Súper gott kjúklinga Enchiladas með Mexíkó osti

Kjúklinga Enchiladas með Mexíkó osti 

• Ólífuolía
• 1 rauðlaukur
• 1/2 rautt chili
• 1 rauð paprika
• 1 græn paprika
• 2 hvítlauksrif 
• salt og pipar
• 2 kjúklingabringur 
• 1 dós niðursoðnir tómatar 
• 1 msk tómatpúrra
• 1 mexíkóostur 
• 1 dl vatn
• Kóríander 
• Tortilla kökur
• Rifinn mozzarella
• Sýrður rjómi 
• Salsa 

Aðferð: 

1.  Hitið olíu á pönnu, skerið niður grænmetið. 
2.  Steikið laukinn í smá stund, bætið paprikum og chili út á pönnuna. 
3. Pressið hvítlauksrif og bætið þeim einnig út á pönnuna. 
4. Steikið kjúklingabringurnar á annarri pönnu eða eldið í ofni við 180°C í 20 mínútur. Kryddið bringurnar með kjúklingakryddi. Rífið bringurnar niður og bætið út á pönnuna. 
5. Hellið tómötum og tómatmauki saman við. 
6. Kryddið til með salti, pipar og smátt söxuðum kóríander. 
7. Skerið mexíkó ostinn í litla bita eða rífið niður, setjið ostinn á pönnuna og hrærið. 
8. Bætið smávegis af vatni saman við og leyfið þessu að malla í nokkrar mínútur.
9. Setjið tortillakökur í eldfast mót, fyllið þær með kjúklingablöndunni og rúllið upp. 
10. Sáldrið rifnum mozzarella osti yfir, ég reif einnig niður eina stóra mozzarella kúlu yfir. Það kom mjög vel út.
11. Bakið við 180°C í ca. 20 - 25 mínútur eða þar osturinn er gullinbrúnn. 
12. Berið fram með sýrðum rjóma, salsa, ferskum kóríander og gjarnan nachos flögum. 

Njótið vel. 

xxx

Eva Laufey Kjaran Hermannsdóttir 

Allt hráefni sem notað er í þessa uppskrift fæst í verslunum Hagkaups.

Geggjað kjúklingapasta með heimagerðu pestó

Ég átti frábæra helgi með fólkinu mínu, en helgin byrjaði á vinkonudekri á Hótel Grímsborgum sem var algjört æði og ég ætla að segja ykkur betur frá því í vikunni. Svo fórum við fjölskyldan á Akranes og skutluðumst síðan á Hvolsvöll. Það var svo gott að komast aðeins í sveitina, leika við Ingibjörgu Rósu og almennt njóta. Allavega á milli þess sem ég vann í lokaritgerðinni sem ég og hópurinn minn skiluðum af okkur í gær og á morgun verjum við ritgerðina og þá er komin smá skólapása. Ekki nema einn áfangi eftir og því sé ég glytta í sumarfrí í skólanum... sem verður kærkomið.

Þetta var semsagt mjög góð helgi og ég vona að þið hafið öll notið hennar. Nú er hins vegar komin ný vika og tími til kominn að deila með ykkur einfaldri uppskrift sem tekur enga stund að búa til. Þessi uppskrift er að mínu mati eftirlæti allra og svo einföld að þið eigið ekki eftir að trúa því. Ég byrja á því að deila uppskriftinni að pestóinu sem er algjör snilld og hægt að borða með nánast öllu, sérstaklega gott í pastarétti eins og í þessa hér fyrir neðan. Ég sýndi einnig aðferðina á Instagram reikningnum mínum en þið finnið mig þar undir @evalaufeykjaran - sem og á Snapchat. 

Gómsætt basilíkupestó með límónu

Einföld matreiðsla 

Tími frá upphafi til enda : 25 mínútur 

• Handfylli fersk basilíka 
• Handfylli spínat
• 100 g ristaðar kasjúhnetur 
• 50 g ferskur parmesan ostur 
• Safinn úr hálfri límónu 
• Salt og pipar, magn eftir smekk 
• 1-2 dl ólífuolía, magn eftir smekk 

Aðferð: 

1. Setjið öll hráefnin í matvinnsluvél eða maukið með töfrasprota. Þið stjórnið þykktinni á pestónu með ólífuolíunni. Berið strax fram og njótið. 

