Showing posts with label PIzza. Show all posts
Showing posts with label PIzza. Show all posts

Sunday, June 12, 2016

Föstudagspizzan að hætti Ingibjargar Rósu


Og hjartaði mitt bráðnaði gjörsamlega. Við byrjuðum helgina á pizzabakstri og þetta var í fyrsta sinn sem Ingibjörg Rósa hjálpaði mömmu sinni, þetta verður okkar fasti liður á föstudögum. Matargerðin verður milljón sinnum skemmtilegri þegar maður fær svona góða aðstoð og mér þótti svo ánægjulegt að sjá hvað litlan mín naut sín. Hún er að verða tveggja ára í júlí og allt í einu er hún orðin svo fullorðin, farin að tala mikið og skipa okkur foreldrum sínum fyrir hægri vinstri haha.

Í fyrsta pizzabakstrinum okkar saman þá bökuðum við einfalda pizzu sem allir á heimilinu geta borðað, margarita var á boðstólnum en móðirin fékk að lauma hráskinku á sinn hluta. Við elskum þessa pizzu og sérstaklega pizzabotninn, mjög einfaldur og allir geta bakað hann. Svo er hægt að bæta öllu því sem hugurinn girnist ofan á pizzuna, fer allt eftir smekk hvers og eins.


Föstudagspizzan að hætti Ingibjargar Rósu 


Pizzadeig 


  • 2 1/2 dl volgt vatn 
  • 3 tsk þurrger 
  • 2 tsk hunang 
  • 2 msk ólífuolía 
  • 400 g Brauðhveiti frá KORNAX 
  • Einn skammtur pizzasósa, við notum oft hakkaða tómata eða tómatmauk
  • Rifinn mozzarella ostur og pizzaostur í bland
  • Pipar
  • Hráskinka
  • Gott salat
  • Parmesan ostur 
Aðferð: 
  1. Leysið gerið upp í volgu vatni og það er afar mikilvægt að gerið sé volgt. 
  2. Bætið hunangi saman við og hrærið vel í. 
  3. Þegar byrjar að freyða í skálinni er gerið klárt. Blandið olíu og hveitinu saman við í hrærivélaskál. Þið getið auðvitað hnoðað deigið í höndunum en mér finnst langbest að nota hnoðarann á hrærivélinni, það ferli tekur um það bil 4 - 6 mínútur. Deigið er tilbúið þegar það er orðið að kúlu og klístrast ekki við hrærivélaskálina. 
  4. Setjið viskastykki yfir skálina og leyfið deiginu að hefa sig í klukkustund. 
  5. Fletjið deigið út og smyrjið deigið með pizzasósu. 
  6. Setjið það álegg sem þið viljið nota ofan á og bakið pizzuna við 220°C 7 - 10 mínútur eða þar til osturinn er gullinbrúnn. 
  7. Berið pizzuna gjarnan fram með hráskinku, góðu salati og nýrifnum parmesan osti. 


Sjáið bara hvað hún er sæt og glöð!! 

Best í heimi. 

xxx

Eva Laufey Kjaran Hermannsdóttir 


Öll hráefni í þessa uppskrift fást í verslunum Hagkaups

Monday, May 2, 2016

Vikuseðill


Mánudagsfiskurinn: Æðisleg bleikja í teriyaki sósu með fetaosti. Þessi réttur er afskaplega einfaldur og fljótlegur sem er alltaf mikill plús á þreyttum mánudegi. 
Þriðjudagur: Æðisleg rif með asískum blæ. Þetta er rétturinn sem setningin "eitt sinni smakkað, þú getur ekki hætt" á vel við. 
Miðvikudagur: Mexíkóskt kjúklingasalat með mexíkó-ostasósu og Doritos.
Fimmtudagur: Á uppstigningardaginn ætla ég að elda fyllt cannelloni með spínati og nóg af osti... algjört sælgæti. 
Föstudagur: Á mínu heimili er hefð fyrir pizzaáti á föstudögum og ætla ég að gera þessa ómótstæðilegu bbq pönnupizzu sem er borin fram með klettasalati, tómötum og nýrifnum parmsesan. 


Helgarmaturinn: Um helgina ætla ég að elda uppáhalds súpuna mína en það er humarsúpan hennar mömmu sem ég elska og elda við sérstök tilefni. 

Helgarbaksturinn

Hér koma tvær hugmyndir að helgarbakstrinum annars vegar ljúffeng marensterta með karamellukremi og hins vegar dúnmjúkar morgunverðarbollur sem allir ættu að prófa.




