Púðursykurmarens með kókosbollurjóma og karamellusósu

Um helgina bakaði ég þessa marensköku með kókosbollurjóma og karamellukremi. Já, hún er eins góð og hún hljómar! Afi minn átti afmæli um helgina og hittumst við fjölskyldan og áttum góða stund saman, ég ákvað þess vegna að skella í eina marensbombu þar sem marensinn er afar vinsæll í okkar fjölskyldu. Marensbakstur er afar einfaldur og það er svo auðvelt að skella saman í góða köku, útkoman verður alltaf dásamleg. Ég LOFA ykkur því að hún er ofsalega bragðgóð og á eftir að slá í gegn... hún allra hitaeiningana virði.

Púðursykurmarens með kókosbollurjóma og karamellusósu

• Bakstur 
• Áætlaður tími frá byrjun til enda: 2 tímar 
• Fyrir 8-10 einstaklinga

Botnar

• 5 eggjahvítur
• 1 dl sykur 
• 3 1/2 dl púðursykur

Aðferð: 

1. Hitið ofninn í 150°C
2. Þeytið eggjahvíturnar og bætið sykrinum saman við í nokkrum skömmtum. Stífþeytið þar til blandan hreyfist ekki til í skálinni sé henni hvolft. 
3. Setjið bökunarpappír á ofnplötu eða bökunarpappír í botninn á tveimur 22 cm lausbotna formum og smyrjið þá hliðarnar með smjöri. 
4. Skiptið marensblöndunni á bökunarpappírinn eða í formin og bakið í 50-60 mínútur við 150°C. Kælið botnana mjög vel áður en þið setjið kókosbollurjóma á milli. 

Kókosbollurjómi 

• 450 ml rjómi 
• 2 tsk flórsykur 
• 1 tsk vanillusykur
• 4 kókosbollur 
• 100 g karamellukurl 
• Smátt skornir ávextir, ca 1 dl. t.d. jarðarber, bláber og hindber

Aðferð: 

1. Þeytið rjóma og bætið flórsykri og vanillu saman við.
2. Þrýstið á kókosbollurnar og skerið þær í litla bita, blandið þeim varlega saman við rjómann ásamt karamellukurli og ávöxtum. 
3. Smyrjið rjómanum á milli botnanna. 

Karamellusósa 

• 1 poki Góa kúlur 
• 1 dl rjómi 

Aðferð: 

1. Bræðið kúlurnar í rjómanum við vægan hita, hrærið vel í og kælið áður en þið hellið yfir marenskökuna. Það er mjög mikilvægt annars gæti marensinn og rjóminn bráðnað (það er ekkert sérlega skemmtilegt)
2. Skreytið kökuna með berjum t.d. jarðarberjum, hindberjum og bláberjum. 

Ég mæli með að þið skellið í þessa um helgina.

Rjómakveðjur

xxx

Eva Laufey Kjaran Hermannsdóttir

Öll hráefni í þessa uppskrift fást í verslunum Hagkaups.

Tryllingslega gott karamellupæ

Í síðasta þætti af Matargleði útbjó ég þetta tryllingslega góða karamellupæ sem er bæði fáránlega einfalt og fljótlegt. Ég kaupi yfirleitt karamellusósuna tilbúna í krukku en sósan fæst meðal annars í Hagkaup. Einnig er hægt að sjóða sæta niðursoðna mjólk í 2 - 3 klst en mjólkin breytist í ljúffenga karamellusósu. Þegar þið hafið ekki þessar 2 - 3 klst þá er í góðu lagi að kaupa hana tilbúna.. ég segi ykkur það satt. Ég elska að eiga nokkrar uppskriftir sem eru það einfaldar að ég get skellt í eina köku hvenær og hvar sem er. Ég mæli hiklaust með að þið prófið þessa um helgina, hún er æði. Var ég búin að segja æði? Ok. Nú er ég hætt. 

