Frönsk súkkulaðikaka með silkimjúkri karamellusósu

Vikan flaug hratt og örugglega, ég sinnti blogginu mjög lítið í vikunni en ég var að klára misserisverkefni í skólanum sem átti hug minn allan. Ég og hópurinn minn rannsökuðum hvernig íslensk fyrirtæki nota Snapchat í sínu markaðsstarfi, virkilega áhugaverð rannsókn að okkar mati og höfðum við gaman af því að vinna hana (á köflum langaði okkur líka til þess að gefast upp, haha).

Helgarfríið hefur þess vegna verið einstaklega ljúft, að hafa ekki stórt verkefni hangandi yfir sér er býsna gott og gaman að geta verið með fjölskyldunni. Ég ætla líka að baka þessa köku hér sem ég gjörsamlega elska og ég veit að fólkið mitt gerir það líka. Það kannast nú flestir við uppskriftina að frönsku súkkulaðikökunni sem er bæði einföld og hriklega góð, en prófið hana endilega með þessari karamellusósu sem bráðnar í munni... berið kökuna fram með ferskum hindberjum en þau fara einstaklega vel saman með súkkulaði. 

Frönsk súkkulaðikaka með karamellusósu

Botn:

• 200 g sykur
• 4 egg
• 200 g suðusúkkulaði
• 200 g smjör
• 1 dl KORNAX hveiti

Aðferð:

1. Hitið ofninn í 180°C (blástur). 
2. Þeytið sykur og egg saman þar til blandan verður létt og ljós. 
3. Bræðið saman smjör og súkkulaði við vægan hita. 
4. Blandið hveitinu saman við eggjablönduna, sumir vilja sleppa hveitinu en þá verður kakan sérstaklega blaut. Bætið súkkulaðiblöndunni varlega saman við í lokin. 
5. Smyrjið bökunarfom eða setjið (eins og mér þykir best) bökunarpappír í botninn á forminu og hellið deiginu í formið. 
6. Bakið kökuna í 30 mínútur.  

Ljúffeng karamellusósu 

• 1 poki Góa kúlur 
• 1 dl rjómi 

Aðferð:

1. Setjið kúlurnar og rjóma í pott, bræðið kúlurnar í rjómanum við vægan hita. Hrærið í sósunni þar til hún verður silkimjúk. Kælið áður en þið hellið sósunni yfir kökuna. 

Skreytið kökuna gjarnan með ferskum hindberjum og berið strax fram. 

Ég vona að þið eigið góðan sunnudag framundan kæru vinir. 

Njótið vel. 

xxx

Eva Laufey Kjaran Hermannsdóttir

Hráefnin í þessa uppskrift fást í verslunum Hagkaups.

Súkkulaðikaka með Frosting kremi

 Súkkulaðibotnar

3 bollar hveiti (Amerísk mæling, 1 bolli = 2,4 dl)
2 bollar sykur
3 egg
2 bollar AB mjólk
1 bolli bragðdauf olía
5 msk kakó
2 tsk lyftiduft
1 tsk matarsódi
2 tsk vanilludropar eða sykur

Aðferð:

Blandið öllum hráefnum saman í skál, hrærið í nokkrar mínútur eða þar til deigið verður slétt og fínt. Hellið deiginu í smurð bökunarform og bakið við 180°C í 25 - 30 mínútur. Það er gott ráð að stinga hníf í kökuna eftir 25 mínútur og ef hnífurinn kemur hreinn upp úr er kakan klár en annars þarf hún lengri tíma. Ofnar eru auðvitað eins misjafnir eins og þeir eru margir.

Það er mikilvægt að leyfa kökunni að kólna alveg áður en hún er skreytt með kreminu.

Vanillu Frosting

4 eggjahvítur

2 1/2 dl sykur

1 tsk vanillusykur

Aðferð: Þeytið eggjahvítur og sykur saman þar til froða fer að myndast. Færið skálina, setjið yfir sjóðandi vatn og hrærið þar til blandan byrjar að þykkna og hitna. Takið þá skálina frá vatninu og hrærið áfram í hrærivélinni, bætið vanillu saman við á því stigi. Hrærið áfram þar til kremið kólnar og verður orðið stíft. (Alveg eins og með marengs, þið eigið að geta hvolft skálinni án þess að kremið hreyfist) Ég setti nokkra dropa af gulum matarlit út í kremið í lokin, mér finnst gel matarlitirnir frá Wilton lang bestir. Mæli með þeim. 

