Pizzaveisla á blogginu, humarpizza og meira til!

Ég slæ ekki hendinni á móti góðri pizzu. Í síðasta þætti í Matargleði Evu lagði ég áherslu á sumarlega rétti. Mér finnst alltaf gaman að baka góða pizzur, það er bæði hægt að baka þær í ofninum eða setja þær á grillið. Hér eru uppskrifir að tveimur pizzum í mínu eftirlæti sem ég mæli með að þið prófið um helgina. 

Ítalskur pizzabotn

240 ml volgt vatn (mikilvægt að vatnið sé volgt)

2 ½ tsk þurrger

1 msk hunang

400 – 450 g hveiti 

1 tsk salt 

2 msk olía 

Aðferð:

Blandið volgu vatni, geri og hunangi saman í skál. Leggið viskastykki yfir skálina og leyfið gerinu að leysast upp í rólegheitum, eða í 7-10 mínútur. Um leið og það byrjar að freyða í skálinni þá er gerblandan tilbúin. Hellið gerblöndunni í hrærivélaskál og bætið öllum hráefnum saman við, það er góð regla að bæta hveitinu smám saman við.  Það gæti þurft minna en meira af hveitinu. Látið hnoðast í vélinni í 6 – 10 mínútur eða þar til deigið er orðið í laginu eins og kúla, einnig á það ekki að vera klístrað. Setjið viskastykki yfir hrærivélaskálina og leyfið deiginu að hefast í klukkustund eða þar til þar hefur tvöfaldast að stærð.

Hvítlauksolía

3 dl ólífuolía 

5 hvítlauksrif

1 tsk gróft salt

Aðferð:

Pressið hvítlauk og blandið honum saman við saltið, hellið olíunni og setjið hvítlaukinn í krukku.   Lokið krukkunni og hristið vel saman. 

Pizza sósa

1 msk ólífuolía

1 laukur, grófsaxaður

2 hvítlauksgeirar, fínsaxaðir

500 ml tómata passata

1 tsk tómatmauk eða tómatpúrra 

Handfylli fersk smátt söxuð basilíka

smávegis af hunangi

Salt og nýmalaður pipar

Aðferð: Hitið laukinn í olíunni þar til hann mýkist og verður glær. Bætið hvítlauknum, tómatapassata, basilíku, hunangi og salti og pipar saman við og leyfið sósunni að malla í  nokkrar mínútur.

Humar pizza 

Hvítlauksolía, magn eftir smekk

300 g skelflettur humar, skolaður og þerraður

Kirsuberjatómatar, skornir í tvennt

1 kúla mozzarella ostur

Salt og nýmalaður pipar

Klettasalat, magn eftir smekk

Parmesan ostur , magn eftir smekk

Hitið ofninn í 200°C. Fletjið deigið út og leggið á pappírsklædda ofnplötu. Smyrjið deigið með hvítlauks- og raðið humrinum og tómötunum ofan á. Kryddið með salti og pipar og stráið ostinum yfir. Bakið í 12 – 18 mínútur eða þar pizzan er orðin gullinbrún. Þegar pizzan er komin út úr ofninum er klettasalati bætt ofan á hana og parmesan osti sáldrað yfir.

 Pizza di’capria

1 pizzabotn

4 – 5 msk pizzasósa

100 g ferskur aspas, soðinn í saltvatni í 3 mínútur og þerraður

1 rauðlaukur, skorin í strimla

Geitaostur, magn eftir smekk

Mozzarellaostur, magn eftir smekk

Salt og nýmalaður pipar

Hitið ofninn í 200°C. Fletjið deigið út og leggið á pappírsklædda ofnplötu. Sjóði aspas í vel söltu vatni í þrjár mínútur og þerrið hann vel þegar hann er tilbúinn. Smyrjið deigið með pizzasósu og raðið aspas, rauðlauk og ostum ofan á. Kryddið með salti og pipar. Bakið í 12 – 18 mínútur eða þar til pizzan er orðin gullinbrún.

