Döðlukaka með dásamlegri karamellusósu

Í þætti gærkvöldsins bakaði ég döðluköku með dásamlegri karamellusósu, þessi kaka er í alvörunni svo góð að þið verðið að prófa hana. Fullkomin í alla staði, ég segi ykkur það satt. Ég smakkaði hana í fyrsta sinn þegar ég vann á litlu kaffihúsi í Oxford fyrir nokkrum árum og það var ást við fyrsta smakk. Það má til gamans segja frá því að tökuteymið mitt var tæplega fimm mínútur að klára þessa köku, aldrei áður hefur neinn réttur horfið svo fljótt. Það er þess vegna rík ástæða fyrir ykkur að prófa kökuna um helgina,  þið eigið eftir slá í gegn :) 

Döðlukaka með heimsins bestu karamellusósu

• 5 msk sykur
• 120 g smjör, við stofuhita
• 2 egg
• 100 g hveiti 
• 210 g döðlur
• 1 tsk matarsódi
• 1/2 tsk kanill
• 1/2 salt
• 1/2 vanillu extract, eða dropar
• 1 1/2 tsk lyftiduft

 Aðferð: 

1. Best er að byrja á því að stilla ofninn í 180°C. 
2. Setjið döðlurnar í pott og látið vatn fljóta yfir, þegar vatnið nær suðu takið þá pottinn af hitanum og látið hann standa í 3 – 4 mínútur. Það er gott að stappa döðlurnar rétt aðeins með gaffli.
3. Blandið matarsóda saman við döðlumaukið og blandið því vel saman. Leyfið blöndunni að standa í svolitla stund.
4.  Næsta skref er að þeyta smjör og sykur saman þar til blandan verður létt og ljós, bætið einu og einu eggi saman við og gott er að þeyta í eina mínútu á milli. 
5. Setjið þurrefnin saman við ásamt vanillu. Þeytið í smá stund og bætið síðan döðlumaukinu saman við í þremur skömmtum.
6.  Smyrjið hringlaga form, mér finnst best að nota smelluform og hellið deiginu í formið. Bakið við 180°C í 35 – 40 mínútur.

Heimsins besta karamellusósa

• 120 g smjör
• 1 1/2 dl rjómi
• 120 g púðursykur

1. Hitið öll hráefnin í potti þar til karamellan fer að sjóða, hrærið reglulega í pottinum eða þar til þið hafið náð ágætri þykkt á karamellunni. Ég vil ekki hafa hana of þykka og ég hræri þess vegna ekki of lengi. Þessa sósu er hægt að bera fram með flestum eftirréttum, en hún er algjört lostæti. 

Berið kökuna fram með rjóma eða ís... og njótið vel <3 

Missið ekki af Matargleði Evu öll fimmtudagskvöld klukkan 19:25 á Stöð 2. 

xxx

Eva Laufey Kjaran Hermannsdóttir

Öll hráefni sem voru notuð í þessar uppskriftir fást í verslunum Hagkaups

D

Beef Bourguignon, hinn fullkomni vetrarmatur.

Í þætti gærkvöldsins eldaði ég meðal annars þennan guðdómlega rétt sem kallast 'Beef bourguignon'. Þegar við Haddi fórum til Parísar í haust smakkaði ég réttinn á litlu sætu veitingahúsi í borginni og ég kolféll fyrir honum. Hægeldað nautakjöt í rauðvínssósu og fullkomin kartöflumús, ég fæ vatn í munninn við það eitt að skrifa niður uppskriftina fyrir ykkur. Nautakjötið verður svo bragðmikið og safaríkt að það er algjör óþarfi að tyggja það, svo mjúkt er það. Þetta er hinn fullkomni vetrarmatur sem ég mæli innilega með að þið prófið. Ég lofa ykkur því að þið eigið eftir að elda hann aftur og aftur. 

Beef Bourguignon 

• 1 msk smjör
• 1 msk ólífuolía
• 600 g nautakjöt, skorið í litla bita
• salt og pipar 
• skallottulaukar, má líka nota venjulegan lauk en þá er notaður 1 stór laukur
• 1 1/2 sellerí stilkur
• 2 gulrætur
• 4 sveppir
• 500 ml - 600 ml nautakjötssoð (vatn + 2 teningar)
• 1 glas gott rauðvín
• 3 hvítlauksrif
• 3 lárviðarlauf
• 5 greinar tímían
• 3 greinar rósmarín
• handfylli fersk steinselja 

Aðferð: 

1. Hitið olíu og smjör í potti og steikið nautakjötið, kryddið til með salti og pipar. Skerið niður beikon og bætið út í pottinn, steikið í smá stund. 
2. Skerið sellerí, gulrætur og sveppi í litla bita og setjið út í pottinn, rífið niður hvítlauk og hrærið vel í pottinum. 
3. Saxið niður steinselju og sáldrið yfir, setjið tímían greinar og rósmarín greinar í pottinn. Hellið soðinu og rauðvíninu saman við, leyfið réttinum að malla í 3 - 4 klukkustundir við vægan hita. Berið fram með sellerí-og kartöflumús.

