Vikuseðill

Mánudagsfiskurinn: Æðisleg bleikja í teriyaki sósu með fetaosti. Þessi réttur er afskaplega einfaldur og fljótlegur sem er alltaf mikill plús á þreyttum mánudegi. 

Þriðjudagur: Æðisleg rif með asískum blæ. Þetta er rétturinn sem setningin "eitt sinni smakkað, þú getur ekki hætt" á vel við. 

Miðvikudagur: Mexíkóskt kjúklingasalat með mexíkó-ostasósu og Doritos.

Fimmtudagur: Á uppstigningardaginn ætla ég að elda fyllt cannelloni með spínati og nóg af osti... algjört sælgæti. 

Föstudagur: Á mínu heimili er hefð fyrir pizzaáti á föstudögum og ætla ég að gera þessa ómótstæðilegu bbq pönnupizzu sem er borin fram með klettasalati, tómötum og nýrifnum parmsesan. 

Helgarmaturinn: Um helgina ætla ég að elda uppáhalds súpuna mína en það er humarsúpan hennar mömmu sem ég elska og elda við sérstök tilefni. 

Helgarbaksturinn

Hér koma tvær hugmyndir að helgarbakstrinum annars vegar ljúffeng marensterta með karamellukremi og hins vegar dúnmjúkar morgunverðarbollur sem allir ættu að prófa.

Marensterta með kókosbollurjóma og karamellukremi.

Kotasælubollur og bráðhollt túnfiskssalat.

Ég vona að þið eigið góða viku framundan.

xxx

Eva Laufey Kjaran Hermannsdóttir

Öll hráefnin í þessar uppskriftir fást í verslunum Hagkaupsþ

Æðisleg bleikja í teriyaki sósu með ristuðum sesamfræjum

Korter í kvöldmat er nýr liður á blogginu en í þessum færslum ætla ég að deila með ykkur einföldum og ofur góðum uppskriftum sem eiga það sameiginlegt að vera mjög fljótlegar. Fyrsti rétturinn sem ég ætla að deila með ykkur er ljúffeng bleikja í teriyaki sósu. Ég eldaði þennan rétt í síðustu viku, þá var ég í próflestri og hafði ekki langan tíma til þess að stússast í matargerðinni. Það kannast eflaust flestir við að lenda einhvern tímann í tímaþröng um kvöldmatarleytið og það þarf ekki endilega að koma niður á gæði matarins, við þurfum bara að velja fljótlega og einfalda rétti og þessi er einn af þeim. 

Bleikja í Teriyaki sósu með ristuðum sesamfræjum

• Einföld matargerð
• Áætlaður tími frá byrjun til enda: 15 mínútur
• Fyrir 2

Hráefni:

• 2 flök Klaustursbleikja 
• 1 msk ólífuolía + 1 tsk smjör 
• Salt og pipar 
• 4 - 5 msk Teriyaki sósa 
• 1 stilkur vorlaukur 
• 2 - 3 msk hreinn fetaostur frá MS
• Ristuð sesamfræ

Aðferð:

1. Hitið ofninn í 180°C. 
2. Hitið olíu og smjör á pönnu, steikið bleikjuna með roðið niður í 2-3 mínútur. Kryddið til með salti og pipar. 
3. Penslið fiskinn með Teriyaki sósu, ca. 1 - 2 msk á hvert bleikjuflak. 
4. Setjið bleikjuflakið í eldfast mót, sáldrið hreinum fetaosti yfir flakið og bakið við 180°C í 5-7 mínútur.
5. Þegar fiskurinn kemur út úr ofninum dreifið þá ristuðum sesamfræjum yfir hann og myljið niður meiri fetaost. Einnig er gott að saxa niður vorlauk og dreifa yfir fiskinn.
6. Berið bleikjuna fram með fersku salati - einfalt og gott!

Njótið vel og ég vona að þið eigið stórgóða viku framundan. 

xxx

Eva Laufey Kjaran Hermannsdóttir

Öll hráefni sem eru notuð í þessa uppskrift fást í verslunum Hagkaups. 

Vikuseðill

 Einföld og góð sjávarréttasúpa með tælensku yfirbragði er frábær mánudagsmatur.

Á morgun, þriðjudag ætla ég loksins að elda Mac'n Cheese í rjóma-beikonsósu. Já þetta er pasta og beikonvika, það hlýtur nú að mega?

 Á miðvikudaginn ætla ég að gera einfalt og gott Sesar salat sem inniheldur kjúkling, beikon, stökka brauðteninga og ljúffenga salatsósu.