Kjúklingapasta með heimagerðu pestó 

• 300 g penne heilhveiti pasta 
• 2 kjúklingabringur
• 1 askja kirsuberjatómatar 
• 1/2 kúrbítur 
• 3 hvítlauksrif 
• Ólífuolía 
• Kjúklingakrydd
• Salt og pipar 
• 1 poki litlar Mozzarella kúlur (eða ein stór) 

Aðferð:

1. Steikið kjúklingabringurnar á hvorri  hlið í 2 mínútur, kryddið til með kjúklingakryddi, salti og pipar. Setjið bringurnar í eldfast mót, skerið niður kirsuberjatómata, kúrbít og hvítlauk og bætið í formið með bringunum. Eldið bringurnar og grænmetið í ofni við 180°C í 20 mínútur. 
2. Sjóðið pasta upp úr söltu vatni samkvæmt leiðbeiningum á pakkanum.
3. Útbúið pestó, uppskriftin er hér að ofan. 
4. Skerið kjúklingabringurnar í litla bita og blandið öllum hráefnum saman í skál. 
5. Í lokin skerið þið litlar mozzarella kúlur í tvennt og bætið við. 

Berið strax fram og njótið vel. 

Ingibjörg Rósa var alsæl með réttinn og hvetur að sjálfsögðu alla til þess að prófa. 

Njótið vel. 

xxx

Eva Laufey Kjaran Hermannsdóttir 

Öll hráefnin í þessa uppskrift fást í verslunum Hagkaups.

Æðislegt andasalat með ristuðum valhnetum, perum og geitaosti.

Í þætti kvöldsins lagði ég áherslu á rétti sem tilvalið er að elda um páskana. Þetta andasalat með steiktum perum, stökkum valhnetum og geitaosti er yfirgengilega gott. Andabringur eru auðvitað algjört sælgæti og eru frábærar í salöt, páskamaturinn þarf alls ekki að vera þungur í maga og tilvalið fyrir þá sem kjósa léttari rétti að bera þennan rétt fram um páskana. 

Andasalat með stökkum valhnetum og geitaosti

• 2 andabringur
• 1 poki klettasalat
• 1 granatepli
• 2 perur
• 1 tsk ólífuolía
• 1 tsk smjör
• Handfylli ristaðar valhnetur
• Geitaostur, magn eftir smekk
• Salatdressing
• 1 tsk rauðvínsedik
• 1 dl jómfrúarolía
• 2 skallottulaukar
• 1 tsk dijon sinnep
• Salt og pipar

Aðferð:

1. Skerið aðeins í andabringurnar og steikið á pönnu. Kryddið bringuna til með salti og pipar og steikið bringurnar í 3-4 mínútur á hvorri hlið. Setjið andabringurnar í eldfast mót og inn í ofn við 180°C í 8 - 10 mínútur. Eins og með allt kjöt er mikilvægt að leyfa því að hvíla í fáeinar mínútur áður en það er skorið, en það kemur í veg fyrir að safinn leki út og kjötið verði þurrt. 
2. Skerið perur í sneiðar og steikið upp úr olíu og smjöri í 1-2 mínútur á hvorri hlið.
3. Þurristið valhnetur á pönnu. 
4. Útbúið franska salatdressingu, saxið niður skallottulauk mjög smátt og setjið í skál. Blandið jómfrúarolíu, sinnepi og rauðvínsediki saman við og hrærið vel í dressingunni.
5. Veltið kálinu upp úr dressingunni og leggið salatið á fat, raðið perum yfir, skerið andabringuna í sneiðar og leggið yfir, myljið geitaosti, sáldrið valhnetum og dreifið granateplum yfir salat í lokin. 
6. Berið strax fram og njótið vel. 

Missið ekki af Matargleði Evu öll fimmtudagskvöld klukkan 19:25 á Stöð 2. 

xxx

Eva Laufey Kjaran Hermannsdóttir

Öll hráefni í þessa uppskrift fást í verslunum Hagkaups. 

Risotto með ferskum aspas og stökku beikoni

Risotto er guðdómlegur hrísgrjónaréttur sem sameinar allt það sem mér þykir gott. Hægt er að útfæra réttinn á marga vegu og í þætti gærkvöldsins eldaði ég Risotto með ferskum aspas, stökku beikoni og sveppum. Einfalt og brjálæðislega gott með miklum parmesan. Ég pantaði mér Risotto á veitingahúsi í London fyrir nokkrum árum og kolféll fyrir honum, silkimjúkur og ómótstæðilega góður...  