Karamellupæ með þeyttum rjóma og dökku súkkulaði 

Botn:

• 250 g Digestive kexkökur
• 150 g smjör
• 2 tsk sykur
• 50 g súkkulaði

Fylling:

• 2 krukkur Dulce de leche karamellusósa (ca. 500 - 600 g samanlagt) 
• 2 bananar
• 200 ml rjómi
• 1 tsk vanillusykur
• 50 g súkkulaði

Aðferð:

1. Setjið kex, smjör, sykur og súkkulaði í matvinnsluvél. Hellið blöndunni í hringlaga form helst lausbotna og þrýstið kexblöndunni í formið og upp með hliðum á forminu.
2. Kælið botninn í hálftíma áður en þið setjið fyllinguna í hann.
3. Fyllið botninn með karamellunni, skerið banana í sneiðar og raðið þeim yfir karamelluna. Þeytið rjóma með smá vanillusykri og dreifið yfir pæið.
4. Saxið dökkt súkkulaði og sáldrið yfir. Kælið pæið mjög vel áður en þið berið það fram. 

Missið ekki af Matargleði Evu öll fimmtudagskvöld á Stöð 2. 

Njótið vel. 

xxx

Eva Laufey Kjaran Hermannsdóttir

Allt hráefni sem notað er í þessa uppskrift fæst í verslunum Hagkaups.

Grillaður ananas með ljúffengri karamellusósu

Ef ég ætti að velja einn eftirlætis grill-eftirrétt þá væri það án efa grillaður ananas með ljúffengri karamellusósu og ferskum hindberjum. Það er ekkert mál að bjóða upp á þennan eftirrétt í útileigunni og hann á eftir að slá í gegn hjá börnum og fullorðnum. 

Grillaður ananas með karamellusósu 

Ferskur ananas, niðursneiddur

80 g smjör

3 msk. púðursykur

1 tsk. kanill 

Aðferð: 

Hitið smjör í potti og bætið púðursykrinum og kanil út í, leyfið þessu að malla í smástund og takið af hitanum. Skerið ananasinn niður og penslið kryddsmjörinu á hann. Það er ágætt að geyma hann í ísskáp í svolitla stund áður en þið grillið hann. 

Grillið sneiðarnar í 2 – 3 mínútur á hvorri hlið og berið fram með góðum vanilluís og karamellusósu. Bætið smávegis af rjóma út í afganginn af smjörblöndunni og hitið í smástund þar til sósan þykknar. 

Njótið vel!

xxx

Eva Laufey Kjaran Hermannsdóttir

Allt hráefni sem notað er í þessa uppskrift fæst í verslunum Hagkaups. 

Ómótstæðilegar rjómabollur

Það hefur tíðkast á Íslandi í yfir hundrað ár að borða bollur á bolludaginn og frá því að ég var lítil þá hefur þessi dagur verið í algjöru uppáhaldi. Ég veit fátt betra en vatnsdeigsbollu með sultu og rjóma, eða annarri góðri fyllingu. Þegar ég var yngri var mikið sport að fá bollu með bleikum og dísætum rjóma, mamma bakaði alltaf heil ósköp af bollum og svo voru alltaf fiskibollur um kvöldið og rjómabollur í desert. Svo vorum við að sjálfsögðu með bolluvendi en ég hef ekki föndra mér slíkan undanfarin ár, ég hlakka til þegar Ingibjörg Rósa smakkar sína fyrstu bollu. Það verður auðvitað ekki nú í ár en kannski á næsta ári, ég er kannski eina móðirin sem hlakka til að bjóða barninu mínu rjómalagað bakkelsi en það má nú heldur betur skapa skemmtilegar minningar og það er allt gott í hófi, það er reglan okkar. Ég tók forskot á sæluna og bakaði nokkrar bollur, það þarf alltaf að æfa sig fyrir stóra daginn. Ég gerði hefðbundnar vatnsdeigsbollur bæði með glúteini og án glúteins. Þið finnið uppskrift að glútenfríum bollum hér.

Það er lítill vandi að búa til sínar eigin bollur og það er gaman að prófa allskonar fyllingar þó vissulega sé bolla með sultu og rjóma alltaf góð þá getur verið ágætt að breyta til. Ég mæli með að þið margfaldið ekki uppskriftina því það er hætta á að hlutföllin riðlist, mér finnst best að laga eina uppskrift í einu.

Hér er uppskrift að vatnsdeigsbollum og þremur ljúffengum fyllingum.

