Gjafaleikur og súkkulaðihristingur.

Ég er algjör súkkulaðifíkill og gæti vel borðað súkkulaði í öll mál, ég reyni þó að gæta hófs. Það er fátt sem kemst nálægt því að vera jafn dásamlegt og bragðgóður súkkulaði mjólkurhristingur. Þessi mjólkurhristingur er af einföldustu gerð og er mjög bragðgóður.

Það er mikilvægt að velja sér ís með miklu súkkulaðibragði. Sá ís sem mér finnst bestur er GOTT súkkulaðiísinn. Alvöru súkkulaðibragð og þá þarf maður ekki að bæta kakódufti saman við til þess að fá rétta bragðið. 

 Súkkulaðihristingur af einföldustu gerð

2 kúlur súkkulaðiís

1/2 bolli mjólk

Setjið saman í blandara. Hellið í glas og sigtið smá kakódufti yfir. 

(Smakkið hristinginn áður en þið hellið honum í glas því ef til vill þá viljið þið meiri súkkulaðibragð og þá bætið þið smá kakódufti út í ísinn og blandið saman við í blandaranum.)

Virkilega dásamlegur mjólkurhristingur sem ég mæli með að þið prufið. Sérlega mikið augnyndi, þá sér í lagi ef mjólkurhristingurinn er borin fram í fallegu glasi og með svona fallegu röri. 

Ég hef fengið ansi margar fyrirspurnir hvað varðar þessi fallegu rör sem ég nota mikið. 

Ég keypti mér ansi mikið af þessum rörum í sumar þegar að ég var að fljúga til Ameríku, það var því nauðsynlegt að finna búð hér á Íslandi sem seldi þessi rör því þau eru virkilega skemmtileg og falleg. 

Það var því frábært að rekast á Íslenzka Pappírsfélagið sem sérhæfir sig í innflutningi á vönduðum og umhverfisvænum umbúðavörum og gjafavörum. Íslenzka Pappírsfélagið býður upp á fjölbreytt úrval gjafakorta, gjafapappír ásamt borðum, böndum, rörum, merkispjöldum og límmiðum. 

Áhersla er lögð á að vörurnar séu umhverfisvænar. 

 Í dag ætla ég í samstarfi við Íslenzka Pappírsfélagið að gefa heppnum lesenda gjafapoka með allskyns vörum frá Íslenzka Pappírsfélaginu. Ótrúlega fallegar og skemmtilegar vörur. 

Það eina sem þið elsku lesendur þurfið að gera til þess að eiga möguleika á því að næla ykkur í gjafapokann fína er að skrifa nafn og netfang fyrir neðan færsluna í athugasemdakerfið og gefa blogginu like á Facebook. Ef þið hafið nú þegar gefið blogginu like þá er nóg að setja nafn og netfang hér fyrir neðan færsluna. 

Ég dreg út heppin vinningshafa eftir viku, þann 31.október. 

Ég hvet ykkur til þess kíkja inn á www.pappirsfelagid.is og fylgjast sömuleiðis með Íslenzka Pappírsfélaginu á Facebook. 

Ég vona að þið eigið ljúfan dag kæru vinir 

xxx

Eva Laufey Kjaran

Djúsí samloka

Mér finnst svo agalegt gott þegar að ég næ að útbúa mér eitthvað sáraeinfalt og ferskt í hádeginu.
 Ég geri mér þetta salat ansi oft, ég nota salatið á gróft brauð eða á hrökkbrauð.

Mér finnst best að rista brauðið ef ég er ekki með hrökkbrauð, en það er nú bara smekksatriði.

 Þetta er ekki bein uppskrift heldur einungis hugmynd að léttum hádegisverði, ég dassa mig alltaf til og frá svo ég veit aldrei hvað ég læt mikið af hverju í þetta salat. 

