Það sem mér finnst best við bíltúrinn upp á Akranes eftir skóla er að ég get lúrað í góðar 40 mín.. Kem endurnærð heim beint í bakkelsið auðvitað, sérlega á dögum sem þessum þegar veðrið heimtar að maður haldi sér innandyra þá er nú ekkert annað í stöðunni en að gera smá vel við sig, gott að hafa eitthvað að narta í með lestrinum.

 Stutt eftir af skólanum og nú fer stressið að segja ærlega til sín, verkefni..verkefni. Þannig nú er eins gott að bretta upp ermar og liggja yfir blessuðum bókunum.

Kaffitíminn kallar!

xxx

Helgin er gengin í garð. Mér finnst alltaf vera föstudagur - vísbending um að tíminn sé ansi fljótur að líða. Tók smá kvíðkast í dag, ekkert agalega mikið eftir af skólanum og það styttist óðum í blessuð prófin. 

Ég er komin í náttfötin mín, reyndar er ég löngu komin í þau.. hér var pöntuð pítsa og haft það kósí fyrir framan sjónvarpið. Huggulegur föstudagur.

 Bakstur, lærdómur, dúlluheit með litlu strákunum mínum, göngutúrar, kaffiboð og matarboð með góðum vinkonum. Svona lítur dagskrá helgarinnar út, lövlí.

Ég hef gert það að vana mínum undanfarið að kaupa rósir á föstudögum, fallegt að eiga fín blóm um helgar. Gefa heimilinu fallegan lit..

Njótið helgarinnar elskur xxx

Að hlakka til

Í hverri viku þá reyni ég að skipuleggja eitt kvöld með manni mínum til þess að gera eitthvað skemmtilegt. Brjóta aðeins upp hversdagsleikann.. Ég er þannig að ég verð að hlakka til einhvers, annars verð ég ómöguleg.  Að setja upp á sig spari andlitið og gleyma lærdómnum í bili...

Í gær fórum við Haddi ásamt vinafólki okkar út að borða og á tónleika. Yndislegir  styrktar-og minningartónleika sem við fórum á. Hver tónlistarsnillingurinn á fætur öðrum. Algjörlega frábært. 

xxx

Spasslið.. 

 Uppáhaldið mitt þessa dagana. Mythic olía, hentar ótrúlega vel handa þeim sem eru með þurrt hár. Lyktar líka vel sem er plús! Gefur hárinu gott líf...

Nauðsyn. Að smella sér í betri skóna,.

xxx

Kósíheit á miðvikudegi

Hundleiðinlegt veður úti, kalt, rigning og rok. Frá því að ég vaknaði þá hefur mig langað að skríða upp í sófa og það var það nákvæmlega sem ég gerði eftir að ég kom heim úr skólanum. Inn í sólstofu, að dúlla mér við að lesa matreiðslublöð við kertaljós. Ooog með gott kaffi auðvitað! Fæ til mín góða gesti í mat annað kvöld og er því að vinna í því að ákveða hvað ég ætla að gefa þeim að borða. Huggulegheit svona áður en lærdómurinn hefst þetta kvöldið. Mæli með því að þið hoppið aðeins upp í sófa, kveikið á kerti og lesið bók/blöð eða bara eitthvað sem ykkur langar og hlustið á veðrið.. ég er að segja ykkur að það er fátt jafn kósí. Ég ætla allavega að sitja hér pínu lengur og njóta...

xxx

...Huggulegheit við lærdóm. Gott að heyra í vindinum úti en inni er hlýtt og gott, sérlega í sokkunum sem yndislega vinkona mín hún Íris prjónaði handa mér.

xxx

... 

 Sunnudagur til sælu í orðsins fyllstu. Dagurinn átti að fara í lærdóm og bara lærdóm, en svo tók sunnudagsdúllerí yfir. Kláraði þó lærdóms skammt helgarinnar þannig samviskan er í góðu. 

Helgin er ansi fljót að líða og á morgun hefst ný vika með nýjum verkefnum. Október gengin í garð og því styttist í próf og verkefnaskil, þessi mánuður verður strembin. Styttist líka í jólin sem er yndislegt. 

Ég elska blóm, mér þykir svo vænt um það þegar að ég fæ blóm. Litlir hlutir skipta miklu máli..

