Geggjað kjúklingapasta með heimagerðu pestó

Ég átti frábæra helgi með fólkinu mínu, en helgin byrjaði á vinkonudekri á Hótel Grímsborgum sem var algjört æði og ég ætla að segja ykkur betur frá því í vikunni. Svo fórum við fjölskyldan á Akranes og skutluðumst síðan á Hvolsvöll. Það var svo gott að komast aðeins í sveitina, leika við Ingibjörgu Rósu og almennt njóta. Allavega á milli þess sem ég vann í lokaritgerðinni sem ég og hópurinn minn skiluðum af okkur í gær og á morgun verjum við ritgerðina og þá er komin smá skólapása. Ekki nema einn áfangi eftir og því sé ég glytta í sumarfrí í skólanum... sem verður kærkomið.

Þetta var semsagt mjög góð helgi og ég vona að þið hafið öll notið hennar. Nú er hins vegar komin ný vika og tími til kominn að deila með ykkur einfaldri uppskrift sem tekur enga stund að búa til. Þessi uppskrift er að mínu mati eftirlæti allra og svo einföld að þið eigið ekki eftir að trúa því. Ég byrja á því að deila uppskriftinni að pestóinu sem er algjör snilld og hægt að borða með nánast öllu, sérstaklega gott í pastarétti eins og í þessa hér fyrir neðan. Ég sýndi einnig aðferðina á Instagram reikningnum mínum en þið finnið mig þar undir @evalaufeykjaran - sem og á Snapchat. 

Gómsætt basilíkupestó með límónu

Einföld matreiðsla 

Tími frá upphafi til enda : 25 mínútur 

• Handfylli fersk basilíka 
• Handfylli spínat
• 100 g ristaðar kasjúhnetur 
• 50 g ferskur parmesan ostur 
• Safinn úr hálfri límónu 
• Salt og pipar, magn eftir smekk 
• 1-2 dl ólífuolía, magn eftir smekk 

Aðferð: 

1. Setjið öll hráefnin í matvinnsluvél eða maukið með töfrasprota. Þið stjórnið þykktinni á pestónu með ólífuolíunni. Berið strax fram og njótið. 

Kjúklingapasta með heimagerðu pestó 

• 300 g penne heilhveiti pasta 
• 2 kjúklingabringur
• 1 askja kirsuberjatómatar 
• 1/2 kúrbítur 
• 3 hvítlauksrif 
• Ólífuolía 
• Kjúklingakrydd
• Salt og pipar 
• 1 poki litlar Mozzarella kúlur (eða ein stór) 

Aðferð:

1. Steikið kjúklingabringurnar á hvorri  hlið í 2 mínútur, kryddið til með kjúklingakryddi, salti og pipar. Setjið bringurnar í eldfast mót, skerið niður kirsuberjatómata, kúrbít og hvítlauk og bætið í formið með bringunum. Eldið bringurnar og grænmetið í ofni við 180°C í 20 mínútur. 
2. Sjóðið pasta upp úr söltu vatni samkvæmt leiðbeiningum á pakkanum.
3. Útbúið pestó, uppskriftin er hér að ofan. 
4. Skerið kjúklingabringurnar í litla bita og blandið öllum hráefnum saman í skál. 
5. Í lokin skerið þið litlar mozzarella kúlur í tvennt og bætið við. 

Berið strax fram og njótið vel. 

Ingibjörg Rósa var alsæl með réttinn og hvetur að sjálfsögðu alla til þess að prófa. 

Njótið vel. 

xxx

Eva Laufey Kjaran Hermannsdóttir 

Öll hráefnin í þessa uppskrift fást í verslunum Hagkaups.

Vikuseðill

Mánudagsfiskurinn: Æðisleg bleikja í teriyaki sósu með fetaosti. Þessi réttur er afskaplega einfaldur og fljótlegur sem er alltaf mikill plús á þreyttum mánudegi. 

Þriðjudagur: Æðisleg rif með asískum blæ. Þetta er rétturinn sem setningin "eitt sinni smakkað, þú getur ekki hætt" á vel við. 