Hér kemur innihaldið, en það er langbest að dassa sig áfram. 

túnfiskur í dós, í vatni

klettasalat, smátt saxað

kirsuberjatómatar, smátt saxaðir

avókadó, smátt saxað

paprika, smátt söxuð

rauðlaukur, smátt saxaður

ólífuolía

salt og nýmalaður pipar

steinselja, smátt söxuð

Öllu blandað vel saman. Ég fæ mér alltaf kotasælu með því hún gerir salatið enn betra og meira djúsí. 

Virkilega fljótlegur, einfaldur og ljúffengur hádegisverður

Ég mæli með að þið prufið. 

Á morgun verður skemmtilegur gjafaleikur á blogginu svo ég hvet ykkur til þess að fylgjast með. 

Vonandi eigið þið ljúfan þriðjudag kæru vinir 

xxx

Eva Laufey Kjaran

Laugardagslúxus

 Morgunstund gefur gull í mund. 

Þessi laugardagsmorgun byrjaði aðeins vel og nú ligg ég upp í sófa, búin að borða yfir mig af laugardagskræsingum. Ég ætla að liggja hér svolítið lengur og fara síðan í göngutúr í þessu yndislega veðri. Svo er það bara lærdómur og huggulegt sem einkenna þennan laugardag. 

Það er vissulega tilefni til þess að gera vel við sig á laugardögum, í mínum dagbókum þá eru þeir heilagir nammidagar. Þessi dagur var aldeilis ekki undantekning og naut ég þess að borða beikon, egg, rúnstykki og amerískar pönnukökur. 

 Amerískar pönnukökur með jarðaberjum og súkkulaðisósu. Það er erfitt að koma orðum að því hvað þetta er dásamlega gott. 

HÉR finnið þið uppskrift af dásamlegum amerískum pönnukökum.

 Fersk íslensk jarðaber.

 Ljúffengur morgunmatur á góðum laugardegi

 Virkilega notalegt í sveitinni. 

En nú þarf ég að klára nokkur verkefni áður en ég get farið út í göngutúr svo ég kveð ykkur í bili. Ég vona að þið eigið ljúfan laugardag. Gerið vel við ykkur í mat og ég hvet ykkur til þess að fara út að  ganga í þessu fallega veðri. 

xxx

Eva Laufey Kjaran

Föstudagshuggulegheit

 Ég er komin í sveitina ásamt ansi góðu fólki, litli bróðir minn og hans kærasta komu með okkur Hadda í sveitina. Við byrjuðum auðvitað á því að fá okkur góðan göngutúr og skoðuðum Seljalandafoss. 

Ég og Brynja völdum ekki sniðuga skó fyrir göngutúrinn, en það er nú önnur saga.

 Það er svo ansi skemmtilegt að labba bakvið fossinn. Dásamlegt umhverfi. 

 Þegar að við komum heim þá var okkur fremur kalt svo ég ákvað að gera heitt súkkulaði með jóla ívafi.

Ég sauð mjólk með kanilstöngum og negulnöglum, sigtaði það síðan frá mjólkinni og bætti við nokkrum bitum af dökku súkkulaði og nokkrum tsk. af sykri.  Þeytti rjóma til þess að hafa með, það er alltaf tilefni fyrir rjóma og rjóminn gerir heita súkkulaðið enn betra.  lokum dreifði ég smá súkkulaði íssósu yfir rjómann. Ég mæli svo sannarlega með þessu súkkulaði á köldum haustdögum. Það er fátt betra.

Greyið Brynja er örugglega enn að venjast því að kærastinn hennar eigi ansi skrýtna systur. 

Ég vona að þið eigið eftir að eiga góða helgi kæru vinir 

xxx

Eva Laufey Kjaran

Bláberjaboozt

Það er ekkert sem jafnast á við ferskt og gott boozt í morgunsárið. Ég nota yfirleitt frosin ber og booztin verða betri fyrir vikið að mínu mati. Ísköld og ljúffeng, alveg eins og að borða góðan ís. 