Nú ætla ég að rölta yfir til ömmu í kvöldkaffi.. það jafnast ekkert á við gott kaffi og ömmuspjall.

Vonandi áttuð þig ljúfa helgi. 

xxx

 

Skóladagar. Það er svo sannarlega að koma október, tíminn flýgur. Dagarnir eru ansi langir.

 Fer út klukkan sjö á morgnana og er búin í skólanum um fimm - sexleytið. Svo heim, matur, hreyfing og lærdómur. Ef til vill smá tiltekt... en bara smá. 

Próf, verkefnaskil og mikill lestur = Október. Dásemd. 

Ég bakaði mér súkkulaðiköku í kvöld - ég var að pirrast yfir verkefni sem er pínu snúið. En hvað haldið þið? Góð súkkulaðikaka kemur skapinu í lag. 

Nú ætla ég að fá mér kaffibolla, já svona seint. Hér á þessu heimili er nóttin ung. Þarf að sigra þetta verkefni. 

xxx

Samfélagsmeinið

Það er ósanngjarnt og ömurlegt að lesa frétt um ellefu ára dreng sem tók sitt eigið líf.

Ellefu ára gamall, allt lífið framundan.

Börn eiga að njóta sín og barndómurinn á að vera besti tíminn. En hvað gerist?

Einelti, það er það sem gerist.

Einelti er það ferlegasta sem ég veit um. Samfélagsmein sem dregur lífskjarkinn úr fólki.

Flestir þurfa að berjast gegn mótlæti í æsku, það veit ég af eigin raun.

Þegar að ég var yngri þá fluttum við erlendis og þá var ansi erfitt að falla inn í hópinn.

Ég man þegar að ég lagðist á koddann fyrstu dagana og hugsaði " Jæja þegar að við flytjum aftur heim þá verður allt orðið gott". Ég beið alltaf eftir lokadögunum því það voru iðulega bestu tímarnir. Ég flutti tvisvar sinnum erlendis, til Noregs. Á tvo staði og því reyndist það þolraun ein, sérlega í annað skiptið.

 Ég þurfti stundum að halda aftur að mér tárum í skólanum. Það er erfitt að vera unglingur og ætla að falla inn í hópinn.

Ég átti t.d. ekki mikið af pæjufötum, var fótboltastelpa af Skaganum en það skildu ekki allir

.

Bekkjasystur mín komu eitt sinn að mér og spurðu hvort ég ætti eiginlega engin föt og af hverju ég væri alltaf í sömu fötunum. Líkast til hefði svarið "mér líður bara vel í þeim" ekki fallið í kramið hjá þeim.

Ég fékk pæjubuxur, mætti í þeim í skólann og fékk glott. Ég labbaði inn í tónmennt og sá krassað á nokkur borð "Eva með gulu tennurnar" " Tannburstaðu þig Eva". Líkast til hefði svarið að tennurnar mínar sködduðust mikið eftir að ég datt eitt sinn í æsku og ég burstaði mig auðvitað á degi hverjum, ekki skipt neinu máli.

Fyrsta froðu-teitið í skólanum. Ég var súper spennt - bekkjarsystur mínar hringdu í mig sama dag þegar að þær voru saman úti a borða og létu mig vita að maður ætti að mæta í sundfötum og með sundhettu. Mér fannst það hálf kjánlegt en ég meina afhverju ætti ég ekki að trúa þeim, ég var ný en þær vanar.

Ég var að æfa fótbolta með eldri stelpunum á þeim tíma og ég mætti á fótboltaæfingu fyrir teitið og spurði afhverju maður ætti að vera í sundfötum o.s.frv. Þær urðu reiðar, tóku mig með sér í skólateitið og húðskömmuðu bekkjarsystur mínar fyrir framan alla. Mér leið vel! Einhver stóð með mér. Þær skömmuðust sín og ég gekk inn með stóru stelpunum, þvílík pæja.

Ég er hálf kjánaleg að skrifa um mína upplifun af einelti. Ég er alls ekki að gera mig að einhverju fórnarlambi og að bera mitt saman við það ömurlega sem börn eru að ganga í gegn um, en eitt veit ég þó að vera einn á móti fjöldanum getur reynst þolraun ein. Ég átti góða að, það eiga ekki allir góða að. Krakkar/unglingar upplifa hundraðfalt verri einelti á degi hverjum, mitt var vægt en alveg nógu mikið til þess að mér leið illa með sjálfa mig og lífið.