 Ég vona að þið eigið frábæra páska með fjölskyldu og vinum. 

xxx

Eva Laufey Kjaran Hermannsdóttir

Öll hráefni sem notuð eru í þessa uppskrift fást í verslunum Hagkaups. 

Skúffukakan sem allir elska

Þetta er litli gríslingurinn minn á öskudaginn, hún Ingibjörg Rósa var svo dásamleg í þessum kjól með þessi krúttlegu eyru að mamman átti ekki orð. Þessa dagana eru grísir í miklu uppáhaldi og búningurinn vakti mikla lukku hjá dömunni minni. Hún er orðin eins og hálfs árs og gleður alla í kringum sig á hverjum degi, við Haddi erum einstaklega heppin. Á morgun byrjar hún svo í leikskóla sem verður ekkert smá skemmtilegt, að vísu finnst mér tíminn alltof fljótur að líða og ég finn að maður þarf svo sannarlega að njóta stundarinnar núna. 

Að því sögðu langar mig að deila með ykkur uppskrift að æðislegri súkkulaðiköku sem allir elska, einföld skúffukaka sem tekur enga stund að búa til og tilvalið að baka í dag á sjálfum valentínusardeginum. Ég hef gaman af öllum dögum sem minna okkur á að veita fólkinu okkar sérstaka athygli. Það er brjálað að gera hjá öllum á hverjum degi og stundum gleymast einfaldir hlutir eins og bara það að vera til með fólkinu okkar núna, þá er ég að meina að slökkva á tölvu, síma og sjónvarpi og setjast við borðstofuborðið og fá sér köku. Ég vona svo sannarlega að þið eigið eftir að eiga góðan dag, veðrið er æði og ég vildi gjarnan eyða deginum með fólkinu mínu en ég er að fara í hagfræði lokapróf á morgun og mun þess vegna eyða honum innandyra við lestur. 

Skúffukakan sem allir elska 

*1 bolli = 2 1/2 dl

• 3 bollar Kornax hveiti
• 2 bollar sykur
• 3 egg       
• 2 bollar hreint jógúrt 
• 1 bolli ljós og bragðlítið olía
• 5 msk kakó 
• 2 tsk lyftiduft 
• 1 tsk matarsódi
• 2 tsk vanillusykur eða dropar 

Aðferð: Hitið ofninn í 180°C (blástur). Blandið öllum hráefnum saman og hrærið í nokkrar mínútur eða þar til deigið er orðið silkimjúkt. Smyrjið ofnskúffu og hellið deiginu í skúffuna. Bakið við180°C í 20 - 25 mínútur. Tíminn fer auðvitað eftir ofnum, eins og alltaf. Gott er að athuga baksturinn með því að stinga prjóni í kökuna, prjóninn á að koma hreinn út og þá er kakan klár. Leyfið kökunni að kólna áður en þið setjið á hana kremið. 

Krem 

• 200 g suðusúkkulaði
• 100 g smarties súkkulaði (eða annað gott, þetta var það súkkulaði sem ég átti til)
• 40 g smjör 

Kókosmjöl til skrauts 

Aðferð: Bræðið súkkulaði og smjör saman við vægan hita, hellið yfir kökuna og sáldrið síðan kókosmjöli yfir. Skerið kökuna í litla bita og berið fram. 

Njótið vel. 

xxx

Eva Laufey Kjaran Hermannsdóttir

Öll hráefni í þessa uppskrift fást í verslunum Hagkaups.

Mjúk súkkulaðikaka með fljótandi karamellusósu

Í gærkvöldi fór fram landssöfnun Samhjálpar til uppbyggingar á meðferðarheimilis í Hlaðgerðarkoti. Söfnunin gekk frábærlega og við söfnuðum rúmlega 80 milljónum sem er algjörlega frábært, það var svo gaman að fá að taka þátt í söfnuninni en við Ásgeir Erlendsson vorum í símaverinu með fullt af skemmtilegu fólki. Ég var svo sátt og sæl þegar ég vaknaði í morgun að ég varð að baka eina gómsæta köku. Mig langaði auðvitað í súkkulaðiköku og ég átti til ljúffenga karamellusósu sem passaði fullkomnlega með súkkulaðinu. Úr varð sænsk kladdkaka með þykkri karamellusósu. Þið ættuð að skella í þessa köku sem allra fyrst, lofa að þið eigið eftir að elska þessa. 

