saman í skál, setjið það til hliðar og kælið vel áður en þið blandið því saman við eggjablönduna. 

Setjið þurrefnin og vanilludropana saman við eggjablönduna og vinnið rólega í ca. tvær mínútur.  Að lokum bætið þið súkkulaðiblöndunni saman við, í tveimur pörtum. 

Vinnið rólega saman þar til gott deig er komið. 

Skiptið deiginu niður í tólf kökuform. Bakið við 180°C í 18 - 20 mínútur. 

Kælið kökurnar í lágmark 30 mínútur áður en þið skreytið þær með súkkulaðikremi 

(ég svindla stundum og læt þær í frysti í smá stund.. bara ef ég er að flýta mér) Annars er alltaf best að baka í huggulegheitum og vera ekkert í neinu stressi. 

Flestar súkkulaðikökur eru langbestar með góðu súkkulaðikremi, helst bara þessu klassíska smjörkremi sem við þekkjum nú langflest. 

Súkkulaðikrem 

200 g smjör, við stofuhita

3 1/2 dl flórsykur 

2 - 3 msk uppáhellt kaffi, vel sterkt og kalt 

1 tsk vanilla extract 

50  g kakó

Aðferð 

Blandið öllu saman í kremið og vinnið í ca. 4 - 5 mín. þar til kremið fer aðeins að lýsast og verða létt. Smakkið ykkur til, ég hvet ykkur til þess. Ef ykkur finnst kremið of þykkt þá bætið þið meiri vökva t.d. meiri kaffi og ef ykkur finnst kremið of þunnt þá bætið þið meiri flórsykri saman við. 

Sprautið kreminu á kökurnar og skreytið að vild! 

 Litríkt skraut sem gleður augað 

Það er ómissandi að drekka ískalda mjólk með súkkulaðiköku. Mjólkin verður enn betri ef hún er drukkin með svona fínu röri. Þessi rör keypti ég í Magnolia Bakery í New York. Ég hef ekki séð þau hér heima fyrir en ef þið hafið rekist á þau þá megið þið endilega benda mér á. 

Mér finnst þau svo falleg og gamaldags. 

Það skiptir ekki máli á hvaða aldri við erum.. ég held að við getum flest verið sammála um að góð súkkulaðikaka er tímalaus klassíker og á alltaf vel við.
Einn biti af kökunni og einn sopi af mjólk bætir og kætir.

Prinsarnir mínir þrír. 

Daníel Mar, Kristían Mar og Steindór Mar. Ég er svo heppin að eiga þá, mínir strákar sem ég elska út af lífinu. Hlakka svo mikið til að sjá þá og knúsa, sem ég vona að verði sem allra fyrst.

Ég vona að þið eigið góðan dag kæru lesendur

xxx

Eva Laufey Kjaran

Morgunmatur í sveitinni

Ég og Haddi erum í sveitinni. Það er svo huggulegt.. dagurinn í dag byrjaði á góðum morgunverði. Mér finnst svo huggulegt á helgum að eyða miklum tíma í að útbúa eitthvað gott í morgunsárið, ég hef ekki tíma fyrir slíkt dúll á virkum dögum. Mér finnst ansi skemmtilegt að raða matnum fallega á disk, þó svo að maturinn sé bara fyrir mig sjálfa og bara ristað brauð. Það verður skemmtilegra að borða matinn ef hann er borinn fallega fram, það finnst mér. 

Í morgun hef ég svo bara verið að dúlla mér að skoða uppskriftir af sænskum kanilsnúðum og amerískum kanilsnúðum, plan dagsins er að baka snúða og hafa það huggulegt hér í sveitinni.

Ég vona að þið eigið ljúfan sunnudag 

xxx

Eva Laufey Kjaran

Spínatbaka

Quiche er komið frá Frökkum. Dásamlegar bökur fylltar með ýmsu góðgæti. 

Ég fór til Frakklands í fyrrasumar og smakkaði margar útgáfur af Quiche, þeir kunna svo sannarlega að gera góðar bökur. 

Mér finnst agalega gott að fá mér Quiche af og til, það getur líka verið gott að gera mikið í einu ef þið eruð í stuði og eiga í frystinum. Það er ansi gott að grípa eina og eina sneið úr frystinum þegar að maður nennir ekki alveg að elda eða þá til þess að taka með í nesti í skólann/vinnuna. 

Hægt er að nota hvað sem er í þessar bökur, bara það sem er til í ísskápnum hverju sinni. 

Uppskriftin sem ég deili með ykkur í dag er ansi einföld og ég vona að þið eigið eftir að prufa. 

