Djúsí pizzur á þrjá vegu

Í síðustu viku átti ein af mínum bestu vinkonum afmæli og það vildi einnig þannig til að sama dag var fyrsti þátturinn af nýju matreiðsluþáttunum mínum að byrja, það var þess vegna heldur betur tilefni til þess að bjóða heim í pizzapartí og smá freyðvínsdrykkju.

Þegar ég fæ fólk heim í mat þá elska ég að bera fram einfalda rétti, ég nenni ómögulega að standa sveitt þegar gestirnir mæta og vil heldur hafa þetta afslappað og þægilegt. Það er líka mikill plús að bjóða upp á mat sem þú getur undirbúið með svolitlum fyrirvara. Eitt af því sem mér þykir skemmtilegast að bjóða upp á eru pizzur á nokkra vegu, það er brjálæðislega einfalt og slær alltaf í gegn.

Ég bauð stelpunum upp á þrjár pizzur, hráskinkupizza með ferskum tómötum, klettasalati og parmesan, ostaveislu sem er mitt uppaáhald borin fram með sultu og mexíkósk pizza með ostasósu, kjúkling og doritos snakki. Hér koma uppskriftirnar, ég mæli með að þið prófið þessar næst þegar ykkur langar í pizzu og ég vona að þið njótið vel. 

Pizzadeig 

·                     2 1/2 dl volgt vatn 

·                     2 tsk þurrger 

·                     2 tsk hunang 

·                     2 msk ólífuolía 

·                     400 - 450 g brauðhveiti frá Kornax

Aðferð: 

1. Leysið gerið upp í volgu vatni og það er afar mikilvægt að gerið sé volgt.
2. Bætið hunangi saman við og hrærið vel í. Þegar byrjar að freyða í skálinni er gerið klárt.
3. Blandið olíu og hveitinu saman við í hrærivélaskál. Þið getið auðvitað hnoðað deigið í höndunum en mér finnst langbest að nota hnoðarann á hrærivélinni, það ferli tekur um það bil 4 - 6 mínútur. 
4. Deigið er tilbúið þegar það er orðið að kúlu og klístrast ekki við hrærivélaskálina. Setjið viskastykki yfir skálina og leyfið deiginu að hefa sig í klukkustund. 

Ostaveisla 

Þessi pizza er án efa ein af mínum uppáhalds pizzum og við vorum allar sammála um að þessi væri æðislega góð, ef þið eruð mikið fyrir ost þá þurfið þið endilega að prófa þessa. Fyrr en síðar!

Hráefni:

• 1 pizzadeig
• 2 - 3 hvítlauksolía 
• Rifinn mozzarella ostur 
• Rifinn parmesan ostur 
• 1 camenbert
• 1/2 piparostur 

Aðferð: Fletjið út pizzadeigið og leggið á pappírsklædda ofnplötu. Smyrjið botninn með hvítlaukssósunni og dreifið rifnum osti yfir. Skerið camenbert og piparost í bita og setjið á botninn. Bakið við  220°C í 10 - 12 mínútur. Berið fram með sultu og njótið vel. 

 Það er nauðsynlegt að skála á góðum dögum. Við fengum okkur brjálæðislega gott vín í fordrykk sem passaði mjög vel með pizzunum, ég verð að mæla með þessu víni. Ég hafði ekki smakkað það áður en ég mun sannarlega kaupa það aftur. Ótrúlega fallegt og gott vín sem er á fínu verði, það heitir Aviva Pink Gold. Mæli með því í sumar!

Mexíkósk pizza með ostafyllingu

Þessi pizza er undursamlega góð og stelpurnar voru hrifnastar af henni, en ostasósan setur punktinn yfir i-ið.

Hráefni:

• 1 pizzadeig 
• Ostasósa 
• 1 mexíkóostur 
• 1 dós sýrður rjómi 
• 1 kjúklingabringa eða sambærilegt magn af kjúklingakjöti 
• 1/2 rauðlaukur 
• Rifinn ostur 
• Doritos

Aðferð: 

Útbúið ostasósuna með því að skera mexíkóostinn í teninga og mauka saman við sýrða rjómann með töfrasprota eða í matvinnsluvél. Fletjið út pizzadeigið og leggið á pappírsklædda ofnplötu. Smyrjið botninn með ostasósunni og dreifið rifnum osti yfir. Skerið kjúklinginn í bita og dreifið yfir ásamt smátt skornum rauðlauk.  Bakið við 220°C í 10 - 12 mínútur. Sáldrið Doritos flögum yfir pizzuna þegr hún kemur út úr ofninum. 