Sellerí - og kartöflumús

• 4 stórar bökunarkartöflur
• 1/2 sellerírót
• salt og pipar
• rjómi
• smjör

Aðferð: Sjóðið kartöflur og sellerírót í 35 - 40 mínútur, hellið vatninu frá og stappið saman. Kryddið til með salti, pipar og bætið rjóma og smjöri saman við eftir smekk.

Haha, stundum er smá action í tökum þegar réttirnir eru farnir að sjóða of mikið ;)

Missið ekki af Matargleðinni öll fimmtudagskvöld klukkan 19:25 á Stöð 2. 

xxx

Eva Laufey Kjaran Hermannsdóttir 

Öll hráefni sem eru notuð í þessar uppskriftir fást í verslunum Hagkaups. 

Pottabrauð og æðislegt pestó úr öðrum þætti af Matargleði Evu

Í þætti gærkvöldsins bakaði ég þetta ofur einfalda brauð og gerði æðislegt pestó með sem tekur enga stund að búa til. Ég geri mjög oft pestó og það er lygilega einfalt, nota yfirleitt bara það sem ég á til hverju sinni og útkoman verður alltaf góð. Það er aðalatriði að eiga góða basilíku, hnetur, parmesan og ólífuolíu. Svo er hægt að bæta öðrum hráefnum við, það fer bara eftir stuðinu í manni :) 

Rósmarín-og hvítlauksbrauð með æðislegu pestói 

• 470 g brauðhveiti
• 370 ml volgt vatn
• 1 tsk salt
• 1/4 tsk þurrger
• 1 msk ferskt rósmarín
• 2 hvítlauksrif

Aðferð: 

1. Blandið þurrefnum saman í skál og hrærið vatni saman við. Setjið plastfilmu yfir skálina og geymið við stofuhita í að minnsta kosti tólf klukkustundir. 
2. Hellið deiginu á hveitistráðborð og stráið smá hveiti yfir deigið. Saxið rósmarín og hvítlauk mjög smátt og blandið við deigið. 
3. Hnoðið deigið rétt aðeins í höndunum og brjótið það saman þannig að það myndi kúlu. 
4. Smyrjið ofnpott með olíu og setjið pottinn inn í ofn við 230°C. 
5. Takið pottinn út úr ofninum, setjið brauðið í pottinn og inn í ofn í 30 mínútur. Þegar 30 mínútur eru liðnar takið þið lokið af pottinum og bakið áfram í 10 - 15 mínútur.  

Pestó með sólþurrkuðum tómötum og sólkysstum tómötum 

• 1 búnt basilíka
• 1 krukka sólþurrkaðir tómatar ca. 3 dl
• 1 krukka sólkysstir tómatar ca. 3 dl
• 100 g ristaðar furuhnetur
• 50 g parmesan
• salt og pipar
• 2 msk sítrónusafi
• 1 dl ólífuolía

Aðferð: Setjið allt í matvinnsluvél eða maukið með töfrasprota. Berið með með ljúffengu brauði.

Þið kannski sjáið það ekki en ég þarf að standa á tám til þess að ná upp í þessa hillu, ég er ekkert mjög hávaxin haha :) 

Missið ekki af Matargleðinni öll fimmtudagskvöld á Stöð 2 klukkan 19:25.

Njótið vel. 

xxx

Eva Laufey Kjaran Hermannsdóttir 

Öll hráefni sem eru notuð í þessar uppskriftir fást í verslunum Hagkaups. 

Ómótstæðileg jarðarberjaostakaka

Í fyrsta þætti af Matargleði Evu setti ég saman þessa ómótstæðilegu ostaköku með berjum. Það þarf ekki að baka þessa sem þýðir að það tekur ekki langan tíma að búa hana til. Ég elska ostakökur og mér finnst ofsalega gaman að útbúa þær, hægt er að leika sér með grunnuppskriftina að vild og bæta því sem manni finnst gott saman við. Eins og ég var búin að segja ykkur þá var viðfangsefni fyrsta þáttarins hjá mér hollar og fljótlegar uppskriftir en ég ákvað að setja þessa með, hún er kannski ekkert svo svakalega holl en hún getur verið það fyrir sálina þegar janúarlægðin nær hámarki og úti er kalt.. Þá er eiginlega bara nauðsynlegt að fá sér góða köku og njóta. Það finnst allavega mér :) 

Ómótstæðileg jarðarberjaostakaka

Botninn:

• 250 g hafrakex
• 150 g smjör, brætt

Aðferð: Bræðið smjör við vægan hita, setjið kexkökurnar í matvinnsluvél og maukið. Hellið smjörinu saman við og hellið síðan í form. Sléttið úr blöndunni með bakhlið á skeið og þrýstið vel. Mér finnst best að nota smelluform en þá er þægilegra að ná kökunni úr forminu. 