Á fimmtudaginn ætla ég að hafa þessar gómsætu sænsku kjötbollur sem slá alltaf í gegn og allir á heimilinu borða vel af. Ingibjörg Rósa mín elskar þessar með nóg af sósu.

Á föstudaginn ætla ég að hafa einn af mínum eftirlætis réttum, spaghetti Bolognese. Ljómandi góður réttur með góðu rauðvínsglasi. 

Um helgina er tilvalið að skella í þessa æðislegu mexíkósku pizzu. 

Tryllingslega gott karamellupæ er á bakstursplaninu mínu um helgina, ef bakstur má kalla. Einföld og syndsamlega góð.

Ég vona að þið hafið fengið hugmyndir að mat út vikuna.

Njótið vel.

xxx

Eva Laufey Kjaran Hermannsdóttir

Hráefnin í þessar uppskriftir fást í verslunum Hagkaups.

Vikuseðill

Gleðilega vinnuviku allir saman! Ég vona að þið hafið haft það einstaklega gott um páskana. Sjálf átti ég frábæra páska með fólkinu mínu og kom endurnærð til vinnu í morgun. Markmið vikunnar er að minnka súkkulaðiát haha og þá er tilvalið að hefja vikuna á þessum græna og fína drykk sem þið sjáið hér að ofan, æðislegur avókadó drykkur með sítrónu. Hér fyrir neðan finnið svo tillögur að kvöldmat út vikuna og ég vona að þið fáið nóg af hugmyndum.

Njótið vel.

Einföld grænmetisbaka með fetaosti er alltaf góð hugmynd eftir veisluhöld í marga daga. Það er upplagt að nota afganga í þessa böku t.d. kjöt eða kjúkling. 

Fiski takkós er frábær leið til þess að fá alla fjölskylduna til þess að borða meira af fisk og grænmeti. Ljúffengur réttur sem slær alltaf í gegn. 

Góðar og matarmiklar súpur eru í sérstöku uppáhaldi hjá mér og gúllassúpan hennar mömmu er ein af þessum súpum sem ég fæ ekki nóg af. Það er líka tilvalið að elda hana í vikunni þar sem veðurspáin er heldur köld og þá er nú ekkert betra en matur sem yljar að innan. 

Kjúklinganúðlur með bragðmikilli sósu er frábær föstudagsmatur og réttur sem allir í fjölskyldunni ættu að elda. Algjört sælgæti!

Hví ekki að skella í Indverska veislu um helgina? Tikka Masala kjúklingur er náttúrlega himneskur og ég mæli með honum á laugardaginn. 

Helgarbaksturinn er súkkulaðiskyrkaka með jarðarberjum. En ekki hvað? Við þurfum öll okkar súkkulaði. 

Öll hráefnin í þessar uppskriftir fást í verslunum Hagkaups. 

Bragðmikið og bráðhollt fiskitakkós úr Matargleði Evu

Fiskitakkós er algjör snilld til þess að fá fjölskylduna til að borða meira af fisk og grænmeti. Ég elska þessa uppskrift og geri hana mjög oft hér heima fyrir, það tekur enga stund að búa til þennan rétt og það er lygilega einfalt að baka sínar eigin tortillavefjur. Á föstudögum er hefð á mörgum heimilum að gera vel við sig og ég skora á ykkur að prófa þessa uppskrift, ég veit að þið eigið eftir að slá í gegn. 

Fiski takkós

Hveititortillur

• 100 g heilhveiti
• 60 g vatn
• smá sjávarsalt

Aðferð:

Blandið öllum hráefnum saman í skál, hnoðið í nokkrar mínútur á hveitistráðu borði. Setjið deigið í hreina skál og viskastykki yfir, leyfið deiginu að hefast í 30-60 mínútur eða þegar deigið hefur tvöfaldast að stærð. Eftir þann tíma fletjið þá deigið út í litlar pönnukökur og steikið á pönnu í mínútu á hvorri hlið. Setjið viskastykki yfir kökurnar svo þær verði ekki of þurrar. 

Mangósalsa

• 1 mangó 
• 1 lárpera 
• handfylli af kóríander 
• 1 rauð paprika 
• 1/2 rauðlaukur 
• ólífuolía 
• límónusafi 
• salt og pipar 
• 1 ananas
• 1 tómatur 

Aðferð: Skerið hráefnin afar smátt niður og blandið vel saman í skál. Best er að geyma salsa inn í ísskáp í hálftíma áður en þið ætlið að bera það fram. 