Pizza með hráskinku

Ég fæ aldrei nóg af þessari pizzu og gjörsamlega elska hana. Hún er agalega góð með rauðvínsglasi, já ég segi ykkur það satt. 

Hráefni:

• 1 pizzadeig
• 1 skammtur pizzasósa (mér finnst líka gott að setja tómata passata)
• Rifinn ostur 
• 1 bréf hráskinka ca. 8 sneiðar
• Klettasalat, magn eftir smekk
• Tómatar
• Parmesan ostur 
• Salt og nýmalaður pipar 

Aðferð: Fletjið út pizzadeigið og leggið á pappírsklædda ofnplötu. Smyrjið botninn með sósunni og dreifið rifnum osti yfir. Bakið við 220°C í 10 - 12 mínútur. Raðið hráskinkunni á pizzuna þegar hún kemur út úr ofninum ásamt klettasalti, smátt skornum tómötum og nýrifnum parmesan. 

Ég vona að þið hafið fengið hugmyndir að góðu pizzakvöldi kæru vinir. 

Njótið vel. 

xxx

Eva Laufey Kjaran Hermannsdóttir

Öll hráefnin í þessa uppskrift fást í verslunum Hagkaups. 

Spínat- og ostafyllt pasta sem bráðnar í munni

Ef ég ætti að velja minn uppáhalds pastarétt þá væri það án efa þessa hér, hann sameinar allt það sem mér þykir gott. Pasta, nóg af osti, góða sósu og spínat. Mjög djúsí og góður réttur sem þið ættuð endilega að prófa. 

Cannelloni

fyrir þrjá til fjóra

•      Ólífuolía
•      1 laukur 
•      3 hvítlauksrif 
•      2 dósir hakkaðir tómatar 
•      Salt og nýmalaður pipar 
•      Handfylli basilíka 
•      1 lárviðarlauf
•      ½ kjúklingateningur
•      500 g spínat
•      ½ tsk múskat 
•      Börkur af hálfri sítrónu 
•      500 g kotasæla 
•      1 egg 
•      4 msk nýrifinn parmesan ostur
•      200 g cannelloni pasta 
•      150 mozzarella ostur 
•      Rifinn ostur 

Aðferð:

1. Stillið ofninn í 180°C. Steikið spínatið upp úr ólífuolíu á pönnu við vægan hita, þegar spínatið er orðið mjög mjúkt færið það yfir skurðbrettið og saxið mjög smátt.
2. Hitið ólífuolíu í potti og steikið smátt saxaðan lauk þar til hann verður glær og mjúkur í gegn, pressið hvítlauksrif og bætið út í pottinn ásamt hökkuðum tómötum, lárviðarlaufi og hálfum kjúklingatening. Kryddið til með salti og pipar og leyfið sósunni að malla í nokkrar mínútur við vægan hita.
3. Í skál blandið saman söxuðu spínati, kotasælu, eggi, parmesan osti, nýrifnu múskati, salti, pipar og basilíkulaufum
4. Fyllið cannelloni pastarörin með ljúffengu ostafyllingunni, gott er að nota sprautupoka en annars má fylla rörin með skeiðum. 
5. Setjið sósu í eldfast mót og raðið pastarörum yfir. Hellið sósunni yfir og dreifið vel af rifnum osti og ferskum mozzarella yfir. Í lokin er gott að rífa vel af parmesan yfir.
6. Bakið við 180°C í 30-35 mínútur. Ef osturinn er orðinn mjög brúnn of fljótt er gott ráð að leggja bökunarappír yfir. 
7.  Berið fram með fersku salati.

Njótið vel. 

Missið ekki af Matargleði Evu öll fimmtudagskvöld klukkan 19:25 á Stöð 2. 

Öll hráefni í þessa uppskrift fást í verslunum Hagkaups. 

