Æðisleg fyllt snittubrauð

Fyllt snittubrauð með pestófyllingu og hvítlauksfyllingu eru afar ljúffeng og einföld í gerð. Ég elska þessi brauð og geri þau mjög oft, þau eru frábær með súpu eða þá ein og sér. Það þarf alls ekki að vera flókið að baka sitt eigið brauð og mér finnst það alltaf svo gaman, sérstaklega vegna þess að þá veit ég nákvæmlega hvað fer í brauðið. Uppskriftin er mjög einföld og það tekur ekki langa stund að útbúa þessi brauð, þið getið svo auðvitað bætt öllu því sem þið viljið í brauðin og um að gera að prófa sig áfram. Ég mæli með að þið prófið þessa uppskrift um páskana og ég vona að þið njótið vel. 

Snittubrauð 

• 500 g brauðhveiti frá Kornax
• 320 ml volgt vatn
• 1 msk hunang
• 15 g ger
• 1 tsk salt
• 2  msk ólífuolía
• Handfylli rifinn mozzarella ostur

Pestófylling

• 5-6 msk rautt pestó (ég notaði pestó frá merkinu Ítalía, fæst í Hagkaup)
• 2 msk fetaostur + smávegis af olíu
• Salt og pipar

Ólífubrauð

• 12-14 grænar ólífur
• 2 – 3 hvítlauksrif
• 2 msk ólífuolía
• Salt og pipar
• 1 tsk. Ítölsk kryddblanda

Aðferð:

1. Blandið þurrgeri, volgu vatni og hunangi saman. Setjið viskastykki yfir skálina og leyfið gerinu að vakna í rólegheitum, það tekur 6 - 8 mínútur. Þegar byrjar að freyða í blöndunni er hún tilbúin. 
2. Blandið gerblöndunni, hveiti, salti og olíu saman og hnoðið í nokkrar mínútur eða þar til deigið verður mjúkt. Setjið viskastykki yfir skálina og leyfið deiginu að hefast í klukkustund. 
3. Búið til tvær lengjur úr deiginu og  skerið létt í brauðin eftir endilöngu.
4. Látið hefast á ný í 20 – 30 mínútur.
5. Hitið ofninn í 230°C.
6. Útbúið fyllingarnar og smyrjið ofan á brauðin, sáldrið rifnum osti yfir og bakið við 220 – 230°C í 10-12 mínútur eða þar til osturinn verður gullinbrúnn.

Einfalt og hriklega góð uppskrift. 

xxx

Eva Laufey Kjaran Hermannsdóttir

Öll hráefnin í þessa uppskrift fást í verslunum Hagkaups. 

Bakaðu þitt eigið rúgbrauð fyrir jólin

Um helgina hélt ég lítið aðventuboð fyrir fjölskylduna mína og bauð þeim meðal annars upp á nýbakað rúgbrauð sem smakkaðist ótrúlega vel. Góðar uppskriftir eru eins og fjársjóður og var ég svo heppin að fá uppskriftina að rúgbrauðinu hjá ömmu hans Hadda. Þetta var í fyrsta skipti sem ég baka rúgbrauð og þetta er mun einfaldara en mig grunaði. Uppskriftin er stór og tilvalið að skera brauðið niður og frysta, já eða pakka því fallega inn og gefa með jólapakkanum. 

Einfalt og stórgott rúgbrauð sem allir ættu að prófa fyrir jólin. 

Rúgbrauð frá ömmu Möggu 

** 1 bolli = 2 dl 

• 15 bollar Kornax rúgmjöl (í brúnu pokunum) 
• 3 bollar Kornax hveiti (í rauðu pokunum)
• 2 bollar sykur 
• 1 bolli síróp
• 20 teskeiðar lyftiduft 
• 1 tsk salt 
• 2 L nýmjólk 

Aðferð: 

1. Hitið ofninn í 100°C (ég notaði blástur)
2. Blandið öllum hráefnum vel saman, þið þurfið stórt fat. Það getur verið svolítið stíft að hræra hráefnum saman en takið ykkur bara góðan tíma, þetta kemur allt með kalda vatninu. 
3. Smyrjið stórt eldfast mót með loki (ég notaði það svarta hér að neðan sem er til á flestum heimilum). Það er líka hægt að baka brauðið í mjólkurfernum. 
4. Hellið deiginu í formið og setjið lokið á. Bakið við 100°C í 12 klukkustundir.

Berið fram með smjöri og einhverju góðu. 

Ingibjörg Rósa var voða hrifin af brauðinu enda mikið matargat eins og mamma sín ;) 

Aðventuboð á Rekagrandanum. Í vikunni birti ég svo fleiri jólalegar uppskriftir meðal annars af graflaxinum sem ég bauð upp á og purusteikinni sem ég elska. 

Ég vona að þið eigið góðan þriðjudag framundan kæru vinir. 

xxx

Eva Laufey Kjaran Hermannsdóttir

Allt hráefnið sem notað er í þessa uppskrift fæst í verslunum Hagkaups.