Nú skal baka..brúðartertu

 Stóri dagurinn hjá Mareni systur minni er á morgun. Spennan er mikil og það er mikið að gera. Allir með sitt hlutverk og allt að verða klárt. Ég fæ að sjá um brúðartertuna eins og ég var búin að segja við ykkur svo nú hugsa ég eingöngu í smjöri og sykri.

 Við völdum svakalega einfalda tertu, súkkulaðikaka með súkkulaðimús og kremið er vanillukrem.

Einföld en mjög ljúffeng. Ég vona alla vega að þetta komið vel út! Okkur finnst hún góð og vonandi finnst gestunum slíkt hið sama.

Ég er svo heppin að eiga góða ömmu sem er mín aðal hjálparkona, við dúllum okkur hér heima við að fylla kökurnar með súkkulaðimús á meðan allir eru að græja salinn.

 

 

Sumsé mikil spenna og tilhlökkun fyrir stóra deginum.

 

xxx

 

Eva Laufey Kjaran

Komdu með mér í gamlárspartí....

Fáeinir dagar í áramót og þá er nú aldeilis tilefni til þess að gleðjast með fjölskyldu og vinum.

Í nýjasta tölublaði Gestgjafans er að finna bestu uppskriftirnar árið 2012. Þar að auki eru uppskriftir að kokteilum sem henta mjög vel í áramótapartí. Mér fannst regulega gaman að blanda þessa kokteila og ég hlakka mikið til að blanda nokkra um áramótin með vinum mínum. 

Þeir kokteilar sem er í miklu eftirlæti hjá mér eru Mojito með ástaraldin og Jóla Magnús. 

Magnús Örn Sölvason sem starfar á veitingastaðnum Galító á Akranesi fékk fyrstu verðlaun fyrir þann  kokteil á Íslandsmeistaramóti barþjóna. Án efa jólakokteillinn í ár. 

Mæli svo sannarlega með að þið blandið nokkra ljúffenga kokteila um áramótin með fólkinu ykkar. 

Njótum þess að vera saman og göngum hægt um gleðinnar dyr. 

xxx

Eva Laufey Kjaran

Jólahuggulegheit

Ég er búin að vera í svo góðu yfirlæti hjá fjölskyldunni minni og tengdafjölskyldu yfir jólin.

Ég er búin að borða á mig gat og gott betur en það. Virkilega huggulegt að labba á milli húsa og gæða sér á gómsætum kræsingum, það kann ég vel að meta. Sjónvarpsgláp, huggulegar stundir með fjölskyldunni og göngutúrar til þess að rýmka til í maganum fyrir fleiri kræsingar hafa einkennt þessi jól. Ég hef varla komið nálægt eldavélinni sjálf, nema þá bara til þess að smakka til hjá yfirkokkunum. 

Systir mín er að fara að gifta sig eftir þrjá daga, ég fæ að gera kökuna og sé um veislustjórn svo nú er verið skipuleggja og skipuleggja, búin að ákveða með kökuna og bakstur hefst á morgun. Þið fáið auðvitað að fylgjast með frumraun minni í brúðarkökugerð. Annað væri nú algjör hneisa. 

Nú ætla ég hins vegar að drífa mig út að hlaupa, það eru víst tvö jólaboð í kvöld svo ég verð eiginlega að rýmka vel til í maganum fyrir komandi veislur. 

Ég vona að þið eigið ljúfar stundir með ykkar fólki elsku vinir

xxx

Eva Laufey Kjaran

Jólakveðja

Gleðileg jól elsku vinir. Ég vona að þið hafið það sem allra best yfir jólin og njótið þess að vera til með ykkar fólki. Jólakossar og knús frá mér. Myndin hér að ofan var tekin fyrr í kvöld (aðfangadagskvöld). Systkinin mín og amma og afi. Virkilega huggulegt kvöld með elsku fólkinu mínu. 

xxx

Eva Laufey Kjaran

Brúðkaup..

Systir mín hún Maren Rós er að fara að gifta sig eftir viku. Ég hlakka ofboðslega mikið til og ég er svo heppin að fá að baka kökuna. Það var smá æfing í gær og mikið sem það er gaman að skreyta kökur. 

Rómantískar og fínar kökur sem fanga augað. 

xxx

Eva Laufey Kjaran

Dökkar súkkulaðibitakökur og marenstoppar.