Skyramisú

Flest þekkjum við ítalska eftirréttinn ,Tíramisú' og er hann einn af vinælustu eftirréttum heims. Ég ákvað að skipta út rjómaostinum út fyrir vanilluskyr og útkoman var stórkostleg. Ég elska, elska þennan eftirrétt og hvet ykkur til þess að prófa hann. Mjög einfaldur og inniheldur rjóma, súkkulaði, skyr og kaffi, semsagt veisla fyrir bragðlaukana og fullkomið eftir góða máltíð. 

Skyramísú 

• 2 egg
• 50 g sykur
• 500 g vanilluskyr
• 250 ml rjómi, þeyttur
• 1 tsk. Vanilla extract eða vanillusykur
• 200 g kökufingur (Lady fingers kex)
• 6-7 dl sterkt uppáhellt kaffi
• Gott kakó, magn eftir smekk
• Súkkulaði, smátt saxað

Aðferð:

1. Stífþeytið egg og sykur saman þar til þykk froða myndast.
2. Blandið skyrinu við eggjablönduna og hrærið vel.
3. Bætið vanillunni og rjómanum (þeyttur) varlega saman við með sleif. Leggið blönduna til hliðar í stutta stund á meðan þið hugið að kökunum.
4. Hellið upp á sterkt kaffi og setjið kaffið í skál.
5. Veltið kökufingrunum upp úr kaffinu og skiptið þeim niður í desert skálar eða fallega skál.
6. Setjið helminginn af skyrblöndunni ofan á kökufingurna, stráið svolitlu kakói yfir og smátt söxuðu súkkulaði. Endurtakið leikinn þar til hráefnið er búið.
7. Í lokin er stráð vel af kakói og smátt söxuðu súkkulaði yfir réttinn.
8. Það þarf að kæla þennan rétt í lágmark 4 klukkustundir áður en þið berið hann fram, best finnst mér að geyma hann í kæli yfir nótt. 

Missið ekki af Matargleðinni öll fimmtudagskvöld á Stöð 2. 

Njótið vel. 

xxx

Eva Laufey Kjaran Hermannsdóttir 

Hráefnin sem eru notuð í þessa uppskrift fást í verslunum Hagkaups. 

Tryllingslega gott grænmetislasagna

Ég deildi þessari uppskrift með áhorfendum Stöðvar 2 í þættinum mínum Matargleði á síðasta ári, einhverra hluta vegna rataði uppskriftin ekki hingað inn og nú bætum við úr því. Það er svo sannarlega alltaf staður og stund fyrir gott lasagna og ég mæli með að þið prófið þessa uppskrift. Gott grænmeti, pasta og góður ostur. Þurfum við nokkuð eitthvað meira? Ég þori að lofa ykkur að þið eigið eftir að elda uppskriftina aftur og aftur - hún er sáraeinföld og þið getið auðvitað notað það grænmetið sem þið eigið til í ísskápnum hverju sinni. 

Grænmetislasagna með pestókartöflum

Grænmetislasagna

Ólífuolía

1 laukur

4 hvítlauksrif

2 gulrætur

2 sellerístangir 

1 rauð paprika

1 græn paprika

½ kúrbítur

150 g spergilkál

1 dós niðursoðnir tómatar með basilíku

2 msk tómatmauk eða tómatpúrra

600 ml grænmetissoð (soðið vatn + grænmetisteningur)

salt og pipar

Handfylli fersk basilíkulauf

Handfylli fersk steinselja

1 dós kotasæla

1 dós sýrður rjómi

Parmesan ostur, magn eftir smekk

Salt og nýmalaður pipar

Lasagneplötur, ferskar eða soðnar samkvæmt leiðbeiningum á pakkanunm.

Rifinn Mozzarella ostur, magn eftir smekk

Aðferð: 

1. Hitið olíu á pönnu. Skerið grænmetið smátt og steikið við vægan hita í nokkrar mínútur eða þar til grænmetið er farið að mýkjast. Bætið pressuðum hvítlauk út pönnuna í lokin og steikið í smá stund. Gott er að setja smá klípu af smjöri.
   