Það tekur enga stund að gera boozt, ég nota það sem ég á í ísskápnum og frystinum hverju sinni. Í morgun þá gerði ég mér bláberja boozt og hann var sérlega góður. 

Bláberjaboozt

2 bollar frosin bláber 

1 banani 

1 msk hörfræ 

1 lítill dós af vanilluskyri 

150 ml superberries safi (magn er í raun eftir smekk, þið prufið ykkur til)

Rifinn engiferrót, magn eftir smekk

Allt sett í blandarann í nokkrar mínútur. 

Það er nóg fyrir stafni í dag svo það var algjör nauðsyn að byrja daginn vel með góðum boozt. 

Ég vona að þið eigið ljúfan dag kæru vinir, það er svo föstudagur á morgun sem þýðir að helgin er að koma. Það er alltaf föstudagur, tíminn flýgur áfram. 

xxx

Eva Laufey Kjaran

Kjúklingasalat

Sumir dagar eru ansi þéttir og mikið sem þarf að gera, en það þýðir þó ekki að sleppa við að hafa eitthvað gott í kvöldmatinn. Það er alltaf hægt að finna smá tíma fyrir matargerð. Að búa til einfalt og matarmikið salat tekur ekki lengri tíma en  20 mínútur.  Þetta salat geri ansi oft, geri það nú sjaldan eins en mér finnst þessi útgáfa eiginlega sú besta. 

 Kjúklingasalat

Fyrir u.þ.b. 3 - 4 manns

2  kjúklingabringur

1 poki af blönduðu salati, pokinn var 200 g 

100 g Tagliatelle

1/2 agúrka 

1 græn paprika

1 rauð paprika

1/2 rauðlaukur 

10 kirsuberjatómatar

1/2 krukka fetaostur, gott að setja smá af olíuna líka

rifinn parmesan ostur, magn eftir smekk

1 askja jarðaber

mulið nachos með saltbragði, magn eftir smekk

1 1/2 msk balsamikedik

2 msk sweet chili sósa

sesam fræ, magn eftir smekk 

salt og pipar

1. Sjóðið pasta samkvæmt leiðbeiningum á pakkanum. (Ég læt alltaf salt og smá ólífuolíu í pottinn) Þegar að það er tilbúið, losið þá allt vatn frá og setjið pastað inn í ísskáp í örfáar mínútur. 

2. Skerið kjúklingabringuna í litla bita, hitið olíu á pönnu og steikið hana við vægan hita. Kryddið til með smá salt og pipar. Þegar að bringan er að verða tilbúin bætið þá sweet chili sósunni og sesamfræjum saman við, hrærið vel í. Ég bætti 1 msk af vatni saman við líka og leyfði þessu að malla við mjög lágan hita í 1 - 2 mínútur. 

3. Skerið grænmetið smátt niður, ég reif gúrkuna niður með rifjárni. Skolið allt saman vel og blandið þessu saman í skál. 

4. Bætið kjúklingabringunni, balsamik edikinu, fetaostinum og jarðaberjum saman við. Blandið vel saman og kryddið með smá salti og pipar.

 5. Stráið salatinu á fat, myljið nachos yfir og rífið duglega af ferskum parmesan ost og stráið yfir.

 Litríkt og fallegt salat. 

  Berið salatið gjarnan með fram með brauði, pestó og ef til vill salat dressingu. Að vísu reyni ég að sleppa því að nota dressingu því þær eiga það til að vera svo sterkar og stela því bragðinu af yndislega grænmetinu. Kjúklingurinn á líka að vera ansi vel kryddaður, sweet chili sósan er ansi sterk og fín. 

 Fljótlegt og ljúffengt salat á þessu heimili í kvöld, ég get varla beðið eftir því að gæða mér á salatinu. Plan kvöldsins er að læra og fara svo í göngutúr, haustið er svo kósí og veðrið dásamlegt. Gott ef það er ekki bara tilefni til þess að fá sér heitt súkkulaði eftir göngutúrinn, ég er nú hrædd um það. Ég á allavega súkkulaði, kanilstangir og negulnagla upp í skáp svo mér finnst það mjög líklegt að ég gæði mér á ljúffengu jóla-súkkulaði í kvöld. Sagði ég jóla? Já hvort ég gerði. Ég er farin að hlakka til. 