Risotto með ferskum aspas og stökku beikoni

• 1 msk ólífuolía + klípa smjör
• 1 laukur
• 1 sellerí stilkur
• 2 hvítlauksrif
• 4 dl arborio hrísgrjón
• 250 g smátt skorinn aspas
• 8 sveppir, smátt skornir
• 8 dl kjúklingasoð
• 2 dl hvítvín
• Salt og pipar
• 60-80 g parmesan ostur
• 2 msk smjör

Ofan á:

• 100 g beikon
• 100 g aspas
• 100 g sveppir

Aðferð:

1. Hitið ólífuolíu í potti og steikið laukinn, sellerí og hvítlauk í 2-3 mínútur. Bætið smátt söxuðum aspas og smátt söxuðum sveppum út í pottinn og steikið, bætið því næst arborio grjónum út í og hrærið stöðugt. 
2. Hellið hvítvíninu saman við og leyfið því að sjóða niður, bætið næst kjúklingasoðinu smám saman viðog hrærið mjög vel á milli.
3. Bætið parmesan ostinum og smjörinu saman við í lokin og kryddið til með salti og pipar. Steikið beikon, aspas og sveppi á pönnu þar til hráefnin eru vel stökk. Setjið Risotto á disk og skreytið með stökku beikoni, aspas og sveppum. Rífið gjarnan niður meiri parmesan og stráið yfir réttinn í lokin. 

Missið ekki af Matargleðinni öll fimmtudagskvöld klukkan 19:25 á Stöð 2.

Njótið vel.

xxx

Eva Laufey Kjaran Hermannsdóttir

Öll hráefnin í þessa uppskrift fást í verslunum Hagkaups.

Entrecôte með chili bernaise og frönskum kartöflum

Í þætti kvöldsins lagði ég áherslu á lúxus matseðil og setti saman þrjá ljúffenga rétti sem tilvalið er elda þegar þið viljið gera vel við ykkur. Nautasteik með öllu tilheyrandi er eitt af því besta sem ég get hugsað mér og ef ég ætla að elda eitthvað gott handa okkur Hadda þá verður þessi réttur yfirleitt fyrir valinu. Að vísu geri ég þá tvær sósu, annars vegar piparostasósu og hins vegar þessa ómótstæðilegu chili bernaise sósu sem ég fæ hreinlega ekki nóg af og gæti borðað hana eina og sér. Hún er algjört æði! Þið vitið hvernig þetta er, ef smjörið er í aðalhlutverki þá er bókað mál að rétturinn sé góður.

Entrecôte með chili bernaise og ljúffengum kartöflum

• 5 eggjarauður
• 250 g smjör, skorið í teninga
• 1 msk Bernaise Essence
• 2 – 3 tsk. Fáfnisgras, smátt saxað
• Salt og nýmalaður pipar

Bernaise Essence

• 1 dl hvítvínsedik
• 8 svört piparkorn
• 2 tsk fáfnisgras
• 3 skallottulaukar, smátt saxaðir
• ½ rautt chili, smátt skorið

Aðferð:

1. Útbúið Bernaise Essence, setjið hvítvínsedik, skallottulauk, fáfnisgras, chili og svört piparkorn í pott og sjóðið saman þar til 1 msk af vökva er eftir. Sigtið vökvann og geymið til hliðar.
2. Þeytið eggjarauður yfir vatnsbaði og bætið smjörinu smám saman við, þetta er smá handavinna en er vel þess virði. Ef skálin er of heit takið þið hana af vatnsbaðinu og kælið, en haldið alltaf áfram að hræra. Það er mjög mikilvægt að skálin sé ekki of heit en annars eldast eggjarauðurnar.
3. Bragðbætið með Bernaise Essence, salti og pipar.
4. Gott er saxa niður ferskt fáfnisgras og chili og sáldra yfir sósuna rétt í lokin.

