Föstudagskokteillinn

Gleðilegan föstudag kæru lesendur. Veðrið er búið að vera dásamlegt í dag og það verður allt betra þegar sólin skín. Ég fékk mér ljúffengan föstudagskokteil áðan, ávextir í kokteilaglasi með smá piparmyntusúkkulaði. 

Fyrst við erum að tala um ávexti og súkkulaði þá er ég alveg í sólgin í súkkulaðihjúpuð jarðarber, það er fátt betra. Mæli með að þið gæðið ykkur á góðum ávöxtum með súkkulaði um helgina.

Dökkt súkkulaði, hvítt súkkulaði og jarðarber. Ljúffengt konfekt. 

Ég vona að þið eigið góða helgi framundan. Ég vona að veðrið haldi áfram að vera svona fínt og svo er auðvitað bolludagurinn á mánudaginn (já ég er mjög spennt) og ég ætla að baka bollur og borða þær með miklum rjóma um helgina. 

Njótið helgarinnar. 

xxx

Eva Laufey Kjaran Hermannsdóttir

Eddan & Freebird

Það var mikill heiður að fá að veita verðlaun fyrir barnaefni ársins á Eddunni s.l. helgi. Mig langaði auðvitað til þess að vera fín á hátíðinni og fór því að leita mér að kjól. Fyrir valinu varð þessi fallegi kjóll frá Freebird. Ég er afskaplega hrifin af Freebird merkinu og ég hvet ykkur kæru lesendur að kíkja þangað. Búðin er staðsett á Laugaveginum. Það er mjög góð útsala á flestum vörum og því er tilvalið að finna sér kjól fyrir árshátíðarnar og sumarbrúðkaupin sem framundan eru. 

Kjólarnir eru svo ævintýralega fallegir.

xxx

Eva Laufey Kjaran Hermannsdóttir 

Laxa tacos.

Mér finnst mjög gott að hafa fisk tvisvar til þrisvar sinnum í viku og eftir að ég byrjaði að hafa fisk oft þá hef ég prófað marga góða fiskrétti og þessi réttur er einn af mínum uppáhalds. Þið sem eruð mikið fyrir taco ættuð að prófa þessa uppskrift en það kemur mjög á óvart hvað fiskur er góður í taco.

Laxa tacos!

Fyrir þrjá til fjóra

Uppskrift. 

• 600 - 700 g lax, skorinn í litla teninga

Kryddlögur

• 2 msk. Olía 
• 1 tsk. paprikukrydd
• 1/2 tsk. cummin krydd
• salt og pipar, magn eftir smekk 
• 1 msk. smátt saxað kóríander 
• 3 - 4  smátt söxuð hvítlauksrif
• 1/2 chilialdin, fræhreinsað og smátt skorið

Aðferð: 

Blandið öllu saman í skál. Hreinsið fiskinn og skerið í litla teninga, blandið fiskinum vel saman við kryddlöginn. Best er að geyma fiskinn í 2 - 3 klst í kæli. 

Steikið fiskinn í örfáar mínútur á pönnu við miðlungshita. Þegar fiskurinn er klár þá setjið þið hann í skál og kreistið safa úr 1/2 límónu (lime) yfir. Saxið kóríander, magnið fer eftir smekk og dreifið yfir fiskinn. Það getur líka verið gott að sáldra smávegis af salti og pipar yfir.

Mangósalsa. 

• 1 ferskt mangó í teningum
• 1 rauðlaukur, meðalstór fínsaxaður
• ½ agúrka, smátt skorin
• 10 kirsuberjatómatar, smátt skornir
• 1 msk fínsaxaður kóríander
• 1 meðalstór lárpera
• safi og rifinn börkur af ½ límónu (lime)
• 1 tsk gróft salt
• Ferskmalaður svartur pipar, magn eftir smekk

Aðferð: Blandið öllu sem er í uppskriftinni vel saman og geymið í kæli í 30 mínútur.

Hitið takkóskeljar í ofni samkvæmt leiðbeiningum á pakkanum, þið getið auðvitað notað heilhveitivefjur líka. Berið fiskinn fram í takkóskeljum með salati t.d. spínati, mangósalsa, rifnum osti og sýrðum rjóma. Það er líka gott að saxa niður kóríander og sáldra yfir í lokin. Ég er mjög hrifin af kóríander en það er auðvitað smekksatriði. 