Mjúk súkkulaðikaka með fljótandi karamellusósu

• 150 g smjör 
• 2 Brúnegg 
• 2 dl sykur 
• 3 dl Kornax hveiti 
• 1 tsk lyftiduft 
• 2 tsk vanilla extract (eða dropar/sykur)
• 4 msk kakó 
• Ögn af salti 
• 3 - 4 msk Dulce de leche karamellusósa 

Aðferð:

1. Hitið ofninn í 180°C. 
2. Bræðið smjör við vægan hita. 
3. Þeytið saman egg og sykur þar til blandan verður létt og ljós. 
4. Blandið þurrefnum saman og blandið varlega saman við eggjablönduna með sleif. 
5. Hellið smjörinu og vanillu saman við og hrærið með sleif, saltið smávegis. 
6. Smyrjið form og hellið deiginu í formið. 
7. Setjið karamellusósuna yfir deigið.
8. Bakið við 180°C í 18 - 20 mínútur, kakan á að vera svolítið blaut. 
9. Kælið á meðan þið útbúið kremið. 

Súkkulaðikremi með karamellusósu 

• 70 g smjör 
• 120 g suðusúkkulaði
• 2 msk síróp
• smávegis af salti 
• 2 msk Dulce de leche

Aðferð: 

1. Brjótið súkkulaðið og bræðið saman við smjörið við vægan hita, ekki fara frá pottinum. Það er mjög auðvelt að brenna þessa góðu sósu. 
2. Bætið sírópinu og karamellusósunni við í lokin, hrærið saman og hellið yfir kökuna. 

Berið kökuna fram með flórsykri og þeyttum rjóma, ég lofa ykkur því að kakan mun slá í gegn. 

Njótið vel. 

xxx

Eva Laufey Kjaran Hermannsdóttir 

Öll hráefnin sem notuð eru í þessa uppskrift fást í verslunum Hagkaups. 

Brúðkaupsterta

Anna Margrét vinkona mín giftist unnusta sínum honum Einari um síðustu helgi og fékk ég þann heiður að baka brúðkaupstertuna. Þetta er í annað sinn sem ég baka brúðkaupstertu en ég hef áður bakað fyrir systur mína. Mikil ósköp finnst mér þetta skemmtilegt og auðvitað pínu stressandi á sama tíma þ.e.a.s. vegna þess að ég vill auðvitað senda frá mér eins góða köku og möguleiki er á. Ég ákvað að baka góða súkkulaðiköku og skreyta hana með hvítu súkkulaðikremi, það er ávísun á glaða gesti. Undanfarið hef ég verið með æði fyrir blómaskreytingum og marengsskrauti, og útkoman var eins og þið sjáið á myndinni fyrir ofan. Falleg blóm setja ótrúlega fallegan svip á kökuna.

Súkkulaðibotnar 

Ég geri þessa súkkulaðibotna mjög oft og ég er alltaf jafn ánægð, þeir eru fremur dökkir og lyfta sér mjög vel. Fékk þessa uppskrift hjá Eddu systur minni fyrir nokkrum árum. 

Þetta er tvöföld uppskrift og miðast við fjögur jafn stór form (best er að gera hana í tveimur pörtum en þið sjáið hér að neðan hvaða og hversu mikið af hráefni þið þurfið) 

6 bollar Kornax hveiti (Amerísk mæling, 1 bolli = 2,4 dl)
4 bollar sykur
6 Brúnegg
4 bollar AB mjólk
2 bollar bragðdauf olía
10 msk kakó
4 tsk lyftiduft
2 tsk matarsódi
4 tsk vanilludropar eða sykur

Aðferð:

Blandið öllum hráefnum saman í skál, hrærið í nokkrar mínútur eða þar til deigið verður slétt og fínt. Hellið deiginu í smurð bökunarform og bakið við 180°C í 25 - 30 mínútur. Það er gott ráð að stinga hníf í kökuna eftir 25 mínútur og ef hnífurinn kemur hreinn upp úr er kakan klár en annars þarf hún lengri tíma. Ofnar eru auðvitað eins misjafnir eins og þeir eru margir.

Það er mikilvægt að leyfa kökunni að kólna alveg áður en hún er skreytt með kreminu.

Hvítt súkkulaðikrem

600 g smjör (mikilvægt að nota smjör en ekki smjörlíki) 

2 pk. flórsykur (hver pakki er 500 g) 

4 msk rjómi 

2 msk vanilla extract eða sykur 

400 g hvítt súkkulaði, brætt

Aðferð:

1. Þeytið smjörið í smá stund eða þar til það er orðið mjúkt og fínt. 

