Heimalagað múslí

 Heimalagað múslí, ab mjólk og bananar, algjört lostæti í morgunsárið. Ég geri oft mitt eigið múslí, ég nota þá bara það sem ég á í skápunum hverju sinni svo múslíið hjá mér er aldrei eins.

Ég held að það geti flestir verið sammála um að múslí sé mjög gott og því er tilvalið að útbúa heimalagað múslí, setja það i fallega krukku og gefa sem gjöf.  Gjafir sem er heimalagaðar eru að mínu mati dásamlegar. Ég hef verið að skoða svo mikið af skemmtilegum gjafahugmyndum fyrir jólin sem ég ætla að prufa og auðvitað kem ég til með að deila þeim með ykkur. 

Heimalagað múslí 

2 dl hafrar

2 dl hörfræ

2 dl sólkjarnafræ

2 dl möndlur 

2 dl kókosmjöl

1 dl valhnetur

1/2 tsk kanil

1 dl rúsínur

2 dl vatn 

1 dl olía t.d. kókos

1 dl lífrænt hunang

smá salt 

 Aðferð:

Hitið ofninn í 200°C. Setjið öll þurrefnin í blandarann og grófhakkið í smá stund. Blandið því næst vökvanum saman við og blandið vel saman með sleif. Dreifið blöndunni á bökunarpappír í ofnskúffu. Ég læt rúsínurnar með inn í ofninn vegna þess að ég vil hafa þær stökkar en auðvitað getið þið bætt þeim við eða hvaða ávöxtum sem þið viljið eftir að blandan kemur út úr ofninum. 

Bakið í 15 mínútur, opnið þá ofninn og hrærið aðeins í blöndunni og bakið áfram í 10 - 15 mínútur. Þá ætti að múslíblandan að vera tilbúin. Að vísu hef ég blönduna alltaf svolitið lengur, eða þar til blandan er orðin vel dökk en það er bara vegna þess að ég vil hafa mitt múslí mjög stökkt. En þið fylgist bara með og smakkið ykkur auðvitað til. 

 Mjög einfalt og svakalega gott. Mæli svo sannarlega með að þið prufið. 

Ég vona að þið njótið vel

xxx

Eva Laufey Kjaran

Sunnudagsmorgun

Morgunmaturinn minn. Spínatsafi, vanillujógúrt með múslí og hindberjum. 

Sunnudagslúxusinn er amerískar pönnukökur og kirsuber. 

Nú ætla ég að drífa mig út að hlaupa og leika við litlu prinsana mína. Ég fer heim í dag, mikið sem ég eftir að sakna allra strax. Agalega leiðinlegt að kveðja! 

Ég vona að þið eigið ljúfan sunnudag 

 xxx

Eva Laufey Kjaran

Good morning!

Mánudagur. Ný vika, spennandi vika!

Ég vaknaði eftir snooze stríð og sá að sólin skein, hamingja. Ég útbjó mér góðan morgunmat, drakk gott kaffi og fór í gegnum fréttasíður. Mér finnst agalega huggulegt á byrja daginn nákvæmlega svona.

Ég bakaði brauð í morgun, stútfullt af kornum. Uppskrift kemur inn á bloggið í vikunni. Það tók mig líklega styttri tíma að baka brauðið en að fara út í búð og kaupa brauð.

Dagurinn í dag fer í lærdóm, útihlaup og bakstur í kvöld. Ég er mjög spennt fyrir bakstrinum því ég ætla að prufa nýja rétti. Þið fáið auðvitað uppskrift af þeim réttum þegar þar að kemur.

 

           Létt ab mjólk með agave, hörfræjum, ástaraldin og jarðaberjum.                     Nýbakað brauð  smá smjöri, eggjum, papriku og pipar.

Ég vona að þið hafið það gott í dag.

xxx

Eva Laufey Kjaran

Orkuríkt Berjaboozt

 Líkt og ég hef sagt áður þá finnst mér mjög gott að laga mér boozt eins oft og ég get.

 Þetta boozt er svakalega gott.

Berjaboozt 

2 1/2 dl. Frosin ber (Ég skolaði þau áður en ég notaði þau)

2 Lófar spínat

1 Banani

1 1/2 msk. Hörfræ

Engiferrót eftir smekk. Rótin skræld og rifinn niður með rifjárni. 

1 Stórt glas Trópí Tríó 

Allt saman í blandarann í nokkrar mínútur. 

Orkumikið og bragðgott. 

Í morgun vaknaði ég við sólargeisla, það var dásamlegt. Dreif í sund og er búin að hafa það ansi huggulegt. Næst á dagskrá er göngutúr í sveitinni.
 Þegar veðrið er gott þá langar manni  að gera allt og njóta þess að sleppa dúnúlpunni. 

Það verður allt betra með sólinni og góðum boozt auðvitað!