 Njótið vel!

xxx

Eva Laufey Kjaran Hermannsdóttir

Sautjándi febrúar

Þó það hafi verið sérlega ljúft um helgina þá er ég meira en tilbúin í nýja viku. Ég byrjaði daginn á hafragraut eins og aðra daga, Það er nóg framundan í vikunni og mörg ansi skemmtileg verkefni. Veðrið er fallegt og þá er nú alltaf allt aðeins betra, mánudagar geta nefnilega verið mjög góðir dagar ef við bara gerum þá að góðum dögum. 

Besti grauturinn í morgunsárið. Hafragrautur með 1/2 stöppuðum banana, hörfræjum, bláberjum og smá agavesírópi. 

Ristað brauð með osti og sultu er best um helgar en þessi er bestur á virkum dögum. 

Ég vona að þið eigið góðan mánudag framundan kæru lesendur. 

xxx

Eva Laufey K. Hermannsdóttir

Lífið Instagramað @evalaufeykjaran

1. Alltaf gaman að hitta þessa heiðursmenn.

2. Það er svo sannarlega hressandi að koma við á Joe & The Juice og fá sér góðan safa.

 3. Oreo bollakökur með hvítu súkkulaðikremi. Þið finnið uppskriftina hér. 

4. Fyrir viku síðan þá fór ég út að borða með vinum mínum og fögnuðum við afmæli vinkonu minnar. Og fyrir viku var ég akkúrat hálfnuð með meðgönguna. Það var því tilefni til þess að fara í kjól :)

 5. Morgunbollinn í sveitinni er miklu betri en venjulega. 

6. Fallegt útsýni og sérstaklega fallegur dagur.

 7. Eftir sunnudagslambið þá var leyfilegt að fá sér fyrsta páskaegg ársins í desert. Mér finnst alltaf svo gaman að lesa málshættina, og svo finnst mér auðvitað ekkert leiðinlegt að borða gott súkkulaði.

Ég er endurnærð eftir góða helgi í sveitinni, búin að hafa það mjög fínt. Ég vona að þið hafið haft það gott um helgina og ég vona að vikan ykkar verði góð. 

xxx

Eva Laufey K. Hermannsdóttir

Fallegur laugardagur, stækkandi magi og pönnukökuveisla.

Við Haddi erum fyrir austan í sælunni og erum búin að eiga ansi ljúfan laugardag. Veðrið er voðlega fínt, það er auðvitað svolítið kalt en nauðsynlegt að fara aðeins út og hressa upp á sig.

Nauðsynlegt að príla svolítið og auðvitað þumalinn upp fyrir því. 

Nú er ég gengin 21 viku með litlu dömuna okkar og ég nota hvaða tækifæri sem er og held utan um stækkandi maga sem ég er svo ánægð með og pósa fyrir myndavélina ;) 

Haddi minn sætur og fínn við Seljalandsfoss. 

Já, það var svolítið kalt en fallegt var það. 

Kaffitími hjá ömmu hans Hadda, pönnukökur með rjóma og sultu. Það allra besta. Ég held svei mér þá að það sé fátt sem slær þessm pönnukökum við.

Njótið helgarinnar - það er eina vitið.

xxx

Eva Laufey K. Hermannsdóttir

Jarðarberja daiquiri

Ég hlakka mikið til að fylgjast með úrslitakvöldinu í Eurovision í kvöld. Ég held svakalega mikið upp á Eurovision og mér finnst alltaf jafn gaman að horfa. Undanfarin ár þá hef ég haldið Eurovision teiti og boðið vinum mínum. Eurovision er ekki allra en það geta nú flestir verið sammála um að það er alltaf gaman að hittast, blanda góða drykki og horfa saman á keppnina. 

Í kvöld kemur í ljós hvaða lag við sendum út í lokakeppnina. Það er því vel við hæfi að bjóða fólkinu ykkar heim í smá teiti. Nú þegar sólin er farin að skína er enn skemmtilegra að bjóða upp á góða drykki. Ég ætla að deila með ykkur uppskrift að uppáhalds kokteilnum mínum, það kannast sennilega flestir við þennan drykk. Jarðarberja daiquiri er ferskur og sérlega bragðgóður kokteill, hann er mjög einfaldur sem er mikill kostur. Það er ekki nauðsynlegt að hafa áfengi í þessum drykk, hann er jafn góður án þess. 

