11.11.11

Föstudagur í dag sem þýðir að helgin er komin, helgin hjá mér fer í lærdóm en ég ætla þó að baka eitthvað gott á morgun því það er nú bara einu sinni í viku laugardagur. 

Ég bakaði um daginn vanillumúfur og átti eftir að setja inn uppskrift, þær heppnuðust ansi vel og voru mjög ljúffengar. Það er eitthvað svo stórkostlegt við Vanillu. 

Ég mæli með að þið prufið þessar múffur um helgina. 

Rómantískar Vanillumúffur með hvítu súkkulaðikremi.  

Uppskriftin kemur hér, ca. 24 múffur

• 226 gr. Mjúkt smjör
• 450 gr. Sykur
• 5 Egg
• 330 gr. Hveiti
• 4 tsk. Lyftiduft
• 1 tsk. Salt
• 3 dl. Rjómi
• 2 msk. Vanilla extract (eða vanilludropar)
• Fræ úr einni vanillustöng.

Aðferð:

Smjör og sykur sett í hrærivélaskál og hrært vel saman í ca. 3- 4 mínútur þar til deigið er létt og ljóst. Egg sett út í , eitt og eitt í einu og hrært vel á milli. Takið ykkur aðra skál og blandið þurrefnum saman, mér finnst svo best að sigta deigið saman við blönduna og hræra lauslega með sleif áður en að ég læt hrærivélina sjá um málin. Hveitiblöndunni er svo blandað saman við deigið og að lokum rjómanum, fræjum úr vanillustönginni og vanilla extract. Blandið vel saman en mjög varlega.

Ég klippti niður bökunarpappír og notaði sem form, gamalsdags og rómantískt að mínu mati. :-)  

Inn í ofn við 160°C í 20 - 25 mínútur. 

 Ég held að það sé ekkert deig eins fallegt og vanilludeig.

 Lövlí. 

 Fallegt

 Svo er hægt að klæða múffurnar upp á ýmsa vegu. 

Góða helgi kæru lesendur 

xxx

Gleðistund eftir kvöldmat. Kaffibolli og gott súkkulaði. Ég var að prufa þetta súkkulaði í fyrsta skipti og jummí! Venjulegt rjómasúkkulaði og hvítt súkkulaði saman í eitt.  Algjör nauðsyn með kvöldkaffinu :) 

xxx

Pizzukvöld á þriðjudegi

Þegar að ég kom heim úr skólanum þá langaði mig í eitthvað svakalega gott. Ég átti nóg af grænmeti og afganga af kjúkling þannig ég ákvað að laga mér speltpizzu með allskyns gúmmilaði.

Ótrúlega einfalt og fljótlegt. 

Speltpizzubotn. (Uppskrift frá Sollu á grænum kosti)

250.gr Speltmjöl

2 msk.  Ólívu olía

1/2 tsk. Salt

2-3 tsk krydd. (Ég setti basilikku, pipar og steinseljukrydd) 

3 - 4 tsk. Vínsteinslyftiduft (líka hægt að nota venjulegt lyftiduft)

125 ml. Heitt vatn

Þurrefnum blandað saman í skál eða það sem mun auðveldara er : Sett í hnoðarann í matvinnsluvélinni. Olíunni bætt saman við og síðan vatninu. Deigið er því næst hnoðað. Smá spelti stráð á borðið og deigið flatt út frekar þunnt. Ég tek hringlótta kökudiskinn minn sem er 25 cm í þvermál og skelli ofan á deigið til að fá hringlaga botn. Setjið bökunarpappír á ofnplötu og deigið þar ofan á og forbakið við 200°C í 4 mínútur, setjið rakt viskustykki ofan á botnana svo þeir verði ekki að tvíböku. Þessi uppskrift gefur 2 botna með 25 cm í þvermál. 

Pizzusósan mín er ansi einföld; 

1. msk Tómatpúrré

3. msk olía

1 hvítlauksrif

salt&pipar

1-2 tsk af kryddblöndu (t.d. steinselja, basilikka eða oreganó) 

Þessu blandað saman og sett ofan á deigið, því næst skar ég niður kirsuberjatómata, rauðlauk, vorlauk, papriku og sveppi. Steikti grænmetið á pönnu upp úr olíu og skar niður kjúkling sem ég átti í ísskápnum og setti hann sömuleiðis á pönnuna í smá stund. 

Gúmmilaðið lagt ofan á pizzubotninn og inn í ofn í 10 mín við 200°C. 

Klettasalat, fetaostur og pínu pipar ofan á pizzuna, þá er hún aldeilis tilbúin. 

Hún var sérdeilis ljúffeng og ansi  fljótleg sem mér þótti agalega fínt. 

xxx

La Dolce Vita...

Mánudagur alla leið í dag, veðrið ferlega leiðinlegt. Rúmar þrjár vikur eftir af skólanum, sem þýðir að prófin eru að nálgast.