Smákökur eru vissulega ómissandi um jólin, það er mjög gaman að prufa nýjar uppskriftir og það er alltaf ákveðinn sjarmi að baka kökurnar sem hafa fylgt fjölskyldunni í mörg ár. Ég ætla að deila með ykkur uppskrift að dásamlegum súkkulaðibitakökum en uppskriftina að þeim fann  ég í norsku tímariti sem ég held mikið upp á. Marenstopparnir hennar mömmu hafa alltaf verið í miklu eftirlæti hjá mér og ég leit alltaf á þær sem "spari" smákökurnar. Þær eru mjög einfaldar en ótrúlega góðar. Ég vona svo sannarlega að þið njótið vel kæru vinir. 

Dökkar súkkulaðibitasmákökur

115 g smjör, við stofuhita

130 g púðursykur

1 egg

160 g hveiti

30 g kakó

1 tsk vanillu extract (eða vanilludropar)

130 g dökkt súkkulaði (brætt yfir vatnsbaði)

250 g súkkulaðihnappar (dökkt súkkulaði)

1 tsk lyftiduft

1.       Byrjið á því að bræða 130 g súkkulaði yfir vatnsbaði og leggið til hliðar.

2.       Þeytið sykur og smjör saman þar til blandan verður létt og ljós.

3.       Bætið egginu og vanillu saman við og hrærið vel.

4.       Sigtið þurrefnin saman, bætið hveitiblöndunni og brædda súkkulaðinu saman við.

5.       Að lokum bætið þið súkkulaðihnöppum eða grófsöxuðu súkkulaði saman við með sleif. Þið getið auðvitað notað hvaða súkkulaði sem er, mér finnst dökkt súkkulaði voðalega gott en þessar kökur eru dásamlegar með öllu súkkulaði.

6.       Ég notaði msk til þess að búa til kúlur. Setjið kúlurnar á bökunarpappír í ofnskúffu og þrýstið smávegis á kúlurnar áður en að þið setjið þær inn í ofn. 
Bakið í miðjum ofni við 160°C í 12 mínútur.  

Ég bræddi smávegis af súkkulaði og dýfði kökunum ofan í, skreytti þær svo með sykurskrauti. 

Algjör súkkulaðisæla og kökurnar smökkuðust mjög vel að mínu mati. 

Marenstopparnir hennar mömmu

3 stk eggjahvítur

200 g sykur

1 tsk vanillu extract eða vanilludropar

180  g súkkulaði, smátt saxað

100 g mulið kornflex

70 g kókosmjöl

Stífþeytið eggjahvítur og sykur, bætið vanillu saman við þegar marensinn er alveg að verða klár. Saxið súkkulaðið smátt og myljið kornflexið, blandið því varlega saman við marensinn með sleif. Ég notaði tsk til þess að búa til kökurnar. Setjið þær á bökunarpappír í ofnskúffu og bakið í miðjum ofni við 150°C í 15 – 20 mínútur. 

Þessar kökur eru virkilega góðar, marenstopparnir hafa verið í eftirlæti hjá mér frá því að ég var lítil og þær eru algjörlega ómissandi á jólum að mínu mati. Súkkulaðibitakökurnar smökkuðust mjög vel og ég á eftir að baka þá uppskrift mjög oft. 

Ég vona að þið hafið það gott og að þið séuð ekki í of miklu jólastressi. 

Vonandi eigið þið ljúft kvöld framundan. 

xxx

Eva Laufey Kjaran

Jóladagur með frábærum vinum

Ég átti dásamlegan dag með frábærum vinum mínum. Við stofnuðum klúbb fyrir nokkrum árum, Bíóklúbbinn Bríet. Við höfum það fyrir reglu að hittast fyrir jólin, borða saman og skipast á gjöfum. Það er krúttlegt og ótrúlega skemmtilegt.Mig langaði til þess að deila með ykkur nokkrum myndum frá því í dag, sannkallaður jóladagur í Reykjavík. 

Aglan mín sæt og fín. 

Skál í boðinu, klúbburinn eignaðist tvö börn á árinu og því ber að fagna. 

Lúxusplatti á Restaurant Reykjavík. Mjög huggulegur veitingastaður og frábær matur. 

Stefán Jóhann er sjarmatröllið í okkar vinahóp. 

Ég og Fríða mín fengum okkur jólaglögg og vorum kampakátar með það. 