Njótið vel og góða helgi!

xxx

Eva Laufey Kjaran Hermannsdóttir

Amerískar súkkulaðipönnukökur með ristuðum pekanhnetum

Amerískar pönnukökur hafa lengi verið í sérstöku uppáhaldi hjá mér og í morgun ákvað ég að breyta aðeins uppskriftinni sem ég nota yfirleitt. Aðal breytingin er sú að ég bætti kakó út í deigið og smá kanil, nú eru þetta þess vegna súkkulaðipönnukökur. Þær eru algjört lostæti og sérstaklega með ristuðum pekanhnetum. Ég mæli með að þið prófið þessar einföldu og bragðgóðu pönnukökur. 

Amerískar súkkulaðipönnukökur

• 5 dl Kornax hveiti
• 2 tsk lyftiduft 
• 2 msk kakó 
• 1 tsk kanill
• 1 Brúnegg
• 2 dl ab mjólk 
• 2 - 3 dl mjólk
• 1 msk sykur
• 1 tsk vanilla extract eða vanilludropar
• 2 msk brætt smjör 

Aðferð: 

1. Blandið þurrefnum saman í skál.
2. Pískið eitt egg og mjólk saman. 
3. Hellið eggjablöndunni saman við þurrefnin og bætið ab mjólk og vanillu út í deigið. 
4. Blandið vel saman með sleif og bætið bræddu smjöri og sykri út í lokin. 
5. Það er ágætis regla að geyma deigið í 30 - 60 mínútur áður en þið steikið pönnukökurnar en þið steikið þær upp úr smjöri á pönnu í nokkrar mínútur eða í um það bil 2 mínútur á hvorri hlið. 

Berið fram með ristuðum pekanhnetum og góðu sírópi. 

Bon appétit!

xxx

Eva Laufey Kjaran Hermannsdóttir

Ómótstæðileg skyrkaka með hvítu súkkulaði og jarðarberjum

Skyrkökur eru ómótstæðilegar og það sakar ekki að það tekur enga stund að setja slíka köku saman. Það þarf ekki að baka eitt né neitt. Ég byrja á því að gera botninn. Í þennan botn fer 1 ½ pakki af lu bastogne kexkökum og 150 g af bræddu smjöri.

Botn
1 pk lu bastogne kex
150 g smjör

Kexið og smjörið er maukað vel saman í matvinnsluvél. Þrýstið kexblöndunni á botninn og upp með börmunum á bökunarforminu. Geymið botninn í kælið á meðan þið útbúið fyllinguna. 

Fylling
500 g vanilluskyr
3 dl rjómi
1 msk flórsykur
1 tsk vanilluduft eða paste
100 g hvítt súkkulaði, brætt
Ber og súkkulaði eftir smekk notað til að toppa 

Aðferð:1. Léttþeytið rjóma og leggið til hliðar.
2. Hrærið skyrinu, flórsykrinum og vanillu saman í smá sund. 
3. Bræðið súkkulaði yfir vatnsbaði og kælið. 
4. Blandið súkkulaðinu varlega saman við skyrblönduna með sleif og bætið rjómanum saman við í lokin með sleif að sjálfsögðu. 
5. Setjið skyrblönduna ofan á kexbotninn og kælið í minnsta kosti þrjár klukkustundir eða lengur. Best yfir nótt. Það er hægt að frysta þessa köku.

Skreytið kökuna að vild en mér finnst best að sáldra smá hvítu súkkulaði yfir kökuna og nokkrum jarðarberju. 

Ekki missa af Matargleði Evu á fimmtudagskvöldum klukkan 20.10. 

xxx

Eva Laufey Kjaran Hermannsdóttir

Gómsætir ostaréttir sem kitla bragðlaukana

Í síðasta þætti af Matargleði Evu heimsótti ég mygluostabú MS í Búðardal og fékk að fylgjast með ostaframleiðslunni. Hér eru tveir ostaréttir sem eru ofboðslega góðir og ég fæ ekki nóg af. Ofnbakaðir ostar eru hreint afbragð og ostasalatið er fullkomið á veisluborðið. 

Gómsætir ostaréttir sem ég mæli með að þið prófið. 