2. Bætið flórsykrinum saman við og tveimur matskeiðum af rjóma, þeytið mjög vel og stoppið að minnsta kosti tvisvar og skafið meðfram hliðum og haldið áfram að þeyta. 

3. Eftir nokkrar mínútur bætið þið vanillu saman við og hvíta súkkulaðinu sem þið bræðið yfir vatnsbaði. Þeytið áfram þar til kremið verður silkimjúkt og fallega hvítt. 

Eins og þið sjáið hér að ofan þá er þetta fremur stór uppskrift að kremi svo það er best að gera hana í tvennu lagi, en ég geri það sama og með kökuna hér að ofan ég tel upp þau hráefni og hversu mikið þið þurfið af þeim svo þið vitið nákvæmlega hvað þarf í kökuna. 

Smyrjið kreminu á milli botnanna og skreytið hana síðan með kreminu. Eins og þið sjáið þá er einn hlutinn aðeins minni en ég einfaldlega skar meðfram kökunni og þannig varð hún minni, sumir eiga form sem eru minni og þá er tilvalið að nota þau. Best er að skreyta kökurnar í sitthvoru lagi og leggja síðan minni hlutann ofan á þann stærri. Skreytið svo kökuna gjarnan með fallegum blómum og marengshnöppum. 

Ég var afar ánægð með útkomuna og brúðhjónin voru það sem betur fer líka, sem var nú fyrir öllu. 

Brúðkaupið þeirra var dásamlegt og ég hef sjaldan skemmt mér eins vel. 

Ég vona að þið njótið vel og sjáið hvað það er einfalt að setja saman fallega brúðartertu.

xxx

Eva Laufey Kjaran Hermannsdóttir

Allt hráefni sem notað er í þessa uppskrift fæst í verslunum Hagkaups

Ómótstæðilegur skyr eftirréttur með súkkulaðiköku og hindberjum

Sumarið hefur flogið áfram og það er óhætt að segja að það hafi verið dásamlegt, ég hef notið þess að vera í sumarfríi með Hadda og Ingibjörgu Rósu. Að vísu gátum við Haddi ekki tekið mikið frí saman, þurfum auðvitað að púsla þessu eins og annað fjölskyldufólk. Engu að síður höfum við náð að bralla margt skemmtilegt saman og ég mætti endurnærð til vinnu í morgun full tilhlökkunar varðandi haustið. Ég bakaði mjög mikið í fríinu og fyrr í sumar útbjó ég þennan ómótstæðilega eftirrétt sem þið ættuð að prófa. Skyrkökur og súkkulaðikökur eru gómsætar, þið getið þess vegna ímyndað ykkur þegar þessar tvær koma saman... brjálæðislega gott og einfalt. 

Eftirréttur með súkkulaðiköku og berjaskyri. 

100 smjör, brætt

2 Brúnegg

2,5 dl sykur

1,5 dl Kornax hveiti

2 tsk vanillusykur

3 msk gott kakó

½ tsk salt

Aðferð: Hitið ofninn í 175°C (blástur). Bræðið smjör í potti við vægan hita. Þeytið saman sykur og egg í smá stund eða þar til blandan verður létt og ljós. Blandið hinum hráefnunum saman við og hrærið í smá stund eða þar til deigið verður silkimjúkt. Smyrjið bökunarform (mér finnst best að nota smelluform en þá er mikið þægilegra að ná kökunni úr forminu).  Hellið deiginu í formið og bakið við 175°C í 20 mínútur. Kælið kökuna og skerið í litla munnbita.

*Formið sem ég nota er 20cm að stærð.

*Mér finnst best að baka þennan botn við blástur en ef þið notið yfir-og undirhita þá þurfið þið að hafa hærri hita t.d. 200°C.

Skyrkakan

• 400 g hindberjaskyr t.d. frá KEA (það er líka hægt að nota blandað berjaskyr)
• 200 ml rjómi, þeyttur
• 3 msk flórsykur
• 1 tsk vanilla extract eða sykur
• 6 – 8 fersk hindber

Aðferð: 

1.  Hrærið skyrinu, flórsykrinum, vanillu og ferskum hindberjum saman í skál. Þegar það hefur blandast vel saman þá bætið þið þeytta rjómanum saman við.
2.  Setjið eftirréttinn gjarnan saman í háu glasi eða í fallegri skál. Rífið niður hvítt súkkulaði í lokin og skreytið með ferskum hindberjum.