Franskar kartöflur

• Bökunarkartöflur
• Ólífuolía
• Salt

Aðferð:

1. Skerið bökunarkartöflurnar í jafn þykka strimla og leggið í ískalt vatn í nokkrar mínútur. Þerrið kartöflurnar mjög vel og leggið í eldfast mót eða á pappírsklædda ofnplötu.
2.  Bakið við 180°C í 30 - 35 mínútur eða þar til kartöflurnar eru gullinbrúnar. Snúið kartöflunum einu sinni til tvisvar á meðan þær eru í ofninum.

Nautakjöt

• Ólífuolía
• 2 entrecôte steikur (ca. 1 steik eða  200-250 g á mann)
• Salt og nýmalaður pipar
• Rósmarín grein
• 1 Hvítlaukur

Aðferð:

1. Hitið ólífuolíu á pönnu, steikið kjötið við háan hita í 2-3 mínútur á hvorri hlið. Kryddið til með salti og pipar. 
2. Gott er að setja rósmarín grein og hvítlauksrif út á pönnuna rétt í lokin ásamt smjörklípu. Leyfið kjötinu að hvíla í 5 mínútur áður en þið berið það fram.

Missið ekki af Matargleði Evu á fimmtudagskvöldum á Stöð 2 klukkan 19:25.

Njótið vel.

xxx

Eva Laufey Kjaran Hermannsdóttir

Öll hráefnin í þessa uppskrift fást í verslunum Hagkaups.

Ofnbakaður lax í sítrónu- og smjörsósu

Ef það væri hægt að finna lykt af matnum í gegnum sjónvarp/tölvu þá væruð þið eflaust kolfallin fyrir þessum ljúffenga rétti. Hann er það einfaldur að hann gæti flokkast sem skyndibiti, það tekur rúmlega fimmtán mínútur að búa hann til og er hann algjört sælgæti. Einfaldleikinn er of bestur og þessi réttur sannar það. 

Ofnbakaður lax með ferskum tómötum

• 800 g beinhreinsað laxaflak með roði
• Salt og pipar
• 1 sítróna, börkur og safi
• 5-6 msk smjör
• Ólífuolía
• 1 askja kirsuberjatómatar
• 1 stór tómatur
• 1 rauðlaukur
• Balsmikgljái
• Ólífuolía
• Handfylli basilíka 

Aðferð:

1. Leggið laxaflakið í eldfast mót, kryddið til með salti, pipar og nýrifnum sítrónuberki.
2. Sáldrið ólífuolíu yfir og smjöri. Bakið við 180°C í 10-12 mínútur.
3. Á meðan fiskurinn er í ofninum útbúið þið einfalt tómatasalat.
4. Skerið kirsuberjatómata, rauðlauk og saxið basilíkuna mjög smátt. Blandið öllum hráefnum saman í skál og kryddið til með salti og pipar. Hellið ólífuolíu og balsamikgljáa yfir, leyfið salatinu að standa inn í kæli áður en þið berið það fram með laxinum.
5. Þegar laxinn er tilbúinn færið þið hann á disk og leggið salsa yfir. Berið strax fram og njótið vel.

Missið ekki af Matargleðinni öll fimmtudagskvöld á Stöð 2. 

Njótið vel. 

xxx

Eva Laufey Kjaran Hermannsdóttir

Öll hráefni sem notuð voru í þessa uppskrift fást í verslunum Hagkaups. 

Bragðmikið og bráðhollt fiskitakkós úr Matargleði Evu

Fiskitakkós er algjör snilld til þess að fá fjölskylduna til að borða meira af fisk og grænmeti. Ég elska þessa uppskrift og geri hana mjög oft hér heima fyrir, það tekur enga stund að búa til þennan rétt og það er lygilega einfalt að baka sínar eigin tortillavefjur. Á föstudögum er hefð á mörgum heimilum að gera vel við sig og ég skora á ykkur að prófa þessa uppskrift, ég veit að þið eigið eftir að slá í gegn. 

Fiski takkós

Hveititortillur

• 100 g heilhveiti
• 60 g vatn
• smá sjávarsalt

Aðferð:

Blandið öllum hráefnum saman í skál, hnoðið í nokkrar mínútur á hveitistráðu borði. Setjið deigið í hreina skál og viskastykki yfir, leyfið deiginu að hefast í 30-60 mínútur eða þegar deigið hefur tvöfaldast að stærð. Eftir þann tíma fletjið þá deigið út í litlar pönnukökur og steikið á pönnu í mínútu á hvorri hlið. Setjið viskastykki yfir kökurnar svo þær verði ekki of þurrar. 