Ég vona að þið eigið góða viku framundan.

xxx
Eva Laufey Kjaran Hermannsdóttir

Öll hráefnin í þessar uppskriftir fást í verslunum Hagkaupsþ

Friday, April 15, 2016

Pönnupizza með jalepeno osti



Pönnupizza með jalepeno osti og sveppum
Pizzabotn 

  • 240 ml volgt vatn (mikilvægt að vatnið sé volgt)
  • 2 ½ tsk þurrger 
  • 1 msk hunang
  • 400 – 450 g brauðhveiti
  • 1 tsk salt 
  • 2 msk olía  

Aðferð: 
  1. Blandið volgu vatni, geri og hunangi saman í skál. 
  2. Leggið viskastykki yfir skálina og leyfið gerinu að leysast upp í rólegheitum, eða í 7-10 mínútur. Um leið og það byrjar að freyða í skálinni er gerblandan tilbúin. 
  3. Hellið gerblöndunni í hrærivélaskál og bætið öllum hráefnum saman við, það er góð regla að bæta hveitinu smám saman við.  Það gæti þurft minna en meira af hveitinu.
  4. Látið hnoðast í vélinni í 6 – 10 mínútur eða þar til deigið er orðið í laginu eins og kúla, einnig á það ekki að vera klístrað. 
  5. Setjið viskastykki yfir hrærivélaskálina og leyfið deiginu að hefast í klukkustund eða þar til þar hefur tvöfaldast að stærð.
  6. Fletjið deigið út, þetta deig dugar í tvær pizzur.
  7. Hitið smávegis af olíu á pönnu, passið að pannan sé mjög heit þegar þið setjið deigið á pönnuna. 
  8. Steikið pizzabotninn á pönnunni í nokkrar mínútur eða þar til botninn er orðinn stökkur, bætið þá kjúklingnum ofan á og sáldrið ferskum mozzarella osti yfir. 
  9. Bakið í ofni við 200°C í 5 - 7 mínútur eða þar til osturinn er gullinbrúnn.

Fylling
  • 1 dós sýrður rjómi 
  • 1 Jalepeno ostur
  • 1 hvítlauksrif
  • Salt og nýmalaður pipar
  • 200 g sveppir steiktir upp úr smjöri og hvítlauk
  • Hægeldaðir tómatar
  • Smátt söxuð steinselja


Aðferð:
  1. Fletjið út pizzadeigið og leggið á pappírsklædda ofnplötu. 
  2. Rífið niður jalepeno ostinn og hrærið saman við sýrða rjómann, pressið hvítlauksrifið og blandið saman við. Kryddið til með salti og pipar. Smyrjið ostablöndunni á botninn.
  3. Steikið sveppina upp úr smjöri og pressið eitt hvítlauksrif út í pottinn, þerrið sveppina vel áður en þið setjið þá á pizzuna.
  4. Bakið við 220°C í 10 - 12 mínútur. Ofnar eru auðvitað misjafnir og það gæti verið að þið þurfið að baka hana lengur en pizzan er klár þegarr hún er gullinbrún. Það er mjög gott að setja hægeldaða tómata og smátt saxaða steinselju yfir pizzuna í lokin.  

Missið ekki af Matargleði Evu öll fimmtudagskvöld klukkan 19:15 á Stöð 2. 

Njótið vel. 
xxx
Eva Laufey Kjaran Hermannsdóttir 

Öll hráefni se


Wednesday, September 30, 2015

Mexíkósk pizza með djúsí ostasósu á örfáum mínútum


Mexíkóskur matur er í sérstöku uppáhaldi hjá mér og fæ aldrei leið á þessum góða mat, möguleikarnir eru líka svo margir sem gerir þessa matargerð enn betri. Ég sá sérstakar pizza tortillur út í búð um daginn og var ekki lengi að grípa þær með mér ásamt öðru góðu hráefni. Ég útbjó mjög einfalda pizzu og það var frekar fínt að sleppa við að baka venjulegan pizzabotn, stundum er maður einfaldlega ekki í stuði fyrir mikið tilstand í eldhúsinu. Botninn var þunnur og stökkur en þannig finnst mér pizzabotnar bestir. Pizzan var einstaklega ljúffeng og þið ættuð að prófa þessa uppskrift.