8 - 10 bollur

100 g smjör
2 dl vatn
2 msk sykur (má sleppa)
110 g Kornax hveiti
3 stór Brúnegg (eða fjögur lítil)

Aðferð:

Hitið ofninn í 200°C. (blástur)
Hitið vatn, smjör og sykur saman í potti og látið suðuna koma upp. (gott er að láta vatn, sykur og smjör sjóða vel saman í 2 - 3 mínútur áður en hveitið er sett út í.
Setjið hveiti út í, hrærið saman og látið kólna í 4 mínútur.
Takið pottinn af hitanum og setjið eggin út í eitt í einu, sláið vel saman á milli. Það er líka ágætt að setja deigið í hrærivélaskál og hræra þannig saman.
Setjið í sprautupoka og sprautið bollunum á pappírsklædda bökunarplötu en það má auðvitað gera það líka með tveimur skeiðum.
Bakið bollurnar í 25 – 30 mínútur, það er mikilvægt að opna ekki ofninn fyrstu 15 mínúturnar af bökunartímanum því þá er hæta á að bollurnar falli.  

Tips! Mér finnst gott að slá eggin létt saman áður en bæti þeim saman við deigið.

Svona lítur deigið út þegar það er tilbúið, svolítið stíft viðkomu. Sprautið bollurnar á pappírsklædda ofnplötu eða notið tvær skeiðar til að móta bollurnar.

Ljúffengar fyllingar

Jarðarberjafylling

 Klassísk og góð fylling sem fær mig til þess að fara aftur í tímann þegar ég var yngri og fékk pening hjá mömmu til þess að hlaupa út í bakarí og kaupa mér eina gómsæta bollu með dísætu bleiku kremi. Nostalgían í hámarki við hvern bita...

• 1 askja jarðarber (10 - 12 stk)
• 4 dl rjómi
• 2 tsk. flórsykur

Aðferð:

1. Maukið jarðarberin með töfrasprota eða með gaffli.
2. Þeytið rjóma og sigtið flórsykur saman við í lokin
3. Blandið jarðarberjamaukinu varlega saman við rjómablönduna með sleif.

Nutella - og bananarjómi

 Þetta er fyllingin sem þið óskið að taki aldrei enda, hún er of góð til að vera sönn. (en þetta er engu að síður sönn saga)

• 4 dl rjómi
• 1 banani
• 3 msk. Nutella

 Aðferð:

1. Þeytið rjóma.
2. Maukið banana og Nutella saman með töfrasprota eða stappið vel saman með gaffli.
3. Blandið bananablöndunna varlega saman við rjómann með sleif.

 Karamellufylling

Karamella er klassísk og hún er alltaf góð, það er ekki annað hægt en elska hana. Þessi fylling er algjört sælgæti og ég gæti vel trúað að hún eigi eftir að falla vel í kramið hjá börnum. Dísæt og dásamleg.

• 4 dl rjómi







3 msk. karamellusósa (sjá uppskrift hér)









1 - 2 dl. karamellukurl

Aðferð:

1. Þeytið rjóma.
2. Blandið karamellusósu saman við rjómann með sleif, prófið að gera ykkar eigin karamellusósu. Það er miklu einfaldara en ykkur grunar. Hér er góð uppskrift. Passið að hún sé köld þegar þið blandið henni saman við rjómann.
3. Í lokin blandið þið karamellukurli saman við rjómablönduna.

Njótið vel kæru lesendur.

xxx

Rjómabollan

Sölt karamellusósa uppskrift

Sölt karamellusósa

Þetta er sósan sem þið verðið að prófa. Hún passar vel með kökum og eftirréttum, og í raun gæti ég borðað hana eina og sér. Það er meðal annars mjög sniðugt að gefa sælkeranum í fjölskyldunni þessa sósu í gjöf. Sósan geymist í ísskáp í tvær vikur. Það er ágætt að hita hana aðeins upp áður en þið berið hana fram. Ég þori að lofa ykkur því að þið kaupið ekki aftur tilbúna sósu þegar þið hafið útbúið ykkar eigin.

Hráefni:

• 200 g sykur
• 2 msk smjör
• ½  - 1 dl rjómi
• ½ tsk salt (sjávarsalt er best að mínu mati)

Aðferð: Setjið sykurinn á pönnu og bræðið hann við vægan hita. Gott er að hafa ekki of háan hita og fara hægt af stað. Takið pönnuna af hellunni þegar sykurinn er allur bráðinn og bætið smjörinu saman við og hrærið vel. Hellið rjómanum út í karamelluna og hrærið þar til karamellan er þykk og fín. Í lokin bætið þið saltinu saman við. Það er líka afskaplega gott að rista hnetur og bæta út í sósuna. 

xxx

Eva Laufey Kjaran Hermannsdóttir