Ég ætla þó ekki að tala meira um jólin í þetta sinn.

Ég mæli með þessu salati kæru vinir og ég vona að þið eigið eftir að eiga notalegt kvöld 

xxx

Eva Laufey Kjaran

Andlitsmaski

Ég er með þurra húð og ég finn það svo sannarlega þegar það kólnar að húðin verður sérstaklega þurr. Ég reyni því að vera dugleg að bera á mig andlitsmaska og rakakrem. 

Ég keypti mér andlitsmaska frá Académíe fyrir nokkrum vikum. Aprikósu maski sem er að mínu mati ansi góður og mæli ég með honum. Hann er á mjög fínu verði og dugir ansi lengi. 

Maskinn er í fljótandi formi og lyktin af honum er ansi góð, ég spái mikið í lyktinni þegar að ég kaupi mér snyrtivörur. Það eina sem maður þarf að gera er að bera maskann á andlitið, bíða með hann á andlitinu í 20 - 30 mínútur, þá er hann orðinn ágætlega harður. Þegar maskinn er þveginn skal varast að nota of heitt vatn, bara volgt vatn því heita vatnið þurrkar upp húðina og þá er maskaaðferðin farin í vaskinn. 

 Ég keypti aprikósu maskann á snyrtistofunni Dekur á Akranesi. 

xxx

Eva Laufey Kjaran

Bleikur sunnudagsbakstur

 Október er mánuður Bleiku slaufunnar.  

Bleika slaufan er tákn Krabbameinsfélagsins í báráttunni gegn krabbameinum hjá konum. 

Árlegur meðafjöldi krabbameina hjá íslenskum konum er um 660. 

Það er skylda okkar að styðja baráttuna gegn krabbameini hjá konum og vera með slaufuna sýnilega. 

Það er of algengt að góð heilsa sé tekin sem sjálfgefinn hlutur. Maður á að þakka fyrir heilsuna hvern einasta dag. Ég hræðist fátt meira en krabbamein og mér finnst æ algengara að heyra af stúlkum á mínum aldri sem eru að greinast með krabbamein. 

Ég hef alltaf verið mjög meðvituð um krabbamein og er líklega meira á tánum gagnvart því en gengur og gerist, ég er líka mjög lífhrædd en það er nú önnur saga. Mamma mín greindist með krabbamein þegar að hún var einungis 28 ára gömul. Þriggja barna móðir í blóma lífsins, eldri systir mín var 10 ára, ég var einungis tveggja ára gömul og litli bróðir minn árinu yngri. Þökk sé frábærum læknum og duglegri mömmu þá sigraði hún meinið. Ég þakka svo sannarlega fyrir það, hún er algjörlega mín hetja.

Ég þakka fyrir tæknina, fólkið í heilbrigðisgeiranum og þær rannsóknir sem gerðar eru til þess að finna lækningu við krabbameini. Það er margt sem við getum gert til þess að styðja við baráttuna gegn krabbameini, Bleika slaufan er ein leið til þess. Þessi helgi er síðasta söluhelgi Bleiku slaufunnar svo ef þú átt eftir að kaupa þá hvet ég þig til þess að stökkva út og næla þér í eina slaufu. 

Hér finnur þú frekari upplýsingar um Bleiku slaufuna.

 Sunnudagsbaksturinn var því helgaður Bleiku slaufunni. 

Vanillubollakökur með hvítu súkkulaði 

250 g Sykur

140 g Smjör

2 Egg

250 gHveiti

1 1/2 msk. Vanilla Extract

1 tsk. Lyftiduft

70 g hvítt súkkulaði, smátt saxað

3 msk. Mjólk

Þeytið saman smjör og sykur í þrjár mínútur, bætið einu og einu eggi saman við. Þeytið vel á milli.