Fríða, Eva og Stefán. Fallegu fallegu vinir mínir. 

Brugðið á leik í jólalandi á Ingólfstorgi. 

Þegar að við löbbuðum niður Laugaveginn þá fundum við dásamlega lykt streyma á móti okkur, lyktin var af ristuðum möndlum. Einstaklega huggulegt!

Yndislegur dagur með frábærum vinum. 

xxx

Eva Laufey Kjaran

Próflok og rauður varalitur

Ég er komin í kærkomið jólafrí. Tilfinningin var góð eftir síðasta prófið í morgun, mig langaði helst til þess að faðma prófvörðinn þegar að ég afhenti honum prófið en ég lét það vera. Ég dreif mig út í bíl og fór í Smáralind til þess að kaupa mér varalit. Ég var aldeilis  búin að lofa sjálfri mér varalit eftir prófin. Keypti mjög fallegan  rauðan varalit í Make Up Store, China Red heitir liturinn og mikið sem ég er ánægð með hann.Þjónustan í Make Up Store er algjörlega frábær svo ég mæli með að þið farið þangað fyrir jólin ef ykkur vantar snyrtivörur.  

Þegar heim var komið þá byrjaði ég auðvitað á því að setja á mig varalit, því ekki get ég byrjað á jólaþrifunum öðruvísi en með varalit. Það er afar sérkennilegt hvað jólaþrifin eru ekki jafn heillandi núna og þau voru í gær þegar að ég var að lesa fyirr prófið. 

Í kvöld þá kemur systir mín og hennar fjölskylda  heim frá Noregi svo ég fæ að knúsast í litlu strákunum mínum. Það verður það allra besta. Dagurinn í dag er ansi ljúfur.

Nú ætla ég hins vegar að vinda mér í blessuð þrifin, við heyrumst kæru vinir.

xxx

Eva Laufey Kjaran

JólaPavlova

Pavlova er dásamleg marensterta með rjómakremi og ferskum berjum. Tertan heitir Pavlova til heiðurs rússnesku ballet stjörnunni, Önnu Pavlova. Árið 1926 þá dansaði hún bæði í Ástralíu og í  New Zealand og þar var þessi dásamlega terta fundin upp.

Pavlova hentar mjög vel sem eftirréttur og í raun hvenær sem er. Hún er mjög einföld og er alltaf sérlega bragðgóð. Hægt er að nota hvaða ber sem er, fer allt eftir smekk hvers og eins.   

 Daim súkkulaðið gegnir lykilhlutverki í JólaPavlovunni því ég er viss um að við getum flest verið sammála um að smá súkkulaði sé nauðsynlegt eftir jólamatinn.

Ég vona að þið njótið vel og ég mæli með að þið prufið þessa tertu.

Jóla Pavlova

MARENSBOTNAR

6 Stk eggjahvítur

300 g sykur

1 ½ tsk mataredik

1 tsk vanilla extract eða dropar

Salt á hnífsoddi

Þeytið eggjahvítur með salti, bætið sykri saman við í þremur skömmtum

og þeytið vel á milli. Bætið ediki og vanilludropum saman við þegar

marensinn er orðinn stífur. Teiknið hring á bökunarpappír, u.þ.b. 24 cm í þvermál, og smyrjið marens á pappírinn. Bakið marensinn við 100° Cí 90 mín. Slökkvið á ofninum, opnið hurðina og látið marensinn kólna íalla vega 3 klst í ofninum. (mamma benti mér á að það væri best að geyma marensinn yfir nótt í ofninum sem og ég gerði)

Rjómakrem með Daim

200 ml rjómi

2 – 3 msk flórsykur

Eitt stórt Daim-súkkulaðistykki

Léttþeytið rjóma og bætið flórsykri út í á meðan þeytt er. Saxið

súkkulaðistykkið ansi smátt, blandið súkkulaði varlega saman við rjómann með sleif. Setjið rjómakremið á tertuna og skreytið kökun  með allskyns berjum,  dreifið nokkrum myntulaufum yfir berin. Sigtið smávegis af flórsykri yfir 

Einföld, dásamleg og svo sannarlega mikið augnyndi. 

xxx

Eva Laufey Kjaran

Bollakökur með súkkulaðiís og piparmyntusmjökremi

Ég og amma bökuðum ljúffengar bollakökur fyrr í vikunni. Ég var búin að sjá á netinu uppskriftir af bollakökum með ís og mér fannst það virkilega spennandi, þess vegna varð ég að prufa að baka slíkar kökur. Ég valdi Gott súkkulaðiísinn í kökurnar. Hann er að mínu mati ótrúlega góður og bragðmikill, ég vildi hafa mikið súkkulaðibragð af kökunum og því hentaði ísinn vel í baksturinn.  Auðvitað áttu kökurnar að vera svolítið jólalegar svo svo ég gerði piparmyntusmjörkrem því ég tengi piparmyntu alltaf við jólin. 