   
2. Bætið niðursoðnum tómötum, tómatmauki, ferskri basilíku, grænmetissoðinu á pönnuna og látið sjóða í 30 mínútur við vægan hita. Kryddið til með salti og pipar.
   
   
3. Á meðan grænmetið mallar á pönnunni búið þið til hvítu sósuna en þið blandið saman kotasælu, sýrðum rjóma, 50 g af rifnum parmesan, salti og pipar. Blandið vel saman.
   
   
4. Setjið grænmetisblöndu í botninn á eldföstu móti,  því næst lasagnaplötur, hvítu sósuna, aftur grænmetisblönduna og endurtakið leikinn einu sinni til tvisvar.
   
   
5. Dreifið vel af rifnum mozzarella osti yfir og nýrifnum parmesan.
   
   
6. Bakið í ofni við 180°C í 40 – 45 mínútur.
   
   

Kartöflur með kasjú- og klettasalatpestói

Kartöflur

150 g kasjúhnetur

Handfylli fersk basilíkulauf

Handfylli klettasalat

50 g parmesan ostur

Nóg af olífuolíu (smekksatriði hvað þið viljið hafa pestóið þykkt)

Salt og pipar

Skvetta af sítrónusafa 

Aðferð:

1. Sjóðið kartöflur með hýðinu, saltið vel.
   
   
2. Maukið saman kasjúhnetur, basilíku, klettasalat, parmesan ost, ólífuolía, salt, pipar og sítrónusafa með töfrasprota eða matvinnsluvél.
   
   
3. Þegar kartöflurnar eru tilbúnar þá hellið þið vatninu af þeim og blandið þeim saman við pestóið. 

Njótið vel kæru vinir. 

xxx

Eva Laufey Kjaran Hermannsdóttir

Allt hráefnið sem notað er í þessa uppskrift fæst í verslunum Hagkaups. 

Súkkulaði panna cotta með heitri berjasósu

Ítalir eru ekki eingöngu þekktir fyrir gott pasta og góðar pizzur en eftirréttirnir þeirra eru guðdómlegir. Einn af mínum eftirlætis eftirréttum er súkkulaði Panna Cotta með berjasósu, þið getið auðveldlega skipt dökka súkkulaðinu út fyrir hvítt súkkulaði. Mér finnst mjög fínt að bera fram þennan eftirrétt í veislum, sér í lagi vegna þess að ég get gert hann kvöldinu áður og það minnkar stressið sem kemur stundum upp þegar von er á mörgum í mat. Það er nefnilega svo fínt að undirbúa nokkra rétti fyrirfram og þessi er einmitt þannig að hann er betri því lengur sem hann fær að vera í kælinum, upplagt að gera hann kvöldinu áður og leyfa honum að jafna sig í rólegheitum yfir nótt. 

Sannkölluð súkkulaðisæla sem allir elska. 

 Súkkulaðibúðingur með heitri berjasósu

• 500 ml rjómi

• 150 g suðusúkkulaði 
• 2 msk sykur
• fræin úr 1 vanillustöng 

• 2 plötur matarlím


Aðferð: 

Leggið matarlímsblöð í kalt vatn í 4 – 6 mínútur.

Á meðan hitið þið rjóma að suðu og bætið súkkulaði saman og bræðið í rólegheitum.

Hrærið í á meðan og þegar súkkulaðið er bráðnað bætið þið sykri og vanillu saman við,  í lokin kreistið þið vökvann frá matarlímsblöðum og hrærið út í vanillublönduna.

Hellið í skálar og geymið í kæli að minnsta kosti í tvær til þrjár klukkustundir, best  yfir nótt. 


Heit berjasósa með vanillu 

• 3 dl bláber 
• 3 dl hindber 
• 2 dl sykur 
• safinn og börkur af hálfri appelsínu 
• ½ tsk kanill
• fræin úr 1 vanillustöng  

Aðferð: 

Setjið öll hráefnin í pott og náið upp suðu, leyfið sósunni að malla í 3 – 5 mínútur. Berið fram með súkkulaðibúðingnum og njótið vel. 

Njótið vel.

xxx

Eva Laufey Kjaran Hermannsdóttir

Allt hráefni sem notað er í þessa uppskrift fæst í verslunum Hagkaups.

