Fagurbleikur og bragðgóður

Fagurbleikur og bragðgóður boozt er fullkomin byrjun í góðu brönsboði. Á tyllidögum má svo fara alla leið og fylla drykkinn upp með kampavíni. Virkilega frískandi og góður drykkur sem tekur enga stund að búa til og allir elska. 

Bleika dásemdin

• 1 bolli frosin jarðarber 
• 1 bolli frosin hindber 
• 1 bolli klakar 
• 4-5 góðar matskeiðar af grísku jógúrti 
• 1 banani 
• Appelsínusafi, magn eftir smekk
• Smá skvetta af hunangi 

Aðferð: Setjið allt í blandarann í 2-3 mínútur eða þar til drykkurinn er silkimjúkur. Berið strax fram og njótið vel. 

xxx

Eva Laufey Kjaran Hermannsdóttir

Öll hráefnin sem voru notuð í þessa uppskrift fást í verslunum Hagkaups.

Belgískar vöfflur með súkkulaði og jarðarberjum

Sunnudagar eiga að vera til sælu, svo mikið er víst. Að byrja daginn á bakstri er einfaldlega vísir að góðum degi og í morgun ákvað ég að skella í þessar einföldu og gómsætu vöfflur með súkkulaði og jarðarberjum. Ég eignaðist svo fínt belgískt vöfflujárn um daginn og mér þykir svo gaman að baka þessar þykku og góðu vöfflur, það tekur enga stund að skella í vöfflurnar og ilmurinn um heimilið er himneskur. Uppskriftin er ekki stór en það er lítið mál að tvöfalda eða þrefalda hana, upplagt að skella í þessar fínu vöfflur í kaffitímanum í dag. 

Annars vona ég að þið eigið ljúfan sunnudag framundan með fólkinu ykkar, á morgun hefst prófavika hjá mér í háskólanum og eyði ég þess vegna deginum inni að læra. Ég strax orðin spennt fyrir næstu helgi en þá ætla ég að njóta þess að vera með Ingibjörgu Rósu. 

Belgískar vöfflur með súkkulaði og jarðarberjum

ca. 10 vöfflur (lítil uppskrift - auðvelt að tvöfalda eða þrefalda)

• 2 bollar Kornax hveiti (ca. 5 dl ) 
• 1 tsk lyftiduft 
• 2 egg 
• 1 tsk vanilla (extract eða sykur)
• 3 msk sykur 
• 1 bolli mjólk (2,5 dl)
• 1 bolli AB mjólk (2,5 dl)
• 3 msk ljós olía
• Smjör

Aðferð:

1. Blandið þurrefnum saman í skál. 
2. Pískið tvö egg, hellið mjólkinni, olíunni og ab mjólkinni saman við og blandið við þurrefnin. 
3. Blandið öllu vel saman og hitið vöfflujárnið, smyrjið járnið með smjöri og bakið vöfflurnar þar til þær eru gullinbrúnar. 
4. Berið vöfflurnar strax fram og þær eru gómsætar með súkkulaði og jarðarberjum. Það er líka ótrúlega gott að rista nokkrar pekanhnetur og útbúa einfalda karamellusósu... þið getið sumsé borið vöfflurnar fram með öllu því góðgæti sem ykkur lystir. 

Ég vona að þið njótið vel. 

xxx

Eva Laufey Kjaran Hermannsdóttir

Hráefnin í þessa uppskrift fást í verslunum Hagkaups. 

Tryllingslega gott humarsalat með mangósósu

Þetta humarsalat er sannkallað lúxussalat þegar við viljum gera sérlega vel við okkur. Ég gjörsamlega elska þetta salat og gæti borðað það í öll mál... en þið vitið, maður borðar víst ekki humar í öll mál :) Ég hvet ykkur til þess að prófa það og þá sér í lagi ef þið eigið von á góðum gestum, þá er bókað mál að þið sláið í gegn. 