Ég viðurkenni það að ég hef sjálf tekið þátt í því að stríða öðrum, skilja útundan o.s.frv. þegar að ég var yngri. Mér líður illa með það í dag, ég vissi betur. Ég vissi alveg hvernig hinum aðilanum leið vegna þess að ég hafði verið í þeirra sporum. En að fylgja straumnum og halda að maður sé betri en einhver er það versta sem við getum gert.

Ég og þú erum alveg eins, ég er ekki betri en þú og þú ert ekki betri en ég. Þess vegna höfum við ekki rétt á því að ganga yfir annað fólk eins og tuskur.

Samfélagið tekur þátt í einelti, t.d. fjölmiðlar. Tökum eina manneskju og úthúðum þar til manneskjan á ekki séns. Hvaða afsökun notum við fyrir því? Jú manneskjan bauð uppá það, alveg eins og ég bauð uppá það að mæta í skólann í ljótum buxum.

Við verðum að passa okkur, nú er ég messa yfir sjálfa mig í leiðinni. Passa okkur á því að við tökum okkur ekki það bessaleyfi að vera betri en einhver annar og halda að það sé í lagi að niðurlægja og hlæja af öðrum. Við þurfum að setja okkur í fótspor annarra, það sem er fyndið fyrir okkur getur reynst ömurlegt fyrir annann.

Pössum upp á hvert annað, þetta er ekki fallegt. Ef fullorðið fólk hugsar ekki sinn gang hvernig eiga þá börnin að læra af þeim eldri. Þessi frétt um þennann unga pilt vakti mig til umhugsunar. Ég ætla að passa betur uppá það hvernig ég kem fram við aðra.

Komdu fram við aðra eins og þú vilt að komið sé fram við þig.

        xxx

 ...Dimmt úti, kalt úti, heitt inni,  kertaljós, vinkonur, lærdómur og heitt kakó.
Uppskrift að huggulegu kvöldi.

Hárið

 

 Haustfílingur. Í dag fór ég í klippingu og litun hjá mínum ástkæra Svavari.
Aðeins að hressa uppá  hárið fyrir haustið - ég er ansi ánægð með útkomuna og get ekki hætt að þefa af hárinu.

Ég elska hvað hárið er fínt og vel lyktandi eftir góða sjæningu.

xxxx

Haustveður. Það er þannig veður í dag að manni langar einna helst að liggja undir teppi. En það er líka kósí að kveikja á nokkrum kertum, drekka gott kaffi og lesa.

xxx

Notaleg helgi að baki. Ég eyddi henni með góðu fólki m.a. annars frændfólki Hadda frá Englandi. Ég lét fylgja með nokkrar myndir af túristaleiðangri sem við fórum í á föstudaginn var. Ég og Erna Guðrún eyddum degi með Alice í borginni. Það var ósköp huggulegt. 

Var á tveimur næturflugum um helgina og á nú bara eitt flug eftir. Skólinn byrjaður, ég byrjuð í leikfimi hjá Dagrúnu og Zúmba hjá Helenu. Þannig kærkomin rútína fer að leggjast yfir mig. En eins og ég hef nú sagt áður þá er þetta sumar búið að vera ansi yndislegt og tíminn ekkert smá fljótur að líða.

Ég lít með björtum augum á haustið. Nýtt upphaf ef svo má segja, er að byrja í viðskiptafræði í HÍ. 

Nú ætla ég að bomba mér í dansklæðin og skunda í Zúmba. 

xxx

 

Huggulegt kvöld. Kom seint heim í kvöld úr flugi og dreif mig í heitt bað, skellti á mig maska og var að pjattrófast. Lagaði mér gott kaffi og borðaði gott Anton berg súkkulaði sem ég keypti í flugstöðinni í Köben. Datt þar inn í sælkerabúð og kom heim með stútfullan poka af mat. Loved it... 

Ég er byrjuð á bókinni One day, hún lofar góðu. Nú ætla ég að njóta þess að skoða september-vogue og lesa nýju bókina áður en að skólabækurnar ná heimsyfirráðum. 

xxx

Yndislegt veður á Skaganum í dag, ótrúlega gott að vakna og finna að það er enn smá eftir af sumrinu.