Einfaldasta brauð í heimi og guðdómleg bruschetta með Mozzarella

Í gærkvöldi ákvað ég að skella í einfaldasta brauð veraldar, já ég er að segja ykkur það satt. Ég átti hveiti, þurrger, salt og vatn... og meira var það ekki. Það eina sem þessi uppskrift krefst er pínu þolinmæði, brauðið þarf að hefast í 12 - 24 klst en ef þið skellið í deigið að kvöldi þá er það tilbúið um morguninn og eina sem þarf þá að gera er að skella því inn í ofn og eftir 45 mínútur er fína og góða brauðið tilbúið. (sem lítur út fyrir að hafa verið rosa mikil vinna)

Brauðið er auðvitað best nýbakað og ákvað ég að nota það í bruschettu með tómötum og Mozzarella. Algjört lostæti og svo einfalt, ég elska allt sem er einfalt þá sérstaklega á sunnudögum þegar manni langar í eitthvað gott en nennir kannski ekki of miklu vinnuframlagi í eldhúsinu ;) 

Pottabrauðið vinsæla 

Brauðbaksturinn verður ekki einfaldari en einmitt þessi, þetta brauð er mjög vinsælt víða um heim og það er ekki að ástæðulausu. Pottabrauð sem öllum þykir gott, vel stökkt að utan og mjúkt að innan. 

• 500 g Kornax hveiti 
• 4 dl kalt vatn 
• 1/4 tsk þurrger 
• 1,5 tsk salt 

Aðferð:

1. Blandið öllum hráefnum saman í skál, deigið er svolítið klístrað og blautt en þannig á það að vera.  
2. Setjið plastfilmu yfir skálina og látið deigið standa við stofuhita í lágmark 12 klst - 24 klst. Mér finnst best að skella í þetta brauð áður en ég fer að sofa, þá get ég annaðhvort bakað það um morguninn eða þegar ég kem heim eftir vinnu og borið það fram með kvöldmatnum. 
3. Eftir 12 - 24 klst stráið þið hveiti á borðflöt og leggið deigið ofan á, hnoðið í smá stund eða þar til deigið er ekki klístrað. Leggið viskastykki yfir deigið og leyfið því að hefast í klukkustund til viðbótar. 
4. Hitið ofninn í 250°C. Setjið ofnpott með loki inn í ofn í 15 mínútur. (Potturinn verður að vera heitur þegar deigið fer í hann). Setjið deigið í pottinn og bakið í 30 mínútur með lokinu á og í 15 mínútur til viðbótar án þess að hafa lok. 
5. Leyfið brauðinu að kólna í svolitla stund áður en þið berið það fram.

Bruschetta með kirsuberjatómötum og mozzarella 

• Gott brauð t.d. pottabrauðið  
• 2 msk ólífuolía 
• 2 marin hvítlauksrif
• 1 askja kirsuberjatómatar 
• Litlar Mozzarellakúlur, magn eftir smekk 
• 1 msk. balsamik edik
• Smátt söxuð fersk basilíka, handfylli
• Salt og nýmalaður pipar  
• Klettasalat

Aðferð: Hitið ofninn í 180°C. Skerið brauðið í sneiðar og leggið á pappírsklædda ofnplötu, sáldrið olíu yfir brauðsneiðarnar og bakið í ofni í nokkrar mínútur. Þegar brauðið er tilbúið og orðið stökkt nuddið sárinu á hvítlauksrifinu ofan á hverja brauðsneið. (Ég notaði nýbakað pottabrauð og sleppti því að rista brauðið í ofni, það var nógu heitt og gott)

Skerið tómata í tvennt og skafið innan úr þeim, Mozzarella osturinn er skorinn í bita og hvítlaukurinn pressaður. Blandið öllu saman ásamt basilíku, olíu, balsamik edik og salti og nýmöluðum pipar. Setjið klettasalat ofan á brauðið og því næst tómatblönduna. Í lokin er voða gott að dreifa smá balsamik gljáa yfir svona rétt til að setja punktinn yfir i-ið. 

Njótið vel. 

xxx

Eva Laufey Kjaran Hermannsdóttir

Allt hráefni sem notað er í þessa uppskrift fæst í verslunum Hagkaups.