Humarsalat með mangósósu og ristuðum furuhnetum

Einföld matreiðsla 
Áætlaður tími frá byrjun til enda: 40 mínútur 
Fyrir 3-4 

• Gott salat t.d. klettasalat og lambhagasalat
• 1 askja kirsuberjatómatar
• 1 askja jarðarber ca. 10 stk
• ½ melóna (má vera hvaða tegund sem er)
• 1 mangó
• ½ rauðlaukur
• ½ rauð paprika
• 600 g humar, skelflettur
• smjör
• ólífuolía
• 2 hvítlauksrif
• ½ chili
• 1 tsk fersk smátt söxuð steinselja
• 1 poki furuhnetur

Aðferð:

1. Skerið öll hráefnin smátt niður og blandið saman í skál eða leggið á fat.
2. Skolið humarinn vel og þerrið, steikið upp úr olíu og smjöri ásamt pressuðum hvítlauk, smátt skornu chili og ferskri steinselju. 
3. Steikið humarinn í 3 – 4 mínútur. Setjið humarinn þá strax yfir salatið.
4. Sáldrið ristuðum furuhnetum yfir í lokin ásamt nokkrum skeiðum af sósunni.

Hvítlaukssósa með mangó

• 1 dós sýrður rjómi
• ½ mangó
• 2 msk majónes
• 1 hvítlauksrif
• ¼ rautt chili
• salt og pipar
• 1 tsk hunang

Aðferð:

1. Setjið öll hráefni í matvinnsluvél eða maukið með töfrasprota. Gott er að kæla sósuna í hálftíma áður en þið berið hana fram. 

Njótið vel. 

xxx

Eva Laufey Kjaran Hermannsdóttir 

Öll hráefnin í þessa uppskrift fást í verslunum Hagkaups. 

Brúsketta með sítrónurjómaosti og reyktum laxi

Í gærkvöldi var sérstakt sítrónuþema í Matargleðinni og ég útbjó þessar sjúklega einföldu brúskettur sem eru tilvaldar í sumar, sem forréttur eða bara sem léttur kvöldverður.  Gott brauð, rjómaostur og reyktur lax fara einstaklega vel saman. Það tekur líka enga stund að skella í þessar einföldu og bragðgóðu brúskettur, sumsé þið eigið eftir að elska þær. 

Ljúffengt laxabrauð með sítrónurjómaosti

Einföld matreiðsla 
Áætlaður tími frá byrjun til enda: 20 mínútur
Fyrir 3-4 

• 1 gott brauð t.d. súrdeigsbrauð
• reyktur lax, í sneiðum
• 200 g rjómaostur, hreinn
• salt og pipar
• safi af hálfri sítrónu
• börkur af hálfri sítrónu
• 1 msk smátt saxaður graslaukur
• Klettasalat
• Ólífuolía
• Hreinn fetaostur
• Sítrónubátar

Aðferð:

1. Skerið gróft brauð í sneiðar og leggið í eldfast mót, sáldrið ólífuolíu yfir og bakið í ofni við 200°c í 4-5 mínútur.
2. Hrærið saman rjómaosti, salti, pipar, sítrónusafa, sítrónuberki og graslauk í skál.
3. Smyrjið vel af rjómaostinum á hverja brauðsneið og leggið klettasalatið og laxinn yfir.
4. Myljið fetaost yfir í lokin ásamt því að saxa niður graslauk og skreytið brauðið með honum.
5. Berið brauðið fram með sítrónubátum.

Öll hráefnin í þessa uppskrift fást í verslunum Hagkaups.

Vanillu- og sítrónukaka úr Matargleði Evu

Í lokaþætti Matargleðinnar var sérstakt sítrónuþema (mögulega tileinkað Beyoncé). Ég bakaði meðal annars þessa æðislegu vanillu- og sítrónuköku sem er í miklu uppáhaldi. Mjög sumarleg og sæt - mæli með að þið prófið hana. 

Vanillu-og sítrónukaka með ferskum berjum

• Bakstur 
• Áætlaður tími frá byrjun til enda: 2 tímar 
• Fyrir 8-10 einstaklinga

• 200 g smjör
• 200 g sykur
• 4 egg
• 300 g hveiti
• 2 tsk vanillusykur 
• 2 tsk lyftiduft
• ½ tsk salt
• 5 msk ferskur sítrónusafi
• börkur af hálfri sítrónu

Aðferð:

1. Stillið ofninn í 180°C (blástur)
2. Þeytið saman sykur og smjör þar til blandan verður létt og ljós.
3. Bætjum eggjum saman við, einu í einu.
4. Blandið þurrefnum saman í skál og bætið síðan við eggjablönduna, ásamt sítrónusafa og sítrónuberki. 
5. Hrærið deigið þar til það verður silkimjúkt.
6. Skiptið deiginu niður í tvö smurð form og bakið við 180°C í 22-25 mínútur.
7. Kælið botnanna mjög vel áður en þið setjið á þá krem!