Þegar að ég var að vinna í bókinni minni þá fannst mér nauðsynlegt að hafa nokkra drykki með, það skapar oft svo skemmtilega stemningu í boðum að bera fram fallega og frískandi drykki (fordrykki). 

Jarðarberja daiquiri

fjögur glös

• 1 poki frosin jarðarber (500 g)
• handfylli fersk mynta
• 4 tsk flórsykur
• safi úr ½ sítrónu
• 12-15 cl romm (Má auðvitað sleppa. Mér finnst líka gott að setja kókosvatn í staðinn) 
• Það er líka gott að setja smávegis af sprite saman við, í lokin.
• fersk jarðarber til skrauts

Aðferð:

Setjið allt saman í blandara í nokkrar mínútur, hellið í falleg glös

og skreytið með ferskum berjum. Berið strax fram og njótið.

 Ég vona að þið eigið góða helgi kæru lesendur. 

xxx

Eva Laufey K. Hermannsdóttir

Oreo bollakökur með hvítsúkkulaðikremi

Oreo bollakökur með hvítsúkkulaðikremi

20 - 24 bollakökur

• 250 g smjör, við stofuhita 
• 4 dl sykur 
• 4 egg 
• 4 - 5 dl mjólk (eða rjómi) 
• 6 dl hveiti 
• 2 - 3 tsk lyftiduft 
• 1 tsk matarsódi
• 2 tsk vanilla extract (eða vanillusykur)
• 16 Oreo smákökur (1 pakki)

Aðferð: 

1. Hitið ofninn í 180°C.(blástur) 
2. Þeytið saman smjör og sykur í þrjár mínútur, bætið einu og
einu eggi saman við. Þeytið vel á milli.
3. Sigtið saman hveiti og lyftiduft a.m.k. þrisvar sinnum. Bætið
hveitiblöndunni, matarsódanum vanillu og mjólkinni saman við og þeytið mjög
vel í nokkrar mínútur þar til blandan verður orðin silkimjúk.
4. Hakkið Oreo smákökurnar í blandara eða þá bara með handaflinu í mjög smáa bita. 
5.Skiptið deiginu niður í bollakökuform og bakið í 15-18 mínútur. 

Kælið kökurnar mjög vel áður en að þið smyrjið á þær krem.

Hvítt súkkulaðikrem

• 220 g smjör, við stofuhita
• 4 dl flórsykur
• 2 tsk vanillu extract eða vanillusykur
• 140 g hvítt súkkulaði

Þeytið saman smjör og flórsykur í nokkrar mínútur, því lengur
sem þið hrærið kremið því betri áferð verður á því. Bræðið hvítt
súkkulaði í vatnsbaði og bætið við smjörkremið ásamt vanillu.
Blandið öllu vel saman þar til kremið verður orðið ansi létt, ef
þið ætlið að nota matarlit þá bætið honum við rétt í lokin.

Ég skreytti kökurnar með Oreo smákökum, einfaldlega vegna þess að ég fæ ekki nóg af þessum kökum. 

Ég mæli með að þið prófið kæru lesendur. 

xxx

Eva Laufey K. Hermannsdóttir

Helgarblómin

Ég keypti þessa fallegu túlípana í gær. Það er svo gaman að eiga falleg blóm.Nú er föstudagur og helgin handan við hornið, ég vona að þið eigið öll ljúfa helgi framundan með fólkinu ykkar.

xxx

Eva Laufey K. Hermannsdóttir

Guðdómleg skyrkaka með hvítu súkkulaði og ferskum berjum

Ég er yfir mig hrifin af osta- og skyrkökum. Þær eru eitthvað svo "creamy" og góðar. Ég fæ til mín svo góða gesti í mat í kvöld að ég ákvað að hafa góða köku í eftirrétt. Ég er ekki að plata ykkur þegar ég segi að þessi kaka er af einföldustu gerð, það tekur hámark 30 mínútur að búa hana til. Svo þarf hún bara að vera í kæli í nokkrar klukkustundir eða yfir nótt og þá er hún tilbúin. Ég elska góðar kökur og hvað þá ef þær eru einfaldar og fljótlegar. Ég mæli svo sannarlega með að þið prófið þessa köku. Hún er virkilega góð, ég lofa ykkur því. Tilvalið að hafa hana sem eftirrétt eða þá bara í kaffitímanum. Ég er líka viss um að þessi kaka myndi nú slá í gegn í Eurovision boðum um helgina. 