Ostafyllingin:

• 600 g hreinn rjómaostur, við stofuhita
• 3 msk. flórsykur
• 200 g hvítt súkkulaði, brætt yfir vatnsbaði
• 300 ml rjómi
• 1 tsk. vanilla
• 1 askja jarðarber

Aðferð: Þeytið rjómaostinn í smá stund, bætið flórsykrinum, rjómanum og vanillu saman við og hrærið. Bræðið súkkulaðið yfir vatnsbaði (kælið aðeins) og hellið út í ostablönduna í mjórri bunu. Skerið nokkur jarðarber og blandið saman við í lokin með sleif. Hellið blöndunni ofan á kexbotninn og inn í kæli. Geymið kökuna í kæli í nokkrar klukkustundir eða yfir nótt. Skerið niður ber og skreytið kökuna, sigtið smávegis af flórsykri yfir í lokin áður en þið berið kökuna fram.

Sannkölluð vetrardrottning.

Missið ekki af Matargleðinni öll fimmtudagskvöld klukkan 19:25 á Stöð 2. 

Njótið vel. 

xxx

Eva Laufey Kjaran Hermannsdóttir

Öll hráefni sem eru notuð í þessa uppskrift fást í verslunum Hagkaups. 

Smoothie skál sem er stútfull af hollustu

Í fyrsta þætti af Matargleði voru fljótlegar og hollar uppskriftir í aðalhlutverki, fyrsti rétturinn sem ég gerði í þættinum var einföld smoothie skál sem fangar auga og er algjört sælgæti. Vissulega er ekki alltaf tími á morgnana til þess að nostra við morgunmatinn og auðvitað er hægt að skella drykknum í drykkjarílat og bruna út. En, þegar tími gefst þá mæli ég með að þið gerið svona skál og njótið í botn. 

Smoothie skál með allskonar berjum 

• Handfylli spínat 
• 1/2 lárpera 
• 1 bolli frosið mangó 
• 1 bolli frosin jarðarber 
• 1 msk hnetusmjör 
• 1 banani 
• 1 tsk chia fræ 
• Möndlumjólk eða appelsínusafi, magn eftir smekk 
• Klakar 
• 2 - 3 msk grískt jógúrt

Aðferð: Setjið öll hráefnin í blandarann og blandið þar til drykkurinn verður silkimjúkur, hellið í skál og skreytið að vild með allskyns góðum berjum og ávöxtum. 

Missið ekki af Matargleði Evu öll fimmtudagskvöld á Stöð 2 klukkan 19:25. 

Njótið vel. 

xxx

Eva Laufey Kjaran Hermannsdóttir 

Öll hráefni sem voru notuð í þessa uppskrift fást í verslunum Hagkaups

Mexíkóskt salat í tortillaskál

Í fyrsta þætti af Matargleði Evu útbjó ég þetta ljúffenga mexíkóska salat í tortillaskál með lárperusósu. Ég elska mexíkóskan mat og þetta salat er tilvalið núna um helgina, stökkur kjúklingur með góðu grænmeti og gómsæt sósa sem setur punktinn yfir i-ið. Algjör veisla fyrir bragðlaukana :) 

Mexíkóskt salat í tortillaskál

Salatskálar

• Tortillahveitikökur
• Ólífuolía

Aðferð: Setjið smá ólífuolíu í pott, skál eða form sem þolir að fara inn í ofn. Setjið eina tortillahveitiköku í formið og mótið skál. Bakið við 180°C í 10–15 mínútur eða þar til kakan er orðin stökk. 

Lárperusósa:

• 1 lárpera
• 2 hvítlauksrif
• 4–5 msk. grískt jógúrt
• Safinn úr 1/2 límónu
• Skvetta af hunangi
• Salt og pipar

Aðferð: Setjið allt í matvinnsluvél eða maukið með töfrasprota, smakkið ykkur  til með salti og pipar. Best er að geyma sósuna í ísskápnum í smá stund áður en þið berið hana fram. 

Salatið:

• 800 g kjúklingakjöt, helst kjúklingalæri með skinni
• Salt og pipar
• 1/2 tsk. kumminkrydd
• 1 tsk. Bezt á allt-krydd
• 1 askja kirsuberjatómatar
• 1 laukur
• Handfylli kóríander
• 1 mangó
• Ólífuolía
• Límónusafi
• Gott kál, t.d. lambhagasalat og klettasalat
• Fetaostkubbur

Aðferð: Steikið kjúklinginn upp úr olíu, kryddið skinnhliðina með salti og steikið á þeirri hlið í tíu mínútur. Kryddið hina hliðina með salti, pipar, kumminkryddi og Bezt á allt-kryddblöndunni. Þegar kjúklingurinn er tilbúinn er gott að setja hann inn í heitann ofn á meðan salatið er útbúið.

Skerið allt grænmetið fremur smátt, blandið salsanu vel saman og bætið saman við lambhagasalatið og klettasalatið í lokin. Fyllið hverja tortillaskál með salati og skerið kjúklinginn í bita og raðið yfir. Setjið væna skeið af lárperusósu yfir og myljið fetaost rétt í lokin yfir allt salatið. 

Missið ekki af Matargleði Evu öll fimmtudagskvöld á Stöð 2 klukkan 19:25. 

Njótið vel. 

xxx

Eva Laufey Kjaran Hermannsdóttir 

Öll hráefni sem voru notuð í þessa uppskrift fást í verslunum Hagkaups.