En það þýðir líka að jólin eru að  nálgast. 

Jólabarnið í mér er í þann mund að springa, ég væri vís til þess að byrja í jólakökubakstri um helgina en nei, ætla að bíða með það pínulítið lengur.

 Í dag útbjó ég plan, ánægja dagsins var sú að ég náði tilsettum markmiðum fyrir daginn í dag og vonandi get ég skrifað hérna n.k. sunnudag að ég hafi náð að uppfylla þau markmið sem ég hef sett mér út þessa viku.

 Það er einhver undarlega góð tilfinning þegar að maður nær að klára markmiðin sín. 

Önnur ánægja var mintu-cappucino sem Agla vinkona var búin að dásama í bak og fyrir, ég varð jú að prófa. Þetta var dásemd, svo Agla hafði rétt fyrir sér. Þá sjaldan :-) 

Hugurinn minn er í útlöndum.. ég gaf honum frí eftir lesturinn og hann er búinn að vera í útlöndum í kvöld. Sumarið var dásamlegt, ferðaðist mikið og stendur Parísar ferðin okkar Hadda upp úr. Yndisleg ferð. 

Ég hlakka til að fara út í desember í smá huggulegheit með famelíunni. Lövlí. 

xxx

Fyllt ljúffengt brauð með fetaost og tómötum.

260 gr. Speltmjöl ( 130 gr. gróft og 130 gr. fínmalað)

25 gr. Ger

2.5 dl. Heitt vatn

2 msk. Ólífu olía

2 tsk. Santa María kryddblanda

1 msk. Graslaukur

50 gr. Fetaostur

Fylling: 

1oo gr. Fetaostur

150 gr. Philadelphia rjómaostur með hvítlauks-og kryddbragði.

3 tómatar, skornir smátt niður

Santa María kryddblanda

Aðferð:

• Hitið ofninn á 200°C
• Blandið þurrefnunum vel saman, hellið vökvanum út í og hrærið vel í nokkrar mínútur. 
• Látið deigið hefast á hlýjum stað í 30 - 40 mínútur. (Gott er að setja heitt vatn í vaskinn og láta skálina standa ofan í) 
• Hnoðið vel deigið og fletjið út. (Gott er að setja smá hveiti undir deigið svo það festist ekki við borðið) 
• Deigið er smurt með philadelphia rjómaostinum og tómötum er síðan bætt við sem og kryddblöndunni. Ca. 1 msk. 
• Lokið brauðinu og penslið með smá smjöri. 
• Inn í ofn í ca. 30 mínútur. 

 Stráið smá hveiti yfir deigið 

Ferlega gott brauð sem á alltaf vel við. 

Vonandi eigið þið góðan sunnudag og njótið þess að slappa af svona rétt áður en að ný vika hefst. 

xxx

xxx

Njóttu dagsins í dag, hann kemur aldrei aftur.

 Er nokkuð dásamlegra en góð kaka á köldum vetrardegi.

Kakó, kökusneið og notaleg stund með fjölskyldunni. Mér finnst fátt jafn yndislegt. 

Hér kemur uppskrift af einfaldri gulrótarköku, uppskriftina fékk ég hjá mömmu minni. Kakan er sérlega góð og ekki skemmir að hafa smá rjóma með. :)

 Uppskriftin er í bollastærðum. (venjulegum kaffibollum) 

 Botn: 

1 1/2 Bolli matarolía

3 Bollar Rifnar gulrætur

2 Bollar púðursykur

4 Egg

2 Bollar hveiti

2 tsk. Matarsódi

1 tsk. Salt

3 tsk. Kanill

1 tsk. Vanilla extract (eða vanilludropar)

Aðferð:

Smyrjið tvö hringlaga form.  

Þeytið egg og sykur saman, bætið gulrótum, matarolíu og vanillu extract eða dropum saman við. Blandið hveiti, matarsóda, salti og kanil saman í aðra skál. Þurrefnunum er síðan blandað saman við eggjahræruna. Bakið í 30 - 40 mínútur við 170°C.  

 Krem:

250 gr. Flórsykur

200 gr. Philadelphia hreinn rjómaostur

1 tsk. Vanilla extract (eða vanilludropar)

2 - 3 sítrónudropar.

Hrærið öllu saman í nokkrar mínútur, gætið þess að hræra ekki of lengi svo að kremið verði ekki of lint.

Kreminu er smurt á milli botnanna og yfir kökuna.

Ljúffeng þessi elska.

xxx 

Ó svo yndislegur dagur í borginni.

Jómfrúin í hádeginu. Betra verður það ekki.

Maren Rós fjörug á fertugsaldri.

Elsku amman mín

Móðir mín fallega.

Mæðgur aðeins að rökræða hver ætti að taka reikninginn eins og gerist stundum. 

xxx

Fékk dásamlega sendingu frá Innes ehf. Frábærar vörur sem ég hlakka til að nota við matar-og bakstursgerð. 