Miðvikudagur: Mexíkóskt kjúklingasalat með mexíkó-ostasósu og Doritos.

Fimmtudagur: Á uppstigningardaginn ætla ég að elda fyllt cannelloni með spínati og nóg af osti... algjört sælgæti. 

Föstudagur: Á mínu heimili er hefð fyrir pizzaáti á föstudögum og ætla ég að gera þessa ómótstæðilegu bbq pönnupizzu sem er borin fram með klettasalati, tómötum og nýrifnum parmsesan. 

Helgarmaturinn: Um helgina ætla ég að elda uppáhalds súpuna mína en það er humarsúpan hennar mömmu sem ég elska og elda við sérstök tilefni. 

Helgarbaksturinn

Hér koma tvær hugmyndir að helgarbakstrinum annars vegar ljúffeng marensterta með karamellukremi og hins vegar dúnmjúkar morgunverðarbollur sem allir ættu að prófa.

Marensterta með kókosbollurjóma og karamellukremi.

Kotasælubollur og bráðhollt túnfiskssalat.

Ég vona að þið eigið góða viku framundan.

xxx

Eva Laufey Kjaran Hermannsdóttir

Öll hráefnin í þessar uppskriftir fást í verslunum Hagkaupsþ

Spínat- og ostafyllt pasta sem bráðnar í munni

Ef ég ætti að velja minn uppáhalds pastarétt þá væri það án efa þessa hér, hann sameinar allt það sem mér þykir gott. Pasta, nóg af osti, góða sósu og spínat. Mjög djúsí og góður réttur sem þið ættuð endilega að prófa. 

Cannelloni

fyrir þrjá til fjóra

•      Ólífuolía
•      1 laukur 
•      3 hvítlauksrif 
•      2 dósir hakkaðir tómatar 
•      Salt og nýmalaður pipar 
•      Handfylli basilíka 
•      1 lárviðarlauf
•      ½ kjúklingateningur
•      500 g spínat
•      ½ tsk múskat 
•      Börkur af hálfri sítrónu 
•      500 g kotasæla 
•      1 egg 
•      4 msk nýrifinn parmesan ostur
•      200 g cannelloni pasta 
•      150 mozzarella ostur 
•      Rifinn ostur 

Aðferð:

1. Stillið ofninn í 180°C. Steikið spínatið upp úr ólífuolíu á pönnu við vægan hita, þegar spínatið er orðið mjög mjúkt færið það yfir skurðbrettið og saxið mjög smátt.
2. Hitið ólífuolíu í potti og steikið smátt saxaðan lauk þar til hann verður glær og mjúkur í gegn, pressið hvítlauksrif og bætið út í pottinn ásamt hökkuðum tómötum, lárviðarlaufi og hálfum kjúklingatening. Kryddið til með salti og pipar og leyfið sósunni að malla í nokkrar mínútur við vægan hita.
3. Í skál blandið saman söxuðu spínati, kotasælu, eggi, parmesan osti, nýrifnu múskati, salti, pipar og basilíkulaufum
4. Fyllið cannelloni pastarörin með ljúffengu ostafyllingunni, gott er að nota sprautupoka en annars má fylla rörin með skeiðum. 
5. Setjið sósu í eldfast mót og raðið pastarörum yfir. Hellið sósunni yfir og dreifið vel af rifnum osti og ferskum mozzarella yfir. Í lokin er gott að rífa vel af parmesan yfir.
6. Bakið við 180°C í 30-35 mínútur. Ef osturinn er orðinn mjög brúnn of fljótt er gott ráð að leggja bökunarappír yfir. 
7.  Berið fram með fersku salati.

Njótið vel. 

Missið ekki af Matargleði Evu öll fimmtudagskvöld klukkan 19:25 á Stöð 2. 

Öll hráefni í þessa uppskrift fást í verslunum Hagkaups. 