 Ég komst ekki í maraþonið í Reykjavík í dag líkt og ég var búin að ákveða en ég dreif mig þó í ræktina í morgun og hljóp dálítið. Fór síðan beinustu leið í bakaríið, skundaði síðan með bakkelsið til ömmu og afa í laugardagsmorgunkaffi. Maren og litlu strákarnir voru líka og það var ansi góð byrjun á deginum. 

Ég er að fara til Minneapolis núna eftir smá stund og kem aftur heim snemma á mánudaginn. 

Þangað hef ég aldrei komið svo það verður gaman að koma þangað. 

Góða helgi og góða skemmtun í kvöld þið sem eruð að fara á menningarnótt. 

xxx

 Á morgun..... fer ég með manni mínum í rúma viku til Parísar. Mig hefur lengi dreymt um að heimsækja þá borg og ég hlakka ofboðslega mikið til. 

Au revoir ;)

Ég vaknaði við yndislegt veður í morgun, það er dásamlegt! Dreif mig út á hjólið og kom auðvitað við í bakaríinu (enda er helgi og þá má allt) og hjólaði til Marenar. Sátum úti og borðuðum bakkelsi í sólinni. Nú er ég komin inn og byrjuð að túpera mig upp fyrir daginn. Leiðin liggur til Washington. Ég verð þar í tvo daga og ætla svo sannarlega að njóta mín. Veðrið á að vera ansi gott - um 30°stiga hiti og sól. Þannig ég mun eflaust brúka sundlaugina á hótelinu til þess að næla í smá tan, bara pínu.

Ég lofa skemmtilegum myndum af fallegri borg í næstu færslu. Hafið það gott í góða veðrinu og njótið þess að vera til. Það ætla ég allavega að gera :-)

.. Klukkan er tólf á hádegi og ég er enn í náttsloppnum. Við Haddi erum á Hvolsvelli að hafa það huggulegt. Ég sit hér við stofuborðið dúðuð í fína náttsloppnum, með kveikt á kertum og með morgunkaffið sem ég er búin að vera að sötra á í rúmar tvær klukkustundir. Ég er ekki að drekka kalt kaffi heldur drekk ég smá og smá og bæti síðan heitu við.. hurðin út að svölum er opin og ferska loftið streymir inn. Pínu kalt en samt ekki, útsýnið og þögnin hérna er engu lík. Hér líður mér vel, hér er í lagi að dúllast frameftir öllu. :-) Haddi svefnpurka sefur líka enn og því er ansi mikil ró.

Eftir smá stund þá ætla ég að fara í göngutúr, kíkja á grafreitinn hjá ömmu og afa sem bjuggu hér á Hvolsvelli.

Eitt finnst mér þó yndislegt kirkjan hér á Hvolsvelli er dásamleg. Lítil og falleg. Það er lykill að henni svo maður kemst alltaf inn. Ég veit ekki neitt betra en að sitja þar inni í kyrrðinni.

Eftir göngutúrinn hef ég hugsað mér að kíkja í sund og á kaffihúsið og fá mér einn góðan kaffibolla - já ég er kaffifrík. Cappucino og gömul slúðurblöð á kósí kaffihúsi.

Ég get verið ansi gömul í mér stundum - en það er í lagi hér á Hvolsvelli.

Hér nýt ég mín.

Mynd af fallegu kirkjunni sem ég tók í september í fyrra. Þá í einum góðum göngutúr :)

Stundum skilur maður ekki þennan heim. Hvað vakir fyrir sumu fólki, sem betur fer skilur maður það ekki. Erfitt er að koma orðum að því hvað mannfólk getur verið illt. Fleiri eru góðir - en þeir sem illir eru skilja eftir djúp sár. Ég er búin að kveikja á kertum hér heima við og hugsa hlýtt til Noregs. Erfiðir tímar.

Hugsum vel um hvort annað, tökum utan um fólkið sem við elskum og verum dugleg við að minna fólkið okkar á það hvað það sé dýrmætt. Því lífið er óútreiknanlegt.

xxx

Be impeccable with your word: Speak with integrity. Say only what you mean. Avoid using the word to speak against yourself or to gossip about others. Use the power of your word in the direction of truth and love.