Þúsund þúsund þakkir. 

Mömmudraumur

Þegar ég var yngri var þessi kaka í miklu uppáhaldi og það hefur ekki breyst. Mamma mín var mjög dugleg að baka og oftar en ekki beið þessi okkar þegar við komum heim úr skólanum. Kökuilmurinn sem tók á móti okkur var dásamlegur og það er fátt sem jafnast á við góðan kökuilm. Það kannast örugglega margir við þessa uppskrift enda vinsæl á mörgum heimilum, ég má til með að deila henni og ég vona að þið njótið vel. 

Mömmudraumur

150 g sykur

150 g púðursykur

130 g smjör

2 Brúnegg, við stofuhita

260 g Kornax hveiti

1 tsk matarsódi

1,5 tsk lyftiduft

salt á hnífsoddi

50 g kakó

2 dl mjólk

Aðferð:

1. Þeytið sykur og smjör þar til blandan verður létt og ljós. 
2. Bætið eggjum   saman við, einu í einu.
3.  Blandið þurrefnum út í deigið ásamt mjólkinni.
4.  Skiptið deiginu niður í tvö smurð hringlaga form og bakið við 180°C í 20 – 25 mínútur.

Súkkulaðikrem

500 g flórsyku

60 g kakó

1 Brúnegg

80 g smjör

1 tsk vanilla (extract eða dropar)

4 msk sterkt uppáhellt kaffi

Aðferð:

1.   Bræðið smjör við vægan hita
2.   Blandið öllu saman í hrærivélaskál og þeytið þar til kremið verður silkimjúkt og fallegt. 

Það er mjög mikilvægt að kæla kökubotnanna áður en þið smyrjið kreminu á milli botnanna og yfir alla kökuna. Skreytið gjarnan með kökuskrauti eða ferskum berjum.

Kakan er alltaf jafn lövlí. Einföld og bragðgóð. 

Það sem mér finnst best við bíltúrinn upp á Akranes eftir skóla er að ég get lúrað í góðar 40 mín.. Kem endurnærð heim beint í bakkelsið auðvitað, sérlega á dögum sem þessum þegar veðrið heimtar að maður haldi sér innandyra þá er nú ekkert annað í stöðunni en að gera smá vel við sig, gott að hafa eitthvað að narta í með lestrinum.

 Stutt eftir af skólanum og nú fer stressið að segja ærlega til sín, verkefni..verkefni. Þannig nú er eins gott að bretta upp ermar og liggja yfir blessuðum bókunum.

Kaffitíminn kallar!

xxx

Ungfrú Rósa.

Vanilluskyrkaka með berjum. Ótrúlega ljúffeng - þá sjaldan sem ég geri vel við mig á þriðjudögum. 

Vanilluskyrkaka með berjum.

Botn:

•   1 ½ Pakki Lu Bostogne Kex.
•   200 gr. Smjör

Fóðrið formið að innan með filmuplasti, látið plastið ná upp á barmana.  Myljið kexið í matvinnusluvél. Blandið smjörinu saman við og þrýstið kexblöndunni á botn og upp með börmum á bökuformi. Kælið á meðan að þið útbúið fyllinguna.

Fylling.

•          750 gr. KEA vanilluskyr. (Ein stór og ein lítil skyrdós.)
•          Peli af rjóma, léttþeyttur.
•          2 msk. Flórsykur.
•          Fræin úr einni vanillustöng.
•          1 ½ tsk . Vanilla Extract. (eða venjulega vanilludropa)

Skerið vanillustöngina í tvennt eftir endilöngu og skafið fræin innan úr henni, blandið skyrinu, flórsykrinum og fræjunum vel saman. Bætið léttþeyttum rjómanum út í og bragðbætið með vanilla extract. Setjið skyrblönduna ofan á kexbotninn. Kælið í a.m.k. 3 tíma eða yfir nótt.

Berjablanda.

•          1 Vanillustöng.
•          1 ½ msk. Flórsykur.
•          Einn poki frosin ber.  
•          ½ Askja af ferskum bláberjum.
•          ½ Askja af ferskum jarðaberjum.

Sjóðið berin og flórsykur saman við vægan hita, skerið eina vanillustöng í tvennt og bætið henni saman við. Látið  malla í nokkrar mínútur á hellunni. Fjarlægið vanillustöngina og kælið berjablönduna í kæli í 30 mínútur áður en þið setjið á kökuna. 

Kakan er síðan skreytt með ferskum ávöxtum og hvítu súkkulaði. Bræðið 100 gr. Af hvítu súkkulaði yfir vatnsbaði og dreifið yfir kökuna.
 Fallegt er að dreifa hvítu súkkulaði á bökunarpappír og það látið inn í kæli í smá stund, úr því verður til ansi fallegt súkkulaðiskraut. 

Njótið