Ljúffengt sítrónusmjörkrem

• 250 g mjúkt smjör
• 500 g flórsykur
• 3 msk sítrónusafi
• 1 tsk sítrónubörkur, eða minna
• 1 msk rjómi
• 100 g hvítt súkkulaði

Aðferð:

1. Þeytið saman smjör og flórsykur í 2 – 3 mínútur.
2. Bætið sítrónusafanum, sítrónuberki, rjóma og bræddu hvítu súkkulaði saman við og þeytið áfram í 4 – 5 mínútur. Því lengur sem þið þeytið kremið því léttara og betra verður það.
3. Smyrjið kreminu á milli botnanna og skreytið með allskyns ferskum berjum. Sigtið gjarnan smá flórsykri yfir kökuna í lokin.

Njótið vel.

xxx

Eva Laufey Kjaran Hermannsdóttir

Öll hráefni í þessa uppskrift fást í verslunum Hagkaups

Pulled Pork í ljúffengri bbq sósu

Pulled Pork í bbq sósu

• 700-800 g úrbeinaður svínahnakki
• 1 tsk paprikukrydd
• 1 tsk cumin krydd
• 1 tsk bezt á allt krydd
• Salt og pipar
• 1 laukur
• 2 hvítlauksrif
• 1 msk ólífuolía

Aðferð:

1. Kryddið kjötið með þeim kryddum sem talin eru upp hér að ofan. 
2. Brúnið kjötið á öllum hliðum upp úr ólífuolíu í víðum potti sem má fara inn í ofn. 
3. Skerið niður einn lauk og bætið honum út í pottinn ásamt tveimur hvítlaukrifjum.
4. Leyfið kjötinu að malla í pottinum við vægan hita á meðan þið útbúið bbq sósuna.

BBQ sósa

• 1 msk ólífuolía
• 1 laukur
• 1 ½ dl tómatasósa
• 1-2 msk balsamikgljái
• 1 msk hunang
• Salt og pipar
• 1 tsk paprikukrydd
• 1 tsk cumin krydd

Aðferð: 

1. Saxið niður laukinn og steikið upp úr olíunni í eina til tvær mínútur. Bætið því næst hinum hráefnunum saman við og leyfið sósunni að malla í smá stund. 
2. Hellið síðan sósunni yfir svínakjötið og setjið lokið á pottinn og inn í ofn við 110°C í 6-8 klst.
3. Berið svínakjötið fram í góðu brauði, með salati og pikkluðum rauðlauk.

Pikklaður rauðlaukur

• 1 rauðlaukur
• 1 dl hvítvínsedik
• 1 msk sykur

Aðferð:

1. Skerið rauðlauk í jafn stórar sneiðar, setjið í krukku eða skál og hellið hvítvínsediki og sykri saman við. 
2. Blandið vel saman og geymið í kæli í lágmark klukkstund.

Án ef minn uppáhalds skyndibiti! 

Njótið vel. 

xxx

Eva Laufey Kjaran Hermannsdóttir

Öll hráefni í þessa uppskrift fást í verslunum Hagkaups

Pönnupizza með jalepeno osti

Pönnupizza með jalepeno osti og sveppum
Pizzabotn 

• 240 ml volgt vatn (mikilvægt að vatnið sé volgt)
• 2 ½ tsk þurrger 
• 1 msk hunang
• 400 – 450 g brauðhveiti
• 1 tsk salt 
• 2 msk olía  

Aðferð: 