Ég vona að þið eigið ljúfa helgi.

xxx

Eva Laufey Kjaran

Grænt ofurboozt

xxx

Eva Laufey Kjaran

Hrökkbrauð

Hrökkbrauð er í miklu eftirlæti hjá mér. Það er eitthvað við þetta stökka og þunna brauð sem ég fæ ekki nóg af. Það erh 

• 
  
• 
  
• 
  
• 4 dl. Haframjöl
• 4 dl. Rúgmjöl
• 1 dl. Graskersfræ
• 1 dl. Sólblómafræ
• 1 dl. Sesamfræ
• 1 dl. Hörfræ
• 7 dl. Vatn
• 1 msk. Hunang 

Aðferð:

1. Blandið öllum þurrefnum saman í skál. 
2. Bætið vatni og hunanagi saman við þurrefnin og blandið vel saman. 
3. Dreifið blöndunni á pappírsklædda ofnplötu. Skerið í deigið með pizzahníf áður en þið setjið deigið inn í ofn. 
4. Bakið við 160°C í 35 mínútur. Opnið hurðina á ofninum og bakið áfram í 10 mínútur, lokið síðan ofninum aftur og bakið í 20 mínútur. Þá ætti hrökkbrauðið að vera tilbúið. Leyfið hrökkbrauðinu að kólna svolítið áður en þið berið það fram. 

Heimalagað múslí

Heimalagað múslí og hindiberjamauk með AB-Mjólk.

7 dl. Haframjöl

50 gr. Sólskinsfræ

50 gr. Graskersfræ

50 gr. Heslihnetur

50 gr. Möndlur

100 gr. Þurrkaðir ávextir (t.d. rúsínur, trönuber, epli.  Ég notaði Gojiber og smá rúsínur í þetta sinn)

1 dl. Hunang (ég notaði lífrænt)

1 dl. Olía (t.d. kókos)

3 msk. Agave síróp (eða 50 gr. Púðursykur)

1 ½ tsk. Kanill

½ tsk. Salt

2 tsk. Vanilla Extract (eða vanilludropar)

Þetta er  múslí fyrir virka daga en á helgum þá ætla ég að laga mér múslí með púðursykrinum og bæta ca. 60 grömmum af dökku súkkulaði með. Held að það sé ansi gott.

Aðferðin er ósköp einföld,  setjum þurrefnin saman í skál og blöndum vel saman. Hrærum svo olíunni, sírópinu, hunanginu, vanillu extract saman og bætum því saman við þurrefnin. Best er að nota bara hendurnar til þess að blanda.

Svo er þessu skellt á ofnskúffu og inn í ofn við 180°C í 20 mínútur.

Þetta er ansi auðvelt og hrikalega gott. Þið getið notað hvaða fræ, hnetur eða ávexti sem þið viljið. Listinn hér að ofan er alls ekki heilagur og því er um að gera að prufa sig áfram. Mig langar t.d. agalega að prufa að setja  grófar kókosflögur með næst. Þetta var mitt fyrsta múslí og sannarlega ekki í síðasta sinn sem ég laga slíkt.

Ég útbjó hindiberjamauk með.

Lét frosin hindiber  (ca. 50 grömm því ég var bara að gera lítið ) í pott og setti 2 msk. Agave síróp (Hægt að nota venjulega sykur líka) saman við. Blandaði þessu vel saman og bætti 2 msk. Af sítrónusafa við. Lét þetta malla í pottinum í örfáar mínútur og bætti ½ tsk af kanil saman við.
Ég stappaði hindberin mjög vel og lét þetta svo í gegnum sigti.
Inn í ísskáp í ca. 30 mínútur og þá er þetta orðið aldeilis fínt.

Hindiberjamauk, létt AB mjólk og heimalagað múslí. Hollur og bragðgóður morgunmatur. Mér finnst nauðsyn að bera mat fram á fallegan máta og það verður skemmtilegra fyrir vikið að borða hann. 

Njótið vel. 

xxx

Eva Laufey Kjaran

Pönnukökur með bláberjum.

Klukkan fjögur ákvað ég nú að gera vel við mig í kaffitímanum, átti ég að hlaupa út í bakarí eða drífa mig í að henda í nokkrar pönnukökur? Ég var ekki lengi að ákveða mig, þessar pönnukökur er þrælgóðar og fljótlegar. Ég er alltaf að reyna að krydda svolítið upp á þær því þær eru vissulega hollari en "venjulegar" pönnukökur og þá er bragðið ekki það sama. En mér finnst þær góðar og í dag þá prufaði ég að útbúa smá bláberjamauk í stað þess að nota síróp, eða við skulum bara kalla það bláberjasíróp. Það hljómar ágætlega.

En hér kemur uppskriftin af einföldum pönnukökum og bláberjasírópinu einfalda, ég notaði sérlega mikið á mínar pönnsur vegna þess að ég er svo hrikalega skotin í bláberjum.

Pönnukökur:

• 100 gr. Haframjöl
• 150 gr. Létt AB-mjólk
• 2 msk. Fínmalað speltmjöl
• 2 msk. Kókos olía
• 1/2 tsk. Lyftiduft
• 1 1/2 - 2 tsk. Kanill
• 1/2 tsk. Vanillu extract (Eða dropar)
• 1 Egg
• 1 tsk. Agave-síróp

Þessu eru öllu blandað vel saman í 2 - 3 mínútur í hrærivél.

Sírópið:

ca. 50  - 60 gr. Bláber (ég notaði í þetta skiptið frosin)

2 msk. Agave síróp

1/2 tsk. Kanill

1 1/2 msk. Rifinn sítrónubörkur

Ég byrjaði á því að skola vel bláberin vegna þess að þau voru frosin, lét svo allt saman í pott og sauð við vægan hita  í um það bil 5. mínútur og hrærði vel í á meðan þar til þetta var orðið að fallegu mauki.

Svo stráði ég nokkrum kókosflögum yfir.

Fallegar og fínar pönnsur, þær glöddu mig svo sannarlega.

xxx

Eva Laufey