Fiskurinn

• 700 - 800 g fiskur, þorskur eða ýsa 
• salt og pipar
• 1 1/2 tsk paprikukrydd
• 1 tsk cumin krydd 
• ólífuolía 

Aðferð: Hitið olíu á pönnu, skeri fiskinn í jafn stóra bita og kryddið með salti, pipar, paprikukryddi og cumin kryddi. Veltið fiskinum vel upp úr kryddinu og steikið á pönnu í  2 - 3 mínútur á hvorri hlið. Berið strax fram í heilhveitivefjum með fersku mangósalsa og grísku jógúrti. 

Missið ekki af Matargleðinni öll fimmtudagskvöld á Stöð 2. 

xxx

Eva Laufey Kjaran Hermannsdóttir

Öll hráefnin í þessa uppskrift fást í verslunum Hagkaups. 

Fiskibollurnar hennar ömmu með asísku twisti

Maturinn og uppskriftirnar hennar ömmu eru mér mjög mikilvægar og passa ég mikið upp á þær. Ég hef áður deilt með ykkur uppskrift að fiskibollunum hennar ömmu Stínu sem allir ættu að prófa. Í síðasta þætti af Matargleði ákvað ég að styðjast við þá uppskrift en breyta henni örlítið og setja asískan twist á hana, það kom ansi vel út og ég mæli svo sannarlega með að þið prófið þessar bollur á bolludaginn. Bragðmiklar, einfaldar og fljótlegar! Akkúrat eins og þetta á að vera. 

Fiskibollurnar hennar ömmu 

14 - 16 bollur

• 800 fiskhakk
• 1 meðalstór laukur
• 1/2 rautt chilialdin 
• handfylli kóríander 
• 1 egg 
• 2 msk hveiti 
• salt og pipar 
• Ólífuolía 
• Smjör 

Aðferð: 

1. Setjið öll hráefnin í matvinnsluvél og maukið þar til blandan verður silkimjúk. Ef þið eigið ekki matvinnsluvél þá er fínsaxið þið laukinn, chilialdin og kóríander og blandið öllu vel saman. 
2. Hitið ólífuolíu og smjör á pönnu, steikið bollurnar á öllum hliðum í ca. mínútu á hlið. Setjið bollurnar í eldfast mót og inn í ofn í 15 - 20 mínútur við 180°C. Á meðan bollurnar eru í ofninum útbúið þið einfalt meðlæti t.d. ferskt salat, hrísgrjón og létta sósu. 

Létt jógúrtsósa með Wasabi

• 1 dós grískt jógúrt 
• 1 hvítlauksrif 
• safi úr hálfri límónu 
• Wasabi paste, magn eftir smekk
• Salt og pipar 

Aðferð: 

1. Setjið öll hráefnin í matvinnsluvél eða maukið með töfrasprota. Smakkið ykkur til og kryddið með salti og pipar. Gott að geyma sósuna í kæli áður en þið berið fram. 

Hrásalat

• Rauðkál 
• Kínakál 
• Safinn úr hálfri límónu 
• 1 gulrót 
• 1/2 rautt chilialdin 
• Salt og pipar 
• Handfylli kóríander 

Aðferð:

1. Skerið grænmetið í þunnar sneiðar og blandið vel saman í skál, kreistið safa úr hálfri límónu yfir og kryddið til með salti, pipar og ferskum kóríander.

Missið ekki af Matargleðinni öll fimmtudagskvöld klukkan 19:25 á Stöð 2. 

Njótið vel. 

xxx

Eva Laufey Kjaran Hermannsdóttir

Öll hráefnin sem voru notuð í þessa uppskrift fást í verslunum Hagkaups. 

Ofnbakaðir þorskhnakkar í paprikusósu

Ofnbakaður fiskur er alltaf í miklu uppáhaldi, þó það þurfi ekki að hafa mikið fyrir góðu hráefni þá er virkilega gott að gera djúsí fiskrétti af og til. Ég elska þá að minnsta kosti og ég hef tekið eftir því hér á síðunni að lesendur mínir eru sammála. Ég eldaði þennan góða rétt í vikunni, ég tók bara það sem ég átti til inn í ísskáp og útkoman var mjög góð. Svo góð að ég borðaði yfir mig og gott betur en það. Mæli með þið prófið fiskréttinn og ég vona að þið njótið vel. 