Ég geri stundum þessa böku, eða böku svipaða og þessa um helgar. Tilvalið að bjóða upp á þessa böku  í brunch-boði ef þú ert að halda slíkt eða þá að fara með í saumaklúbbinn. Enginn verður svikinn af ljúffengri böku, svo mikið er víst. 

 Spínatbaka

Uppskrift miðast á við þrjá - fjóra. 

Deig: 

2 bollar grófmalað spelt, (á myndinni fyrir neðan sjáið þið stærðina á bollanum sem ég nota. En bollinn rúmar 237 ml )

100 g smjör, skorið í teninga

80 ml kalt vatn

Salt & pipar

Fylling:

4 egg

80 ml mjólk

handfylli spínat

chorizo, magn eftir smekk

1/4 paprika

2 - 3 msk blaðlaukur, fínt saxaður

Rifinn ostur, magn eftir smekk

1/2 tsk hvítlaukskrydd

Salt & nýmalaður pipar eftir smekk

Aðferð: 

 Skerið smjörið í litla teninga, blandið smjörinu, speltinu og saltinu saman með höndunum.
Bætið síðan vatninu saman við smám saman.

Smjörteningarnir þurfa að blandast vel saman við hveitið, á myndinni hér fyrir ofan þá er blandan nánast tilbúin. 

Svo er bara að slá deiginu upp í myndarlega kúlu, setja plastfilmu utan um og geyma inn í ísskáp í 30 - 60 mín. 

Fletjið deigið út og í bökuformið. Ég notaði frekar lítið bökunarform í þetta sinn, var jafn stórt og ca. stór matardiskur. Ég lét bökunarpappír undir deigið svo það myndi ekki festast við formið. 

Potið í deigi með gaffli og inn í ofn í 8 - 10 mínútur. 

Þið getið notað hvað sem er! Bara það sem þið eigið ísskápnum hverju sinni. Ég notaði spínat, papriku, blaðlauk og chorizo að þessu sinni. Ég skar grænmetið og chorizo smátt niður, raðaði ofan í bökunarskelina og hellti eggjablöndunni yfir. 

Eggjablanda: pískið fjögur egg léttilega, bætið mjólkinni og kryddinu saman við. 

Grænmetið, chorizo, eggjablandan og osturinn kominn á sinn stað. Fínt er að sáldra smá kryddi yfir ostinn að lokum. Bakið í ca. 35 - 40 mínútur eða þar til osturinn er orðinn fallega brúnn. 

Svona lítur bakan út eftir bakstur.

Mæli með að þið berið bökuna fram með salati, fetaost og léttri sósu t.d. jógúrtsósu (grískt jógúrt, hvítlaukur, pipar og agúrka) 

Ég vona að þið njótið vel. Góða helgi, gerið nú vel við ykkur um helgina í mat og drykk. Þið eigið það skilið. 

xxx

Eva Laufey Kjaran

Lífið Instagrammað

Átti ansi skemmtilegt kvöld á Fiskmarkaðnum í síðustu viku, maturinn er svo góður að ég kemst ekki yfir það. Ætla að fara þangað aftur sem allra fyrst. Og mæli með því að þið gerið slíkt hið sama. Virkilega virkilega gott. 

1.Huggulegur byrjun á deginum. Kaffi, Vogue og matarblöð. 2. Tónleikar með Eivör, vávávívá. Sú er glæsileg og hæfileikarík.

3. Humarsalat á Galító, það er ljúffengt 4. Brunch platti á Café Paris, augnyndi og virkilega gott.

evalaufeykjaran á instantgram - Ég læt inn ansi margar myndir á instagram, loksins búin að fá mér síma með almennilega myndavél.. það er bara svo gaman að taka myndir af lífinu.. sér í lagi af góðum mat. 

xxx

Eva Laufey Kjaran

Sunnudags huggulegheit.

Helgin er búin að vera svo ansi fín. Ég er búin að fara á tvenna tónleika, mjög ólíkir tónleikar en frábærir báðir tveir. Annars vegar með Jet Black Joe og hins vegar með Eivör. Frábært tónlistarfólk. 

Svo er ég búin að eyða helginni með góðu fólki, borða góðan mat og hafa það huggulegt. 

Dagurinn í dag byrjaði á pönnukökum og ávöxtum, smá sunnudagshuggulegheit.
Veðrið er ansi gott og ég ætla að eyða deginum með litla frænda mínum. 

Ég vona að þið eigið góðan dag 

xxx

Eva Laufey Kjaran