Ofnbakaður Stóri Dímon

1 Stóri Dímon

2 msk ólífuolía

1 hvítlauksrif, marið 

1 msk smátt saxað rósmarín

Aðferð: 

Blandið olíu, hvítlauk, rósmaríni og ögn af salti saman í skál. Stingið hníf í ostinn og snúið aðeins upp á hnífinn, hellið blöndunni yfir ostinn. Bakið við 180°C í 8 - 10 mínútur eða þar til osturinn er orðinn gylltur. 

Gott að vita! Það er hægt að baka ostinn í öskjunni sem hann kemur í. Það getur samt komið fyrir að askjan sem osturinn kemur í brotni í ofninum en þá er ágætt að setja öskjuna ofan í eldfast mót en þannig tryggjum við að osturinn haldi sér á sínum stað. 

Ostasalatið sem slær alltaf í gegn 

1 Mexíkóostur

1 Hvítlauksostur

1 dós sýrður rjómi

1 dós Grískt jógúrt 

1/4 púrrulaukur, smátt saxaður 

1 rauð paprika, smátt skorin

rauð vínber, skorin í tvennt 

Aðferð:

Skerið púrrulauk eftir endilöngu, skolið og skerið síðan í litla bita. Skerið paprikuna einnig mjög smátt og vínberin í tvennt. Blandið sýrða rjómanum og gríska jógúrti saman við og bætið ostinum saman við í lokin, mér finnst best að skera hann fremur smátt. Blandið öllu vel saman og berið fram með góðu brauði eða kexi. Salatið er betra ef það fær að vera í kæli í klukkustund áður en það er borið fram. 

Njótið vel. 

xxx

Eva Laufey Kjaran Hermannsdóttir

Matargleði Evu. Fjórði þáttur, dögurður.

Dögurður eða brunch er fullkomin máltíð sem sameinar bæði morgunmat, hádegismat og í flestum tilvikum ljúfar samverustundir með fjölskyldu og vinum. Hér koma uppskriftir að gómsætum réttum sem ég bjó til í matreiðsluþætti mínum á Stöð 2, Matargleði Evu sem eru sýndir á fimmtudagskvöldum kl 20.10.

Amerískar pönnukökur

5 dl. hveiti 

3 tsk. lyftiduft

1/2 tsk. salt 

2 Egg

4 dl. AB mjólk

2 -3  dl. mjólk 

3 msk. smjör (brætt) 

1 tsk. vanilla extract eða vanillusykur

1 msk. sykur 

Aðferð:

Sigtið hveiti, lyftiduft og salt saman. Bræðið smjör og leggið til hliðar. Pískið egg og mjók saman í skál. Hellið eggjablöndunni saman við hveitið, bætið smjörinu einnig saman við og hrærið vel í með sleif. Bætið ab mjólkinni út í og hrærið þar til þið eruð ánægð með þykktina á deiginu. Í lokin er ágætt að bæta smá sykri út í deigið. Setjið plastfilmu yfir skálina og leyfið deiginu að standa í kæli í lágmark 30 mínútur áður en þið steikið pönnukökurnar.

Pönnukökurnar eru síðan steiktar upp úr smjöri á pönnu í nokkrar mínútur, ca. 2 mínútur á hvorri hlið. Þegar loftbólur myndast í deigið þá eigið þið að snúa þeim við.

Þetta er frábær grunnuppskrift að pönnukökum en stundum bæti ég eplum, bláberjum, bönunum eða súkkulaðispænum út í deigið. Prófið ykkur áfram með það hráefni sem ykkur finnst gott... pönnukökur eru einfaldlega ljúffengar!

Bláberjasíróp

3 dl appelsínusafi

3 dl sykur

3 dl bláber, fersk eða frosin

safi og börkur af einni sítrónu

Aðferð:

Hitið sykur og appelsínusafa í potti, þegar sykurinn er bráðnaður og þetta lítur út eins og síróp má bæta bláberjum, sítrónuberki og safa út í pottinn og hræra vel í blöndunni. Leyfið bláberjasírópinu að malla við vægan hita í 30 – 40 mínútur.