Kökurnar komu vel út og þau sem smökkuðu voru ánægð með þær,  þannig ég mæli með að þið prufið og ég vona að þið verðið líka ánægð. Sunnudagur til baksturs, það er sko ávísun á huggulegheit. 

Súkkulaðibollakökur með súkkulaðiís

Um það bil 20 - 22 bollakökur

200 g smjör, við stofuhita

4 egg 

3 dl sykur

5 dl hveiti 

1 tsk vanillusykur

2 tsk lyftiduft

4 dl Gott súkkulaðiís

150 g súkkulaðihnappar 

Aðferð:

1. Þeytið saman sykur og smjör þar til blandan verður létt og ljós, ca. 4 - 5 mínútur. 

2. Bætið einu og einu eggi saman við 3. Súkkulaðiísinn girnilegi, bætið honum saman við eggjablönduna og hrærið vel saman við. 

4. Sigtið þurrefnin saman og bætið við blönduna 5. Bætið súkkulaðihnöppum saman við með sleif

6. Skiptið deiginu niður í pappaform og setjið inn í ofn við 200°C í 15 - 20 mínútur.

  ATH. Að ofnar eru mismunandi svo fylgist vel með kökunum. Stingið pinna í kökurnar og ef pinninn kemur hreinn út þá eru kökurnar tilbúnar. 

Kælið kökurnar mjög vel áður en þið skreytið þær með kreminu.

Piparmyntusmjörkrem

Ég er mjög hrifin af piparmyntu og þetta var í fyrsta sinn sem ég prufaði að gera piparmyntusmjörkrem, ég nota piparmyntu extract sem fæst m.a. í Hagkaup og í Kosti. En þið getið auðvitað notað piparmyntudropa en að mínu mati er extractinn mun betri og bragðmeiri. 

230 g smjör, við stofuhita

5 dl flórsykur

2 - 3 tsk piparmyntu extract 

2 msk mjólk

Aðferð 

Blandið flórsykrinum og smjörinu vel saman í nokkrar mínútur, bætið því næst piparmyntu og mjólkinni saman við. Smakkið ykkur til, það er auðvitað mikilvægt. 

Ég notaði 1M stút frá Wilton til þess að sprauta kreminu á kökurnar. 

Fallegar bollakökur. Ég lét nokkur jarðaber ofan á hverja köku og sigtaði smávegis af flórsykri yfir. 

Það kom ánægjulega á óvart að hafa ísinn með, ég var mjög ánægð með útkomuna. 

Jólakökur sem bíða eftir jólunum. Að mínu mati gera kökur heimilið enn hlýlegra. 

Ég vona að þið eigið ljúfan sunnudag framundan kæru vinir og ég mæli með að þið setjið upp svuntuna og hefjið bakstur. 

xxx

Eva Laufey Kjaran

Göngutúr í kuldanum

Það er fátt betra en langur göngutúr í kuldanum þegar orkan er sérlega léleg og lestrarbugun á hæsta stigi. Eftir göngutúrinn þá fórum við á Garðakaffi hér á Skaganum og hlýjuðum okkur yfir heitu súkkulaði og fengum okkur ljúffenga eplaköku. 

 Nú eru örfáir dagar í próflok og örfáir dagar í að fjölskyldan mín komi heim. Ég á mjög erfitt með einbeitingu því ég er verulega spennt. Ég og litlu strákarnir mínir ætlum að baka frá okkur allt vit og dúllast fram eftir öllu. Það verður sko huggulegt. 

Á morgun læt ég inn uppskrift af dásamlegum súkkulaðibollakökum með piparmyntukremi. Ég ætlaði að vera búin að setja hana inn en dagurinn hljóp frá mér. 

xxx

Eva Laufey Kjaran