Vanillubollakökur með hindberjafyllingu.

Bollakökur sem koma á óvart. 

Vanillubollakökur eru klassískar og eiga alltaf vel við. Það er gott að bæta hindberjafyllingu í þessar kökur og í raun má nota hvaða ber sem er, fer allt eftir smekk hvers og eins. Fyllingin kemur skemmtilega á óvart þegar fólk tekur bita af kökunum. 

 Vanillubollakökur u.þ.b 18 - 20 stk.

250 g sykur

135 g smjör

2 egg

250 hveiti 

1 1/2 tsk vanilla extract eða vanilludropar

1 tsk. lyftiduft

3 - 4  msk mjólk

Aðferð:

Hitið ofninn í 200°C. Hrærið smjör og sykur saman í hrærivél og bætið síðan eggjum saman við, fyrst öðru og svo hinu. Blandið hveiti og lyftidufti saman í annarri skál og sigtið blönduna 3 - 5 sinnum. Bætið hveitiblöndunni saman við smjörblönduna í smáum skömmtum ásamt mjólk og hrærið vanillu saman við í lokin. Skiptið deiginu í pappaform og bakið í 20 mín. Skerið lítið gat í miðjuna á hverri köku og takið svolítinn bút upp úr henni. Setjið um það bil 1/2 - 1 msk af fyllingu í hverja köku, magnið fer eftir því hversu stórt gat er gert í kökurnar. Látið kökurnar standa í 10 mín áður en kremið er sett á þær. 

Hindberjafylling.

4 - 5 dl fersk hindber 

2 dl vatn

1 tsk. kartöflumjöl

1 tsk. sítrónusafi 

Setjið allt í lítinn pott, blandið vel saman og látið sjóða við vægan hita í nokkrar mínútur. Hrærið vel í á meðan, best er að blandan verði þykki og fín en þá má bæta meiri vatni saman við hana ef þið viljið hafa hana þynnri. Kælið fyllinguna áður en þið setjið þær í kökurnar. 

 Krem.

230 g smjör, við stofuhita

5 dl flórsykur

2 tsk vanilluextract eða dropar

2 msk mjólk

fersk hindber til skrauts

Hrærið smjör og flórsykur saman þar til smjörið er orðið mjúkt. Bætið mjólk smátt og smátt út í og hrærið vel saman við á milli. Bætið vanillu saman við í lokin. Kælið kremið í smástund ef það er of lint. Setjið kremið í sprautupoka og sprautið því ofan á kökurnar. Skreytið kökurnar að vild en þær eru sérlega fallegar með ferskum hindberjum. 

Ég bakaði þessar kökur fyrir babyshower í ágúst og birti uppskriftina að þeim í Gestgjafanum. Þær eru sérlega góðar að mínu mati og algjört augnyndi. Það er tilvalið á heldur gráum janúardegi að baka sætar og góðar bollakökur sem gefa lífinu lit. 

Ég vona að þið eigið ljúfan dag framundan kæru vinir. 

xxx

Eva Laufey Kjaran