Rjómalagað kjúklingapasta úr Matargleði Evu

Í þætti kvöldsins var sérstakt pasta þema og eldaði ég nokkra af mínum eftirlætis pastaréttum. Ég lagði mikla áherslu á einfalda rétti sem allir geta leikið eftir og tekur ekki langa stund að búa til. Þessi lúxus kjúklingapastaréttur er til dæmis einn af þeim og hann er svo góður að þið verðið að prófa hann. Ég mæli að minnsta kosti hiklaust með honum um helgina. Kjúklingur, beikon, pasta og rjómi saman í eitt. Orð eru óþörf :)

Rjómalagað kjúklingapasta með beikoni og kryddjurtum

Fyrir 3 - 4 manns. 

• 2 msk ólífuolía
• 4 kjúklingabringur
• 200 g gott beikon
• 8 - 10 sveppir, skornir
• 2 msk fersk steinselja, smátt söxuð
• 2 msk ferskt timjan, smátt saxað
• 1/2 kjúklingateningur
• 350 ml matreiðslurjómi 
• salt og pipar eftir smekk
• 300 g tagliatelle pasta 

Aðferð:

1. Hitið ólífuolíu á pönnu og steikið kjúklingabringurnar í 1 - 2 mínútur á hvorri hlið, kryddið til með salti og pipar. Setjið bringurnar í eldfast mót og leggið þær til hliðar. 
2. Steikið sveppi og beikon upp úr olíu þar til beikonið verður stökkt. 
3. Saxið niður ferskar kryddjurtir og bætið þeim út á pönnunni, hellið rjómanum einnig út á pönnuna og bætið hálfum kjúklingatening saman við. Leyfið sósunni að malla í 2 - 3 mínútur. Kryddið til með salt og pipar. 
4. Hellið sósunni yfir kjúklinginn og inn í ofn við 180°C í 30 - 35 mínútur.
5. Sjóðið pasta samkvæmt leiðbeiningum á pakkanum.
6. Setjið pasta á disk og kjúklinginn yfir ásamt sósunni, dreifið gjarnan ferskri steinselju yfir í lokin. 

Njótið vel. 

Missið ekki af Matargleðinni öll fimmtudagskvöld klukkan19:25 á Stöð 2. 

xxx

Eva Laufey Kjaran Hermannsdóttir

Öll hráefni sem notuð eru í þessa uppskrift fást í verslunum Hagkaups. 

Mac & Cheese með beikoni og rjómasósu.

Í síðasta þætti mínum lagði ég áherslu á matargerð frá Bandaríkjunum og þessi réttur er einn þekktasti og vinsælasti rétturinn þar í landi. Ég gjörsamlega elska þennan rétt en hann inniheldur allt það sem mér þykir gott. Pasta, beikon, ost og rjóma... ég þarf ekki meira. Mæli með að þið prófið og ég vona að þið njótið vel. 

Ofnbakað Mac & Cheese 

• 250 g makkarónupasta
• 1 msk ólífuolía
• 150 g beikon, smátt skorið
• 300 g sveppir
• 1 rauð paprika
• 1 msk smátt söxuð steinselja
• 1 msk smátt saxað tímían
• 2 msk smjör
• 1 laukur, sneiddur 
• 500 ml matreiðslurjómi
• 200 ml grænmetissoð (soðið vatn + einn græntmetisteningur)
• 100 g rifinn Parmesan ostur
• 100 g rifinn Cheddar ostur
• 1 msk smátt söxuð steinselja
• salt og pipar

Aðferð:

1. Hitið ofninn í 180°C.
2. Sjóðið makkarónupasta samkvæmt leiðbeiningum á pakkanum. Hellið vatninu af og setjið pastað í eldfast mót.
3. Hitið olíu á pönnu og steikið beikonið í nokkrar mínútur, bætið sveppum og papriku út á pönnu og steikið. Kryddið til með salti og pipar. Saxið niður ferskar kryddjurtir og dreifið yfir.
4. Blandið beikonblöndunni saman við makkarónupastað.  
5. Hitið smjör á pönnu, sneiðið niður einn lauk og steikið upp úr smjörinu í nokkrar mínútur við vægan hita eða þar til laukurinn verður mjúkur í gegn.
6. Hellið matreiðslurjómanum og grænmetissoðinu saman við og leyfið sósunni að malla í nokkrar mínútur.
7. Rífið niður Parmesan ost og Cheddar, setjið út í sósuna og leyfið ostinum að bráðna í rólegheitum. Kryddið til með salti og pipar.
8. Hellið sósunni yfir pastað og blandið saman með skeið.
9. Rífið niður nóg af osti t.d. Mozzarella og Cheddar og dreifið yfir formið. 