Mexíkósk pizza með kjúkling og djúsí ostasósu 

  • 2 tortilla pizzakökur
  • 1 dós sýrður rjómi
  • 1 mexíkóostur, rifinn
  • salt og nýmalaður pipar
  • 500 – 600 g kjúklingakjöt t.d. úrbeinuð kjúklingalæri
  • 2 msk. Mexíkósk kryddblanda
  • 1 rauð paprika, smátt skorin
  • Salt og nýmalaður pipar

Tillögur að áleggi; lárpera, salsa sósa, sýrður rjómi og smátt saxaður kóríander.

Aðferð:

  1. Leggið kjúklingalæri eða annað kjúklingakjöt í eldfast mót og kryddið til með bragðmikilli kryddblöndu. Eldið í ofni við 180°C í 20 mínútur. (fer auðvitað eftir þykktinni á kjúklingakjötinu) 
  2. Á meðan kjúklingurinn er í ofninum blandið þið sýrða rjómanum og nýrifnum mexíkóosti  saman í skál og kryddið til með salti og pipar.
  3. Smyrjið tortillakökur með ostasósunni (ég keypti sérstakar pizza tortillur í Hagkaup, þær eru aðeins þykkari).
  4. Skerið papriku og kjúklingakjöt í litla bita og dreifið yfir ostasósuna.
  5. Bakið í ofni við 180°C í ca. 5 – 7 mínútur. Þegar pizzan er tilbúin er gott að skera niður avókadó, tómata, ferskt kóríander og dreifa yfir. Einnig finnst mér algjört æði að mylja niður Nachos flögur og sáldra yfir. Einföld og stórgóð máltíð sem öllum í fjölskyldunni þykir góð. 




Mæli svo sannarlega með að þið prófið þessa, hún er mjöööög góð.

Njótið vel.

xxx

Eva Laufey Kjaran Hermannsdóttir


Friday, August 21, 2015

Pönnupizza með bbq kjúkling


Ég fékk svakalega fína pönnu frá systkinum mínum í afmælisgjöf og hef ég notað hana í mjög margt. Þessi panna má fara inn í ofn og veitir mér þess vegna þann möguleika að gera pönnupizzur sem eru að mínu mati mikið betri en venjulegar pizzur. Mig langar að deila uppskrift að ómótstæðilegri pizzu með bbq kjúkling, klettasalati og nýrifnum parmesan. Hljómar það ekki vel? Fullkomin helgarpizza. 






Pizzabotn 

240 ml volgt vatn (mikilvægt að vatnið sé volgt)
2 ½ tsk þurrger 
1 msk hunang
400 – 450 g brauðhveiti frá Kornax (í bláa pakkanum)
1 tsk salt 
2 msk olía 

Aðferð: 

  1. Blandið volgu vatni, geri og hunangi saman í skál. 
  2. Leggið viskastykki yfir skálina og leyfið gerinu að leysast upp í rólegheitum, eða í 7-10 mínútur. Um leið og það byrjar að freyða í skálinni er gerblandan tilbúin. 
  3. Hellið gerblöndunni í hrærivélaskál og bætið öllum hráefnum saman við, það er góð regla að bæta hveitinu smám saman við.  Það gæti þurft minna en meira af hveitinu.
  4. Látið hnoðast í vélinni í 6 – 10 mínútur eða þar til deigið er orðið í laginu eins og kúla, einnig á það ekki að vera klístrað. 
  5. Setjið viskastykki yfir hrærivélaskálina og leyfið deiginu að hefast í klukkustund eða þar til þar hefur tvöfaldast að stærð.
  6. Fletjið deigið út, þetta deig dugar í tvær pizzur.
  7. Hitið smávegis af olíu á pönnu, passið að pannan sé mjög heit þegar þið setjið deigið á pönnuna. 
  8. Steikið pizzabotninn á pönnunni í nokkrar mínútur eða þar til botninn er orðinn stökkur, bætið þá kjúklingnum ofan á og sáldrið ferskum mozzarella osti yfir. 
  9. Bakið í ofni við 200°C í 5 - 7 mínútur eða þar til osturinn er gullinbrúnn.

BBQ kjúklingur

Ólífuolía
300 g kjúklingakjöt ofan á eina pizzu
1 meðalstór rauðlaukur
BBQ sósa að eigin vali
salt og nýmalaður pipar

Aðferð:

  1. Hitið ólíuolíu á pönnu og steikið kjúklinginn, kryddið til með salti og pipar. 
  2. Skerið rauðlauk og bætið honum út á pönnuna. 
  3. Bætið bbq sósunni í lokin og leyfið þessu á malla í 3 - 4 mínútur. 