Sigtið saman hveiti og lyftiduft amk. þrisvar sinnum. Bætið hveitiblöndunni, vanilla og mjólkinni saman við og blandið mjög vel saman í nokkrar mínútur þar til blandan verður orðin silkimjúk. Að lokum bætið þið hvíta súkkulaði saman við með sleif.

Setjið í bollaköku form og inn í ofn við 180°C í 20 - 25 mín.

Kælið kökurnar vel áður en þið setjið á þær krem.

Uppáhalds kremið mitt er smjörkrem með hvítu súkkulaði. Það hentar afar vel með ansi einföldum vanillukökum. Þið getið auðvitað notað hvaða krem sem er, súkkulaðikrem er líka ansi gott á kökurnar. 

Hvítt súkkulaðikrem

230 g smjör, við stofuhita

4 dl flórsykur 

200 g hvítt súkkulaði, brætt. 

2 tsk vanilla extract 

Þeytið flórsykur og smjör vel saman í nokkrar mínútur. Bræðið súkkulaðið yfir vatnsbaði og bætið við smjörkremið. Að lokum bætið þið vanillu saman við og hrærið vel í nokkrar mínútur, þar til kremið verður létt og fínt. 

Ég setti nokkra dropa af bleikum matarlit saman við kremið. 

Ég bræddi hvítt súkkulaði og bætti smávegis af bleikum matarlit saman við, sprautaði síðan súkkulaðinu á bökunarpappír og bjó til bleika slaufu. Lét súkkulaðiskrautið standa inn í ísskáp í klukkustund áður en ég lét það á kökurnar.

 Bleikar kökur sem voru svo sannarlega góðar með ískaldri mjólk. 

 Það er nauðsynlegt að vera meðvitaður um heilsuna. Að hugsa vel um líkama og sál. 

Ég trúi því og treysti að við getum haft góð áhrif á okkar heilsu, við fáum einungis einn líkama til afnota á meðan að við erum hér og við þurfum að hugsa virkilega vel um hann. 

Ég  vona að þið eigið ljúfan sunnudag kæru vinir 

xxx

Eva Laufey Kjaran

Laugardagskvöld

Er búin að koma mér ansi vel fyrir upp í sófa, er með uppáhalds bækurnar mínar og blöðin mér við hlið. Í sjónvarpinu er sjónvarpsþátturinn The little Paris kitchen með Rachel Khoo. Þættirnir eru svo ótrúlega flottir hjá henni og hún er svo dásamleg, maturinn hjá henni er líka svakalega girnilegur. 

Lúxus laugardagskvöld sumsé, fletti í gegnum bækurnar/blöðin mín, horfi á matreiðsluþætti, drekk gott kaffi og er auðvitað með súkkulaðirúsínur með kaffinu. Agalega notalegt. Vinkona mín ætlar svo að koma og taka þátt í matarhuggulegheitum. Það er mjög gott að eiga vinkonu með sama áhugamálið. 

Ég vona að þið eigið ljúft laugardagskvöld kæru vinir

xxx

Eva Laufey Kjaran

Helgin

 Eins og ég hef nú sagt við ykkur áður þá elska ég föstudaga. Skemmtilegasti dagur vikunnar að mínu mati. Dagurinn í dag er búin að vera virkilega huggulegur. Átti stórgott hádegisdeit með systrum mínum, Eddu og Sigrúnu. Það er alltaf jafn gott að hitta þær. 

Fallegar. 

Í kvöld er afmæli hjá yndislegum vinum. Mikil ósköp sem ég er spennt fyrir því að eyða kvöldinu með vinum mínum. Það er fátt skemmtilegra.

Ég vona svo sannarlega að þið eigið eftir að eiga góða helgi. 

xxx

Eva Laufey Kjaran