Eke missa af Matargleði Evu öll fimmtudagskvöld á Stöð 2. 

Njótið vel. 

xxx

Eva Laufey Kjaran Hermannsdóttir 

Allt hráefni sem notað er í þessa uppskrift fæst í verslunum Hagkaups. 

Einfaldasti pastarétturinn

Orðið Arrabbiata þýðir “ævareiður” en þá er verið að vísa í hve sterkur rétturinn er.  Ég vann á litlu veitingahúsi í Oxford fyrir nokkrum árum og þessi pastaréttur var einn sá vinsælasti. Það var ekki aftur snúið þegar ég var búin að smakka hann, enda er hann mjög bragðgóður og sérstaklega einfaldur.

Að mínu mati er ekki mikið úrval af pastaréttum á veitingahúsum hér á Íslandi, mér finnst flestir pastaréttir bornir fram í beikon-rjómasósu sem er að sjálfsögðu gott og blessað en það er eitthvað við ítalskar tómatsósur sem heillar mig meira.  

Ég hvet ykkur til þess að prófa þennan rétt, það tekur enga stund að elda hann og ég er handviss um að hann eigi eftir að slá í gegn á heimilinu.  Þó nafnið vísi í að þetta sé MJÖG sterkur réttur þá hafið þið hann eins og þið viljið, ég myndi segja að eftirfarandi uppskrift væri miðlungs sterk. Ég vona að þið njótið vel.

Pasta Arrabbiata

Undirbúningstími 10 mínútur

Eldunartími 20 mínútur 

Fyrir 2 - 3 

Hráefni:

250  g Pasta Casareccia

ólífuolía

1 rauðlaukur

2 gulrætur

2 hvítlauksrif

1 rautt chili, fræhreinsað

salt og nýmalaður pipar

1 krukka pastasósa með basilíku

½ kjúklingateningur

parmesan ostur

fersk basilíka

Aðferð:

1. Sjóðið pasta samkvæmt leiðbeiningum á pakkanum.
2. Hitið olíu í víðum potti, skerið grænmetið fremur smátt og steikið í smá stund eða þar til það fer að mýkjast.
3. Hellið tómatsósunni út í og bætið kjúklingatening saman við.
4. Kryddið til með salti og pipar.
5. Leyfið sósunni að malla við vægan hita þar til grænmetið er eldað í gegn.
6. Þegar pastað er tilbúið er vatninu hellt af (geymið þó 2 dl sem þið bætið í sósuna) og blandið saman við sósuna. Leyfið pastaréttinum að malla í svolitla stund og berið síðan fram með parmesan osti og ferskum basilíkulaufum.

Það er tilvalið að nota þessa pastategund í þennan rétt, mjög skemmtileg áferð. 

Einfalt og gott hvítlauksbrauð 

Það er klassískt að bjóða upp á gott hvítlauksbrauð með pastaréttum og hér kemur uppskrift sem er einföld og góð.

½ baguette brauð, skorið í tvennt og í fjóra bita

½ hvítlauksostur

3 msk sýrður rjómi

salt og pipar

ólífuolía

Aðferð:

1. Skerið brauðið í tvennt og síðan í fjóra bita.
2. Rífið niður hvítlauksost og blandið saman við sýrða rjómann, kryddið til með salti og pipar.
3. Leggið í eldfast mót og sáldrið smá ólífuolíu yfir brauðsneiðarnar.
4. Bakið við 200°C í nokkrar mínútur eða þar til brauðið er gullinbrúnt.

Buon Appetito!

xxx

Eva Laufey Kjaran Hermannsdóttir

Allt hráefni sem notað er í þessa uppskrift fæst í verslunum Hagkaups.