Algjört augnakonfekt og ljúffengur á bragðið. 

xxx

Eva Laufey Kjaran Hermannsdóttir

Allt hráefni sem notað er í þessa uppskrift fæst í verslunum Hagkaups.

Himnesk súkkulaðikaka

Kladdkaka er sænsk að uppruna og nýtur mikilla vinsælda, það má líkja henni við franska súkkulaðiköku. Stökk að utan en mjúk að innan. Í gærkvöldi sofnaði ég út frá hugsunum um girnilegar súkkulaðikökur og þegar ég vaknaði í morgun klukkan sex með dóttur minni þá var það mitt fyrsta verk að baka kökuna sem ég hafði í huga. Sænsk kladdakaka með súkkulaðimús, já hún er jafn góð og hún hljómar. Í fyrstu var ég hrædd um að hún yrði kannski svolítið þung en svo var ekki, ef þið elskið súkkulaði og langar í eitthvað gott í dag þá er þetta kakan. Það góða við þessa köku að það þarf ekki mörg hráefni og flest eigum við þau inn í skáp nú þegar.

Ingibjörg Rósa dundaði sér á meðan móðirin bakaði þennan sunnudagsmorguninn. 

Sænsk kladdkaka, súkkulaðibotninn.

100 smjör, brætt

2 Brúnegg

2,5 dl sykur

1,5 dl Kornax hveiti

2 tsk vanillusykur

3 msk gott kakó

½ tsk salt

Aðferð: Hitið ofninn í 175°C (blástur). Bræðið smjör í potti við vægan hita. Þeytið saman sykur og egg í smá stund eða þar til blandan verður létt og ljós. Blandið hinum hráefnunum saman við og hrærið í smá stund eða þar til deigið verður silkimjúkt. Smyrjið bökunarform (mér finnst best að nota smelluform en þá er mikið þægilegra að ná kökunni úr forminu).  Hellið deiginu í formið og bakið við 175°C í 20 mínútur. Kælið kökuna mjög vel áður en þið takið hana upp úr forminu og bætið súkkulaðimúsina ofan á botninn.

*Formið sem ég nota er 20cm að stærð.

*Mér finnst best að baka þennan botn við blástur en ef þið notið yfir-og undirhita þá þurfið þið að hafa hærri hita t.d. 200°C.

Himnesk súkkulaðimús

25 g smjör

150 g súkkulaði

3 Brúnegg, aðskilinn

2 msk sykur

2,5 dl rjómi

Aðferð: Bræðið smjör og súkkulaði við vægan hita í potti, þegar súkkulaðið er bráðnað hellið því í skál og leyfið að kólna. Þeytið rjóma og leggið til hliðar. Stífþeytið eggjahvítur, um leið og það byrjar að freyða í eggjahvítunum bætið þið sykrinum smám saman við. Eggjahvíturnar eru tilbúnar þegar þær eru stífar og þið getið hvolft skálinni án þess að þær hreyfast.

Blandið eggjarauðum saman við súkkulaðið, það er mjög mikilvægt að súkkulaðið sé kalt (annars gæti þetta orði að súkkulaði-eggjahræru). Blandið súkkulaði-eggja blöndunni út í marensinn og blandið rólega saman með sleif. Í lokin blandið þið rjómanum saman við með sleif.

Þá er súkkulaðimúsin klár. 

 Næsta skref er að taka súkkulaðibotninn upp úr forminu, setjið plast filmu yfir formið og setjið botninn aftur í. Hellið súkkulaðimúsinni yfir og geymið í kæli í lágmark 3 klukkustundir, best yfir nótt. Ég er alltaf að flýta mér og hafði ekki tíma né þolinmæði til að bíða svo ég notaði tvær matarlímsplötur sem ég leysti upp í heitu vatni og bætti þeim út í súkkulaðimúsina. Þess þarf að sjálfsögðu ekki en ef kakan á að vera stíf og fín þá er það vissulega betra. 

Þessi kaka er ómótstæðilega góð og sérstalega með ferskum jarðarberjum, ég ætla að bjóða upp á þessa köku í kvöld sem eftirrétt en hún mamma er búin að bjóða okkur í humarsúpuna sína sem er alltaf svo góð, ég þarf endilega að koma þeirri uppskrift hingað inn á bloggið.

Fallegi diskurinn sem þið sjáið á myndinni er frá cupcompany.is.

Ég vona að þið njótið vel og eigið góðan sunnudag framundan.

xxx

Eva Laufey Kjaran Hermannsdóttir