Mangósalsa

• 1 mangó 
• 1 lárpera 
• handfylli af kóríander 
• 1 rauð paprika 
• 1/2 rauðlaukur 
• ólífuolía 
• límónusafi 
• salt og pipar 
• 1 ananas
• 1 tómatur 

Aðferð: Skerið hráefnin afar smátt niður og blandið vel saman í skál. Best er að geyma salsa inn í ísskáp í hálftíma áður en þið ætlið að bera það fram. 

Fiskurinn

• 700 - 800 g fiskur, þorskur eða ýsa 
• salt og pipar
• 1 1/2 tsk paprikukrydd
• 1 tsk cumin krydd 
• ólífuolía 

Aðferð: Hitið olíu á pönnu, skeri fiskinn í jafn stóra bita og kryddið með salti, pipar, paprikukryddi og cumin kryddi. Veltið fiskinum vel upp úr kryddinu og steikið á pönnu í  2 - 3 mínútur á hvorri hlið. Berið strax fram í heilhveitivefjum með fersku mangósalsa og grísku jógúrti. 

Missið ekki af Matargleðinni öll fimmtudagskvöld á Stöð 2. 

xxx

Eva Laufey Kjaran Hermannsdóttir

Öll hráefnin í þessa uppskrift fást í verslunum Hagkaups. 

Humarsúpan úr Matargleði Evu

Í síðasta þætti lagði ég sérstaka áherslu á sjávarfang og eldaði meðal annars þessa ljúffengu humarsúpu sem er mjög vinsæl í minni fjölskyldu. Ef það er ferming, skírn eða önnur stór veisla í fjölskyldunni er þessi súpa undantekningarlaust á boðstólnum, og alltaf er hún jafn vinsæl. Uppskriftin kemur frá mömmu minn og þykir mér mjög vænt um þessa uppskrift. Ég lofa ykkur að þið eigið eftir að elda súpuna aftur og aftur. 

Lúxus humarsúpa 

Humarsoð

• Smjör
• 600-700 g humarskeljar
• 2 stilkar sellerí
• 3 gulrætur
• 1 laukur
• 2-3 lárviðarlauf
• 3-4 hvítlauksrif
• 3-4 tímían greinar
• 1 tsk eftirlæti hafmeyjunnar
• 1 tsk Ítölsk sjávarréttakryddblanda
• 1 l fiskisoð (soðið vatn + 2 fiskikraftsteningar)
• 1 glas hvítvín (ca 3 dl)
• Salt og pipar

Aðferð: Skolið humarinn mjög vel og takið humarhalana upp úr skelinni. Leggið halana til hliðar. Skerið sellerí, gulrætur og lauk gróft. Steikið upp úr smjöri ásamt humarskeljum. Hellið fiskisoði og hvítvíni yfir, kryddið til með þeim kryddum sem talin eru upp hér að ofan. Leyfið soðinu að malla við vægan hita í rúmlega klukkstund, því lengur sem soðið fær að malla því betri verður súpan. Eftir þann tíma sigtið þá skeljarnar og grænmetið frá.

Súpan

• 2 msk hveiti
• 2 msk smjör
• Humarsoðið
• Smjör
• Humarhalar
• 1 hvítlauksrif
• ½ tsk eftirlæti hafmeyjunnar
• ½ ítölsk sjávarréttarblanda
• 500 ml rjómi
• salt og pipar
• fersk steinselja 

Aðferð: Búið þið til smjörbollu með því að bræða smjör og blanda hveiti saman við, hellið síðan soðinu út í pottinn og hrærið. Á annarri pönnu hitið smjör, steikið humarhala og kryddið til með eftirlæti hafmeyjunnar, sjávarréttakryddi, salti, pipar og hvítlauk. Steikið humarinn í 2 – 3 mínútur. Hellið rjómanum út á pönnuna og blandið öllu vel saman, hellið rjómablöndunni út í pottinn með soðinu og leyfið súpunni að malla í smá stund áður en þið berið hana fram. Saxið niður ferska steinselju og sáldrið yfir rétt áður en þið berið súpuna fram.

Njótið vel kæru vinir. 

xxx

Eva Laufey Kjaran Hermannsdóttir 

Öll hráefni sem eru notuð í þessa uppskrift fást í verslunum Hagkaups.