1. Blandið volgu vatni, geri og hunangi saman í skál. 
2. Leggið viskastykki yfir skálina og leyfið gerinu að leysast upp í rólegheitum, eða í 7-10 mínútur. Um leið og það byrjar að freyða í skálinni er gerblandan tilbúin. 
3. Hellið gerblöndunni í hrærivélaskál og bætið öllum hráefnum saman við, það er góð regla að bæta hveitinu smám saman við.  Það gæti þurft minna en meira af hveitinu.
4. Látið hnoðast í vélinni í 6 – 10 mínútur eða þar til deigið er orðið í laginu eins og kúla, einnig á það ekki að vera klístrað. 
5. Setjið viskastykki yfir hrærivélaskálina og leyfið deiginu að hefast í klukkustund eða þar til þar hefur tvöfaldast að stærð.
6. Fletjið deigið út, þetta deig dugar í tvær pizzur.
7. Hitið smávegis af olíu á pönnu, passið að pannan sé mjög heit þegar þið setjið deigið á pönnuna. 
8. Steikið pizzabotninn á pönnunni í nokkrar mínútur eða þar til botninn er orðinn stökkur, bætið þá kjúklingnum ofan á og sáldrið ferskum mozzarella osti yfir. 
9. Bakið í ofni við 200°C í 5 - 7 mínútur eða þar til osturinn er gullinbrúnn.

Fylling

• 1 dós sýrður rjómi 
• 1 Jalepeno ostur
• 1 hvítlauksrif
• Salt og nýmalaður pipar
• 200 g sveppir steiktir upp úr smjöri og hvítlauk
• Hægeldaðir tómatar
• Smátt söxuð steinselja

Aðferð:

1. Fletjið út pizzadeigið og leggið á pappírsklædda ofnplötu. 
2. Rífið niður jalepeno ostinn og hrærið saman við sýrða rjómann, pressið hvítlauksrifið og blandið saman við. Kryddið til með salti og pipar. Smyrjið ostablöndunni á botninn.
3. Steikið sveppina upp úr smjöri og pressið eitt hvítlauksrif út í pottinn, þerrið sveppina vel áður en þið setjið þá á pizzuna.
4. Bakið við 220°C í 10 - 12 mínútur. Ofnar eru auðvitað misjafnir og það gæti verið að þið þurfið að baka hana lengur en pizzan er klár þegarr hún er gullinbrún. Það er mjög gott að setja hægeldaða tómata og smátt saxaða steinselju yfir pizzuna í lokin.  

Missið ekki af Matargleði Evu öll fimmtudagskvöld klukkan 19:15 á Stöð 2. 

Njótið vel. 

xxx

Eva Laufey Kjaran Hermannsdóttir 

Öll hráefni se

Klístruð og ómótstæðileg rif

Klístruð og ómótstæðileg rif 

Svínarif

• 1 tsk Bezt á allt kryddblanda
• 1 tsk paprika
• 1 tsk cumin krydd
• 1 tsk kanill
• 1 dl Hoisin sósa
• 1 dl Soya sósa
• 1 msk hunang
• Salt og pipar
• ½ rautt chili
• 1 stilkur vorlaukur
• 1 hvítlauksrif
• 1 msk fersk nýrifið engifer
• 1 dl púðursykur

Aðferð: 

1. Saxið chili og vorlauk, blandið öllum hráefnum saman í skál og leggið svínarif í form. 
2. Hellið sósunni yfir og geymið í kæli. Best er að leyfa kjötinu að liggja í sósunni í nokkrar klukkustundir. 
3. Pakkið kjötinu inn í álpappír og bakið við 110°C í 2,5-3 klukkustundir. Eftir þann tíma stillið þið ofninn á grillhita og opnið álpappírinn, steikið kjötið á þeim hita í 10-15 mínútur.
4. Dreifið ristuðum sesamfræin yfir kjötið áður en þið berið það fram.

Ferskt hrásalat

• ½ höfuð rauðkál
• ½ höfuð hvítkál
• ½ rautt chili aldin
• 2 stilkar vorlaukur
• Safi úr hálfri límónu
• Safi úr hálfri appelsínu
• Handfylli kóríander
• Salt

 Aðferð:

1. Skerið grænmetið smátt og blandið saman í skál. 
2. Kreistið safann úr límónu og appelsínu yfir salatið og kryddið til með salti og pipar. Gott er að leyfa salatinu að standa í hálftíma í kæli áður en þið berið það fram. 

Njótið vel.