Berið pizzuna fram með klettasalati, kirsuberjatómötum og nýrifnum parmsan.

Njótið vel og góða helgi.

xxx

Eva Laufey Kjaran Hermannsdóttir


Allt hráefni sem notað er í þessa uppskrift fæst í verslunum Hagkaups. 

Friday, April 24, 2015

Pizzaveisla á blogginu, humarpizza og meira til!


Ég slæ ekki hendinni á móti góðri pizzu. Í síðasta þætti í Matargleði Evu lagði ég áherslu á sumarlega rétti. Mér finnst alltaf gaman að baka góða pizzur, það er bæði hægt að baka þær í ofninum eða setja þær á grillið. Hér eru uppskrifir að tveimur pizzum í mínu eftirlæti sem ég mæli með að þið prófið um helgina. 

Ítalskur pizzabotn

240 ml volgt vatn (mikilvægt að vatnið sé volgt)
2 ½ tsk þurrger
1 msk hunang
400 – 450 g hveiti 
1 tsk salt 
2 msk olía 

Aðferð:
Blandið volgu vatni, geri og hunangi saman í skál. Leggið viskastykki yfir skálina og leyfið gerinu að leysast upp í rólegheitum, eða í 7-10 mínútur. Um leið og það byrjar að freyða í skálinni þá er gerblandan tilbúin. Hellið gerblöndunni í hrærivélaskál og bætið öllum hráefnum saman við, það er góð regla að bæta hveitinu smám saman við.  Það gæti þurft minna en meira af hveitinu. Látið hnoðast í vélinni í 6 – 10 mínútur eða þar til deigið er orðið í laginu eins og kúla, einnig á það ekki að vera klístrað. Setjið viskastykki yfir hrærivélaskálina og leyfið deiginu að hefast í klukkustund eða þar til þar hefur tvöfaldast að stærð.



Hvítlauksolía

3 dl ólífuolía 
5 hvítlauksrif
1 tsk gróft salt

Aðferð:
Pressið hvítlauk og blandið honum saman við saltið, hellið olíunni og setjið hvítlaukinn í krukku.   Lokið krukkunni og hristið vel saman. 


Pizza sósa

1 msk ólífuolía
1 laukur, grófsaxaður
2 hvítlauksgeirar, fínsaxaðir
500 ml tómata passata
1 tsk tómatmauk eða tómatpúrra 
Handfylli fersk smátt söxuð basilíka
smávegis af hunangi
Salt og nýmalaður pipar

Aðferð: Hitið laukinn í olíunni þar til hann mýkist og verður glær. Bætið hvítlauknum, tómatapassata, basilíku, hunangi og salti og pipar saman við og leyfið sósunni að malla í  nokkrar mínútur.



Humar pizza 

Hvítlauksolía, magn eftir smekk
300 g skelflettur humar, skolaður og þerraður
Kirsuberjatómatar, skornir í tvennt
1 kúla mozzarella ostur
Salt og nýmalaður pipar
Klettasalat, magn eftir smekk
Parmesan ostur , magn eftir smekk

Hitið ofninn í 200°C. Fletjið deigið út og leggið á pappírsklædda ofnplötu. Smyrjið deigið með hvítlauks- og raðið humrinum og tómötunum ofan á. Kryddið með salti og pipar og stráið ostinum yfir. Bakið í 12 – 18 mínútur eða þar pizzan er orðin gullinbrún. Þegar pizzan er komin út úr ofninum er klettasalati bætt ofan á hana og parmesan osti sáldrað yfir.


 Pizza di’capria

1 pizzabotn
4 – 5 msk pizzasósa
100 g ferskur aspas, soðinn í saltvatni í 3 mínútur og þerraður
1 rauðlaukur, skorin í strimla
Geitaostur, magn eftir smekk
Mozzarellaostur, magn eftir smekk
Salt og nýmalaður pipar

Hitið ofninn í 200°C. Fletjið deigið út og leggið á pappírsklædda ofnplötu. Sjóði aspas í vel söltu vatni í þrjár mínútur og þerrið hann vel þegar hann er tilbúinn. Smyrjið deigið með pizzasósu og raðið aspas, rauðlauk og ostum ofan á. Kryddið með salti og pipar. Bakið í 12 – 18 mínútur eða þar til pizzan er orðin gullinbrún.

Njótið vel og góða helgi!

xxx

Eva Laufey Kjaran Hermannsdóttir