Hér kemur uppskriftin. Njótið vel kæru lesendur. 

Uppskriftin er fyrir sex til átta.

Byrjum á því að mylja kexkökurnar í matvinnsluvél eða i blandaranum. Bætið smjörinu einnig saman við kexið, smjörið á að vera kalt. 

Ég notaði lausbotna pæ-form en þið getið auðvitað notað hvaða form sem er. Það er betra að nota lausbotna. Þetta form er 24x25 cm. 

Þrýstið kexblöndunni á botninn og upp með börmunum á bökunarforminu, notið bara hendurnar til þess. Það er einfaldara. 

Kælið botninn á meðan að þið útbúið fyllinguna. 

Leynivopnið í kökunni er án efa þetta dásamlega súkkulaði, hvítir súkkulaðidropar. 

Léttþeytið rjóma og leggið til hliðar. Blandið skyrinu, flórsykrinum og vanillusykrinum saman í hrærivél í örfáar mínútur. Bræðið súkkulaðið yfir vatnsbaði og kælið í smá stund (en ekki of lengi, það verður að vera silkimjúkt). Hellið súkkulaðinu út í skyrblönduna og hrærið saman með sleif. Bætið rjómanum saman við í lokin og hrærið vel saman. 

Dreifið skyrblöndunni yfir kexbotninn með sleif. 

Mér finnst rosalega gott að setja fersk ber ofan á kökur, þið getið notað hvaða ber eða ávexti sem þið viljið. Jarðarber og bláber eru í mínu eftirlæti svo ég notaði þau í dag. 

Sigtið smá flórsykri yfir kökuna og rífið endilega smávegis af súkkulaði yfir. Það gerir kökuna enn betri. Hún er best ef hún fær að vera lengi í kæli. Lágmark 3 klukkustundir en mér finnst líka gott að geyma hana yfir nótt. 

Algjör draumadís. Mikið er ég orðin spennt að gæða mér á henni með fjölskyldunni minni í kvöld. 

Ég mæli með að þið prófið og njótið. 

xxx

Eva Laufey K. Hermannsdóttir

Instagram myndir

 1. Hjá Danna á Senter í vetrarhressingu. 

2. Klúbbsamlokan á Snaps er gúrm, mæli með að þið prófið. 

 3. Já fleiri matarmyndir, laugardagshuggulegheit á kaffihúsi í miðbænum. 

4. Eldhúsið mitt í Vesturbænum

 5. Yfirheyrsla í Fréttablaðinu. Léttar og skemmtilegar spurningar. 

6. Ég fór á þorrablót Skagamanna um síðustu helgi og skemmti mér ótrúlega vel, með mér á myndinni er Aldís Birna ofurfagra svilkona mín. 

 Í dag eyddi ég deginum með blaðamönnum frá Jamie Oliver tímaritinu í Bretlandi. Við löbbuðum um Reykjavík og ég sýndi þeim marga dásamlega veitingastaði sem við erum svo heppin að eiga. Það var ekki leiðinlegt að monta sig af góða og fjölbreytta matnum okkar hér á Íslandi.

Ykkur er meira en velkomið að fylgjast með mér á Instagram, mér finnst voða gaman að setja inn myndir af lífinu já þá einna helst myndir af góðum mat. Finnið mig undir evalaufeykjaran

xxx

Eva Laufey K. Hermannsdóttir 

Heimakær

Birtan var svo fín í gær þegar sólin ákvað að skína örlítið. 

AB mjólk, special K og bláber í morgunsárið.

Nú eru liðnir tveir mánuðir frá því að við fluttum hingað í Vesturbæinn og okkur líður mjög vel. Mér finnst Vesturbærinn eiginlega vera eins og lítill bær, eins og Akranes. Stutt í allt og mjög þægilegt að vera hér. Íbúðin okkar verður líka heimilislegri með hverjum deginum og nú vantar mig bara nokkrar myndir á vegginn  og þá ætti allt saman að vera komið í bili. 

Það er líka sérstaklega notalegt að geta unnið heima fyrir þennan morgunin því veðrið úti er lítið spennandi. En ég þarf nú samt að koma mér af stað í nokkur verkefni eftir hádegi. Ég hef þó klukkustund til þess að hlusta á Coldplay og dunda mér í rólegheitum. Það finnst mér ansi fínt. 

Ég vona að þið eigið góða helgi framundan. 

xxx

Eva Laufey K. Hermannsdóttir