Missið ekki af Matargleði Evu öll fimmtudagskvöld á Stöð 2.

Öll hráefni í þessa uppskrift fást í verslunum Hagkaups.

Páskalambið, fylltur hryggur með ofnbökuðum kartöflum og soðsósu

Fylltur lambahryggur með sólkysstum tómötum, furuhnetum, ólífumauki, steinselju og sítrónuberki er afar ljúffeng steik sem passar einstaklega vel á veisluborðið um páskana. Með hryggnum er gott að hafa ofnbakaðar kartöflur í andafitu og auðvitað góða soðsósu, fullkomið fyrir þá sem vilja nostra aðeins við matargerðina og njóta í botn. Í þætti kvöldsins sýndi ég áhorfendum þessa einföldu og bragðmiklu uppskrift sem ég hvet ykkur til að prófa um páskana. 

Fylltur lambahryggur með tómat-og furuhnetupestói

Fyrir 4-6

1 lambahryggur ca. 2,5 kg, úrbeinaður 

Fylling:

• 1 krukka sólkysstir tómatar 
• 3 msk ólífutapende 
• 70 g ristaðar furuhnetur
• ½ laukur 
• 2 hvítlauksrif 
• 1 msk fersk steinselja 
• Salt og nýmalaður pipar
• 1 msk jómfrúarolía
• Börkur af hálfri sítrónu 
• 2 tsk smátt saxað rósmarín
• ½ L vatn  

Grænmeti:

• 2 laukar 
• 4 hvítlaukar, heilir
• 4-6 gulrætur 

Aðferð:

1. Látið kjötborðið úrbeina lambahrygginn.
2. Setjið öll hráefnin sem eiga að fara i fyllinguna í matvinnsluvél og maukið vel. 
3. Setjið fyllingunni á milli hryggjarvöðvanna og leggið lundirnar þar ofan á. 
4. Mótið rúllu og vefjið seglgarni utan um rúlluna og kryddið hryggginn með salti, pipar, sítrónuberki. Saxið einnig niður ferskt rósmarín og sáldrið yfir. 
5. Skerið grænmetið í grófa bita og leggið í eldfast mót, setjið lambahrygginn yfir og hellið hálfum líter af soðnu vatni í fatið og inn í ofn við 180°c í 45-50 mínútur. Þegar 15 mínútur eru eftir af eldunartímanum er ágætt að hækka hitann í 200-210°C. 
6. Leyfið kjötinu að hvíla í 10 mínútur áður en þið skerið það og berið fram, hellið soðinu frá og geymið fyrir sósugerð. 

Ofnbakaðar kartöflur í andafitu

• 10-15 kartöflur að eigin vali
• 2-3 msk andafita
• 4 - 5 hvítlauksrif 
• 3-4 rósmaríngreinar 

Aðferð: 

1. Afhýðið kartöflurnar og sjóðið í vel söltu vatni í 10 mínútur. Eftir þann tíma takið þær upp úr pottinum og leggið í eldfast mót.
2. Skerið niður hvítlauksrif og saxið ferskt rósmarín. Setjið 2 msk af andafitu í formið og veltið kartöflunum upp úr fitunni. 
3. Kryddið til með salti og pipar. Bakið í ofni við 180°C 30 - 35  mínútur eða þar til kartöflurnar eru gullinbrúnar, það er gott ráð að snúa þeim við endrum og eins.  

Soðsósa

• 300-400 ml soð 
• ½ nautakraftsteningur 
• Salt og pipar 
• 500 ml rjómi
• 2 tsk hveiti 
• 1 msk olía 

Aðferð:

1. Sigtið soðið í pott og blandið nautakrafstening og rjóma saman við.
2. Kryddið til með salti og pipar. Leyfið sósunni að ná suðu og hrærið vel í á meðan. 
3. Blandið saman í skál hveiti og olíu og þykkið sósuna með hveitblöndunni. 
4. Berið strax fram með kjötinu.

Missið ekki af Matargleði Evu öll fimmtudagskvöld á Stöð 2 klukkan 19:25. 

xxx

Eva Laufey Kjaran Hermannsdóttir

Öll hráefni í þessa uppskrift fást í verslunum Hagkaups.