Morgunverðarkartöflubaka með Chorizo pylsu

1 msk ólífuolía

2 stórir laukar, smátt skornir

200 gr chorizo pylsa, smátt skorin 

1 rauð paprika

2 hvítlauksrif, marin

4 bökunarkartöflur, skornar í teninga

salt og nýmalaður pipar

4 – 5 egg

fersk steinselja

Hitið ofninn i 180°. Hitið olíu á  pönnu og steikið laukinn við vægan hita þar til laukurinn verður mjúkur. Bætið chorizo pylsunni, paprikunni og hvítlauknum út á pönnuna og steikið í nokkrar mínútur. Bætið kartöfluteningum saman við og kryddið með salti og pipar. Setjið blönduna í eldfast mót þegar kartöflurnar eru eldaðar í gegn. Brjótið eggin yfir og bakið við 180°C í ca. 10 mínútur eða þar til eggin eru fullelduð. Þegar kartöflubakan kemur út úr ofninum er gott að saxa niður ferska steinselju og strá yfir réttinn

Ávaxtabakki er alltaf góð hugmyndir, ávextir eru bæði ótrúlega góðir og algjört augnayndi. Ég skar niður mína eftirlætis ávexti sem eru melóna, ananas, kíví, jarðarber og bláber. 

Granóla, grískt jógúrt, fersk bláber og hunang fara einstaklega vel saman. Hér finnið þið uppskrift að gómsætu granóla.

Ég vona að þið njótið vel. 

xxx

Eva Laufey Kjaran Hermannsdóttir

Páskarnir mínir

Páskarnir voru mjög ljúfir hjá okkur, það var eingöngu slappað af og borðað. Það var gott að hafa fjölskylduna heima en þau búa í Noregi, það vantaði að vísu eldri systur mína hana Mareni og fjölskyldu hennar sem við söknuðum sárt. Páskarnir ganga einfaldlega út á það að njóta og vera með fólkinu sínu. Ég var endurnærð eftir þetta frí, að vísu var ég mjög spennt að hvíla súkkulaðið í bili enda borðaði ég á mig gat og meira til, það var ekki annað hægt þegar móðir mín töfrar fram veislumat á hverjum degi. Mig langaði að deila nokkrum myndum með ykkur og ég vona að þið hafið átt góða páska.

Ljúffengar andabringur í appelsínusósu a'la mamma 

Súkkulaðimúsin sem slær alltaf í gegn 

Nautalund með piparostasósu og gómsætu meðlæti, uppskriftin birtist hér á blogginu mjög fljótlega

Á páskadag var hægeldaður lambahryggur, ég sá um eldamennskuna þennan dag og leyfði mömmu að slappa af á meðan.

Bestu vinkonur, Rósirnar tvær. 

Að sjálfsögðu var spjallað mikið við fólkið okkar í Noregi.

Eftir allan þennan mat var voða gott að hreyfa sig aðeins, ó já það er alveg nauðsynlegt.

Ingibjörg Rósa stækkar með hverjum deginum sem líður og nú er hún sífellt að koma með eitthvað nýtt. Nú getur hún klappað, vinkað og sýnt okkur hvað hún er stór. Að sjálfsögðu erum við svakalega montin og það er svo skemmtilegt að fylgjast með henni þroskast. 

xxx

Eva Laufey Kjaran Hermannsdóttir

Instagram myndir @evalaufeykjaran

 1. Ingibjörg Rósa heimsótti mömmu sína í vinnuna og kunni bara vel við sig fyrir framan myndavélarnar. 

2. Vesturbæjarísinn klikkar ekki. 

 3. Á myndinni má sjá tvær Rósir að fagna því að sú stutta er byrjuð að klappa. 

4. Forsíðumynd á Lífinu, fylgirit Fréttablaðsins. 

 5. Svarið er nei, það er ekki hægt að vera meira krútt!

6. Ljúfur dagur í New York með heimsins bestu vinum, Stefán minn er bakvið myndavélina. 

7. Að sjálfsögðu var súkkulaðieggjagleði í vinnunni í vikunni. 

8. Það er ekkert betra í þessum heimi en þetta knús (og þessar kinnar).

9. Ég er heppnust, vinn með eintómum snillingum. 

10. Við Haddi fórum á árshátíð Icelandair um daginn, það var mjög skemmtilegt. 

 Ég vona að þið eigið gott páskafrí kæru lesendur. 

xxx

Eva Laufey Kjaran Hermannsdóttir