Ofnbakaðir þorskhnakkar með paprikuosti

• 1 msk ólífuolía eða smjör 
• 1 laukur, smátt saxaður
• 4 gulrætur, smátt skornar 
• 1 rauð paprika, smátt skorin
• 1/2 blómkálshöfuð, smátt skorið
• 1/2 spergilkálshöfuð, smátt skorið
• 700 g þorskhnakkar 
• 3/4 paprikuostur eða heill, smátt skorinn
• 250 ml rjómi 
• Salt og nýmalaður pipar 
• 100 g rifinn ostur 

Aðferð: 

1. Steikið grænmetið upp úr olíu eða smjöri í nokkrar mínútur eða þar til grænmetið fer að mýkjast. 
2. Bætið ostinum og rjómanum saman við, leyfið grænmetisblöndunni að malla í smá stund og kryddið til með salti og pipar. Þegar osturinn er allur bráðinn er blandan tilbúin. 
3. Skerið þorskhnakkana í bita og leggið í eldfast mót, kryddið til með salti og pipar. Hellið grænmetiðsblöndunni og rifnum osti yfir og bakið við 180°C í 25 - 30 mínútur. 
4. Berið fram með fersku salati og hrísgrjónum.  

Njótið vel. 

xxx

Eva Laufey Kjaran Hermannsdóttir 

Allt hráefni sem notað er í þessa uppskrift fæst í verslunum Hagkaups.

Villtur lax með blómkálsmauki og smjöri

Eftir ljúft frí á Spáni hlakkaði ég til að fá mánudagsfiskinn minn, auðvitað er gott og gaman að borða allt sem hugurinn girnist þegar maður er í fríi en mig var farin að lengja eftir fisk. Það gladdi mig mjög mikið er ég sá að í fiskborðinu í Hagkaup var þessi glæsilegi villti lax, ég týndi til einfalt meðlæti. Blómkál, kirsuberjatómata, ferskan aspas og púrrulauk. Ef hráefnið er gott þá þarf ekki að flækja hlutina. Ég dreif mig heim, í bílnum á leiðinni var ég búin að ákveða hvernig ég ætlaði að matreiða fiskinn en þetta átti að vera eins einfalt og kostur væri, enda klukkan að ganga sjö og allir svangir. Pönnusteiktur lax með blómkálsmauki, ofnbökuðum aspas, tómötum og púrrlaukssmjörsósu. Þetta var einn besti fiskur sem ég hef smakkað. Það er ekki hægt að líkja eldislaxi og þeim villta samana, sá villti er einfaldlega algjört lostæti. Nú er komið að ykkur. 

Villtur lax með blómkálsmauki og grænmeti. 

• Stórt blómkálshöfuð 
• grænmetisteningur 
• 500 g villtur lax
• ólífuolía 
• smjör 
• ferskur aspas 
• kirsuberjatómatar 
• salt og nýmalaður pipar
• 100 - 150 g smjör 
• 1/2 púrrulaukur

Aðferð:

1. Sjóðið blómkálshöfuðið í söltu vatni og bætið grænmetistening út í pottinn. 
2. Beinhreinsið fiskinn ef það er ekki búið að því, skerið flakið í jafn stóra bita og hitið olíu á pönnu. Steikið fiskinn í 2 mínútur á hvorri hlið, kryddið til með salti og pipar. Mér finnst mjög gott að bæta smá smjöri út á pönnuna rétt í lokin. 
3. Þegar blómkálshöfuðið er soðið, takið það upp úr pottinum með fiskispaða t.d. og setjið ferskan aspas út í sjóðandi vatnið í þrjár mínútur. Takið aspasinn upp úr pottinum og leggið í eldfast mót. Bætið kirsuberjatómötum og fiskinum ofan á aspasinn. Hellið smávegis af olíu yfir og kryddið enn og aftur með salti og pipar. 
4. Bakið í ofni við 180°C í 6 - 8 mínútur. 
5. Á meðan fiskurinn er í ofninum skerið þið niður púrrulauk og sjóðið við vægan hita í smjörinu, notið um það bil 100 - 150 grömm af smjöri. 
6. Maukið blómkálið með töfrasprota eða í matvinnsluvél, bætið smjöri saman við og kryddið til með salti og pipar. Ef blómkálsmaukið er of þykkt þá setjið þið smávegis af vatninu sem var í pottinum. 
7. Þegar fiskurinn er klár berið þið allt saman strax fram og njótið vel. 

Skyndimatur eins og hann gerist bestur! 

Njótið vel. 

xxx

Eva Laufey Kjaran Hermannsdóttir 

Allt hráefnið sem notað er í þessa uppskrift fæst í verslunum Hagkaups.